Isaya
43 Maeni tie lembe ma Yehova uwacu,
En m’e Jacwic peri, Ee Yakobo, Ng’atu m’ucwiyi, Ee Israel:
“Lworo kud unegi, kum adaru weri.
Alwong’i ku nyingi.
Itie para.
2 Abibedo kudi saa m’ibekadhu pii,
Man saa m’ibekadhu kulo, ebimwonyi ngo.
Saa m’ibewotho i die mac, ebiweng’i ngo,
Kadi lebmac de birewi ngo.
3 Kum an a Yehova Mungu,
Ng’atu ma Leng’ mir Israel, Jalarni.
Amiyo Misiri ubed ni jamgony iri,
Ethiopia man Seba kakeri.
4 Kum piri doko tek i wang’a,
Juyungi, man ameri.
Pieno, abimiyo dhanu kakeri,
Man thek kaka kwo peri.
5 Lworo kud unegi, kum ani kudi.
Abigamu kodhini* niai yo nyangu
Man abicoki karacelo niai yo reto.
6 Abiyero ni yo malu kumae: ‘Dwoggi!’
Man ni yo piny nia, ‘kud icergi.
Dwog wota niai ku bor, man nyiga niai kud i tung’ ng’om,
7 Ju ceke ma lwong’iri ku nyinga
Man m’acwiyo pi dwong’ para,
M’ang’ino man atimo.’
8 Wuwodh ju m’abinga, ma ke wang’gi nuti,
Man udhing’, ma ke ithgi nuti.
9 Wek thek ceke ucokiri kaka ma rom,
Man dhanu ucokiri karacelo.
Ng’a m’i kindgi ma copo koro lembuni?
Kunoke ma copo ketho wawinj lembe ma kwong’a?*
Giwodh jumulembe migi pi nituco nia giyero lemandha,
Kunoke giwinji man giyer nia, ‘tie lembe mandha!’”
10 Wutie jumulembe para, Yehova wacu,
“Eyo, jatic para m’ang’iyo,
Kara wung’eya man wuyiya
Man wunyang’ nia atie Ng’atu ma rom.
Mungu mange mbe ma jular jucwiyo i wang’a,
Man i ng’eya de mbe.
11 An, a Yehova, man m’uweko an jalar mange mbe.”
12 “An re m’atie Ng’atu m’utwong’o, m’ubodho man m’unyutho lembe
Saa ma mungu mi juwirok ubino mbe i kindwu.
Pieno wutie jumulembe para,” Yehova wacu, “man an a Mungu.
13 Bende atie Ng’atu ma rom saa zoo;
Man ng’atu moko mbe ma romo mayu gin moko kud i cinga.
Saa ma kan atimo lembe moko, ng’a ma copo cero lembene?”
14 Yehova ma Jawar mwu, Ng’atu ma Leng’ mir Israel uwacu kumae:
“Piwu, abioro ng’atu moko i Babeli man abiredho riu ceke m’i dhugang’
Man Jukaldayo bigoyo nduru mi can i meli migi.
15 An a Yehova, Ng’atu ma Leng’ mwu, Jacwic mir Israel, Ubimo mwu.”
16 Maeni tie lembe ma Yehova wacu,
En m’ekaku yo i die nam
Man gengi kadok i die pii m’udhetho,
17 Ng’atu ma wodho magali mi lwiny man riuni,*
Udul mony karacelo ku juaskari ma jurukara:
“Gibivuto man gibiai ungo.
Jubinegogi, jubikudhogi gibitho calu mac mi kithambi m’ubeliel.”
18 “Kud wupoy pi lembe ma con,
Man kud wumeduru niparu pi lembe m’ukadhu.
19 Nen! abetimo lembe ma nyen;
Kadok kawoni de ebewok.
Nyo wung’eyo ngo lembene?
Abiyabu yo i die langa
Man kulo i die hanga.
20 Yedi mi lum biyunga,
Utho man udo,
Kum abiketho pii biwok i langa,
Kulo i hanga,
Kara dhanu para m’ang’iyo gimadhi,
21 Dhanu m’acwiyo ira gira
Kara gitwong’ pak para.
22 Ento ilwong’a ngo, Ee Yakobo,
Pilembe iol kuda, Ee Israel.
23 Ikelo ngo ira rombe pi lam peri m’awang’a ma boo,
Kadi dwong’ de imiyo ngo ira ku lam peri.
Adiyi ngo nia ikel ira giramiya,
Kadi aoli de ngo ku kwayu udok sengi.
24 Ing’iewo ngo ira thiang’ ma mit* ku sente peri,
Man iyeng’a ngo ku miyo mi lam peri.
Ento inura ku dubo peri
Man iola ku kosa peri.
25 An, an re ma Ng’atu m’ubeweyo kier* peri pira gira,
Man abipoy ungo pi dubo peri.
26 Poy wiya; dong’ wakel adote mwa ng’atuman i kum wadi;
Kor lembe peri m’unyutho nia imbe ku kosa.
27 Kwaru peri ma kwong’a udubo,
Man jukwenda* peri gijai ira.
28 E abicido judongo ma wijo mi kabedo ma leng’,
Man abimiyo Yakobo kara junyothe
Man abithiero Israel kara juyanye.