Isaya
26 I nindo maeca, jubiwero wer ma e i ng’om mi Yuda:
“Watie kud adhura ma tek.
Eketho both ni gang’kidine man ni gang’ne ma tek.
2 Wuyab dhugang’ kara thek ma pwe umondi,
Thek ma timo migi atira.
4 Wugen Yehova pi nja,
Kum Yah* Yehova en e Cana ma rondo ku rondo.
5 Eredho ju ma bedo malu, adhura m’udodere.
Eredhe piny,
Eredhe nitundo i ng’om;
Ebole piny i utur.
6 Jubinyono iye ku tielo,
Tiend ju m’ubesendiri, tiend ju ma thindho biwotho i wiye.”
7 Yo pa won bedopwe utie atira.*
Calu in atira,
Ibipoto yo pa won bedopwe.
8 Wabelubo yo mi pokolembe peri, Ee Yehova,
Man wageno in.
Nipoy piri man pi nyingi re m’utie gin ma wabeyenyo ku cwinywa ceke.
9 Aveni benega lee* ku diewor,
Eyo, tipona ubemedere niseyi;
Kum kan ibepoko lembe iwi ng’om,
Dhanu m’i ng’ombe giponjo bedopwe.
10 Kadok jutim bero ni jatimrac de,
Ebiponjo ngo bedopwe.
Ebitimo racu kadok i ng’om ma lembe tie atira i iye de,
Man ebineno ngo dwong’ pa Yehova.
11 Ee Yehova, iting’o cingi malu, ento gibenene ngo.
Gibineno amora m’itie ko pi dhanu peri man lewic bimakugi.
Eyo, mac ma pi judegi peri biwang’ugi ruk.
12 Ee Yehova, ibimiyo iwa kwiyocwiny,
Pilembe gin ceke ma watimo,
In re m’itimogi iwa.
13 Ee Yehova Mungu mwa, rwodhi mange m’uweko in gibimo wiwa,
Ento wabilwong’o mwa nyingi kende.
14 Gin avu, gibikwo ngo.
Tego migi thum i tho, gibiai ungo malu.
Kum iloko weng’i i kumgi
Pi nidarugi tup man pi niruco nying’gi pet.
15 Iketho thek unyay, Ee Yehova,
Iketho thek unyay;
Iyungiri giri.
Imedo mupaka mi ng’om ceke lee mandha.
16 Ee Yehova, i saa mi masendi gilokiri i beng’i;
Kinde m’itwinyogi, gikonjo adundegi i rwo ma nyaling’ ling’.
17 Tap calu dhaku ma iye nuti man m’ubecigonyere
Ma moc ugoyo man m’ubewak ni litho,
Wan de watie kumeno pi lembe peri, Ee Yehova.
18 Wagamu iwa man moc ugoyowa,
Ento udog ubedo ve wanyolo yamu.
Wakelo ngo both i ng’ombe,
Man ng’atu acel de mbe m’unyolere pi nikwo i ng’ombe.
19 “Avu peri bikwo.
Avu para biai malu.
Wucew man wukok kud anyong’a,
Wun ma wubedo i utur!
Kum thoi peri utie calu thoi mi kugweno,*
Man ng’om biketho ju ma tego migi thum i tho udog ukwo kendo.*
20 Wucidhi, wu dhanu para, wumond i kusika mwu ma kut,
Man wucik dhugola i beng’wu.
Wukewupond pi nyathi kare moko
Cil ma kwinyo ukadh ko.
21 Kum nen! Yehova ubebino niai kud i kabedo pare
Pi nilwong’o dhanu ma bedo i ng’ombe kara gicung i dhu kosa migi;
Man ng’om biwodho kamaleng’ rimo ma jucwiro i wiye
Man ebiumo ngo kendo wi dhanu pare ma junego.”