Isaya
30 “Can iwi wot ma juthwon,” Yehova wacu,
“Ma gitimo lembe ma gipangu ma en e para ngo,
Ma gitimo lembariba,* ento ku tipo para ngo,
Pi nimedo dubo iwi dubo.
2 Giloro piny i Misiri m’umbe nipenja,*
Pi ninwang’u kapondo i the gwok* pa Farao
Man pi nipondo i the tipopiny mi Misiri!
3 Ento gwok pa Farao bidoko iwu ni gin ma nyayu lewic,
Man kapondo i the tipopiny mi Misiri bidoko iwu ni gin ma nyayu acidi.
4 Kum judongo ma wijo pare gin’i Zoan,
Man juor pare gidaru tundo i Hanes.
5 Gin zoo lewic binegogi,
Nikum dhanu ma copo miyo ngo igi sukulia,
Ma copo konyogi ngo man ma copo miyo ngo igi sukulia,
Ento kende kende lewic kud acidi.”
6 Atwong’a pi yedi ma yo piny:
I die ng’om mi masendi man mi can,
Ng’om mir umvor, umvor m’uberundo,
Ng’om mir urobi man mi thwol ma jumac ma tuk atuka,*
Giyeyo lonyo migi i ng’ey kana
Man piny m’akana migi iwi kwomb ngamia.
Ento piny maeno de bibedo mbe ku kony ni dhanu.
7 Kum kony mi Misiri bitimo ngo gin moko acel de.
Pieno adaru lwong’e kumae: “Rahab ma bedo fethe.”
8 “Kawoni cidhi, kiewe iwi ban i vutgi,
Man gore i buku,
Kara i nindo m’ubino ebed
Ni jamulembe ma nja.
9 Kum gitie dhanu ma jujai, wot ma weg gondiri,
Wot m’utie ngo ayika niwinjo cik* pa Yehova.
10 Giyero ni ju ma neno gin ma wok i wang’ kumae: ‘Kud wunen,’
Man ni juewlembe kumae: ‘Kud wuyer iwa gin ma wok i wang’ mandha.
Wuyer iwa gin ma nyayu anyong’a,* gin ma wok i wang’ mi ndra.
11 Wulokuru cen kud i yo; wuwir kud i gengi.
Wuwek niketho Ng’atu ma Leng’ mir Israel i wang’wa.’”
12 Pieno Ng’atu ma Leng’ mir Israel uyero kumae:
“Calu ma wukwero wec maeni,
Wulund wugeno mwu ndra kud abombi,
Man wubejenguru zoo iwi lembe maeni,
13 Pieno kier maeni bibedo iwu calu gang’kidi m’ukak,
Calu gang’ ma wiw m’ugom m’udhingo rwombere.
Ebirwombere mbwang’, wang’ acel.
14 Ebirungere calu agulu ma dit,
Ebirungere kpo nziki nziki m’adekelene acel de mbe ma bidong’ i kind ng’iline
Pi nigamu mac kud i kamac
Kunoke pi nitwomo pii kud i thatha.”*
15 Kum Rwoth Ubimo ma Malu Ngbir Yehova,
Ma Ng’atu ma Leng’ mir Israel uwacu kumae:
“Wubiboth nikum dwogo ma wudwogo ko i bang’a man bedoyoo;
Tego mwu bibedo nuti tek wubemeduru nibedo yoo man nibedo ku genogen.”
Ento wubedo ngo ayika.
16 Wulund wuyero kumae: “Ungo, wabiringo ku riuni!”
Eyo, wubiringo.
“Man wabiringo ku riuni ma ringo ma tek!”
Pieno, ju m’uriemo tokwu de biringo ma tek.
17 Kum dhanu elufu bimiel nikum masendi pa ng’atu acel;
Wubiringo nikum masendi pa dhanu abic
Nitundo ma dongwu ma bidong’ bibedo calu yen ma bor i die wi got,
Calu yend abera iwi ungulu got.*
18 Ento Yehova ubekuro ku twiyocwiny pi nitimo iwu bero,
Man ebiai malu pi nitimo iwu kisa.
Kum Yehova tie Mungu mi bedopwe.
Ju m’ubemediri nikure* gi jumutoro.
19 Kinde ma dhanu bibedo i Sayuni, i Yeruzalem, ibiwak ungo nyanok de. Ma jiji mbe ebinyutho iri bero kinde m’ibewagu kony; saa m’ebiwinjo dwendi ci ebidwoko wang’e. 20 Kadok nwang’u Yehova bimiyo iwu can ni mukathi man masendi ni pii de, re Japonjo peri ma Dit bipondo ngo kendo, man ibineno Japonjo peri ma Dit ku weng’i. 21 Man ithi biwinjo wec yor i ng’eyi m’ubewacu kumae: “Yo ni eni. Woth i iye.” Tek ubekwayu wuwir yor acwic kunoke yor acam.
22 Man wubicido mola ma tar ma juumo i kum ayi gin m’acwiya mwu m’ang’ika man mola ma kwar ma jumwono i kum ayi gin m’acwiya mwu mi cuma.* Wubibayugi calu bongu ma dhaku utiyo ko kinde m’ebeneno nindo pare, ma wubewacu kumae: “Wuai cen!”* 23 Man ebimiyo koth pi kodhi m’icoyo i ng’om, man cam ma ng’om bicego bibedo dupa man ma giero kum.* I nindo maeca, udul lim peri bicamu i luba ma lac. 24 Man dhieng’ ku kana ma furo ng’om bicamu cam ma jujebo kud uboko ma wac, ma jukworo ku lupau man kanya. 25 I nindo mi nek ma dit, kinde ma ot ma wiw bipodho, kulo man pii biwok kud iwi gudi ceke m’uting’ere malu man kud iwi ungulu gudi ceke ma wiw. 26 Man lero pa dwi m’upor bidoko calu lero pa ceng’, man lero pa ceng’ bidoko ma tek wang’ abiro calu lero mi nindo abiro i nindo ma Yehova biriwo kum dhanu pare m’utur, man ebikeyo wang’ rem ma rac nikum goco m’egoyo kogi.
27 Nen! nying’ Yehova ubebino niai ku bor,
M’ebeliel ku ng’eicwiny man kud afuru ma pek.
Dend dhoge upong’ ku kwinyo,
Man lebe calu mac ma wang’u piny ruk.
28 Tipone* calu kulo ma dit m’ubecorere m’upong’ nitundo i ng’utjo,
Pi niyongo thek i kiyongila mi nyoth;*
Man dhanune bibedo ku gwang’ i ding’gi ma biketho gibikier.
29 Ento wer mwu bibedo calu ng’atu m’ubewer ku diewor
Kinde ma wubeyikuru* pi foc,
Man adundewu bibedo kud anyong’a
Calu ng’atu m’ubewotho kud usegu
I yo m’ebecidho ko i bang’ got pa Yehova, i bang’ Cana mir Israel.
30 Yehova biketho dwande ma dwong’ biwinjere
Man ebinyutho bote kinde m’ebeloro ku ng’eicwiny pare ma lake tek,
Ku mac ma wang’u piny ruk,
Koth ma dwong’ ma podho mbwang’, morpolo kud avuvu, man pei.
31 Kum ndiri bimaku Asiria nikum dwand Yehova,
Ebigoye kud uluth.
32 Saa ceke ma Yehova ubegoyo Asiria
Kud uluth pare mi matira,
Jubiwinjo dwand nyithi vul man adungu
Kinde m’eting’o cinge malu i kumgi i lwiny.
33 Tofeth* pare dong’ utie ayika,
Etie bende ayika pir ubimo.
Edaru dhuro dhu yen kaka ma thuc man ma lac,
Ku mac man yen ma dit.
Calu kulo mi muganga, yuyo pa Yehova
Bigudo mac i kume.