Isaya

65 “An gira aweko dhanu m’upenja ngo gisaya;

An gira aweko dhanu m’usaya ngo ginwang’a.

 2 Athang’u cinga dieceng’ duu ni dhanu ma juthwon,

Ni dhanu m’ubewotho i yo ma cuu ngo,

M’ubelubo paru migi gigi;

 3 Dhanu m’ubenyayu ng’eicwiny i iya thiri thiri i the wang’a,

Nikum lam migi ma gibethiero i podho man yiro mi lam migi ma gibeketho ubeduny iwi briki.

 4 Gibedo i kind liel,

Man gibedo diewor traka kaka m’upondo,*

Ma nwang’u gibecamu ring’ kul*

Man cwej piny ma rac* n’i ajeni migi.

 5 Giyero kumae: ‘Bed keno; kud icor i bang’a,

Kum a leng’ nisegi.’*

 6 Nen! lembene ugorere i wang’a;

Abicungo ngo dii,

Ento abiculogi,

Abiculogi i mukero ma pong’,*

 7 Pi kosa migi man pi kosa pa kwaru migi bende,” Yehova wacu.

“Calu ma giketho yiro mi lam uduny iwi gudi

Man gikelo acidi i wiya iwi ungulu gudi,*

Abilar pimo cul migi pong’.”*

“Tap calu ma juwodho pigulok ma nyen kud i nying ulok m’unur,

E ng’atu moko wacu kumae: ‘Kud inyothe, kum piny ma ber* n’i iye,’

Abitimo bende kumeno pi bero mi jutic para;

Abinyothogi ngo kpo.

 9 Abiwodho kodhi kud i Yakobo

Man kud i Yuda ng’atu moko ma bilagu gudi para;

Jupara m’ang’iyo bimake ni aba,

Man jutic para bibedo i iye.

10 Caron bidoko ni luba mi rombe

Man Poga* mir Akor bidoko ni kayom mi dhieng’

Pi dhanu para m’ubesayu kakara.

11 Ento wutie i kind dhanu m’uweko Yehova,

Ju m’uwil ku got para ma leng’,

Ju m’uketho meza ni mungu mi Bati,

Man ju m’ubepong’o kikombe ku pigulok ma jujebo ni mungu mir Anyim.

12 Pieno abikethowu athothi ni palamularu,

Man wun ceke ubikulo korwu piny kara junegwu,

Pilembe alwong’owu, ento wuyii ngo,

Aweco, ento wuwinjo ngo;

Wumeduru mwu nitimo lembe ma rac i wang’a,

Man wung’iyo nitimo gin m’adagu.”

14 Nen! jutic para bikok kud anyong’a nikum adundegi m’utie ma ber,

Ento wun wubiwak nikum can mir adunde

Man wubigoyo nduru nikum cwinywu m’utur.

15 Wubiweko i ng’eywu nying’ ma jupara m’ang’iyo bitiyo ko calu alam,

Man Rwoth Ubimo ma Malu Ngbir Yehova binego ng’atuman acel acel m’i kindwu,

Ento ebilwong’o jutic ma pare ku nying’ mange;

16 Kara ng’atu ma tek ubesayu ire mugisa iwi ng’om

Unwang’ mugisa i bang’ Mungu mi lemandha,*

Man ng’atu ma tek ubekwong’o kwong’ iwi ng’om

Ukwong’ ku nying’ Mungu mi lemandha.*

Kum wijo biwil i kum masendi ma con;

Jubikanugi cen kud i wang’a.

17 Kum nen! abecwiyo polo ma nyen ku ng’om de ma nyen;

Man wijo bipoy ungo i kum lembe ma con

Kadi lembene bidwogo de ngo i adunde.

Kum nen! abecwiyo Yeruzalem ni piny ma nyayu mutoro

Man dhanu pare ni piny ma nyayu anyong’a.

19 Anyong’a binega i kum Yeruzalem man abibedo ku mutoro i kum dhanu para;

Jubiwinjo ngo kendo dwand wak kadi nduru mi can.”

20 “Mukere moko mbe mi kabedone ma bikwo pi nindo ma nok kende,

Kadi ng’atu m’utii ma bidaru ngo rundi mi kwo pare.

Kum ng’atu moko ci ma bitho ma oro pare tie dak acel jubikwane ni nyathin ma nyanok,

Man jubilamu jadubo, kadok nwang’u oro pare dak acel.*

21 Gibigiero udi man gibibedo i igi,

Gibipidho podho mir ulok man gibicamu nying’gi.

22 Gibigiero ngo ma nia ng’atu mange re m’ubed i iye,

Kadi gibipidho ngo ma nia jumange re m’ucam.

Kum nindo mi dhanu para bibedo calu nindo pa yen,

Man anyong’a binego dhanu para m’ang’iyo lee mandha pi tic mi cing’gi.

23 Gibitimo ngo tic ma tek* mi mananu,

Kadi gibinyolo ngo awiya m’unen can,

Kum gin karacelo ku nyikwaygi,

Gitie kodhi mi dhanu ma Yehova upoko mugisa i wigi.

24 Ma fodi gilwong’o ngo ci, abidwoko igi lembe;

Ma fodi gibeweco aweca ci, abiwinjo.

25 Urudi bicamu karacelo ku nyathin urombo,

Umvor bicamu lum calu thwon dhiang’,

Man thwol bicamu utur.