Zaburi
BUKU MIR ADEK
(Zaburi 73-89)
Wer p’Asaf.
73 Mungu en e ber andha ni Israel, ni ju m’adundegi leng’.
2 Ento an, tienda yenyo weko yo;
Tienda yenyo kier.
3 Kum kinde m’abino neno kwiyocwiny mi jutimrac
Kumira unega i kum weg ting’iri.*
4 Kum githo ma litho mbe;
Kumgi tie ma leng’.*
5 Gibedieng’ ungo calu dhanu mange,
Kadi gibesendiri de ngo calu jumange.
6 Eno uketho gironyo kuyunga i ng’utgi ve tigo;
Man gironyiri ku rop calu bongu.
7 Lonyo* migi ma dit uketho wang’gi umwony;
Gikadhu kadhiri gin m’adunde romo paru.
8 Gicayu cac man giyero lembe ma reco.
Ginyayu lworo i dhanu ku kuhaya nia gibitimogi rac.
9 Giweco ve gidongo nitundo i polo,
Man lebgi weco iwi lembe ceke m’i ng’om.
10 Pieno dhanu pa Mungu gilokiri i bang’gi,
Man gimadhu kum pii migi ma dit.
11 Giwacu kumae: “Mungu copo ng’eyo lembe m’ubekadhu nenedi?
Nyo andha Ng’atu ma Malu ngbir utie ku ng’eyong’eci?”
12 Eyo, jutimrac gitie kumeno, gin ma saa ceke lembe migi tie miero.
Gibemedo jamcing’gi ameda.
13 Andha agwoko adundena leng’ mananu,
Alwoko cinga mananu pi ninyutho nia lembe mbe i wiya.
14 Abed adieng’ dieceng’ duu;
Man abed anwang’u twiny kubang’ kugweno.
15 Ento ka nwang’u ayero lembe maeni,
Nwang’u acibo dhanu peri.*
16 Kinde m’aii ninyang’ i iye,
Lembene unyotho wiya
17 Nitundo m’amondo i kabedo ma leng’ ma dit pa Mungu,
E aparu cuu pir anyim migi.
18 Andhandha iketho gicungo iwi ng’om ma foth.
Ibiketho gibipodho kara ginyothiri.
19 Nyoth migi bibedo rek mire maa!
Ajiki migi bitundo rek man ebibedo rac mire maa!
20 Calu lek ma rwinyo kinde ma ng’atini ucew, E Yehova,
Kinde m’icew, ibiriemogi* cen.
21 Ento adundena ubino kec,
Man yor i iya* awinjo litho ma lee.
22 Rieko para ubino mbe man akoso nyang’ i lembe;
Abino calu yedi ma rieko pare mbe i weng’i.
23 Ento kawoni atie kudi saa ceke;
Imaku cinga ma yor acwic kii.
24 Ibetelo wiya ku juk peri,
Man i ng’eye ibitera i dwong’.
25 Atie ku ng’a mange i polo?
Man m’uweko in, gin mange m’ayenyo mbe iwi ng’om.
26 Tego mi kuma man mir adundena copo thum,
Ento Mungu en e cana ni adundena
Man en e makapiny para pi rondo ku rondo.
27 Andhandha dhanu ceke ma gibedo bor kudi gibinyothiri.
Ibijigo wi* ng’atu moko ci m’uweki i ayi m’umaku piny ungo.*
28 Ento pira an, nicoro ceng’ini i vut Mungu e ber ira.
Aketho Rwoth Ubimo ma Malu ngbir Yehova ni kapondo para,
Kara atwong’ pi tic pare ceke.