Zaburi
Pa Daudi.
27 Yehova en e der para man both para.
Abilworo ng’a?
Yehova en e ka ma tek mi kwo para.
Ndiri ng’a ma binega?
2 Kinde ma dhanu ma reco gicoro i wiya pi nicamu ring’ kuma,
Jukwor para ku judegina re ma gilund gikier man gipodho.
3 Kadok udul askari uketho kagonjo i kuma,
Adundena bilworo ngo.
Kadok lwiny utuk i dhoga,
De asu abibedo ma cwinya tek.
4 Akwayu gin acel i bang’ Yehova,
Eno re ma tie gin m’abiyenyo;
Nia abed i ot pa Yehova i nindo ceke mi kwo para,
Kara anen bero pa Yehova
Man anen hekalu* pare kilili.
5 Kum ebikana i otbak pare i nindo mi can;
Ebikana kii i kaka m’upondo mi hema pare;
Ebiketha malu iwi cana.
6 Kawoni wiya ubedo ating’a malu iwi judegi para ma gitieka;
Abithiero lam i hema pare ku kok mir anyong’a;
Abiwero wer mi pak* ni Yehova.
7 E Yehova, winja kinde m’abewak,
Nyuth ira bero man dwok ira lembe.
8 Adundena upoyo wiya i kum lembang’ola peri ma e:
“Yeny wang’a.”
E Yehova, abiyenyo weng’i.
9 Kud ikan weng’i ira.
Kud ilok jatic peri cen ku ng’eicwiny.
Itie jakonyna;
Mungu mi both para kud ikuna kadi kud iweka.
10 Kadok nwang’u vwa giku maa gikuna,
Yehova en gire bijola.
11 Ponja i yo peri, E Yehova,
Tel wiya i yo mi bedopwe pi jukwor para.
13 Ka nwang’u ayiyo ngo nia abineno bero pa Yehova i ng’om mi ju ma kwo,*
Nwang’u eni ani kani?
14 Gen Yehova,
Cwinyi bed tek man bed tek.*
Eyo, gen Yehova.