Isaya
37 Kinde m’Ubimo Hezekia uwinjo lembe maeno, ndhu ndhu eyeco bongu pare man eumo kendi mi saki i kume, e ecidho i ot pa Yehova. 2 I ng’eye, eoro Eliakim m’ubino janen wi kal,* Cebna ma jagor man judongo mi julam ma giumo kendi mi saki, kara gicidh i bang’ jabila Isaya ma wod Amoz. 3 Giwacu ire kumae: “Ubimo Hezekia uyero kumae: ‘Tin utie nindo mi can, mi cac,* man mi lewic; kum watie ve dhaku ma moc ugoyo,* ento tego m’enyol ko nyodone mbe. 4 Saa moko nyo Yehova Mungu peri biwinjo wec pa Rabcake ma rwoth pare m’ubimo mir Asiria uore ebin eroko ko Mungu ma kwo, man nyo Yehova Mungu peri bimiyo matira ire pi wec m’ewinjo. Pieno, rwo pi dong dhanu ma giboth.’”
5 E jutic p’Ubimo Hezekia gicidho i bang’ Isaya, 6 man Isaya uyero igi kumae: “Wuwac ni rwoth mwu kumae: ‘Yehova uyero kumae: “Lworo kud unegi pi wec m’iwinjo, ma gi wec mir acidi ma jutic p’ubimo mir Asiria gicida ko. 7 Nen, aberoyo paru moko i wiye, ebiwinjo rwonglembe moko man ebiloko ebidok i ng’om pare ma dhe; e abiketho jubinege ku palamularu i ng’om pare ma dhe.”’”
8 Saa ma Rabcake uwinjo nia ubimo mir Asiria uweko adhura mi Lakic, eloko edok i bang’e man ewok enwang’u ebekiedo i dhu Libna. 9 Ubimo mir Asiria ugam uwinjo jubeyero nia Ubimo Tiraka mir Ethiopia ubino pi nikiedo i dhoge. Kinde m’ewinjo lembe maeno, e eoro jukwenda kendo i bang’ Hezekia, eyero kumae: 10 “Wuwac ni Ubimo Hezekia mi Yuda kumae: ‘Kud iwek Mungu peri m’ibegeno no uwondi ku wec ma nia, “jubimiyo ngo Yeruzalem i cing ubimo mir Asiria.” 11 Nen! idaru winjo lembe ma jubim mir Asiria gitimo i kum ng’om ceke, kite ma ginyotho kogi. Nyo ini kendi re m’ibibothi? 12 Nyo mungu mi thek ma kwaru para unyotho gibodho theknegi de? Gozan, Haran, Rezef, man dhanu mir Eden ma gibino i Tel-asar gini kani? 13 Ubimo mir Hamath, ubimo mi Arpad, man ubimo mir adhura mi Sefarvaim, mi Hena ku mi Iva gini kani?’”
14 E Hezekia ugamu baruane kud i cing’ jukwenda man esomogi. I ng’eye, Hezekia ucidho i ot pa Yehova, man epedhogi* i wang’ Yehova. 15 E Hezekia ucaku rwo i bang’ Yehova, eyero kumae: 16 “Ee Yehova mir udul ma Mungu mir Israel, in m’ijany malu iwi* jukerubi, ini kendi m’itie Mungu mandha mi ker ceke m’i ng’om. Icwiyo polo ku ng’om. 17 Ee Yehova, cik ithi man iwinji! Yab weng’i man inen, Ee Yehova! Winj wec ceke ma Senakerib uoro jubin juroki ko, in m’i Mungu ma kwo. 18 Ee Yehova, andha jubim mir Asiria ginyotho ng’om ceke man bende ng’om migi de. 19 Man gibolo mungu migi i mac, pilembe gibino mungu ngo ento gibino tic mi cing’ dhanu, niwacu yen man kidi. Eno re m’uketho gituc ninyothogi. 20 Ento kawoni, Ee Yehova Mungu mwa, bodhwa kud i cinge, kara ker ceke m’i ng’om ung’ey nia ini kendi m’i Mungu, Ee Yehova.”
21 E Isaya ma wod Amoz uoro kwenda i bang’ Hezekia kumae: “Yehova Mungu mir Israel uwacu kumae: ‘Calu m’irwo i bang’a pir Ubimo Senakerib mir Asiria, 22 Yehova uyero pire kumae:
“Nyasayuni ma sumba ubeceyi, ebeng’ieri.
Nyayeruzalem ubeyengo wiye m’ebeceyi ko.
23 Iroko ng’a man icido nying’ ng’a?
Iting’o dwendi i kum ng’a
Man ng’a m’ineno ku weng’i mi ting’iri?
Tie Ng’atu ma Leng’ mir Israel!
24 Nikadhu kud i bang’ jutic peri, iroko Yehova man iyero kumae:
‘Abiidho malu iwi gudi,
Kaka ma bor mi Lebanon
Kud udul magali mi lwiny para.
Abing’ondo yend tido ma boco m’i iye, yend jenevriye* ma beco m’i iye.
Abimondo kaka ma lir lir m’usagu m’i iye, i luline m’ujiyere nisagu.
25 Abitong’o vuj pii man abimadhu pii;
Abidwono kulo* mi Misiri ku the tienda.’
26 Nyo iwinjo ngo? Akeco lembe maeni niai con.
Ayike* cuu niai con.
Kawoni dong’ abecitime.
Ibidwoko adhura ma tek ni udhuru mir uvuru.
27 Tego mi dhanu mir adhurane bithum;
Jubinyayu ndiri i igi man jubinyayu lewic i wigi.
Gibidoko calu uboko mi lum man lum ma numu,
Calu lum ma twii iwi ot ma yamu ma yo nyangu thwoyo.
28 Ento ang’eyo cuu saa m’ibedo i iye piny, ang’eyo bende saa m’iwok man m’idwogo i iye,
Man saa ma kwinyo benegi i iye i kuma,
29 Pilembe adaru winjo pi kwinyo m’ubenegi i kuma man woy m’ibewoy ko.
Pieno abitong’o gol para i umi man abiketho gwang’ para i kind dend dhogi,
E abipeyi abidwoki kud i yo m’ibino kud i iye.”
30 “‘Man maeni bibedo iri ni giranyutha: oro maeni ibicamu cam m’utwii gire; oro m’i ng’eye ke ibicamu nying camne m’ukek man udok ucek; ento i oro mir adege ibicoyo kodhi, ibikaye, man ibipidho podho mir ulok, e ibicamu nyinge. 31 Dong dhanu mi ot pa Yuda ma giboth, niwacu dong ju m’udong’ gibiguro ulaggi bimondo piny man gibicego nying’gi malu. 32 Kum dong dhanu biwok kud i Yeruzalem man ju m’uboth ke biwok kud iwi Got Sayuni. Amora pa Yehova mir udul bitimo lembuni.
33 “‘Pieno, Yehova uyero pir ubimo mir Asiria kumae:
“Ebimondo ngo i adhura maeni
Kadi ebikilo ngo nying athero acel de i iye,
Ebikiedo ngo i kume kadok ku ban acel
Kadi gang’ ma tek de ebigiero ngo i kume pi nimake.”’
34 ‘Ebidok kud i gengi m’ebino kud i iye;
Ebimondo ngo i adhura maeni,” Yehova wacu.
35 ‘Abicero bang’ adhura maeni man abibodhe pira gira
Man pi Daudi ma jatic para.’”
36 E malaika pa Yehova ubino man unego juaskari elufu dak acel ku pier abora wi abic (185 000) i kagonjo mi Juasiria. Kinde ma dhanu giai pir kugweno, gineno gin ceke givuto ma gin avu. 37 Ubimo Senakerib mir Asiria ugam utugo woth man edok i Nineve, e ebedo kuca. 38 Nindo acel, kinde m’erum piny i ot pa Nisrok ma mungu pare, Adramelek giku Carezer ma gi wote ma buu ginege ku palamularu man giringo i ng’om mir Ararat. E wode ma Esar-hadon udoko ubimo kakare.