Isaya
63 Eni ng’a m’ubebino niai kud i Edom,
Niai kud i Bozra ku bongu mi rangi m’uriang’ini,*
Ng’atu m’ukendo bongu ma leng’,
M’ubewotho i tego pare ma diti?
“Tie an, a Ng’atu m’ubeweco i bedopwe,
Ng’atu m’utie ku tego ma dit pi nibodho.”
2 Pirang’o bongu peri tie ma kwar,
Man pirang’o kendi peri calu pa ng’atu m’ubenyono nying ulok i vur mi biyo pigulok?
3 “Anyono nying ulok i vuj pigulok kenda.
Ng’atu moko mbe m’i kind dhanu m’ubino karacelo kuda.
Amedara ninyonogi i ng’eicwiny para,
Man amedara niwotho i wigi i kwinyo para.
Rimbgi ukirere i kum bongu para,
Man anyotho bongu para ceke.
4 Kum nindo mi culo kwor n’i adundena,
Man oro mi jupara ma juwaru udaru tundo.
5 Aneno, ento ng’atu moko bino mbe m’ukonya;
Azungo nia ng’atu moko mbe m’uwodhere nikonyo.
E cinga ukelo both,*
Kwinyo para re m’utiela.
6 Anyono i dhanu nikum ng’eicwiny para,
Amerogi ku kwinyo para
Man akonjo rimbgi i ng’om.”
7 Abiweco pi timo mi mer ma lokere ngo pa Yehova,
Timo pa Yehova m’uromo ku pak,
Pi lembe ceke ma Yehova utimo iwa,
Lembe dupa ma beco m’etimo ni ot mir Israel,
Nimakere ku kisa pare man mer pare ma dit ma lokere ngo.
8 Kum eyero kumae: “Andha gitie dhanu para, wot ma bigwoko bedoleng’ migi.”
Pieno, edoko Jalar migi.
9 I saa mi masendi migi ceke, en de esendere.
Man jakwenda pare ma buu* ubodhogi.
Ewarugi nikum mer man kisa pare,
Eting’ogi malu man eyeyogi i nindo ceke ma yang’ con.
10 Ento gijai man ginyayu can i tipo pare ma leng’.
E edoko jadhoggi,
Man ekiedo i dhoggi.
11 E gipoy pi rundi ma yang’ con,
Rundi pa Musa ma jatic pare, uketho giwacu kumae:
“Ng’atu m’uwodhogi kud i nam ku jukwac mi dwol pare ni kani?
Ng’atu m’uketho tipo pare ma leng’ i iye ni kani,
12 Ng’atu m’uketho bote mi dwong’ ucidho karacelo ku cing’ Musa ma yor acwic,
Ng’atu m’ukaku i pii i wang’gi
Pi niketho nying’ ma rondo ku rondo ire gire,
13 Ng’atu m’uketho giwotho i die pii m’udhetho,*
E giwotho m’umbe nikier
Calu riuni i die lum?*
14 Tap calu m’udul lim loro i pambu mi poga,
Tipo pa Yehova ketho giyom.”
Itelo wi dhanu peri kumeno
Pi niketho nying’ ma dwong’* iri giri.
15 Lok weng’i piny niai kud i polo man inen,
Niai kud i kabedo peri m’uting’ere mi leng’o man mi dwong’.
Amora peri man tego peri,
Ngisi peri m’ubethukini man kisa peri ni kani?
Jucerogi kud gitund i bang’a.
16 Kum itie Wegwa;
Kadok nyo Abraham ung’eyowa ngo
Man Israel copo ng’iyowa ngo de,
Re in, Ee Yehova, itie Wegwa.
Jawar mwa ma niai yang’ con utie nyingi.
17 Pirang’o iweko* wabewotho swa bor ku yo peri, Ee Yehova?
Pirang’o iweko adundewa udoko nwang’, uketho dong’ wabelwori ngo?
Dwogi pi bero mi jutic peri,
Suru ma giralaga peri.
18 Ebedo ni aba mi dhanu peri ma leng’ pi kare ma nyanok kende.
Judhogwa giwotho iwi hekalu peri.
19 Pi rundi m’ulwar wadoko calu ju m’ibimo ngo i wigi nyanok de,
Calu ju m’ulwong’iri ngo nyanok de ku nyingi.