O jw.org Wangcan a Lalakaw Mihinomay to Masamsamay a Fafahiyan
“ I PARO no kakarayan, ˈalomanay fafahiyan ato kaemangay fafahiyan masamsamay itini notirengan ato nafalocoˈan. Kiso ato itatihiay kiso a tamdaw na iraay ko mahaenay a nalifetan han? Kawra mafanaˈay kiso han? Misakaretengay ko Kawas ira ko ngaˈayay nokaˈorip no fafahiyan, mihaenay polong misamsamay to fafahiyan a demak, wa sahcien Ningra a misaysay.”
Masowalay isawni a fatac naitiniay i jw.org wangcan a lalakaw “Midipot to Fafahiyan—Misakaretengay ko Kawas to Fafahiyan Han?” Salikoray noniya lalakaw iraay ko cecay sapalaliting, keniˈ han ngaˈayto misiyacay toniya lalakaw a PDF, ikor ngaˈayayto insacen mala o tancang. I Padaka fafahiyan salikaka ci Sitaysi sanay: “Miinsac kako toniya lalakaw ikor, malacafay to cecay fafahiyan salikaka patayra toniya tancang i pidipotan to masamsamay a fafahiyan a kitiraan.”
O cecay matayalay misaaliay to adihayay tancang i fafahiyan salikaka, sapipalilamaw to maroˈay itira a fafahiyan. Mihaenay, mapalilamayho nangra ko 40 a tancang ato 30 a kato no jw.org wangcan. Ikor miliyawayho tayra ko fafahiyan salikaka i pidipotan to masamsamay a fafahiyan a kitiraan i, itiraay a mikowanay mitahidang to fafahiyan salikaka a misiwkay, sasamaan a minanam to Fangcalay Cudad a paˈaraw to itiraay a fafahiyan.
Itini roma pidipotan to fafahiyan a kitiraan, ci Sitaysi ato tatosa fafahiyan salikaka iraay ko ngaˈayay a minaroˈan. Limaay ko mapalilamay nangra a tancang, ikor o itiraay a tamdaw misaaliayho to adihayay a tancang. Sanay ko cecay matayalay: “Oniya tancang papadama to itiniay a fafahiyan, tada misaaliay kami toniya tancang.” Ikor miliyaw cangra tayra toniya pidipotan a kitiraan i, o romaroma fafahiyan sapinengnengaw to sasamaan minanam to Fangcalay Cudad, iraayho ko tatosa sapirienangaw to nocilaay a saˈopo.
Sanay ci Sitaysi: “Maˈaraw ko ˈalomanay a tamdaw maolahay toniya lalakaw, tada fahkaˈay a mahemek kami. Oniya lalakaw no wangcan mainsac malo tancang ikor, o ngaˈayay lihaf no Hongti Kitakit tada misolotay tonini a masamsamay a fafahiyan. Maˈaraw cangra tada mahemekay a micada, tada matemeray ko falocoˈ no mita. Wa padadotoc kami milasil to ngaˈayay lihaf i cangranan, hinatalaayho kami sasamaan ci Yihofa palemed tamiyanan.”