SAPATONGAL LALAKAW C
Tano Layapen ko Midaˈocay ˈOrip! a Malalengo
Saliyaliyaw sanay ko salikaka a mitolon, misongilaˈ a midotim, ikor mitepang toniya Layapen ko Midaˈocay ˈOrip! a cudad. Pakafanaˈ kita to pakingkiwan i, sasamaan ko demak ngaˈ misongilaˈ a misakadademak toniya cudad hani? Nengnengen ko dotoc a pina pakayraan.
ˈAyaw no milengo i
1. Songilaˈen a misaday. Sinanoten ko demak saali no pakingkiwan, halo samaanay ko pinengneng ningra toniya fedengan. O manan a Kimad pasangaray cingra cipinang ato misakadademak hani? Talaˈayawen a minengneng ko “Malalitingay a Lalakaw,” ano ciepoc ko pakingkiwan i, paladaˈen cingra itini i pilengoan.
Malalengo i
2. Ano mihayi cingra, ˈayaw ato pihererek no pikingkiw, ngaˈayay mitolon.
3. Hamaan datadat sa ko sasowalen, edengan o fedengan a lalakaw ko lalengoen, papifahfahan ko pakingkiwan to harateng ningra.
4. Milengo to faelohay a Rayray i, ˈosien koya ‘Mamananam a Kalimlaan’, lengoen ko pina a lalangian.
5. Maherek ko cecay a rayray i, lengoen ko lalomalen noniya rayray, padama to pakingkiwan, pakaharateng to mananamay ningra a kalimlaan.
6. Malalengo to sito ko cecacecay a fedengan i:
ˈOsien ko salicay no fatac.
ˈOsien ko aˈosien a sinael.
Ano ngangaˈay i, ˈosien ko dama a sinael.
Ano ngangaˈay siyacayen i, nengnengen ko ika maemin.
Lengoen ko kahacecacecay a salicay.
Papinengneng ko sito to “Calepen Mikadkad” a coka, licayen samanay ko harateng ningra.
Pakalaloken ko sito misakadademak to “Patosokan”, ngaˈayay patireng to romaroma a patosokan, mihaen, wa mahapinang ningra hakowa ko kacakatan no niyah.
Licayen ko sito, misaday to lalakaw i, o manan ko kaolahan ningra itini i “Malalitingay a Lalakaw.”
Ano ngaˈayay i, lahecien milengo ko kahacecay a fedengan.
Ikor no Malalengo
7. Saharateratengen ko saali no sito. Cangacangen ci Yihofa padama cingranan padadotoc a macakat, halo paira to taneng tisowanan, ho mafanaˈ kiso samaanen a padama cingranan.