Zaburi
Wer pi ceng’ Sabatu.
92 E ber nidwoko foyofoc ni Yehova,
Man niwero wer mi pak* ni nyingi, E Ng’atu ma Malu ngbir,
2 Pi niyero pi mer peri ma lokere ngo kugweno,
Man pi bedoleng’ peri ku diewor,
3 Ku jamgoyo wer ma thondhe apar man jamgoyo wer ma thondhe adek,
Ku dwand adungu m’ubewak.
4 Kum inyayu anyong’a i iya, E Yehova, nikum tic peri;
Nikum tic m’i cingi, abekok ku mutoro.
5 Tic peri gi dwong’ mire maa, E Yehova!
Paru peri gi thuc mire maa!
6 Ng’atu ma rieko pare mbe ung’eyogi ngo;
Man jakasegu copo nyang’ ungo i lembe ma e:
7 Kinde ma judubo gibetwii calu lum
Man jutimrac ceke gibelepini,
Etie kara junyothgi pi rondo ku rondo.
8 Ento in idodiri malu pi rondo ku rondo, E Yehova.
9 Eyo, nen judegini ku wang’ mir aloci, E Yehova,
Nen kite ma judegini gibinyothiri ko;
Ibilalu i jutimrac ceke.
10 Ento ibidodo tego* para calu tego pa thwon dhiang’ mi lum;
Abiyomo kuma ku mo ma ng’ic.
11 Abineno judegi para ku wang’ mir aloci;
Man itha biwinjo pi kite ma dhanu ma reco ma giai i kuma gibepodho ko.
12 Ento weg bedopwe gibijany calu yend ngasi,
Gibidongo ma bor calu yend tido mi Lebanon.
13 Jupidhogi i ot pa Yehova;
Gibejany i lela pa Mungu mwa.
14 Kadok kinde ma gitii* gibicego nyinggi asu;
Gibimediri nibedo ku tego* man gibibedo numu,
15 Ma gibetuco nia Yehova tie atira.
Etie Cana para ma gondiri mbe i iye.