Isaya
66 Yehova uwacu kumae:
“Polo tie komker para, man ng’om utie dul mi the tienda.
Dong’ ot ma wuromo giero ira ni kani,
Man kayom para ni kani?”
2 “Cinga re m’utimo gin maeni ceke,
E kumeno gin ceke giwok,” Yehova wacu.
“Dong’ abineno bang’ ng’atu ma e:
Ng’atu ma mol, ma cwinye tur man ma kume ubemiel i kum* lembe para.
3 Ng’atu m’ubenego thwon dhiang’ tie calu ng’atu m’ubenego dhanu.
Ng’atu m’ubethiero urombo tie calu ng’atu m’ubeturo ng’ut gwok.
Ng’atu m’ubemiyo giramiya tie calu ng’atu m’ubethiero rimb kul!*
Ng’atu m’ubewang’u udok sengi ni girathiera mi poy, tie calu ng’atu m’ubemiyo mugisa ku wec mi lamu bila.*
Ging’iyo yo migi gigi,
Man anyong’a negogi* i kum gin ma judagu.
4 Pieno, abing’iyo yo mi miyo igi matira,
Man tap piny ma ndiri ubed unegogi i kume re m’abikelo i wigi.
Pilembe kinde m’alwong’o, ng’atu moko mbe m’uyii;
Kinde m’aweco, ng’atu moko mbe m’uwinjo.
Gimediri migi nitimo lembe ma rac i wang’a,
Man ging’iyo nitimo gin m’adagu.”
5 Wuwinj wec pa Yehova, wun ma kumwu ubemiel i kum* wec pare:
“Umego mwu m’udaguwu man m’ubekoyowu nikum nyinga giyero kumae: ‘Wek Yehova unwang’ dwong’!’
Ento ebiwok man ebikelo iwu anyong’a,
E gin re ma gi ju ma gibinwang’u lewic.”
6 Dwal mi woy ubeai kud i adhura, dwal ubeai kud i hekalu!
Utie dwand Yehova m’ubeculo ni judegi pare gin ma giromo ko.
7 Elar eoy ma fodi moc ugoye ngo.
Elar enyolo nyathin ma nico ma fodi moc ugoye ngo.
8 Ng’a m’udaru winjo kit lembe ma kumeno?
Ng’a m’uneno kit lembuno?
Nyo ng’om binyolere i nindo aceli?
Kadi thek binyolere zoo wang’ aceli?
Re kinde ma moc ugoyo Sayuni ci, enyolo wote.
9 “Nyo abikelo nyathin nitundo i saa m’enyolere i iye man abilund cero kud enyolere?” Yehova wacu.
“Kunoke nyo abitugo nyoliri man abilund ciko dhug usau nyodo?” Mungu peri wacu.
10 Anyong’a negwu ku Yeruzalem man mutoro negwu kude, wun ceke ma wumare.
Anyong’a negwu lee mandha kude, wun ceke ma wubewak pire.
11 Kum wubidhoth man wubiyeng’ lee mandha ku thunone mi jukocwiny,
Wubimedhuru lee man anyong’a binegowu nikum dwong’ pare ma dit.
12 Kum Yehova uwacu kumae:
“Nen, abeyaru kwiyocwiny nitundo i bang’e calu kulo,
Man dwong’ mi thek calu pii ma dit m’ubemol.
Wubidhoth man jubiting’owu i wang’ ng’etjo,
Man jubithorowu iwi cong’jo.
13 Calu ma mego juko ko cwiny wode,
An de abijuko cwinywu kumeno;
Man wubinwang’u jukocwiny nikum Yeruzalem.
14 Wubineno lembe maeni, man anyong’a binego adundewu,
Cogowu biloth tap calu lum m’uloth.
Man Yehova biketho jutic pare bing’eyo cinge,*
Ento ebipoko lembe iwi judegine.”
15 “Kum Yehova bibino calu mac,
Man magali pare calu avuvu,
Pi nimiyo matira ku ng’eicwiny ma lake tek
Pi nijuko ku lebmac.
16 Kum Yehova bikelo pokolembe ku mac,
Eyo, ku palamularu iwi dhanu ceke;*
Man ju ma Yehova binego bibedo lee.
17 “Ju ma dwokiri leng’ man ju ma lonyiri gigi pi nimondo i podho* i tok ng’atu ma n’i diere, ju ma camu ring’ kul* man piny ma judagu kud uyo, gin ceke jubijigo wigi karacelo,” Yehova wacu. 18 “Calu m’ang’eyo pi tic migi man paru migi, abebino nicoko dhu dhanu mi thek man mi dhok ceke, e gibibino man gibineno dwong’ para.”
19 “Abiketho giranyutha i kindgi man abioro jumoko m’uboth i bang’ thek, i Tharsis, i Pul man i Lud, ma gi ju ma gikilo athero, i Thubal man i Yavan man i cula ma bor, ma gi ju ma giwinjo ngo pi rwonga man gineno ngo dwong’ para; e gibitwong’o pi dwong’ para i kind thek. 20 Gibiwodho umego mwu ceke kud i kind thek zoo calu giramiya ni Yehova, iwi riuni,* i magali, i magali m’auma, iwi kana, man iwi ngamia ma ringo ma tek nitundo iwi got para ma leng’, Yeruzalem,” Yehova wacu, “tap calu ma dhanu mir Israel gikelo ko giramiya migi i ajeni ma leng’ i ot pa Yehova.”
21 “Abigamu bende jumoko ni julam man ni Julawi,” Yehova wacu.
22 “Tap calu ma polo ma nyen ku ng’om de ma nyen m’abecwiyo bibedo asu i wang’a,” Yehova wacu, “kodhi mwu ku nyingwu de bibedo kumeno.”
23 “Niai ma dwi upor nitundo m’ebipor kendo, man niai i sabatu nitundo i sabatune ma kucelo,
24 “E gibicidho man gibineno avuj dhanu m’ujai ira;
Pilembe ukoko m’ubecamugi bitho ngo,
Man mac migi de bitho ngo
E gibidoko ni gin ma dhanu ceke* udagu.”