THIWIWEC MIR 5
WER 108 Mer mi gwokobedoleng’ pa Mungu
Bero ma wanwang’u nikum mer ma Yehova umaru kowa
“Kristu Yesu ubino i ng’om pi nibodho judubo.”—1 TIM. 1:15.
I ADUNDO
Bero ma wanwang’u nikum jamgony man kite ma wacopo nyutho ko foyofoc mwa ni Yehova.
1. Wacopo timo ang’o pi ninyayu anyong’a i Yehova?
KEPAR nia imiyo ni ng’atu moko giramiya moko ma leng’ man m’etie ku yenyne. Cwinyi romo tur lee ka ng’atune ulund ukane i the kavuto ma dong’ ebeparu de ngo pire! I ng’ete m’ucelo lundo, anyong’a romo negi lee kan ebetiyo kude ma ber man efoyi pire. Lapor maeni urombo nenedi ku giramiya mi jamgony? Yehova umiyo Wode piwa. Kepar kite m’anyong’a ucikere ninege ko ka wabenyutho foyofoc pi giramiya maeno ma pire tek lee man pi mer m’enyutho iwa, niwacu mer m’ucwale nimiyo iwa jamgony!—Yoh. 3:16; Rum. 5:7, 8.
2. Wabiweco iwi lembang’o i thiwiwec maeni?
2 Ento ku nindo m’ubekadhu, waromo caku neno ngo valer pa giramiya mi jamgony. Ecopo bedo ve wakanu giramiya ma Mungu umiyo iwa i the kavuto. Andha watie kud anyong’a nia emiye iwa, re wakethe kaka ma wiwa romo wil kude. Kara lembuno kud utimere, wacikara nibeparu thiri thiri pi gin ma Mungu giku Kristu gitimo iwa. Thiwiwec maeni bikonyowa tap nitimo kumeno. Wabineno bero ma jamgony ubemiyo iwa niai kawoni man m’ebimiyo i nindo m’ubino. Wabineno bende ayi ma wacopo nyutho ko foyofoc mwa ni Yehova pi mer m’enyutho iwa, asagane i kind nindo maeni mi Poy pi tho pa Yesu.
BERO MA JAMGONY UBEMIYO IWA NIAI KAWONI
3. Jamgony ubemiyo iwa bero moko acel ma kani niai kawoni?
3 Kawoni de wabenwang’u bero i kum lam mi jamgony ma Kristu uthiero. Ku lapor, Yehova weko dubo mwa iwi ukungu mi jamgony. Etie ire ngo ni ng’ol ku cik nia ewek iwa; en re m’ebemito. Foyofoc ucwalu jagor zaburi niwero kumae: “Kum in, E Yehova, i ber man itie ayika niweko lembe.”—Zab. 86:5; 103:3, 10-13.
4. Yehova umiyo jamgony pi jukani? (Luka 5:32; 1 Timoteo 1:15)
4 Jumoko giromo paru nia giromo ngo ku kisa pa Yehova. I andha de, wan ceke waromo ngo. Jakwenda Paulo uyero nia ‘eromo ngo nia julwong’e jakwenda’ pilembe ya ebed ‘enyayu ragedo i kum cokiri pa Mungu.’ Ento emedo kumae: “Ni kum bero ma yawe mbe pa Mungu, atie calu m’atie eni.” (1 Kor. 15:9, 10) Ka waloko cwinywa i kum dubo mwa, Yehova weko iwa. Pirang’o? Utie ngo pilembe ya waromo ku kisa pare, ento pilembe emaruwa. Tek paru ma nia tiji mbe ubesendi, poy nia Yehova umiyo ngo jamgony pi dhanu m’ukoso dubo, ento pi judubo m’uloko cwinygi.—Som Luka 5:32; 1 Timoteo 1:15.
5. Nyo ng’atu moko m’i kindwa romo paru nia eromo ku kisa pa Yehova? Kekor.
5 Ng’atu acel de mbe m’i kindwa ma romo paru nia eromo ku kisa pa Yehova, eno ke kadok edaru timo ire pi oro ma dupa. Andha Yehova foyo tic ceke ma wabetimo ire ku gwoko bedoleng’. (Ebr. 6:10) Re emiyo iwa Wode calu giramiya mi mananu, ento ungo pi niculowa pi tic ma watimo. Pieno tek wabeparu nia waromo ku kisa pa Yehova pilembe ya wadaru timo ire lembe lee, nyutho nia wabeparu nia wabino mbe ku yeny ma Yesu utho ko piwa.—Nen lembe m’uyenyo rombo kude i Jugalatia 2:21.
6. Pirang’o Paulo utimo tic pa Yehova ku kero pare zoo?
6 Paulo ugam ung’eyo nia tic pare ngo re ma biketho enwang’ bero i wang’ Mungu. Dong’ pirang’o ke etimo tic pa Mungu ku kero pare zoo? Ubino pi ninyutho foyofoc pare ni Yehova pi bero ma yawe mbe m’etimo ire. (Efe. 3:7) Calu Paulo, wan de wabemedara nitimo ni Yehova kud amora, ungo pi ninwang’u kisa pare ento pi nifoye pi kisa m’etimo iwa.
7. Wabenwang’u bero mange ma kani nikum jamgony niai kawoni? (Jurumi 5:1; Yakobo 2:23)
7 Bero mange ma jamgony ubemiyo iwa niai kawoni utie nia wacopo bedo ku winjiri ma ceng’ini man ma segi ku Yehova.a Calu ma waneno i thiwiwec m’ukadhu, wabino ngo jurimb Mungu saa ma wanyolara. Ento nikum jamgony wacopo “bedo ku kwiyocwiny i kindwa ku Mungu,” e kumeno wacopo coro bende ceng’ini i vute.—Som Jurumi 5:1; Yakobo 2:23.
8. Pirang’o ukwayu wabed wafoy Yehova pi rwom mi rwo m’emiyo iwa?
8 Wakewecu iwi lembe acel kende m’ugwaku kum winjiri mwa ku Yehova, niwacu rwom mi rwo i bang’e. Yehova winjo kende kende ngo rwo ma dhanu pare girwo kinde ma gicokiri karacelo, ento bende rwo ma segi pa ng’atuman m’i kindwa. Rwo copo juko cwinywa man emiyo iwa kwiyocwiny mir adunde. Emiyo iwa bero maenogi kende ngo. Ecopo dwoko bende winjiri m’i kindwa ku Mungu doko tek. (Zab. 65:2; Yak. 4:8; 1 Yoh. 5:14) Saa ma Yesu ubino iwi ng’om, ebed erwo wang’ ma pol pilembe egam eng’eyo nia Yehova ubino winje man nia rwo biketho winjiri m’i kindgi ku Won bidoko tek. (Luka 5:16) Watie kud anyong’a ma lee nia nikum lam ma Yesu uthiero, wacopo bedo jurimb Yehova man waweco kadok i bang’e nikadhu kud i rwo!
BERO MA JAMGONY BIMIYO IWA I NINDO M’UBINO
9. Jamgony bimiyo bero ma kani ni jutic pa Yehova ma weg bedopwe i nindo m’ubino?
9 Jamgony bimiyo bero ma kani ni jutic pa Yehova ma weg bedopwe i nindo m’ubino? Yehova bimiyo igi kwo ma rondo ku rondo. Dhanu ma dupa giparu nia lembuno copere ngo pilembe ya dhanu ucaku tho niai con dit. Ento lembakeca ma Yehova ubino ko pi dhanu niai i acaki utie nia gikwo rondo ku rondo. Ka nwang’u Adamu udubo ngo, nwang’u ng’atu moko mbe m’ubeciparu nia kwo ma rondo ku rondo copere ngo. Man kadok kawoni etie iwa tek niparu ayi ma kwo ma rondo ku rondo bibedo ko de, re cwinywa copo bedo tek nia ebitundo pilembe Yehova udaru culo welpiny m’ukwayere kara wanwang’e, niwacu kwo pa Wode m’emaru.—Rum. 8:32.
10. Jukristu ma juwiro ku rombe mange gibekuro ang’o kud ava ma lee?
10 Kadok wabinwang’u mugisa mi kwo ma rondo ku rondo i nindo m’ubino de, re Yehova ubemito wacak paru pire niai kawoni. Jukristu ma juwiro gibekuro kud ava kwo ma ber m’i polo kinde ma gibibimo wi ng’om karacelo ku Kristu. (Nyu. 20:6) Rombe mange gibekuro nikwo iwi ng’om m’umbe ku litho man peko i iye. (Nyu. 21:3, 4) Nyo itie acel m’i kind rombe mange man ibekuro kwo m’ajikine mbe iwi ng’om? Kud ipar nia kwo m’i polo usagu maeno! Nwang’u de Mungu ucwiyo dhanu pi nikwo iwi ng’om. M’umbe jiji, wabinwang’u anyong’a ma yawe mbe iwi ng’om.
11-12. Wacopo kuro mugisa moko ma kani m’i Paradizo kud ava ma lee? (Nen bende cal.)
11 Kepar kite ma kwo peri bibedo ko iwi ng’om m’udoko ni Paradizo! Lworo binegi ngo nyanok de nia saa moko twoyo bimeki kunoke nia ibitho. (Isa. 25:8; 33:24) Yehova bipong’o yeny peri ceke ma pigi tek. Ibimaru iponj tic ma kani i ng’om ma nyen? Nyo ibimaru iponj lembe iwi leya kunoke iwi winyo? Nyo ibimaru iponj jamgoyo wer moko kunoke kubo cal? M’umbe jiji, yeny mi jukub pla mi ot, yeny mi jurugiedo man mi jurufur bibedo lee mandha. Jubibedo bende ku yeny mi jubodho mi pidho cam, mi tedo, mi yiko jamtic ma tung’ tung’, mi pidho thiwe man mi yiko kumgi. (Isa. 35:1; 65:21) Calu m’ibikwo nja ku nja, ibinwang’u saa mi timo tic mi bodho moko ci m’imito.
12 Ebibedo anyong’a ma lee dit nijolo ju m’ucer! (Tic. 24:15) Kepar bende pir anyong’a m’ibinwang’u kinde m’ibeponjo lembe iwi Yehova nikadhu kud i giracwiya pare ma wendgi kwanere ngo. (Zab. 104:24; Isa. 11:9) Ento m’usagu zoo, ebibedo anyong’a ma lee nitimo ni Yehova m’umbe pidocwiny moko acel de m’ubesendowa! Nyo andha ibemito iwil mugisa maeno ceke kud “anyong’a mi dubo ma kadhu akadha”? (Ebr. 11:25) Tak de ngo! Mugisa ma wabinwang’u usagu piny ceke ma wacopo weko i ng’om maeni. Poy nia ng’om m’udoko ni Paradizo bibedo kwa ngo ni genogen mi nindo m’ubino. Saa biromo ma wabikwo andha i iye. Nwang’u lembuno zoo cicopere ngo ka nwang’u Yehova umaruwa ngo cil m’emiyo ko iwa Wode!
Mugisa ma kani m’i Paradizo m’ibekuro kud ava ma lee nisagu zoo? (Nen udukuwec mir 11-12)
FOY YEHOVA PI MER M’ENYUTHO IRI
13. Wacopo foyo Yehova nenedi pi mer m’enyutho iwa? (2 Jukorintho 6:1)
13 Wacopo foyo Yehova nenedi pi jamgony m’emiyo iwa? Nwang’u wabeketho tic pare i kabedo ma kwong’a i kwo mwa. (Mat. 6:33) Ka waparu ber, Yesu utho “kara ju m’ubekwo kud gikwo kendo pigi gigi, ento gikwo pire en m’etho pigi man egam ecer.” (2 Kor. 5:15) M’umbe jiji, wabemito ngo nyanok de nia wajol bero ma yawe mbe pa Mungu mi mananu.—Som 2 Jukorintho 6:1.
14. Wacopo nyutho nenedi nia watie ku yiyoyic i telowic pa Yehova?
14 Wacopo foyo bende Yehova pi mer m’enyutho iwa nwang’u wabenyutho nia watie ku yiyoyic i telowic pare. Nenedi? Saa ma wabemaku yub, calu ve iwi kadhiri ponjiri m’ukwayu walubi kunoke iwi kit tic m’ukwayu wayii, wacikara niparu pi gin ma Yehova ubemito watim. (1 Kor. 10:31; 2 Kor. 5:7) Ka yub mwa ubenyutho nia watie ku yiyoyic, e lembe moko mi wang’uic bitimere; yiyoyic mwa i Yehova man winjiri mwa kude bidoko tek nisagu. Genogen mwa de bidoko ni piny m’unuti andha.—Rum. 5:3-5; Yak. 2:21, 22.
15. Wacopo nyutho foyofoc mwa nenedi i kind nindo mi Poy pi tho pa Yesu?
15 Yo mange de nuti ma wacopo nyutho ko foyofoc mwa ni Yehova pi mer m’enyutho iwa. Utie nitimo gin ceke ma wacopo i kind nindo mi Poy pi tho pa Yesu pi ninyutho nia wabefoyo Yehova pi jamgony. M’uweko pangu nicidho i Poy pi tho pa Yesu, wacopo lwong’o bende jumange. (1 Tim. 2:4) Kor lembe ma bikadhu i saa mi Poy pi tho pa Yesu ni ju m’ilwong’o. Icopo nyutho igi bende video m’i jw.org ma thiwigi tie Pirang’o Yesu utho? man Wapoi pi tho pa Yesu. Bikwayu judong cokiri ginen nia gilwong’o ju m’ukwiyo i tipo. Kepar pir anyong’a ma bibedo i polo kud iwi ng’om bende kinde ma rombe pa Yehova moko m’urwinyo udwogo i dwol pare! (Luka 15:4-7) I saa mi Poy pi tho pa Yesu, wek wan ceke wanen nia wamothara i kindwa kende ngo, ento asagane wamoth welo ku ju m’ubino kendo i ng’ey nindo ma lee. Wabemito waketh giwinjiri nia gitie ajola.—Rum. 12:13.
16. Pirang’o ukwayu wapar nirweyo pi saa ma lee i kind nindo mi Poy pi tho pa Yesu?
16 Ineno nenedi kan irweyo pi saa ma lee i kind nindo mi Poy pi tho pa Yesu? Eno tie ayi ma ber mi nyutho foyofoc mwa pi gin ceke ma Mungu giku Kristu gitimo iwa. Ka wabemedara nitimo lee i tic pa Yehova, e wabinwang’u kony pare de lee, man adwogine bibedo nia genogen ma watie ko i wiye bimedere. (1 Kor. 3:9) Nen bende nia iworo Program mi som mi Biblia pi Poy pi tho pa Yesu ma jurieyo i nyathibuku Wang’iyu i Lembagora kubang’ ceng’ kunoke ma nwang’ere i buku mi coko m’i kind yenga. Iromo ng’iyo bende niponjo giragora maenogi i saa mi ponji peri ma segi.
17. Ang’o ma nyayu anyong’a i Yehova? (Nen bende sanduku ma thiwiye tie, “Ayi mi foyo Yehova pi mer pare.”)
17 Saa moko nyo eromo copere ngo iri nitimo lembe ceke ma waweco pigi i thiwiwec maeni. Ento poy nia Yehova poro ngo gin m’ibemiyo ire ku ma jumange gibemiyo; eneno lembe ma n’i adundeni. Anyong’a nege lee kan ebeneno nia adundeni udhir ku foyofoc pi giramiya pare ma pire tek lee, niwacu jamgony.—1 Sam. 16:7; Mark. 12:41-44.
18. Pirang’o wabefoyo Yehova Mungu giku Yesu Kristu?
18 Utie ndhu nikum jamgony kende re ma Yehova copo weko dubo mwa, ma wacopo bedo jurimbe man wacopo bedo ku genogen mi kwo ma rondo ku rondo. Dong’ wek saa ceke wabed wanyuth foyofoc mwa ni Yehova pi mer pare m’ucwale nimiyo iwa kaka mi nwang’u mugisa maeno ceke. (1 Yoh. 4:19) Wek wanyuth bende foyofoc mwa ni Yesu m’umaruwa lee mandha uketho emiyo kwo pare piwa!—Yoh. 15:13.
WER 154 Mer jik i yo ki ngo