Isaya
60 “Ai malu, Ee dhaku, rieny der, kum der peri udaru bino.
Dwong’ pa Yehova uberieny i wii.
2 Kum nen! Mudho biumo ng’om,
Man mudho ma bii biumo thek;
Ento Yehova birieny i wii,
Man dwong’ pare binen i wii.
3 Thek bicidho i bang’ der peri
Man jubim i bang’ dwong’ peri* m’uberieny.
4 Ting’ weng’i man inen ng’eti tingili!
Gin ceke gicokiri; gibebino i beng’i.
Woti gibemediri nibino niai ku bor,
Man nyigi ma juting’o i wang’ ng’etjo.
5 I saa maeno ibineno man ibirieny,
Adundeni bidhongo man bipong’ kud anyong’a,
Pilembe lonyo mi nam bibino atira i beng’i;
Lonyo mi thek bibino i beng’i.
6 Udul ngamia biumo ng’om peri,*
Nyithi thwoni ngamia mi Midian man mir Efa.
Ju ceke m’uai i Ceba gibibino,
Gibiyeyo mola ma kwar kud udok ma ng’wice ng’ar.
Gibitwong’o pak pa Yehova.
7 Udul lim mi Kedar ceke bicokiri i beng’i.
Thwoni rombe mi Nebayoth bitimo iri.
Gibibino iwi pemlam para man abiyiyogi,
Man abiruko ot para mi dwong’.*
8 Jukani ma giberingo calu afuru e,
Calu akuru m’uberingo i bang’ odigi?*
9 Kum cula biketho genogen migi i wiya;
Meli mi Tharsis utelo yo,*
Pi nikelo woti nia ku bor,
Karacelo ku mola migi ma tar man mola migi ma kwar,
I bang’ nying’ Yehova Mungu peri man i bang’ Ng’atu ma Leng’ mir Israel,
Kum ebiyungi.*
10 Juwirok bigiero gang’kidi peri,
Man jubim migi bitimo iri,
Kum agoyi nikum ng’eicwiny para,
Ento nikum bero para abibedo ku kisa i kumi.
11 Dhugang’ peri bimedere nibedo ayaba saa ceke;
Jubicike ngo dieceng’ ku diewor,
Pi nikelo iri lonyo mi thek,
Man jubim migi bitelo yo.
12 Kum thek man ker ceke ma bitimo ngo iri bithum,
Man thekne binyothere pet.
13 Dwong’ mi Lebanon bibino i beng’i.
Yend jenevriye,* yend fren, man yend sipre ceke karacelo,
Pi niruko kaka ma hekalu para n’i iye;
Abimiyo dwong’ ni kaka m’aketho tienda i iye.
14 Wot ju m’usendi bibino man gibirum i weng’i;
Ju ceke m’uceyi gicikiri nirum i the tiendi,
Man gibilwong’i nia adhura pa Yehova,
Sayuni pa Ng’atu ma Leng’ mir Israel.
15 Kakare ma juwenji man judegi, ma nia ng’atu moko mbe m’ukadh kud i ii,
Abiketho ibidoko ni piny ma juyungiri pire nja ku nja,
Gin ma nyayu mutoro i kind dhanu m’utuk ceke.
16 Man ibimadhu cak mi thek andha,
Ibidhodho thuno jubim;
E ibing’eyo andhandha nia an a Yehova, a Jalarni,
Man nia Ng’atu ma Tek pa Yakobo utie Jawarni.
17 Kaka mola abikelo mola ma kwar,
Kaka cuma abikelo mola ma tar,
Kaka yen, mola,
Man kaka kidi, cuma;
Man abiketho kwiyocwiny ni juliew peri
Bedopwe ke ni ju ma miyo iri tic.
18 Jubiwinjo ngo kendo pi rop i ng’om peri
Kadi nyoth man uvuru i wang’ kieu peri.
E ibilwong’o gang’kidi peri nia Both man dhugang’ peri nia Pak.
19 Ceng’ bibedo ngo iri kendo ni der ku dieceng’,
Kadi lero pa dwi de bimiyo ngo iri der,
Kum Yehova re ma bidoko iri ni der ma rondo ku rondo,
Man Mungu peri bibedo leng’o peri.
20 Ceng’ peri bimwony ungo kendo,
Kadi tego pa dwi peri de bijwik ungo,
Kum Yehova re ma bidoko iri ni der ma rondo ku rondo,
Man nindo peri mi can bijik.
21 Dhanu peri ceke bibedo pwe;
Gibicamu ng’om ni aba rondo ku rondo.
Gitie piny m’utwii ma an re m’apidho,
Tic mi cinga, kara juyunga.
22 Ng’atu ma nok bidoko elufu,
Man ma nyandiw bidoko thek ma tek.
An a Yehova, abidhulo lembene i saane.”