Zaburi
א [Alef]
119 Jumutoro gi ju ma gibewotho ma lembe moko mbe i wigi,*
Ma gibeworo cik pa Yehova.
2 Jumutoro gi ju ma gibeworo poyowic pare,
Ma gibesayu kakare kud adundegi ceke.
3 Gitimo ngo lembe moko ma rac;
Giwotho i yo pare.
4 Ing’olo nia juwor
Lembang’ola peri cuu mandha.
5 Ka nwang’u ndhu acopo cungo nging’ nging’*
Kara awor telowic peri ba!
6 E nwang’u lewic ubenyay ungo i wiya
Kinde m’abeng’iyo i lembang’ola peri ceke.
7 Abipeki kud adunde m’atira
Kinde m’abiwinjo pi pokolembe peri ma pwe.
8 Abiworo telowic peri.
Timba kud ikuna magwei.
ב [Beth]
9 Jalawobi copo gwoko yo pare bedo ma leng’ nenedi?
Nwang’u ebegwokere nimakere ku lembe peri.
10 Asayu kakeri kud adundena ceke.
Kud iwek akier bor kud i kum lembang’ola peri.
11 Agwoko lembe peri cuu mandha i adundena
Kara kud adub iri.
12 Dong’ pak ubed iri, E Yehova;
Ponja ku telowic peri.
13 Abetwong’o ku dend dhoga
Lembapoka peri ceke m’iyero.
14 Anyong’a nega i kum poyowic peri
Nisagu i kum piny mange ceke ma pigi tek.
15 Abinyamu i* lembang’ola peri
Man abiketho wang’a i kum yo peri.
16 Amoko i kum cik peri.
Wiya biwil ungo i kum lembe peri.
ג [Gimel]
17 Tim ku bero ni jatic peri,
Kara akwo man awor lembe peri.
18 Yab wang’a kara anen terere
Piny ma wang’u ijo ma nwang’ere i cik peri.
19 Atie ndhu umondo i ng’om.
Kud ikan lembang’ola peri ira.
20 Saa ceke ava
Mi lembapoka peri nega* lee.
21 Ijuko jukuhaya,
Ma gi ju ma julamu ma gikier kud i kum lembang’ola peri.
22 Kab cac man anyware cen kud i bang’a,*
Pilembe aworo poyowic peri.
23 Kadok kinde ma judongo ma wijo gibedo karacelo
Man giweco rac i kuma de,
Jatic peri nyamu i* telowic peri.
24 Amoko i kum poyowic peri,
Gi calu jumii juk para.
ד [Daleth]
25 Avuto* i utur.
Gwoka abed kwo nimakere ku lembe peri.
26 Akoro iri pi gin ceke m’atimo, man idwoko ira lembe;
Ponja ku telowic peri.
28 Nindo ukeng’ i wang’a* nikum can.
Dwoka tek nimakere ku lembe peri.
29 Kab timo mi ndra cen kud i bang’a,
Tim ira bero m’imii ko ira cik peri.
30 Ang’iyo yo mi gwoko bedoleng’.
Ang’eyo nia lembapoka peri tie atira.
31 Amoko i kum poyowic peri.
E Yehova, kud iwek lewic unyay i wiya.
ה [He]
33 Ponja ku yo mi telowic peri, E Yehova,
E abilube nitundo i ajiki.
34 Mii ira nyang’ i lembe,
Kara awor cik peri
Man kara awore kud adundena ceke.
35 Tel wiya* i yo mi lembang’ola peri,
Kum anyong’a nega i kume.
36 Keth adundena umok i kum poyowic peri,
Ento ungo i kum bero para gira.
37 Lok wang’a cen kara kud enen gin ma konyne mbe;
Gwoka abed kwo i yo peri.
39 Kab lewic m’ubenyayu lworo i iya
Kum lembapoka peri tie ber.
40 Nen maram abeyenyo ko ng’ol peri kud ava.
Nikum bedopwe peri, gwoka abed kwo.
ו [Waw]
41 Nyuth ira mer peri ma lokere ngo, E Yehova,
Man both peri nimakere ku lembang’ola* peri;
42 E abidwoko lembe ni ng’atu m’ucaya,
Kum aketho genogen para i lembe peri.
43 Kud ikab lembe mi lemandha kud i dhoga,
Kum ageno* lembapoka peri.
44 Abiworo cik peri saa ceke,
Rondo ku rondo.
45 Man abiwotho kaka ma museme,*
Pilembe ayenyo ka ng’ol peri.
46 Abikoro pi poyowic peri i wang’ jubim,
Man lewic binega ngo.
47 Amoko i kum lembang’ola peri,
Eyo, amarugi.
48 Abiting’o cinga yor i bang’ lembang’ola peri m’amaru,
Man abinyamu i lembe iwi* telowic peri.
ז [Zayin]
50 Eni re ma tie jukocwiny para i saa m’anwang’ara ku peko,
Kum lembe m’iyero ugwoka abedo kwo.
51 Weg rikini gibecaya ku rac,
Ento akier ungo kud i kum cik peri.
52 Abepoy i kum lembapoka peri ma con, E Yehova,
Man gijuko cwinya.
53 Ng’eicwiny ma lake tek umaka i kum jutimrac
Ma giweko cik peri.
54 Telowic peri gidoko ira ni wer
Kaka moko ci m’abedo i iye.*
55 Apoy i kum nyingi ku diewor, E Yehova,
Kara awor cik peri.
56 Eno re m’utie ng’iyo para
Pilembe abeworo ng’ol peri.
ח [Heth]
57 Yehova en e makapiny para,
Ang’olo nia abiworo lembe peri.
58 Abekweyi kud adundena ceke;
Nyuth ira bero nimakere ku lembang’ola* peri.
59 Ang’iyo i timo para cuu,
Kara adwok tienda udok i bang’ poyowic peri.
60 Atimo pio man agalu ngo
Niworo lembang’ola peri.
61 Thol mi jutimrac utieka,
Ento wiya uwil ungo i kum cik peri.
62 Ku diewor aai malu pi nidwoko iri foyofoc
Pi lembapoka peri ma pwe.
63 Atie jarimb dhanu ceke ma gibelwori
Man mi ju ma gibeworo ng’ol peri.
64 E Yehova, mer peri ma lokere ngo upong’o ng’om;
Ponja ku telowic peri.
ט [Teth]
65 Itimo ku bero ni jatic peri,
E Yehova, calku lembe peri.
66 Ponja ku rieko man ng’eyong’ec,
Kum aketho genogen para i lembang’ola peri.
67 I wang’e m’anwang’ara ku can, abed akier,*
Ento kawoni abeworo lembe peri.
68 In i ber man tic peri de gi beco.
Ponja ku telowic peri.
69 Jukuhaya gicwayu vupo lee i wiya,
Ento abeworo ng’ol peri kud adundena ceke.
70 Adundegi nwang’,*
Ento an amoko i kum cik peri.
71 Ebino ber nia anwang’ara ku can,
Kum eno uketho aponjo telowic peri.
72 Cik m’imiyo utie ber ira,
Ma sagu cekel mi mola ma kwar man mi mola ma tar elufu.
י [Yod]
73 Cingi ucwiya man udwoka tek.
Mii ira nyang’ i lembe,
Kara aponj lembang’ola peri.
74 Ju ma gilwori ginena man anyong’a negogi,
Kum lembe peri tie genogen* para.
75 E Yehova, ang’eyo nia lembapoka peri gi pwe,
Man nia i bedoleng’ peri re m’ituc ninyayu can i kuma.
76 Akweyi, timba mer peri ma lokere ngo ujuk cwinya,
Nimakere ku lembang’ola* m’ing’olo ni jatic peri.
77 Bed ku kisa i kuma kara amedara nikwo,
Kum amoko i kum cik peri.
78 Dong’ lewic umak jukuhaya,
Kum gibesenda mananu.*
Ento abinyamu i lembe iwi* cik peri.
79 Dong’ ju ma gibelwori gidwog i bang’a,
Ju ma ging’eyo poyowic peri.
80 Dong’ adundena ulub telowic peri kubang’e kubang’e,
Kara lewic kud unyay i wiya.
כ [Kaf]
81 Abeyenyo both peri kud ava,
Kum lembe peri tie genogen* para.
82 Wang’a ubekuro lembe peri kud ava
Kinde m’abeyero kumae: “Ibijuko cwinya awene?”
83 Kum adoko calu usau mir adila ma yiro uthwoyo,
Ento wiya uwil ungo i kum telowic peri.
84 Jatic peri bikuro pi nindo adi?
Pirang’o ibekelo ngo pokolembe iwi ju ma gibenyayu ragedo i kuma?
85 Jukuhaya gitong’o vur ira,
Gi ju ma gikwero niworo cik peri.
86 Lembang’ola peri ceke giromo jugengi.
Dhanu ubenyayu ragedo i kuma mananu; konya!
87 Juboth nijigo wiya kud i ng’om,
Ento an, aweko ngo ng’ol peri.
88 Gwoka abed kwo nikum mer peri ma lokere ngo,
Kara agwok poyowic m’imiyo.
ל [Lamed]
89 E Yehova,
Lembe peri bibedo i polo rondo ku rondo.
90 Bedoleng’ peri utie i kind dhanu m’utuk ceke.
Iketho ng’om ucungo nging’ nging’, uketho ebemedere nicungo.
91 Nikum lembapoka peri, gibemediri* nibedo nuti nitundo tin,
Kum gin ceke gi jutic peri.
92 Ka nwang’u amoko ngo kii i kum cik peri,
Nwang’u arwinyo i masendi para.
93 Wiya biwil ki ngo i kum ng’ol peri,
Pilembe nikumgi iketho abedo kwo.
94 An a peri, bodha,
Pilembe asayu ka ng’ol peri.
95 Jutimrac gikura kara ginega,
Ento an aketho wiya kilili i kum poyowic peri.
96 Aneno nia piny ceke ma leng’ utie ku mupaka,
Ento lembang’ola peri umbe ku mupaka.*
מ [Mem]
97 Amaru cik peri mire maa!
Anyamu iye* dieceng’ duu.
98 Lembang’ola peri ketho adoko riek nisagu judegi para,
Pilembe eni karacelo kuda rondo ku rondo.
99 A riek ma sagu juponji para ceke,
Pilembe abenyamu i lembe iwi* poyowic peri.
100 Atimo lembe ku rieko nisagu judongo,
Pilembe abeworo ng’ol peri.
101 Akwero niwotho i yo moko ci ma rac,
Kara awor lembe peri.
102 Alokara ngo cen kud i kum lembapoka peri,
Kum iponja.
103 Lembe peri mit i dhoga mire maa!
E mit lee i dhoga ma sagu miyokic.
104 Nikum ng’ol peri atimo lembe ku rieko.
Eno re m’uketho adagu yo ceke ma rac.
נ [Nun]
105 Lembe peri en e thala ni tienda,
Man der ni yo para.
106 Atimo lembang’ola ma ku kwong’ man abipong’e,
Nia abiworo lembapoka peri ma pwe.
107 Abino ku can lee.
E Yehova, gwoka abed kwo nimakere ku lembe peri.
108 Akweyi, E Yehova,
Anyong’a unegi i kum girathiera para ma ku berocwiny m’apeki ko,*
Man ponja ku lembapoka peri.
109 Kwo para n’i ariti* saa ceke,
Ento wiya uwil ungo i kum cik peri.
110 Jutimrac giciko uwic ira,
Ento akier ungo kud i kum ng’ol peri.
111 Aketho nia poyowic peri ubed ni giralaga para mi nja,
Pilembe gitie anyong’a mir adundena.
112 Akeco nia abiworo telowic peri
Saa ceke, nitundo i ajiki.
ס [Samekh]
113 Adagu ju m’adundegi upokere,*
Ento amaru cik peri.
114 In i kapondo para man ban para,
Kum lembe peri tie genogen para.*
115 Wu jutimrac, wubed bor kuda,
Kara awor lembang’ola pa Mungu para.
117 Tiela kara abothi;
E abiketho wiya saa ceke i kum telowic peri.
118 Iloko ng’eyi ni dhanu ceke ma gikier kud i kum telowic peri,
Kum gi dhanu ma reco man juvupo.
119 Ikabu jutimrac ceke kud i ng’om calu ve gitie ceth uka ma tije mbe.
Eno re m’uketho amaru poyowic peri.
120 Lworoni uketho kuma* ubemiel;
Abelworo pokolembe peri.
ע [Ayin]
121 Atimo lembe m’atira man ma pwe.
Kud iwenja i cing’ ju m’usenda!
122 Ng’ol nia ibikonyo jatic peri;
Dong’ jukuhaya kud gisenda.
123 Wang’a daru jony m’ebekuro ko both peri
Man lembang’ola peri* ma pwe.
124 Nyuth mer peri ma lokere ngo ni jatic peri,
Man ponja ku telowic peri.
125 An a jatic peri, mii ira nyang’ i lembe
Kara ang’ey poyowic peri.
126 Nindo uforomo ni Yehova mi timo lembe,
Kum gituro cik peri.
127 Eno re m’uketho amaru lembang’ola peri
Nisagu mola ma kwar, kadok mola ma kwar ma leng’.*
128 Pieno, aneno telowic* moko ci m’uai i beng’i nia etie atira;
Adagu yo moko ci ma rac.
פ [Pe]
129 Poyowic peri giwang’u ic.
Eno re m’uketho aworogi.*
130 Tuco the lembe peri miyo der,
Emiyo nyang’ i lembe ni ju m’ung’eyo lembe akeca ngo.
131 Ayabu dhoga ma lac man agamu ng’eta,*
Pilembe ava lembang’ola peri ubenega lee.
132 Lokiri i bang’a man nyuth ira bero,
Calu m’ing’olo ni ju m’umaru nyingi.
133 Tel wi dagutielo para museme* ku lembe peri;
Dong’ gin moko ci ma rac kud ubim wiya.
134 Lara* kud i cing’ dhanu ma gibesenda,
E abiworo ng’ol peri.
135 Keth weng’i urieny* iwi jatic peri,
Man ponja ku telowic peri.
136 Piwang’a ubemol calu kulo kud i wang’a
Pilembe dhanu gibeworo ngo cik peri.
צ [Tsade]
137 In i pwe, E Yehova,
Man lembapoka peri de tie atira.
138 Poyowic peri gi pwe
Man jugeno gin ceke.
139 Amora ubeliel i iya,
Pilembe wi judegi uwil i kum lembe peri.
140 Lembe peri tie leng’,*
Man jatic peri umare.
141 Kabang’a de mbe man jucaya;
Ento wiya uwil ungo i kum ng’ol peri.
142 Bedopwe peri en e bedopwe ma rondo ku rondo,
Man cik peri en e andha.
143 Kadok nwang’u can man peko ubino i wiya de,
Re amoko asu i kum lembang’ola peri.
144 Poyowic peri gi pwe rondo ku rondo.
Mii ira nyang’ i lembe, kara amedara nibedo kwo.
ק [Kof]
145 Abelwong’i kud adundena ceke, E Yehova, dwok ira lembe.
Abilubo telowic peri.
146 Abelwong’i; bodha!
Abiworo poyowic peri.
148 Wang’a yabere i wang’ kur mi diewor,
Kara anyam i* lembe peri.
149 Winj dwanda nikum mer peri ma lokere ngo.
E Yehova, gwoka abed kwo nimakere ku bedopwe peri.
150 Ju ma gitimo lembe mi lewic* gicoro ceng’ini;
Gini bor ku cik peri.
151 In’i ceng’ini, E Yehova,
Man lembang’ola peri ceke gin andha.
152 Con aponjo lembe iwi poyowic peri,
Nia ikethogi kara gibed rondo ku rondo.
ר [Rec]
153 Nen can para man lara,
Kum wiya uwil ungo i kum cik peri.
155 Both ni bor ku jutimrac,
Pilembe giyenyo ngo ka telowic peri.
156 Kisa peri tie dit, E Yehova.
Gwoka abed kwo nimakere ku bedopwe peri.
157 Ju ma ginyayu ragedo i kuma man judhoga gi dupa;
Ento akier ungo kud i kum poyowic peri.
158 Aneno ju ma cibojo, e can unega,
Kum giworo ngo lembe peri.
159 Nen maram amaru ko ng’ol peri!
E Yehova, gwoka abed kwo nikum mer peri ma lokere ngo.
160 Ukungu mi lembe peri en e andha,
Man lembapoka peri ceke ma pwe gibedo rondo ku rondo.
ש [Sin] kunoke [Cin]
161 Judongo ma wijo gibenyayu ragedo i kuma mananu,
Ento adundena ubeworo lembe peri.
162 Anyong’a ubenega i kum lembe peri
Calu ng’atu m’unwang’u jambayeki dupa.
163 Adagu ndra ku rac mandha,
Ento amaru cik peri.
164 Wang’ abiro kubang’ ceng’ apeki
Pi lembapoka peri ma pwe.
165 Kwiyocwiny ma dit utie ni ju ma gimaru cik peri;
Gin moko mbe ma copo ketho gikier.*
166 Aketho genogen para iwi tic mi both peri, E Yehova,
Man abeworo lembang’ola peri.
167 Abeworo* poyowic peri,
Man amarugi ku cwinya ceke.
168 Abeworo ng’ol peri man poyowic peri,
Kum ing’eyo lembe ceke m’abetimo.
ת [Taw]
169 Dong’ wak para m’abekwayu ko kony utund i beng’i, E Yehova.
Nikadhu kud i lembe peri, keth anyang’.
170 Dong’ kwac para m’abekwayu ko bero utund i weng’i.
Bodha calu m’ing’olo.*
171 Dong’ dend dhoga upong’ bik ku pak,
Kum iponja ku telowic peri.
172 Dong’ leba uwer lembe peri,
Kum lembang’ola peri ceke gi pwe.
173 Dong’ cingi ubed ayika nikonya,
Kum ang’iyo niworo ng’ol peri.
174 Abeyenyo both peri kud ava, E Yehova,
Man amoko kii i kum cik peri.
175 Wek abed* kwo kara apeki;
Dong’ lembapoka peri ukonya.
176 Awotho swa calu urombo m’urwinyo. Say ka jatic peri,
Pilembe wiya uwil ungo i kum lembang’ola peri.