Pirang’o Jumulembe pa Yehova gitimo Cemo mir uthieno pa Rwoth i ayi m’ukoc ku mi dini mange?

Walubo kilili mandha lembe ma Biblia uyero kinde ma wabetimo Cemo mir uthieno pa Rwoth, ma julwong’o bende “Cemo pa Rwoth,” Cemo ma tokcen, man Poy pi tho pa Yesu. (1 Jukorintho 11:20) Lembe m’ukoc utie nia dini ma pol gitie ku yiyoyic man timo m’urombo ngo ku lembe ma Biblia uyero iwi ayi mi timo Poy pi tho pa Yesu.

Thelembene

Thelembe m’uketho watimo Cemo mir uthieno pa Rwoth utie nipoy pi Yesu; i ayi maeno wanyutho nia wafoyo lam m’ethiero piwa. (Matayo 20:28; 1 Jukorintho 11:24) Cemo mir uthieno pa Rwoth utie ngo sakramenta, kunoke lembe moko mi dini ma ng’atini ucikere nitimo kara enwang’ mugisa ma segi calu ve bero kunoke weko dubo.a Biblia ubeponjo nia tie ngo lembe moko ma jutimo i dini re ma ketho dubo mwa wekere, ento ewekere kende kende nikadhu kud i yiyoyic ma watie ko i Yesu.​—Jurumi 3:25; 1 Yohana 2:1, 2.

Wang’ adi?

Yesu uyero ni julubne nia gibed gitim Cemo mir uthieno pa Rwoth pi nipoy pire, ento eng’olo ngo nia gibed gitime wang’ adi. (Luka 22:19) Jumoko ginwang’u nia kwayu jubed jutime kubang’ dwi, ju mange lundo paru nia kubang’ yenga, ju mange ke kubang’ ceng’, kunoke wang’ dupa kubang’ ceng’, ju makucelo lundo paru nia ng’atini ucikere nitime wang’ lee i kadhiri m’enwang’u nia utie ber.b Enre wakenen lembe moko m’ukwayu jukejung’ii igi.

Yesu ucaku the Cemo mir uthieno pa Rwoth i nindo mi Kadhukuwijo mi Juyahudi, man edok etho de cing’ nica i ng’eye nyanok. (Matayo 26:1, 2) Ebino ngo lembe moko m’utimere gire kumeni. Biblia uporo lam ma Yesu uthiero ku lam mi nyathirombo mi Kadhukuwijo. (1 Jukorintho 5:7, 8) Jubed jutimo Kadhukuwijo wang’ acel kubang’ oro. (Ai 12:1-6; Lembe mi Julawi 23:5) Rom rom kumeno, Jukristu mi rundi ma kwong’a gibed gitimo Poi pi tho pa Yesu wang’ acel kubang’ oro,c man Jumulembe pa Yehova de gilubo lapor maeno m’ujengere iwi Biblia.

Nindo man saa

Ayi ma Yesu utimo ko Cemo mir uthieno pa Rwoth konyowa ning’eyo kende ngo nia kwayu watime wang’ adi, ento ekonyowa ning’eyo bende nindo man saa mi time. Ecaku the Cemo mir uthieno pa Rwoth i ng’ei mwony pa ceng’ mi nindo 14 mi dwi mi Nisan, oro 33 N.N.Y,d nimakere ku kalandrie mi Biblia. (Matayo 26:18-20, 26) Kubang’ oro, wamedara nitimo Poi pi tho pa Yesu i nindo maeno; i ayi maeno, walubo lapor mi Jukristu mi rundi ma kwong’a.e

Kadok nwang’u nindo 14 mi dwi mi Nisan, oro 33 N.N.Y. ugam upodho ceng’ kas’abic de, re kubang’ oro, nipoy pi lembe m’utimere cing’ nica copo dok podho nindo mange i kind yenga. Pi ning’eyo ceng’ ma nindo 14 mi dwi Nisan bepodho i iye kubang’ oro, wabed watiyo ku bodho ma rom ku ma jubed jutiyo ko i rundi pa Yesu, kakare nitiyo ku bodho ma jutiyo ko i kalandrie mi Juyahudi i rundi mwa eni.f

Mukathi man pigulok

Pi nicaku thelembe maeno ma nyen, Yesu utiyo ku mukathi m’umbe thobi i iye man pigulok ma kwar m’ugam udong’ kinde ma gibino camu Kadhukuwijo. (Matayo 26:26-28) Walubo lapor maeno; pieno watiyo ku mukathi ma thobi mbe i iye, kadi ma jumedo de ngo piny moko i iye, man pigulok ma kwar; ento watiyo ngo ku giramadha ma lim lim, kunoke ma juting’o lake, kadi ma jumedo piny moko i iye.

Dini moko gibed gitiyo ku mukathi ma thobi ni iye, ento i Biblia, wang’ ma pol thobi nyutho dubo man nyoth. (Luka 12:1; 1 Jukorintho 5:6-8; Jugalatia 5:7-9) Pieno, mukathi ma thobi mbe i iye man ma jumedo ngo gin mange i iye re ma romo nyutho cuu mandha kum Kristu m’umbe dubo. (1 Pethro 2:22) Timo mange ma Biblia ucwaku ngo utie nitiyo ku giramandha ma lim lim kaka pigulok. Kanisa moko gitimo kumeno pilembe gikwero gin gigi nia kud jumadh kong’o ento Biblia re kwero ngo.​—1 Timoteo 5:23.

Gitie lanyuth, ento ungo kum Yesu man rimbe

Mukathi ma thobi mbe i iye man pigulok ma kwar ma jutiyo ko i Cemo pa Rwoth gitie lanyuth, ginyutho kum Kristu man rimbe. Gilokiri ngo nidoko ni kume man rimbe i ayi mir udu, kadi gijebiri ngo ku kume man rimbe calu ma jumoko beparu. Kenen lembe moko ma Biblia uyero m’ukonyowa ninyang’ kumeno.

• Ka nwang’u Yesu uyero ni julub pare nia gimadh rimbe, nwang’u ecituro cik pa Mungu m’ukwero nia kud jucam rimo. (Thangambere 9:4; Tic mi Jukwenda 15:28, 29) Eno tie lembe ma copere ngo, pilembe Yesu copo ng’olo ngo nyanok de ni jumange nia gitur cik pa Mungu m’uyero nia rimo tie leng’.​—Yohana 8:28, 29.

• Ka nwang’u etie rimb Yesu re ma jukwenda gimadhu, nwang’u eyero ngo nia rimbe “ma bicwir”; i ayi maeno ebino nyutho nia fodi ethiero ngo lam pare.​—Matayo 26:28.

• Yesu uthiero lam pare “wang’ acel pi nja.” (Juebrania 9:25, 26) Ento, ka nwang’u mukathi ugam ulokere ni kume man pigulok ni rimbe i saa mi Cemo mir uthieno pa Rwoth, nwang’u edok bedo ve nia dhanu ma gicamu mukathi man ma gimadhu pigulok gidog githiero lamne kendo.

• Yesu uyero kumae: “Wumeduru nitimo kumeni wupoy ko pira,” ento ungo “pi nithiera.”​—1 Jukorintho 11:24.

Dhanu ma giyero nia mukathi lokere doko ni kum Yesu man nia pigulok doko ni rimbe, gijengo ponji maeno iwi wec ma nwang’ere i verse moko mi Biblia. Ku lapor, i lok ma pol mi Biblia, juloko nia Yesu uyero pi pigulok kumae: “Maeni rimba.” (Matayo 26:28) Ento jucopo loko bende wec pa Yesu maeno kumae: “Maeni thelembene tie rimba,” “Maeni nyutho rimba,” kunoke “Maeni ucungo ka rimba.”g Calu ma Yesu ubed utimo wang’ ma pol, ebino tiyo ku lapor pi niponjo.​—Matayo 13:34, 35.

Ng’a ma camu mukathi man ma madhu pigulok?

Kinde ma wa Jumulembe pa Yehova wabetimo Cemo mir uthieno pa Rwoth, ju ma nok m’i kindwa re ma gicamu mukathi man ma gimadhu pigulok. Pirang’o kumeno?

Rimb Yesu m’ucwir ucaku the “lembariba ma nyen” m’uwilo lembariba m’ubino i kind Yehova Mungu ku thek mir Israel ma con. (Juebrania 8:10-13) Dhanu ma gin’i lembariba ma nyen maeno re ma gicamu mukathi man gimadhu pigulok mi Poi pi tho pa Yesu. Etie ngo Jukristu zoo, ento kende ju ma Mungu “lwong’ogi” i ayi ma segi. (Juebrania 9:15; Luka 22:20) Dhanu maeno gibibimo karacelo ku Kristu i polo; Biblia uwacu nia tie dhanu 144 000 kende re ma ginwang’u rom maeno.​—Luka 22:28-30; Lembanyutha 5:9, 10; 14:1, 3.

Tung’ kud “udul ma nok” ma julwong’ogi kara gibim karacelo ku Kristu, dhanu ma dupa m’i kindwa gitie ku genogen mi bedo i kind “udul ma dit” ma gibinwang’u kwo ma rondo ku rondo iwi ng’om. (Luka 12:32; Lembanyutha 7:9, 10) Kadok nwang’u jumoko m’i kindwa ma gitie ku genogen mi kwo iwi ng’om gicamu ngo mukathi man gimadhu ngo pigulok mi Poi pi tho pa Yesu de, re wadikara zoo karacelo pi nidwoko foyofoc pi lam ma Yesu uthiero piwa.​—1 Yohana 2:2.