Ponji ma wacopo nwang’u i barua ario pa Pethro

1. Nyanok i wang’ tho pa Pethro, etimo ang’o ku kony mi tipo ma leng’?

JAKWENDA Pethro ugam utimo ni Yehova ku bedopwe pi oro ma dupa man saa moko enyang’ nia dong’ ajiki mi kwo pare ni ceng’ini. I kind nindo maeno, ewotho karacelo ku Yesu, eyabu dhu tic mi lembanyong’a i kabedo ma dupa man ebino acel m’i kind umego mi guriri m’utelowic. Re tic pare ujik eno kende ngo. I kum oro 62-64 N.N.Y., ku kony mi tipo ma leng’ ekiewo barua ario ma tin julwong’o Pethro mi 1 ku mir 2. Eyero nia etie ku genogen nia barua maeno bikonyo Jukristu i ng’ey tho pare.—2 Pet. 1:12-15.

2. Pirang’o wayero nia barua ma Pethro ukiewo utundo tap i saane?

² Pethro ukiewo barua pare i saa ma ‘can ubenego [umego ku nyimego pare] pir amulaic ma tung’ tung’ ma gibenwang’iri ko.’ (1 Pet. 1:6) I saa maeno nwang’u dhanu ma reco gicaku royo ponji mi ndra man timo m’ucido i cokiri. (2 Pet. 2:1, 2, 14) Bende, nwang’u Jukristu ma gibekwo i Yeruzalem gibecineno “ajiki mi piny ceke,” niwacu nyoth ma juaskari mi Roma gicikelo iwi adhurane. (1 Pet. 4:7) M’umbe jiji, barua pa Pethro ukonyogi ning’eyo gin ma giromo timo pi niciro amulaic ma gibenwang’iri ko man nibedo ayika pi ma bibino.b

3. Pirang’o ukwayu wang’ii i barua pa Pethro?

³ Kadok nwang’u Pethro ugam ukiewo barua pare ni Jukristu mi rundi ma kwong’a de, re Yehova uketho juroyogi i Biblia. Pieno wan de tin wacopo nwang’u bero niai kud i igi. (Rum. 15:4) Calu ma wabekwo i ng’om ma timo m’ucido unyay lee i iye, ecopo bedo tek iwa de nitimo ni Yehova. Bende, ceng’ini eni wabinwang’ara ku masendi ma dit m’usagu nyoth mi Yeruzalem. Dong’ wacopo nwang’u poyowic moko ma pigi tek i barua ario ma Pethro ukiewo. Poyowicne bikonyowa nikuro nindo pa Yehova, nivoyo lworo mi dhanu, man nimaru umego ku nyimego mwa lee mandha. Gibikonyo bende judong cokiri nineno gin ma gicopo timo pi nipong’o yeny mir udul rombe ma ber mandha.

MEDIRI NIKURO NINDO PA YEHOVA

4. Calu ma 2 Pethro 3:3, 4 unyutho, ang’o ma copo kwiyo yiyoyic mwa?

⁴ Wabekwo i kind dhanu m’umbe ku yiyoyic i lembila mi Biblia. Judegi mwa giromo ng’iero dhogwa pilembe wadaru kuro ajiki kud ava ma lee pi oro m’ulwar. Jumange ke giyero nia ebibino ngo abina zoo de. (Som 2 Pethro 3:3, 4.) Ka wawinjo wec ma kumeno i bang’ ng’atu ma waberweyo ire, jaratic wadwa kunoke wat mwa moko, wan de waromo caku bedo ku jiji. Re Pethro unyutho gin ma copo konyowa.

5. Ang’o ma bikonyowa nikuro ajiki mi ng’om maeni ku pidoic ma beri? (2 Pethro 3:8, 9)

⁵ Jumoko giromo paru nia Yehova ubegalu dit ku kelo ajiki mi ng’om ma rac maeni. Re wec pa Pethro copo konyowa nikuro ajikine ku pidoic ma ber, pilembe gibepoyo wiwa nia kite ma Yehova neno ko saa ukoc bor dit ku kite ma dhanu neno ko. (Som 2 Pethro 3:8, 9.) I wang’ Yehova, oro elufu acel ubedo ve nindo acel. Bende, Yehova ubemwonyo lembe hai, kum ebemito ngo nia ng’atu moko acel de unyothere. Re saa ma nindo pare biromo, ajiki mi ng’om maeni bitundo andha. Etie iwa rwom ma lee nitiyo ku dong’ saa maeni pi nimiyo lembatuca ni dhanu mi thek ceke.

6. Wacopo ‘bepoy pi nindo pa Yehova saa ceke’ nenedi? (2 Pethro 3:11, 12)

⁶ Pethro ukwayuwa nia ‘saa ceke wabed wapoy’ pi nindo pa Yehova. (Som 2 Pethro 3:11, 12.) Wacopo poy pire nenedi? Pire tie tek nia kubang’ ceng’ wabed wapar pi mugisa ma wabinwang’u i ng’om ma nyen. Ku lapor, kepar nia ibeyuyo yamu ma ng’ic ma ber, ibecamu cam ma giero kum, ibejolo dhanu m’imaru m’ucer man ibeponjo dhanu m’ukwo oro ma dupa i wang’ pong’o mi lembila mi Biblia. Paru ma kumeno bikonyi nikuro nindo pa Yehova man biketho cwinyi bibedo tek nia andha ajiki mi ng’om maeni ni kago. ‘Calu ma walar wang’eyo lembe [mir anyim] i wang’e,’ juponji mi ndra biketho ngo ‘wakier.’—2 Pet. 3:17.

VOY LWORO MI DHANU

7. Lworo pa dhanu copo bedo kud atelatela ma kani i wiwa?

⁷ Calu ma wacuku paru pi nindo pa Yehova, eno ubecwaluwa nirweyo lembanyong’a ni jumange. Re saa moko waromo bedo ku jiji mi weco i bang’ dhanu. Pirang’o? Pilembe waromo lworo wec man timo migi. Lembuno ugam utimo Pethro. I uthieno ma jubeng’olo lembe pa Yesu, elworo niyero nia etie acel m’i kind julub pare man ekwero wang’ dupa nia kadok ang’eya de eng’eye ngo. (Mat. 26:69-75) Re en ma rom edog eyero ku tegocwinye kumae: “Kud wulwor gin ma gibelworo, kadi cwinywu de kud ung’abere.” (1 Pet. 3:14) Wec maeno ubetego cwinywa nia wacopo voyo lworo pa dhanu.

8. Ang’o ma copo konyowa nivoyo lworo mi dhanu? (1 Pethro 3:15)

⁸ Ang’o ma copo konyowa nivoyo lworo mi dhanu? Pethro uyero iwa kumae: “Wudwok Kristu udok leng’ i adundewu calu Rwoth.” (Som 1 Pethro 3:15.) Eno ubenyutho niparu pi dito man tego pa Rwoth man Ubimo mwa ma Kristu Yesu. Ka kumi ubemiel man lworo ubenegi saa ma kaka unen iri mi rweyo lembanyong’a, poy ndhu pir Ubimo mwa. I saa maeno kepar nia ebebimo i polo man jumalaika ma wendgi kwanere ngo gin’i ng’ete. Poy bende nia etie ku “dito ceke . . . i polo kud i ng’om bende” man nia ebibedo ‘karacelo kudi i nindo ceke nitundo i kajik mi ng’om.’ (Mat. 28:18-20) Pethro ukwayuwa nia wabed “ayika saa ceke” pi nicero bang’ yiyoyic mwa. Nyo imito imii lembatuca kaka m’itimo iye tic, i somo, kunoke kaka mange? Tek eyo, par con con pi saa m’ibirweyo i iye man gin m’ibiweco i wiye. Bende, kway Yehova umii iri tegocwiny man bed ku genogen nia ebikonyi nivoyo lworo mi dhanu.—Tic. 4:29.

“WUMERURU I KINDWU LEE MANDHA”

9. Saa moko Pethro ukoso ninyutho mer nenedi? (Nen bende cal.)

⁹ Pethro uponjo ayi mi nyutho mer. Ebino nuti kinde ma Yesu ubeyero kumae: “Abemiyo iwu cik ma nyen, nia wumeruru i kindwu; tap calu m’amaruwu, wun bende wumeruru i kindwu.” (Yoh. 13:34) Kadok kumeno de, i ng’eye Pethro ulworo dhanu man ekwero nicamu karacelo kud umego ku nyimego pare ma gi Juyahudi ngo. Jakwenda Paulo ulwong’o timo maeno nia “paliri,” kunoke timo mir umbili. (Gal. 2:11-14) Ejolo juk ma Paulo umiyo ire man lembuno umiyo ire ponji. Pieno, i barua pare ario ceke ekiewo nia ukwayu ngo wayer ayera kende nia wamaru umego ku nyimego mwa, ento wanyuth bende merne ku timo.

10. Kara wanyuth “mer mir umego m’umbe umbili” i iye, mito watim ang’o? Kekor. (1 Pethro 1:22)

¹⁰ Pethro uyero nia wamar juyic wadwa ku “mer mir umego m’umbe umbili” i iye. (Som 1 Pethro 1:22.) Wabimarugi ku kit mer maeno nwang’u wabekwo nimakere ku “lemandha” ma wabeponjo. Lemandhane uketho i iye ponji ma nia “Mungu umbe kud akoyakoya.” (Tic. 10:34, 35) Kan i cokiri wabenyutho mer ni jumoko kende, eno nyutho nia wabeworo ngo cik ma Yesu umiyo iwi mer. Andha re calu Yesu, kindwa romo bedo ceng’ini magwei ku jumoko kende. (Yoh. 13:23; 20:2) Ento Pethro ubepoyo wiwa nia waii ‘nimaru umego ku nyimego mwa m’i wang’ ng’om zoo’ calu ve gitie juruot mwa ma dhe.—1 Pet. 2:17.

11. Nimaru jumange “lee mandha niai kud i adunde” thelembene tie ang’o?

¹¹ Pethro ukwayuwa nia ‘wamarara i kindwa lee mandha niai kud i adunde.’ Kakeni wec ma nia nimaru “lee mandha” thelembene tie nimaru jumange kadok etie iwa lembe ma tek de. Ku lapor, waromo timo ang’o kan umego moko ukierowa kunoke utimowa raci? Saa moko nyo watie ku ng’iyo mi culo wang’ racu ma jutimo iwa. Re Yesu umiyo ni Pethro ponji ma nia timo ma kumeno foyo ngo i Mungu. (Yoh. 18:10, 11) E i ng’eye Pethro ukiewo kumae: “Kud wudwok wang’ racu ku racu, kadi wang’ ayany kud ayany. Ento wudwok wang’e ku poko mugisa.” (1 Pet. 3:9) Dong’ wek mer ma thuth ucweli ninyutho bero kadok ni ju m’utimi rac man nidieng’ kugi.

12. (a) Mer ma thuth bicwaluwa bende nitimo ang’o? (b) Calu ma video ma thiwiye tie “Préservons l’unité, un cadeau précieux” unyutho, imito i ii nitimo ang’o?

¹² I barua pa Pethro mi kwong’o, etiyo ku wec ma nia ‘nimaru lee mandha.’ Mer ma kumeno umo ngo kende kende wi dubo ma wendgi nok, ento wi “udul dubo.” (1 Pet. 4:8) Saa moko nyo Pethro upoy i kum ponji ma Yesu umiyo ire oro ma dupa i wang’e iwi timo kisa. I saa maeca, copere nia Pethro uparu nia cwinye leng’ dit kinde m’eyero nia ebitimo kisa ni umin “nitundo wang’ abiro.” Re Yesu umiyo ire man iwa bende ponji ma nia ukwayu watim kisa nitundo “wang’ pier abiro wi abiro (77),” niwacu m’umbe nijigo. (Mat. 18:21, 22) Tek inwang’u nia etie iri tek nitiyo ku juk maeno, cwinyi kud utur! Saa moko ebedo tek ni jutic pa Yehova ceke nitimo kisa kum gitie ku dubalaga. Lembe ma pire tek kawoni utie nia tim ceke m’icopo pi nitimo kisa ni umeru man niripo kindwu kude.c

JUDONG COKIRI, WUKWAY ROMBE PA YEHOVA

13. Ang’o ma copo ketho ebedo tek ni judong cokiri nikonyo umego ku nyimego migi?

¹³ M’umbe jiji, Pethro uwil tak de ngo ku wec ma Yesu uyero ire i ng’ey cer pare ma nia, “kway rombe para ma thindho.” (Yoh. 21:16) Tek itie jadit cokiri, ing’eyo nia ukwayu in de itii ku telowic maeno. Re eromo bedo tek ni jadit cokiri ninwang’u saa mi pong’o rwom maeno ma pire tek lee. I andha, judong cokiri gicikiri nilar dieng’ pi yeny mi thenge mi kum man mi thenge mi tipo mi juruot migi. Gicikiri nibedo bende ni lapor ma ber i tic mi rweyo lembanyong’a, i yiko man timo theng program mi coko, mi coko ma dongo mi twodiri man mir adhura. Jumoko m’i kindgi gibediko cing’gi ku Komite ma diko kind Jumulembe ku odiyath kunoke ku Departema mi LDC. Judong cokiri gitimo tic dupa andha!

14. Ang’o ma copo miyo ava mi kwayu udul rombe i kum judong cokiri? (1 Pethro 5:1-4)

¹⁴ Pethro ukwayu judong cokiri wagi kumae: “Wukway udul rombe pa Mungu.” (Som 1 Pethro 5:1-4.) Tek itie jadit cokiri, wang’eyo nia imaru umego ku nyimego peri man imito ikonygi. Re saa moko iromo paru nia itie ku tic lee kunoke iol lee ma nipong’o rwom peri copo bedo tek. Dong’ ang’o ma copo konyi? Kor kite m’ibewinjiri ko ni Yehova. Pethro ukiewo kumae: “Tek ng’atu moko ubekonyo, ekony m’ebejengere iwi tego ma Mungu miyo.” (1 Pet. 4:11) Copere nia umego ku nyimego peri gibenwang’iri ku peko ma copo thum ungo kawoni. Poy nia Yesu Kristu ma “jakwac ma dit” re ma copo konyogi nisagu. Ecopo timo kumeno tin, man i ng’om ma nyen m’ubebino. Gin ma Mungu ubekwayu i bang’ judong cokiri utie kende kende nimaru umego migi, nikonyogi man nibedo ni “lapor ni udul rombe.”

15. Jadit cokiri moko bekwayu udul rombe nenedi? (Nen bende cal.)

¹⁵ Umego William m’ubedo jadit cokiri pi oro ma dupa, unyang’ nia pire tie tek nitimo liew mi kwac. Kinde ma thong’om mi Korona ucaku, en ku judong cokiri wagi gipangu nia gin ma kwong’a ma mito gibed gitim kubang’ yenga utie niweco ku ng’atuman ma n’i ungu migi. Ekoro thelembe mi yub maeno kumae: “Umego ma dupa gibino kwo kendgi i pacu migi, man paru ma rac romo mondo i wigi.” Kan umego kunoke nyamego moko ubenwang’ere ku peko, umego William winje kilili mandha pi ninyang’ nia ang’o m’ubedieng’o cwinye. I ng’eye eii ninwang’u girasoma kunoke video moko i kusika mwa mir Internet, ma copo tielo cwinygi. Eyero kumae: “Kawoni re ma yeny mi timo liew mi kwac usagu m’i wang’e zoo. Watimo kero ma lee pi nikonyo dhanu ging’ey Yehova; ukwayu watim kero ma rom eno pi nikwayu udul rombe pa Yehova man nikonyogi gimediri nibedo i lemandha.”

WEK YEHOVA UDAR PONJI PERI

16. Waromo tiyo ku ponji ma wanwang’u i barua pa Pethro nenedi?

¹⁶ Waweco iwi ponji ma nok kende ma nwang’ere i barua ario ma Pethro ukiewo ku kony mi tipo ma leng’. Saa moko nyo ineno thenge m’ukwayu itim alokaloka i iye. Ku lapor, nyo imaru inyam i lembe lee iwi mugisa ma wabinwang’u i nindo m’ubino? Nyo iketho lembakeca mi miyo lembatuca i kaka tic, i somo kunoke i kabedo mange? Nyo ineno ayi m’icopo nyutho ko mer lee nisagu ni umego ku nyimego peri? Judong cokiri, nyo wutie ku lembakeca mi kwayu rombe pa Yehova kud ava ma lee ma jubecung’owu ngo acung’a? Kan ing’iyo i lembe peri ku jwigiri, iromo nwang’u nia ukwayu itim alokaloka i thenge moko; re cwinyi kud utur. Poy nia “Rwoth [Yesu] ber,” man ebikonyi nitimo alokaloka ceke m’ukwayere. (1 Pet. 2:3) Pethro ubetielo cwinywa kumae: “Mungu . . . bidaru en ponji mwu. Ebiketho wucung nging’ nging’, ebidwokowu tek man ebiketho wucung iwi kathere ma tek.”—1 Pet. 5:10.

17. Ka wabemedara niciro man wabeweko Yehova uponjwa, wabinwang’u bero ma kani?

¹⁷ Ku kwong’a, Pethro ukeunwang’u nia eromo ngo nibedo i vut Wod Mungu. (Luka 5:8) Re calu ma Yehova giku Yesu gikonye ku mer, emedere nibedo jalub pa Kristu. Eno uketho enwang’u rwom mi mondo “i Ker ma rondo ku rondo pa Rwoth mwa man Jalar mwa ma Yesu Kristu.” (2 Pet. 1:11) Eno tie sukulia ma lee mandha! Tek calu Pethro iweko ngo cwinyi utur man iweko Yehova uponji, in bende ibinwang’u sukulia mi kwo ma rondo ku rondo. E ‘ibitundo i kum lembakeca mi yiyoyic peri ma en e both peri.’—1 Pet. 1:9.