Gwok genogen peri ubed ma tek

1. Yehova umiyo iwa genogen ma kani?

YEHOVA umiyo iwa genogen ma wang’u ijo mi kwo ma rondo ku rondo. Jumoko gitie ku genogen ne mi kwo rondo ku rondo i polo ku kum mi tipo ma tho ngo. (1 Kor. 15:50, 53) Ento jumange dupa lundo, gitie ku genogen mi kwo rondo ku rondo kud anyong’a man ku leng’kum ma ber iwi ng’om. (Nyu. 21:3, 4) Kadok watie ku genogen mi cikwo i polo kunoke iwi ng’omi, genogen ne pire tie tek lee i iwa.

2. Genogen ucungo iwi ang’o, man pirang’o wabeyero kumeno?

² Wec ma jutiyo ko i Biblia nia “genogen,” thelembene copo bedo “nikuro lembe moko ma ber ma bitimere.” Genogen mwa pi nindo m’ubino utie lemandha, kum Yehova re m’umiye. (Rum. 15:13) Wang’eyo gin m’edaru ng’olo man wang’eyo bende nia ekoso ngo nitimo lembe m’eyero. (Wel 23:19) Cwinywa tek nia Yehova utie kud ava man copo mi timo lembe moko ci m’eng’olo nia ebitimo. Pieno, genogen mwa ucungo ngo iwi lembe ma jurambu aramba kunoke ma jubeparu apara, ento iwi kathere mandha.

3. Wabiweco iwi lembang’o i thiwiwec maeni? (Zaburi 27:14)

³ Wegwa m’i polo umaruwa man ebemito wagene. (Som Zaburi 27:14.) Ka genogen mwa i ii Yehova utie ma tek, wabibedo ku copo mi ciro peko man wabinyego ku peko mi nindo m’ubino ku tegocwinywa man kud anyong’a. Dong’ wakenen kite ma genogen copo gwoko kowa. Wakecak nineno nia pirang’o genogen ubedo ve nanga man sabu (casque). I ng’eye ke, wabineno ayi ma wacopo dwoko ko genogen mwa udok ma tek.

GENOGEN MWA UBEDO VE NANGA

4. Genogen mwa ubedo ve nanga i yo ma kani? (Juebrania 6:19)

⁴ I barua ma jakwenda Paulo ukiewo ni Juebrania, eporo genogen mwa ku nanga. (Som Juebrania 6:19.) Paulo ubed uwotho wang’ ma pol ku wi nam, eng’eyo ma ber nia jubed jutiyo ku nanga pi nigwoko yey kara kud ucidh ung’eny i dhu wat. Nindo moko en de ebedo nuti i kind ju m’ubewotho ku yey kinde ma yamu utuk ma tek i wigi. Saa maeno eneno ju m’uringo ku yey ubolo nanga i pii kara yey kud ucidh ugud cana. (Tic. 27:29, 39-41) Calu nanga ketho yey cungo kakare, genogen mwa de ketho wacungo ma tek kara kud wacor bor ku Yehova kinde ma wanwang’ara i peko. Genogen m’ucungo ma tek konyowa wakadhu kud i yamu ma tek, niwacu peko; kum nwang’u wang’eyo nia lembe bidoko ber. Poy nia Yesu ular upoyowa nia jubinyayu ragedo i kumwa. (Yoh. 15:20) Pieno, ninyamu lembe iwi mugisa mi nindo m’ubino bikonyowa nitimo asu ni Yehova.

5. Genogen ugwoko Yesu nenedi kinde m’ebino nwang’ere i wang’ tho?

⁵ Wakenen kite ma genogen uketho ko Yesu ucungo ma tek i wang’ tho mi litho m’ubino kure. Nindo moko i ceng’ Pentekoste mi oro 33 N.N.Y., jakwenda Pethro udok iwi lembila mi buku mi Zaburi m’uweco pi tegocwiny pa Yesu. Ewacu kumae: “Abikwo ku genogen; kum ibiweka ngo i Kabuli, kadi ibiyiyo ngo kum ng’atu ma leng’ peri utopi. . . . Ibipong’a kud anyong’a ma lee i weng’i.” (Tic. 2:25-28; Zab. 16:8-11) Kadok Yesu ung’eyo nia ebitho de, re ebedo ku genogen ma tek nia Mungu bicere, man nia ebidorombo kendo ku Won i polo.​—Ebr. 12:2, 3.

6. Umego moko uyero lembang’o pi genogeni?

⁶ Genogen mwa mi Jukristu udaru konyo umego ku nyimego mwa dupa niciro peko. Wakewec iwi lapor p’umego Leonard Chinn, m’i ng’om mir Angleterre. I saa mi lwiny ma kwong’a mi ng’om zoo, jugam jutwiye pilembe ya ekwero nimondo i tic mir askari. Juketho ebedo kende pi dwi ario, man i ng’eye judiye nitimo tic ma tek. I ng’ey lembuno ekiewo kumae: “Lembe m’akadhu kud i iye uketho aneno nia kara wamedara niciro, genogen utie gin ma pire tek. I Biblia, watie ku lapor pa Yesu, mi jukwenda, mi jubila man bende lembang’ola ma pigi tek. Lembe maeno ceke miyo iwa genogen ma dit pi nindo m’ubino man tego mi ciro lembe.” Genogen ubino ve nanga ni Leonard, man iwa de ecopo bedo lembe ma rom.

7. Peko ma wanwang’ara ko ketho genogen mwa doko tek nenedi? (Jurumi 5:3-5; Yakobo 1:12)

⁷ Ka waciro peko man waneno kite ma Yehova ukonyo kowa i lembene, genogen mwa doko tek man anyong’a nego Yehova i kumwa. (Som Jurumi 5:3-5; Yakobo 1:12.) Pieno, genogen mwa doko tek nisagu ma walar wabino ko kinde ma fodi wamondo amonda i lemandha. Sitani ubemito peko nurwa, ento ku kony pa Yehova, wacopo ciro pekonegi ceke.

GENOGEN MWA UBEDO VE SABU

8. Genogen ubedo ve sabu i yo ma kani? (1 Juthesaloniki 5:8)

⁸ Biblia uporo bende genogen mwa ku sabu. (Som 1 Juthesaloniki 5:8.) Jaaskari kendo sabu kara ugwok wiye i kum ret ma jadhoge umito nyayu i kume i lwiny. Wan de mito wagwok wiwa, niwacu paru mwa i kum ret ma Sitani copo nyayu i kumwa. Ebeoyo amulaic aoya i wiwa man lembe mange ma tung’ tung’ kara unyoth paru mwa. Tap calu ma sabu gwoko wi jaaskari, genogen mwa de gwoko paru mwa kara wamedara asu nigwoko bedoleng’ mwa ni Yehova.

9. Ka dhanu gimbe ku genogen, gitimo ang’o?

⁹ Genogen mwa mi kwo ma rondo ku rondo bikonyowa nitimo ku rieko man ku ng’iyo i lembe. I thenge mange, ka genogen mwa ukwiyo man waweko paru mi kum re m’ubimo wiwa, wacopo wil ku genogen mwa mi kwo ma rondo ku rondo. Wakenen lembe moko m’unwang’u Jukristu m’ubino kwo con i Korintho. Gibayu yiyoyic migi i lembang’ola pa Mungu ma pire tek, niwacu genogen mi cer. (1 Kor. 15:12) Paulo ugoro nia ju ceke ma gimbe ku genogen mi cer, gikwo migi kende kende pi nipong’o ava migi ma ndhundhu. (1 Kor. 15:32) Tin dhanu dupa ma gimbe ku genogen i lembang’ola pa Mungu, gitimo lembe moko ci kara gibed kud anyong’a, ke pi kawoni. Wan lundo, waketho genogen mwa i lembe ma Mungu ung’olo pi nindo m’ubino. Genogen mwa utie iwa ve sabu, egwoko paru mwa, man ekonyowa i kum ng’iyong’ic ma copo nyotho winjiri mwa ku Yehova.​—1 Kor. 15:33, 34.

10. Genogen copo gwokowa nenedi i kum paru ma raci?

¹⁰ Genogen mwa copo gwokowa bende i kum paru ma nia waromo timo ngo lembe ma nyayu anyong’a i Yehova. Ku lapor, jumoko copo paru kumae: ‘An e, acopo bedo ngo zoo de i kind dhanu ma bikwo rondo ku rondo, tija mbe! Aromo kwo ngo nimakere ku cik mir ukungu pa Mungu.’ Poy nia Elifaz ma jamii juk ma rac, de ugam utiyo ku paru ma rom eno kinde m’ebeweco ku Yob. Ewacu kumae: “Dhanu en e ang’o, ma nia ebedo leng’i?” Edok eyero pi Mungu kumae: “Nen, eketho genogen ungo kum jumaleng’ pare; eyo, polo de leng’ ungo i wang’e.” (Yob 15:14, 15) Eno vupo mi tuko! Iparu nia ng’a m’ucwale niwodho paru maeno? Tie Sitani. Sitani ung’eyo nia kan iweko paru maeno ubedo asu i wii, ibibayu genogen peri. Pieno, koc kud i kum vupo ma kumeno man keth wii zoo i kum lembang’ola pa Yehova. Bed ma cwinyi tek nia ebemito ikwo rondo ku rondo, man ebikonyi kara itund i kum lembakeca maeno.​—1 Tim. 2:3, 4.

GWOK GENOGEN PERI UBED MA TEK

11. Pirang’o wacikara nibedo jucir lembe kinde ma wabekuro nindo ma lembe ma wageno bitimere i iye?

¹¹ Etie yot ungo nigwoko genogen mwa ubed ma tek saa ceke. Wacopo nwang’u nia Mungu ubegalu nipong’o lembang’ola pare. Ento Yehova tie ng’atu ma kwo rondo ku rondo. Nindo ma wabeneno nia tie lee, i wang’e lundo nwang’u utie nyanok. (2 Pet. 3:8, 9) Ebitimo lembe m’eng’olo, ke i saa m’ukwayere; re ecopo time ngo i nindo ma wabemito wan. Dong’ ang’o ma bikonyowa nigwoko genogen mwa ubed ma tek kinde ma wabekuro ku cirocir pong’o mi lembang’ola pare?​—Yak. 5:7, 8.

12. Nimakere ku Juebrania 11:1, 6, ang’o ma biketho genogen mwa bidoko teki?

¹² Genogen mwa bibedo ma tek, ka wabedo asu ceng’ini ku Yehova, pilembe en re m’ebiketho lembe ma wageno bitimere. Kara wabed ku genogen, mito walar wayii nia Yehova unuti man nia etie “ng’atu ma miyo sukulia ni dhanu m’ubeyenye ku cwinygi ceke.” (Som Juebrania 11:1, 6.) Ka waneno Yehova ni ng’atu m’unuti andha, wabibedo ma cwinywa tek nia ebipong’o lembe ceke m’eng’olo. Wakenen lembe moko ma waromo timo ma copo ketho kindwa doko ceng’ini mandha ku Yehova, man nigwoko genogen mwa ubed ma tek.

13. Waromo coro ceng’ini i vut Mungu nenedi?

¹³ Rwo i bang’ Yehova man som Lembe pare. Kadok wacopo neno ngo kum Yehova de, re waromo coro ceng’ini i vute. Wacopo weco kude nikadhu kud i rwo ma nwang’u cwinywa tek nia ebiwinjowa. (Yer. 29:11, 12) Waromo winje ke nwang’u wabesomo Lembe pare man nwang’u wabenyamu iye. Ka wasomo pi kite ma con Yehova ugam ugwoko ko ju m’ugwoko bedoleng’ migi ire, e genogen mwa bidoko tek nisagu. Lembe ceke ma nwang’ere i Lembe pa Mungu “ukiewere pi ponji mwa, kara ni kum cirocir mwa man jukojuk ma wanwang’u i Lembagora, wabed ku genogen.”​—Rum. 15:4.

14. Pirang’o mito wabed wanyam i lembe iwi gin ma Yehova udaru timo ni jumange?

¹⁴ Nyam lembe iwi kite ma Yehova upong’o ko lembang’ola pare. Kenen gin ma Mungu utimo ni Abraham giku Sara. Nwang’u dong’ gidaru tii ma gicopo nyolo ngo nyodo. Re Mungu ung’olo igi nia gibinyolo nyathin. (Tha. 18:10) Abraham utimo ang’o? Biblia uyero kumae: “Eyiyo nia ebidoko wego mi thek dupa.” (Rum. 4:18) Kadok nwang’u i nen pa dhanu juromo geno ngo lembuno de, re cwiny Abraham ubino tek nia Yehova bipong’o lembang’ola pare. Cwinye utur ngo zoo de. (Rum. 4:19-21) Lembe maeno ubeponjowa nia mito saa ceke wajengara iwi Yehova nia ebipong’o lembang’ola pare, kadok lembene ubenen iwa nia ecopere ngo de.

15. Pirang’o mito wabed wapar pi gin ma Yehova udaru timo iwa?

¹⁵ Par pi gin ma Yehova udaru timo iri. Kepar pi bero m’idaru nwang’u i kum pong’o mi lembang’ola ma nwang’ere i Lembe pa Mungu. Ku lapor, Yesu ung’olo nia Won bipong’o yeny mi gin ma pigi tek pi kwo peri. (Mat. 6:32, 33) Ewacu bende nia Yehova bimiyo iri tipo pare ma leng’ tek ikwayu. (Luka 11:13) Yehova upong’o lembang’ola maenogi. Pieno, kepar pi lembang’ola mange ma Yehova udaru timo iri. Ku lapor, eng’olo iri nia ebitimo iri kisa, ebijuko cwinyi, man ebitungi i thenge mi tipo. (Mat. 6:14; 24:45; 2 Kor. 1:3) Kan ibeparu pi gin ma Yehova udaru timo iri, genogen peri bidoko tek pi lembe m’ebitimo iri i nindo m’ubino.

ANYONG’A NEGI I GENOGEN

16. Pirang’o genogen utie giramiya ma pire tek lee?

¹⁶ Genogen mwa mi kwo ma rondo ku rondo utie giramiya ma pire tek lee m’uai i bang’ Mungu. Wabekuro kud ava lembe ma ber ma bitimere i nindo m’ubino, kum cwinywa tek nia ebitimere andha. Genogen ubedo iwa ve nanga, ebeketho waciro peko, wacungo ma tek i wang’ ragedo, man kadok i wang’ tho bende. Ebedo iwa ve sabu, ebegwoko paru mwa kara wakoc ku gin ma rac, man wamok i kum gin ma ber. Genogen mwa m’ujengere iwi Biblia ketho wacoro ceng’ini ku Mungu, man enyutho mer ma dit ma Mungu umaru kowa. Wanwang’u bero lee dit ka wabegwoko genogen mwa ubed ma tek.

17. Pirang’o genogen mwa ketho wabedo kud anyong’a?

¹⁷ I baruwa ma jakwenda Paulo ukiewo ni Jurumi, emiyo tielocwiny ma e: “Anyong’a negwu i genogen.” (Rum. 12:12) Paulo ubino kud anyong’a dre, pilembe cwinye bedo tek nia kan egwoko bedoleng’ pare, ebinwang’u kwo ma rondo ku rondo i polo. Wan de anyong’a copo negowa i genogen, pilembe cwinywa tek nia Yehova bipong’o lembang’ola pare. Jagor zaburi ukiewo kumae: “Ng’atu . . . ma genogen pare ni i Yehova Mungu pare,” m’e Mungu ma “gwoko lemandha mi nja, . . . en e jamutoro.”​—Zab. 146:5, 6.