Mikitini i Falocoˈ Misongilaˈ a Misaday

Ano mikingkiw kita to Fangcalay Cudad i, nanay mitemer ko Kimad ni Yihofa to falocoˈ ita. Toniya pakayraan patirengay ci Icra to ngaˈayay taˈarawan, saan ko Fangcalay Cudad, ‘misongilaˈay misaday i falocoˈ cingra, sapikingkiwaw to Rikec ni Yihofa.’ (Icra 7:10) Sapisongilaˈaw a mikingkiw i, misamaan kita mikifalocoˈ misongilaˈ a misaday hani?

Mitolon. ˈAyaw no mamikingkiw i, ka pitolon. Ngitangiten ci Yihofa to hasakafanaˈaw iso tora maˈosiay a lalakaw, ato sasamaan sakadademaken kora maˈosiay.—ˈOlic 119:18, 34.

Palahaden ko misapoeneray a waywayan. O roma tamdaw tada misatakaraway, sapimamaan ko Kawas cipinangay to Fangcalay Cudad sanay, kawra mihimedan no Kawas ko Kimad to mahaenay a tamdaw. (Luka 10:21) Pacalepen a mikingkiw ko Fangcalay Cudad, hamaan sapipasengiaw to taneng no niyah a mihaen to demak. Ano cowa ka hecad ko harateng ita to ni Yihofa i, pairaen ko misapoeneray a misalof to niyah.

Tengilen ko radiw no Likakawa no Kawas. O radiw mitemeray to kemod no falocoˈ ita, padama kitaanan misaday i pidokoan. ˈAyaw no mamikingkiw ngaˈayayho mitengil to radiw no likakawa no Kawas, wa madolo a mikifalocoˈ a misaday.