Zaburi
Pa Daudi. Maskil.*
32 Jamutoro tie ng’atu ma juweko kier pare, man ma juumo wi dubo pare.*
2 Jamutoro tie ng’atu ma Yehova uketho ngo kosa i wiye,
M’abombi mbe i adundene.
3 Kinde m’abedo ling’, cogona utal nikum cur para dieceng’ duu.
4 Kum dieceng’ ku diewor cingi* ubedo pek i wiya.
Tego para uduny calu pii i saa mi lietho ma lake tek mi oro. (Sela)
5 Tokcenne atuco dubo para iri;
Aumo ngo wi kosa para.
Awacu kumae: “Abituco kier para ni Yehova.”
E iweko kosa para man dubo para. (Sela)
6 Eno re m’uketho ng’atu moko ci m’ugwoko bedoleng’ pare birwo i beng’i
Kinde ma fodi jucopo nweng’i.
E kadok pii m’upong’ de binwang’e ngo.
7 Itie ira kapondo;
Ibigwoka ni can.
Ibitieka tingili ku kok mir anyong’a mi both. (Sela)
8 “Abimiyo iri copo mi ng’iyo i lembe man abiponji ku yo m’umaku iwoth i iye.
Abimiyo iri juk ma nwang’u wang’a n’i wii.
9 Kud idok* calu riuni* kadi kana ma rieko migi mbe
M’ukwayu jutel wi tego migi ku gwang’ kadi kud adila ma jutwiyo i dhoggi
Ka gibin i beng’i.”
10 Litho pa jatimrac gi dupa;
Ento ng’atu m’ugeno Yehova, mer pare ma lokere ngo tieke gbur.
11 Mutoro negwu nikum Yehova man wubed kud anyong’a, wu weg bedopwe;
Wukok kud anyong’a, wu ju ceke m’adundewu atira.