Yob
27 Yob umedere ku wec* pare, man eyero kumae:
2 “Tek andha Mungu ubedo kwo, en m’ecero ira pokolembe ma pwe,
tek andha Jategokpo ubedo kwo, en m’eketho adoko* kec,
3 tek fodi yuyo para n’i iya, man tipo m’uai i bang’ Mungu n’i odiuma,
4 dend dhoga biyero ngo lembe ma rac; kadi leba de bicwayu ngo vupo!
5 Ecopere ngo awac nia wuweg bedopwe!
Cil m’abitho ko, abiweko ngo* bedocu para!
6 Abigwoko bedopwe para man abiweke ki ngo;
adundena bipoko ngo lembe i wiya* i nindo ceke m’akwo i iye.*
7 Dong’ jadegina udok calu jatimrac,
man ju m’usaya kud ali gidok calu weg gondiri.
8 Kum genogen ang’o ma ng’atu ma lworo ngo Mungu* bedo ko
kinde ma junyothe,
kinde ma Mungu ukabu kwo* pare?
9 Nyo Mungu biwinjo wak pare,
kinde m’ang’abacwiny uwok i wiye?
10 Kunoke nyo anyong’a binege i Jategokpo?
Nyo ebikwayu Mungu saa ceke?
11 Abiponjowu ku lembe iwi tego pa* Mungu;
abikanu ngo gin moko acel de iwi Jategokpo.
12 Nen! tek wun ceke wuneno gin ma wok i wang’,
dong’ pirang’o ke wec mwu igi nanu?
13 Eni tie sukulia ma jatimrac nwang’u i bang’ Mungu,
giralaga ma jusend ginwang’u i bang’ Jategokpo.
14 Tek wote ginyay, gibipodho i lak palamularu,
man nyikwaye gibinwang’u ngo cam m’uromgi.
15 Ju ma giboth ire thong’om re ma biyikogi,
man montho migi biwagugi ngo.
16 Kadok nwang’u ecoko dhu mola ma tar calu utur,
man edhuro bongu ma leng’ calu ulobo,
17 kadok nwang’u ecoko dhoge,
won bedopwe re ma bikende,
man ju ma lembe mbe i wigi re ma gibipoko i mola ma tar pare.
18 Ot m’ebegiero tegone mbe calu ot pa nyathin abirbir,*
calu otbak ma jakur ugiero.
19 Ebicivuto ma nwang’u elony, ento ebicoko gin moko ngo;
kinde m’ebiyabu wang’e, nwang’u gin moko mbe keca.
20 Ndiri rube calu pii m’upong’;
yamu ma tek leke cen ku diewor.
21 Yamu ma yo nyangu bitere, e ebibedo mbe;
ebiweye cen ku kakare.
22 Ebicorere i wiye m’umbe kisa
ma nwang’u ebeyenyo eringi i tego pare.
23 Epadu cinge i bang’e
man elwiyo i bang’e ku kakare.*