Yeremia
31 “I nindo maeca,” Yehova wacu, “abidoko Mungu ni juruot ceke mir Israel, man gibidoko dhanu para.”
2 Yehova uwacu kumae:
“Dhanu m’uboth kud i lak palamularu ginwang’u bero i langa
Saa ma Israel ubino wotho pi nicidho i kayom pare.”
3 Yehova uwok ira ku bor man eyero kumae:
“Ameri ku mer ma rondo ku rondo.
Pi thelembe maeno re m’acori i vuta ku mer ma lokere ngo.*
4 Ento abidogieri kendo man jubigieri.
Ee nyaku ma sumba mir Israel, ibiting’o nyithi vul peri kendo
Man ibiwok woko m’ibemiel kud anyong’a.
5 Ibipidho kendo podho mir ulok i gudi mi Samaria;
Ju ma pidho ulok bipidhe man gibicamu nyinge.
6 Kum nindo bebino ma jukur mi gudi pa Efraim gibikok i iye kumae:
‘Wuai malu, waidhu i Sayuni, i bang’ Yehova Mungu mwa.’”
7 Kum Yehova uwacu kumae:
“Wukok kud anyong’a ni Yakobo.
Wugoy muzira pilembe wutie dhanu ma kwong’a i kind thek.
Wutwong’ lembene, wupak Mungu man wuyer kumae:
‘Ee Yehova, bodh dhanu peri, ma gidong Israel.’
8 Abedwogogi niai kud i ng’om ma yo malu.
Abicoko dhoggi karacelo niai kud i theng ng’om ma bor mandha.
Abinga man abala bibedo i kindgi,
Dhaku ma iye nuti man dhaku m’ubegonyere, gin ceke karacelo.
Gibidwogo keni ma gitie udul dhanu ma lee.
9 Gibidwogo ku wak.
Abitelo wigi kinde ma gibekwayu kisa.
Abitelo wigi i bang’ kulo,
I yo ma kpee ma giromo kier ungo i iye.
Kum atie Wego ni Israel man Efraim utie kayu para.”
10 Wuwinj lembe pa Yehova, wu thek,
Man wutwong’ lembene i kind cula ma ni bor, wuyer kumae:
“Ng’atu m’ulalu Israel bicoko dhoge karacelo.
Ebikuro wiye calu ma jakwac kuro ko dwol pare.
11 Kum Yehova biwaru Yakobo
Man ebilare kud i the cing’ ng’atu ma tek nisage.
12 Gibibino man gibikok ku mutoro i die wi Sayuni
Man gibirieny nikum bero pa Yehova,
Nikum nying cam, pigulok ma nyen man mo,
Nikum nyithi rombe ku nyithi diegi man nyithi dhieng’.
Gibidoko calu podho ma pii romo ma ber,
E gibikwiyo ngo kendo nyanok de.”
13 “I nindo maeca nyaku ma sumba bimiel kud anyong’a,
Awobi ku judongo bende karacelo.
Abidwoko wak migi bidoko ni mutoro.
Abijuko cwinygi man abimiyo igi anyong’a kaka can migi.
15 “Yehova uwacu kumae:
‘Dwal ubewinjere i Rama, nduru man wak ma lee:
Racel re m’ubewagu wote.*
Ekwero kud jujuke pi wote,
Pilembe dong’ gimbe.’”
16 Yehova uwacu kumae:
“‘Jig wak man kud icwir piweng’i kendo,
Kum ibinwang’u sukulia pi tic peri,’ Yehova wacu.
‘Gibidwogo niai kud i ng’om pa jadegi.’
17 ‘Man genogen utie pir anyim peri,’ Yehova wacu.
‘Woti bidwogo i ng’om migi ma dhe.’”
18 “Awinjo andhandha Efraim ubecur.
‘Itwinya man jutwinya,
Calu nyathi thwon dhiang’ ma juponjo ngo ku yeyo mberembere.
Dwoga i beng’i man abibedo ayika nidwogo,
Pilembe in i Yehova Mungu para.
19 Kum i ng’ey m’adwogo, aloko cwinya;
I ng’ey ma juketho anyang’, agoyo bamba ku can.
Lewic kud acidi umaka,
Kum ayeyo cac mir aradu para.’”
20 “Nyo Efraim utie ngo woda ma kacwinya, nyathin m’amaru?
Kum saa ceke ma tek aweco rac i kume, apoy pire asu.
Pi thelembe maeno re ma kan aparu pire ci, can mondo i iya.
Man kisa binega andhandha i kume,” Yehova wacu.
21 “Com iri ayi i gengi,
Man keth giranyutha.
Keth wii i kum gengi ma dit, ma en e yo m’ibikwanyu.
Dwogi, Ee nyaku ma sumba mir Israel, dwog i bang’ adhura peri maeni.
22 Ee nyaku m’ujai, ibikadhu kun ku kun nitundo awene?
Kum Yehova udaru cwiyo piny moko ma nyen i ng’om:
Dhaku bilubo tok nico reke reke.”
23 Yehova mir udul ma Mungu mir Israel uwacu kumae: “Gibiyero lembuni kendo i ng’om mi Yuda man i adhurane saa m’abidwogo dhanu migi ma jutero i ng’eca: ‘Yehova umii iri mugisa, Ee kabedo ma pwe, Ee got ma leng’.’ 24 Man Yuda kud adhurane ceke bibedo karacelo i iye, jurufur ku ju m’ubetelo wi dwol. 25 Kum abiyeng’o ng’atu* m’uvoc man abiyeng’o ng’atu moko ci m’ubekwiyo.”
26 E wang’ acel acew man ayabu wang’a, nwang’u abino nindo nindo ma mit.
27 “Nen! nindo bebino,” Yehova wacu, “m’abicoyo i iye kodhi mi dhanu man kodhi mir udul lim i ot mir Israel man i ot mi Yuda.”
28 “Man tap calu m’akuro wigi pi nifudho, nirwombo, nituro, ninyotho, man ninyayu ret, kumeno bende abikuro wigi pi nigiero man nipidho,” Yehova wacu. 29 “I nindo maeca, jubiyero ngo kendo kumae: ‘Wego ucamu nying ulok ma wac, lak awiya re m’ulund utho.’* 30 Ento ng’atuman bitho pi dubo pare gire. Ng’atu moko ci m’ucamu nying ulok ma wac, en re ma lake bitho.”
31 “Nen! nindo bebino,” Yehova wacu, “m’abitimo iye lembariba ma nyen ku ot mir Israel man ot mi Yuda. 32 Ebibedo ngo calu lembariba m’agam atimo ku kwarugi i nindo m’amaku iye cing’gi pi niwodhogi kud i ng’om mi Misiri, ‘lembariba para ma gituro, kadok nwang’u abino rwoth migi mandha,’* Yehova wacu.”
33 “Kum maeni en e lembariba m’abitimo ku ot mir Israel i ng’ey nindo maeca,” Yehova wacu. “Abiketho cik para i igi man abikiewe i adundegi. Abidoko Mungu migi man gibidoko dhanu para.”
34 “E gibiponjiri ngo kendo i kindgi ma nia ng’atuman uponj wagi kunoke uponj umin, m’ewac ko kumae: ‘Ng’ey Yehova!’ Kum gin ceke gibing’eya, niai i kum ng’atu ma nok nitundo i kum ng’atu ma dit m’i kindgi,” Yehova wacu. “Pilembe abiweko kier migi man abipoy ungo kendo pi dubo migi.”
35 Yehova,
Ma miyo ceng’ urieny ku dieceng’,
Cik ni dwi ku nyikaluku kara girieny ku diewor,
En m’etugo nam man eketho mujangane woy,
En ma nyinge Yehova mir udul, uyero kumae:
36 “‘Tek cik maeno ujik nindo moko,’ Yehova wacu,
‘E ka kodhi pa Israel de bijik nibedo thek i wang’a saa ceke.’”
37 Yehova uwacu kumae: “‘Tek juromo pimo polo ma ni malu man juromo nwang’u kathere mi ng’om ma ni piny, e kan abikwero kodhi pa Israel ceke pi lembe zoo ma gitimo,’ Yehova wacu.”
38 “Nen! nindo bebino,” Yehova wacu, “ma jubigiero adhura ni Yehova niai i kum Ot ma wiw pa Hananel nitundo i kum Dhugang’ mi Gul. 39 Thol mi pimo piny bicidho atira nitundo i kum ungulu got* Gareb man ebiwiro ebidok yor i Goa. 40 Man poga* ceke mir avu ku mi vuru* man podho ceke nitundo i Poga mi Kidron nicidho bir i gul mi Dhugang’ mi Riuni yo nyangu, bidoko ni piny ma leng’ ni Yehova. Jubifudhe ngo kadi jubirwombe ngo kendo nyanok de.”