Isaya
32 Nen! ubimo bicamu ker pi bedopwe,
Man judongo ma wijo bibimo pi pokolembe m’atira.
2 Man ng’atuman bibedo calu kapondo ni yamu,
Kapondo ni koth ma kud avuvu,
Calu kulo m’umol i ng’om langa,
Calu tipo cana ma dit i ng’om ngele.
3 E jubiumo ngo kendo wang’ ju m’ubeneno piny,
Man ith ju m’ubewinjo lembe de biwinjo cuu.
4 Adunde ju ma vur vur biparu lembe cuu iwi ng’eyong’ec,
Man leb weg gwong’o biweco yot yot man terere.
5 Jubilwong’o ngo kendo jakasegu nia jabero,
Man ng’atu ma kura pare rac nia dhanu mir awora;
6 Kum jakasegu biyero lemkasegu,
Man ebipangu lembe ma rac i adundene,
Pi ninyayu jai* man niyero lembe ma reco iwi Yehova,
Pi niketho ng’atu ma kec ubenego* ucidhi m’ecamu ngo,
Man pi nitwono ng’atu ma rieu ubenego ku piny m’eromo madhu.
7 Ng’atu ma kura pare rac pangu lembe ma reco;
Enyayu timo mir acidi
Pi ninyotho ng’atu m’ubetagu ku ndra,
Kadok kinde ma jacan ubeyero lembe m’atira de.
8 Ento jabero utie ku paru mi berocwiny,
Man emedere asu nitimo berocwiny.
9 “Wu jumamon ma wudieng’ ungo, wuai malu man wuwinj dwanda!
Wun anyira ma wukwanu ngo ku lembe, wucik ithwu i kum lembe m’abeyero!
10 I ng’ey oro acel ku piny kende ci,
Wu ju ma wukwanu ngo ku lembe cwinyu bing’abere,
Pilembe saa ma pono nying ulok bithum binwang’u jucoko ngo dhu nying yen.
11 Kumwu miel, wu jumamon ma wudieng’ ungo,
Cwinywu ng’abere, wun ma wukwanu ngo ku lembe!
Wuwodh bongu wudong’ muneru,
Man wutwii kendi mi saki i pierwu.
12 Wudhong korwu ku can
Pi podho ma beco man pir ulok ma cego nyinge.
13 Kum ukudho ku yend ukudho biumo ng’om mi dhanu para;
Gibiumo udi ceke mi mutoro,
Eyo, adhura mir anyong’a.
14 Kum juwenjo ot ma wiw ma tek;
Juweko adhura ma woy n’i iye.
Ofel ku otkur ma wiw udaru doko ni uvuru mi nja,
Katuko mi kana mi lum,
Luba mir udul lim,
15 Cil ma jubikonjo ko tipo i wiwa niai ku malu,
Man langa bidoko ni podhoyen ma cego nyinge,
Man jubikwanu podhoyen ma cego nyinge ni luli.
16 E pokolembe m’atira bibedo i langa,
Man bedopwe bibedo i podhoyen ma cego nyinge.
17 Bedopwe mandha bikelo kwiyocwiny,
Man nying bedopwe mandha bibedo bedoyoo man bedomoth ma nja.
18 Dhanu para bibedo i kabedo mi kwiyocwiny,
I udi m’ubedo museme man i kayom m’ukwiyo.
19 Ento pei birungo luli,
Man jubirwombo adhura pet.
20 Mugisa iwu wu ju ma wucoyo cam i dhu pii ceke,
Wu ju ma wuweko* thwon dhiang’ man kana ucidho.”