Isaya
49 Wuwinja, wu cula,
Man wucik ithwu wu thek ma bor.
Yehova ulwong’a i wang’ nyoliri para.
Elwong’o nyinga saa ma fodi an’i maa.
2 Eketho dhoga doko calu palamularu ma lake bith;
Egeng’a i the tipo cinge.
Eketho adoko calu athero ma lake bith;
Ekana i thubu* pare.
3 Ewacu ira kumae: “In i jatic para, Ee Israel,
Man abinyutho leng’o para nikadhu kud i beng’i.”
4 Ento awacu kumae: “Anegara mananu.
Awodho kero para mananu pi gin mandha ngo.
5 Man kawoni Yehova ma Ng’atu m’ucwiya niai i ic kara abed jatic pare,
Uwacu ira nia adwok Yakobo i bang’e,
Kara Israel ucokiri i bang’e.
Abinwang’u dwong’ i wang’ Yehova,
Man Mungu para bidoko tego para.
6 Man ewacu kumae: “Itie ngo kende kende jatic para
Pi niting’o suru pa Yakobo
Man pi nidwogo ju ma jugwoko mir Israel.
Amiyi bende ibed ni der ni thek,
Kara both para ucidh cil i tung’ ng’om.”
7 Maeni tie lembe ma Yehova, ma Jawar mir Israel, ma Ng’atu ma Leng’ pare uwacu ni ng’atu ma jucayu, ni ng’atu ma thek udagu, ni jatic mi rwodhi:
“Jubim bineno man gibiai malu,
Man judongo ma wijo bikulo korgi piny,
Nikum Yehova, ma Ng’atu ma jugeno,
Ng’atu ma Leng’ mir Israel m’udaru ng’iyi.”
8 Yehova uwacu kumae:
“I saa mi bero adwoko iri lembe,
Man i nindo mi both akonyi;
Amedara nigwoki pi nimiyi ibed lembariba ni dhanu,
Pi nidogiero ng’om,
Pi niketho gidog gilag giralaga migi ma nwang’u udong’ ni uvuru,
9 Pi niyero ni jukol kumae: ‘Wuwoki’
Man ni ju ma n’i mudho, ‘Wunyuthuru!’
Gibicamu i dhu ndaki,
Man luba migi bibedo i dhu yo m’ulil* ceke.
10 Kec binegogi ngo kadi rieu de binegogi ngo,
Lietho ma lake tek kadi ceng’ de biwang’ugi ngo.
Kum Ng’atu ma kisa nege i kumgi bitelo wigi,
Man ebitelo wigi i dhu pii m’udhenyini.
11 Abiketho gudi para ceke bidoko ni ndaki,
Man gengi para ma dongo biting’iri malu.
12 Nen! giai bor mandha,
Man Nen! ju ma e uai yo malu man yo reto,
Man ju ma ca uai i ng’om mi Sinim.”
13 Wukok ku mutoro, wu polo, man anyong’a negi, in i ng’om.
Wek mutoro uneg gudi man gigoy muzira;
Kum Yehova ujuko cwiny dhanu pare,
Man kisa unege i kum dhanu pare ma jusendo.
14 Ento Sayuni umedere niyero kumae:
“Yehova uwenja, man Yehova uwil kuda.”
15 Nyo wi dhaku romo wil ku nyathin pare m’ubedhoth,
Kunoke kisa romo nege ngo i kum wode m’eyeyo i iye?
Kadok wi mon maeno romo wil de, an re wiya biwil kudi tak de ngo.
16 Nen! adaru ng’iki i die cinga.
Gang’kidi peri n’i wang’a.
17 Woti gibidwogo pio.
Ju m’urungi man m’unyothi gibiai kud i beng’i.
18 Ting’ weng’i man inen ng’eti tingili.
Gin ceke gibecokiri karacelo.
Gibebino i beng’i.
“Calu andha abedo kwo,” Yehova wacu,
“Ibironyo gin zoo calu ma juronyo ko jamruko,
Man ibitwiyogi calu ma nyamugole* twiyere ko.
19 Kadok nwang’u junyotho kabedo peri man edong’ kende man ng’om peri udong’ ni uvuru,
Kawoni ebidoko diny magwei ni dhanu ma bedo i iye,
Man ju m’ubed umwonyi bibedo bor.
20 Woti m’inyolo saa m’awiya peri utho, biyero i ithi kumae:
‘Kabedo maeni diny magwei ira.
Yab ira kaka m’aromo bedo i iye.’
21 Man ibiyero i adundeni kumae:
‘Ng’a m’unyolo awiya e ira?
Kum an a dhaku m’awiya pare tho man ma jamugumba,
Aai i ng’eca man awok kud i kol.
Ng’a m’utungo awiya eni?
Nen! adong’ kenda ma kenda,
Dong’ awiya e uai kani?’”
22 Rwoth Ubimo ma Malu Ngbir Yehova uwacu kumae:
“Nen! abiting’o cinga ni thek
Man abiting’o ayi* ni dhanu.
Gibikelo woti i cing’gi*
Man gibiyeyo nyigi iwi gokgi.
23 Jubim bidoko jugwok peri,
Man nyi ubimonegi bibedo jupidi peri.
Gibipodho piny ma wang’gi arieba i ng’om iri
Man gibinang’u utur m’i the tiendi,
E ibing’eyo nia an a Yehova;
Ju m’uketho genogen migi i iya lewic binegogi ngo.”
24 Nyo juromo mayu ju ma ng’atu ma tek umaku,
Kunoke nyo juromo bodho ju ma jarukara umaku ni ng’eca?
25 Ento Yehova uwacu kumae:
“Kadok nwang’u juromo mayu ju ma ng’atu ma tek umaku de,
Man juromo bodho ju ma jarukara umaku ni ng’eca de,
Abijai ni ju m’ujai iri,
Man abibodho woti.
26 Abiketho ju m’usendi bicamu ring’gi gigi,
Man gibimer ku rimbgi gigi, calu ve ku pigulok ma mit.