Yeremia
29 Eni tie lembe mi barua ma jabila Yeremia uoro niai kud i Yeruzalem ni dong judongo m’i kind dhanu ma n’i ng’eca, ni julam, ni jubila, man ni dhanu ceke ma Nebukadnezar ucoko kud i Yeruzalem man etero i ng’eca i Babeli. 2 Eoro baruane ni Ubimo Yekonia, ni min ubimo,* ni bajego, ni judongo ma wijo mi Yuda man mi Yeruzalem man ni jubodho ku jutic mir uka* ma giai kud i Yeruzalem. 3 Eoro baruane i cing Elasa ma wod Cafan man Gemaria ma wod Hilkia m’Ubimo Zedekia mi Yuda uoro i Babeli i bang’ Ubimo Nebukadnezar mi Babeli. Baruane uwacu kumae:
4 “Eni tie lembe ma Yehova mir udul ma Mungu mir Israel uyero ni dhanu ceke m’ucidho i ng’eca, m’aketho ucidho i ng’eca niai kud i Yeruzalem i Babeli: 5 ‘Wugier udi man wubed i igi. Wupidh piny i podho man wucam nying’gi. 6 Wugam mon man wunyol awiya ma co ku ma nyir; wugam mon ni wotwu man wumii nyiggwu jugam, kara gin de ginyol awiya ma co ku ma nyir. Wunyay kuno man wendwu kud ujwiki. 7 Wuyeny kwiyocwiny mir adhura m’aketho juterowu i iye i ng’eca, man wukway Yehova pire, pilembe tek adhurane utie ku kwiyocwiny, wun de wubibedo ku kwiyocwiny. 8 Kum Yehova mir udul ma Mungu mir Israel uwacu kumae: “Kud wuwek jubila mwu man juewlembe ma n’i kindwu uwondwu, kud wuwinj bende lek ma gibeleko. 9 Kum ‘gibeewo iwu lembila mi ndra ku nyinga. Aorogi ngo,’ Yehova wacu.”’”
10 “Kum Yehova uwacu kumae: ‘Saa ma oro pier abiro bithum i Babeli, abipoy piwu, abipong’o lembang’ola para man abidwogowu i kabedo maeni.’
11 “‘Kum ang’eyo ma ber lembe m’abeparu piwu,’ Yehova wacu, ‘paru mi kwiyocwiny ento mi lembe ma rac ungo, pi nimiyo iwu kwo ma ber i nindo m’ubino man genogen. 12 Wubilwong’a, wubibino i bang’a, man wubirwo i bang’a, e abiwinjowu.’
13 “‘Wubiyenya man wubinwang’a, kum wubiyenya kud adundewu zoo. 14 Man abiweko wubinwang’a,’ Yehova wacu. ‘Abicoko ng’eca mwu man abicoko dhogwu karacelo kud i kind thek man kud i kabedo m’alaluwu i iye,’ Yehova wacu. ‘Abidwogowu kud i kabedo m’aketho wucidho i iye i ng’eca.’
15 “Ento wuyero kumae: ‘Yehova uwodho iwa jabila i Babeli.’
16 “Kum eni tie lembe ma Yehova uyero ni ubimo m’ujany iwi komker pa Daudi man ni dhanu ceke ma bedo i adhura maeni, umego mwu m’ucidho ngo kudwu i ng’eca: 17 ‘Yehova mir udul uwacu kumae: “Nen, abeoro palamularu, ndru man thong’om i wigi, man abiketho gibidoko calu nying ulam m’utop,* ma rac magwei ma juromo camu ngo.”’
18 “‘Abilubo tokgi ku palamularu, ku ndru, man ku thong’om. Abiketho gibidoko ni gin ma ng’oyo ndiri ni ker ceke mi ng’om, ni alam, ni gin ma wang’u ijo, ni gin ma julwiyo i kume ku zungo, ni acidi i kind thek ceke m’alalugi i iye, 19 pilembe giwinjo ngo lembe para m’aoro i bang’gi nikadhu kud i bang’ jutic para ma jubila, m’abed aoro kendo kendo,’* Yehova wacu.
“‘Ento wuwinjo ngo,’ Yehova wacu.
20 “Pieno wuwinj lembe ma Yehova uwacu, wu dhanu ceke ma wu n’i ng’eca, wun m’aorowu niai kud i Yeruzalem i Babeli. 21 Eni tie lembe ma Yehova mir udul ma Mungu mir Israel uwacu pir Ahab ma wod Kolaya man pi Zedekia ma wod Maaseya m’ubeewo lembila mi ndra iwu ku nyinga: ‘Wunen, abemiyogi i cing Ubimo Nebukadnezar mi Babeli man ebinegogi ku palamularu i weng’wu. 22 Man lembe ma binwang’ugi bidoko ni alam ma dhanu ceke mi Yuda m’ucidho i ng’eca bibeweco pire, gibibeyero kumae: “Wek Yehova udwoki calu Zedekia man calu Ahab ma ubimo mi Babeli uvulo i mac!” 23 Kum gitimo lembacidi i Israel, gitimo abor ku mon mi juwagi man gicwayu vupo ku nyinga ma ke ang’olo ngo igi.
“‘“An re m’ang’eyo man a jamulembe,” Yehova wacu.’”
24 “Man ibiyero ni Cemaya mi Nehelam kumae: 25 ‘Yehova mir udul ma Mungu mir Israel uwacu kumae: “Calu m’ioro barua ku nyingi ni dhanu ceke ma n’i Yeruzalem, ni Zefania ma wod Maaseya ma jalam man ni julam ceke, m’iwacu ko kumae: 26 ‘Yehova ukethi ni jalam kaka Yehoyada ma jalam kara idok ni janen wi ot pa Yehova, kara inen wi ng’atu moko ci m’ubetimere ve abelu, kara inen wi abelu ceke m’ubetimere ve jabila man itwiye ku kongo man jamtwic; 27 pirang’o ke ijuko ngo Yeremia mir Anathoth, m’ubetimere ve jabila i kindwu? 28 Kum eoro iwa kadok lembe i Babeli, eyero kumae: “Lembene bimaku kare ma lee! Wugier udi man wubed i igi. Wupidh piny i podho man wucam nying’gi . . .”’”’”
29 Saa ma Zefania ma jalam usomo barua maeni i ith jabila Yeremia, 30 lembe pa Yehova ubino i bang’ Yeremia, uyero kumae: 31 “Or kwenda ni dhanu ceke ma n’i ng’eca man iyer kumae: ‘Eni tie lembe ma Yehova uyero pi Cemaya mi Nehelam: “Calu Cemaya uewo iwu lembila ma ke aore ngo man etemo niketho wugen ndra, 32 pieno Yehova uwacu kumae: ‘Nen, abeloko wang’a i kum Cemaya mi Nehelam man i kum nyikwaye. Ng’atu acel de mbe m’i kind jupare ma biboth i kind dhanu maeni man ebineno de ngo bero m’abitimo ni dhanu para,’ Yehova wacu, ‘pilembe ecwalu dhanu ujai i kum Yehova.’”’”