Yeremia
17 “Jugoro dubo pa Yuda ku kalamu mi cuma.
Jugore ku lak dhiama iwi ban mir adundegi
Man iwi tung pemlam migi,
2 Kinde ma wotgi bepoy pi pemlam migi man pi mbegi migi mi thier*
I ng’et yen m’ujany ma n’i wi ungulu gudi* m’uting’ere,
3 Iwi gudi ma n’i kiaru.
Abiketho jubiyaku lim peri ku lonyo peri ceke,
Eyo, kaka peri ma malu, nikum dubo m’itimo i die ng’om peri ceke.
4 In giri ibiweko giralaga m’amiyo iri.
Man abiketho ibitimo ni judegi peri i ng’om m’ing’eyo ngo,
Kum icwinyo ng’eicwiny para calu mac.
Ebiliel pi nja.”
5 Yehova uyero kumae:
“Kwong’ iwi ng’atu ma geno dhanu ma dhanu,
Ma jengere iwi tego pa dhanu,*
Man m’adundene ulokere bor ku Yehova.
6 Ebibedo calu yen m’ucungo kende i langa.
Ebineno ngo lembe ma ber kinde m’ebebino,
Ento ebibedo i ng’om ngele mi langa,
I ng’om kadu kaka ma ng’atu moko mbe ma copo kwo i iye.
7 Mugisa ni ng’atu m’ugeno Yehova,
Ma Yehova en e genogen pare.
8 Ebibedo calu yen ma jupidho i dhu kulo,
Ma guro ulage nitundo i die pii.
I saa mi lietho de gin ma bitime nedi mbe,
Ento ithe bibedo numu asu.
Cwinye bipido ngo i oro ma ng’om utal i iye,
Kadi ebijigo ngo nicego nyinge de.
9 Adunde tie jabombi* nisagu gin moko ci, man etie ayika nitimo lembe ceke.*
Ng’a ma copo nyang’ i iye?
10 An a Yehova, ayenyo i adunde,
Ang’iyo i pidoic m’upondo,*
Pi nimiyo ni ng’atuman calku timo pare,
Calkud adwogi mi tic pare.
11 Ng’atu ma nwang’u lonyo i ayi m’atira ngo
Tie calu aywer ma coko tong wadi m’enyolo en ungo.
Gibiweke i diere mi kwo pare,
Man i ajikine binwang’ere nia e jakasegu.”
12 Komker ma dwong’ pa Mungu, udodere niai i acaki,
Hekalu mwa ni kuca.
13 Ee Yehova, in m’i genogen mir Israel,
Lewic binego dhanu ceke m’uweki.
Nying’ ju m’ubejai iri* bikiewere i utur,
Pilembe giweki, Yehova, in m’i kulo mi pii mi kwo.
14 Key kuma, Ee Yehova, e abikey.
Bodha, e abiboth,
Kum in re m’i ng’atu m’apaku.
15 Nen! dhanu moko ubeyero ira kumae:
“Lembe pa Yehova ni kani?
Dong’ etimere do!”
16 Ento an, akwero ngo nibedo jakwac pi nilubo toki,
Kadi nindo mi nyoth de ubino ngo mito para.
Ing’eyo lembe ceke ma dhoga yero;
Gin kpo gitimiri m’ibeneno!
17 Kud idok ira ni gin ma ng’oyo ndiri.
Itie kapondo para i saa mi can.
18 Wek lewic unyay iwi ju m’usenda,
Ento kud iwek lewic unyay i wiya.
Wek ndiri makgi,
Ento kud iwek ndiri maka.
Kel nindo mi can i wigi,
Rung’gi man nyothgi mi magwei.*
19 Yehova uwacu ira kumae: “Cidh icung i dhugang’ mi wot dhanu ma jubim mi Yuda gimondo man giwok kud i iye, man i dhugang’ ceke mi Yeruzalem. 20 Icikiri niyero igi kumae: ‘Wuwinj lembe pa Yehova, wu jubim mi Yuda, wu dhanu ceke mi Yuda, man wu dhanu ceke ma wubedo i Yeruzalem, ma wumondo kud i dhugang’ maeni. 21 Yehova uwacu kumae: “Wubed ku weng’wu, man kud wuyey ter moko ci i ceng’ Sabatu kadi kud wuroy terne kud i dhugang’ mi Yeruzalem. 22 Kud wuwodh ter moko ci kud i ot mwu i ceng’ Sabatu; man kud wutim tic moko ci. Wugwok Sabatu ubed leng’, tap calu m’agam ang’olo ni kwaruwu. 23 Re giwinjo ngo kadi giciko de ngo ithgi, man thwon migi uketho gikwero* niworo kadi nijolo twiny.”’
24 “‘“Ento tek wubewora cuu mandha,” Yehova wacu, “man wuberoyo ngo ter kud i dhugang’ mir adhura maeni i ceng’ Sabatu, man wubegwoko ceng’ Sabatu leng’, ma wubetimo ko ngo tic moko i cenge, 25 e jubim ku judongo ma wijo ma gijany iwi komker pa Daudi, gibimondo bende kud i dhugang’ mir adhura maeni, ma giberingo ku magali man ku riuni, gin, judongo ma wijo migi, dhanu mi Yuda, ku dhanu ma bedo i Yeruzalem; e dhanu bibedo i adhura maeni pi nja. 26 Man dhanu biai kud i adhura ma tung’ tung’ mi Yuda, niai kud i kabedo m’udhoko Yeruzalem, niai kud i ng’om pa Benjamin, niai kud i ng’om ma yor i poga, niai kud i ng’om gudi, man niai kud i Negeb.* Gibikelo lam m’awang’a ma boo, lam, girathiera mi nying cam, udok sengi, man lam mi dwoko foyofoc i ot pa Yehova.
27 “‘“Ento tek wuwora ngo man wugwoko ngo ceng’ Sabatu leng’, nikum ter ma wubeyeyo man ma wubemondo ko kud i dhugang’ mi Yeruzalem i ceng’ Sabatu, abigudo mac i kum dhugang’ne, e maje biwang’u andha udi ma wiw ma tek mi Yeruzalem, man ebinegere ngo.”’”