Todongen ko Piharateng Ato Waywayan ni Yihofa Aci Yis

1-2. (1) Maolah ci Yihofaan milingatay to manan? (2) Mikitini ci Yisan samaanay mahapinang ita koni?

‘SAROCODEN ko falocoˈ, sarocoden ko harateng, sarocoden ko ˈicel, tano polong a ˈorip a maolah to Kawas iso ci Yihofaan.’ (Marko 12:30) Sanay ci Yis, o saikakaay a Rikec ni Mosi a limoˈot. Wa misarocod kita a maolah ci Yihofaan, coko kalim, nafalocoˈan ato ˈicel aca, milingatayho to misimsimay a harateng, o misamaanay misimsim a minengneng to demak. Soˈlin cowa ka cipinang kita to harateng ni Yihofa, kawra pakayni minanam to ‘harateng ni Kristo,’ wa cipinang kita to samaanay miharateng ci Yihofa, samanen malecaday ko harateng ni Yis ato kakarayan a Wama.—1 Korinto 2:16.

² Misarocoday ci Yis a maolah ci Yihofaan, milingatay koni to harateng ningra. Mafanaˈay ci Yis to araaw no Kawas, tanektekay ko falocoˈ a mitoor toniya araaw a midemak, ano tahalifa to pasangar kamayan a midemak. Misarocoday ci Yis midemak to araaw no kakarayan a Wama, cowa ka papiconaen no kalo a demak a makalisanga ko falocoˈ no niyah.

3. (1) O tarokos ci Pitiro mikitini ci Yisan mananamay ko manan? (2) Pakalalokay ci Pitiro to Krisciyang sasamaan ko demak? (1 Pitiro 4:1)

³ Ci Pitiro ato roma tarokos iraay ko kalikoan a mikotod ci Yisan, mingata a minanam cingranan, cipinang to piharateng ato waywayan ningra. Ikor, i sakayat no Kawas a mitilid ci Pitiro to saka cecay tikami, pakalalokay to Krisciyang tano ni Kristo a harateng a misaday to falocoˈ.a (ˈOsien ko 1 Pitiro 4:1.) ‘Misaday to falocoˈ no niyah’ ono mala sofitayay a sasowalen. Ano mitodong ko Krisciyang to ni Kristo a piharateng ato waywayan, sano ni Yis a wayaywan, o iraayto ko ciˈicelay a sapifolaaw a lalosidan, ngaˈayay micoˈay to mararaway a coos no niyah, ato mikowanan ni Satan a tatiihay a hekal.—2 Korinto 10:3-5; Ifiso 6:12.

4. Oniya lalakaw iraay ko manan a lalengoen?

⁴ Oniya lalakaw mamifolfol to piharateng ato waywayan ni Yis, wa milengoho to sasamaan mitodong kita cingranan. Mikitini i taˈarawan ningra, wa mananam ita ko: (1) Pahecad to ni Yihofa a harateng ko niyah, mihaen wa mahecad ko harateng tono salikaka; (2) palahad to misapoeneray; (3) pakayni i pitolon ci Yihofaan, padadotoc tanektek ko harateng.

PAHECAD TO NI YIHOFA A HARATENG KO NIYAH

5. Kinacecayay, samanay hano cowa ka hecad ko harateng ni Pitiro ato ni Yihofa?

⁵ Kinacecayay, cowa ka hecad ko harateng ni Pitiro ato ni Yihofa. Pasowalan ni Yis ko tarokos, wa tayra ko niyah i Yirusalim, mapatorod i kakeridan no pihakelongan a mapasemsem, ikor mapatay. (Matay 16:21) Mihayian ni Yihofa pakapatay ci Yisan ko tao! Alatek pasangaray micada ci Pitiro to mahaenay a demak, samanen pakasoˈlinay ci Pitiro to o tokel no Israil ci Yis, o miocoran ni Yihofa a Misiya. (Matay 16:16) Oranto i, kayat han ni Pitiro ci Yis a miconged a pasowal: ‘Tapangaw, kaolahen ko niyah, cowa ko mamahaen ko ˈorip iso.’ (Matay 16:22) Itini toniya demak, cowa ka hecad ko harateng ni Pitiro ato ni Yihofa, mansa cowa ka hecad ato ni Yis.

6. Samaanay ci Yis paihkal to harateng no niyah to o mahecaday to ni Yihofa aki?

⁶ O harateng ni Yis mahecaday tono kakarayan a Wama. Soˈlin miconged ci Pitiro ci Yisan nano o siniˈada ci Yisan, kawra cowa ka picada ci Yis. Sanay pasowal ci Pitiroan: ‘Satanaw, kapiliyas tayra i lalikor ako! O pakapolinay kiso takowanan, samanen o harateng iso, cowa kono Kawas a harateng, ono tamdaw a harateng.’ (Matay 16:23) Ihkalay ci Yis cipinang, coko niyah aca ko kaolahen. Pakayni toniya demak, mananamay ni Pitiro ko kalimlaan: Wa tano ni Yihofa a harateng mikotay to niyah a harateng. Ano kitato i, wa mihaen a minanam.

7. Ikor samaanay paihkal ci Pitiro, to pahecaday to harateng ni Yihofa cingra hani? (Nengnengen ko coka.)

⁷ Ikor, tano waywayan a paihkal ci Pitiro to makalimay ko niyah a harateng pahecad to ni Yihofa. Itiya, wa pala finawlan no Niyah ci Yihofa to cowa ka picada to kerit a ˈalafang a tamdaw, ocor sanay ci Pitiroan papitosil to ˈalafang ci Korniliusan. Milaˈosi toniya ˈinorong, mamisalof ci Pitiro to harateng no niyah ngaˈ, samanen itiya cowa ka picawmaˈ ko Yutaya tamdaw to ˈalafang a tamdaw. Cipinangto ci Pitiro to harateng no Kawas i, cowato ka pisakakinih. Mihaenay, na ocoren ni Kornilius ko tamdaw mitahidang ci Pitiroan i, cowa ka cisasa a malingad, ‘cowa ka piconged.’ (Dmak 10:28, 29) Tosilen ni Pitiro ci Kornilius ato paro no lomaˈ, micadaayto to paputisem cangra, mala o saka cecay Krisciyang a ˈalafang a tamdaw cangra.—Dmak 10:21-23, 34, 35, 44-48.

8. Sasamaan kita paihkal to malecaday to ni Yihofa a piharateng a waywayan hani? (1 Pitiro 3:8)

⁸ Ikor to no pina a miheca, palimoˈotay ci Pitiro to Krisciyang ‘malecad ko harateng.’ (ˈOsien ko 1 Pitiro 3:8.) Sasamaan ko finawlan ni Yihofa ngaˈ malacecay ko harateng hani? Pakayniay minanam to Kimad ni Yihofa, cipinang a mitodong to piharateng ato waywayan Ningra. Tinakoen, pakalalokay ci Yis to mikotoday cingranan a tamdaw papisalakat to Kitakit no Kawas i nokaˈorip. (Matay 6:33) Sapicangacangaw to Kitakit, o roma salikaka alatek sapirienangaw to mieminay to toki a matayal. Misaˈicel cangra micangacang to ciepocay a patosokan i, cowa ko mamiconged kita cangranan, pasowal to kaolahan ko niyah, ao wa pakahemeken ita pakalalok, midama cangra ngaˈ.

PALAHAD TO MISAPOENERAY

9-10. Samaanay ci Yis paihkal to misapoeneray?

⁹ ˈAyaw no mapatay no tamdaw ci Yis a dadaya i, kalacafayay to tarokos a malafi. I kalafian i, pakafanaˈan ningra ci Pitiro ato roma tarokos to kalimlaan pakayni i misapoeneray. Isaˈayaw, ocoran ni Yis ci Pitiro aci Yohani misaday to kalafian, alatek misadayay cangra to fintang ato sasifing, samanen ˈayaw no kalafian i, iraay ko tamdaw patado minanaw to ooˈ. Mihaen, wa o cima ko papatado minanaw to ooˈ no ˈalomanay tamdaw hani?

¹⁰ Cowa ka cisasa ci Yis midemak toniya ˈinorong, paihkal to misapoeneray. Fahkaˈay ko tarokos, samanen ono koli koniya ˈinorong. Hepol sanay ci Yis to rikoˈ, miala to sasifing mikedec to tatelecan, ikor taktak sato nanom i fintang, a misatapang minanaw to ooˈ no ˈalomanay. (Yohani 13:4, 5) Patado to 12 tarokos a mihacecay pananaw, adihayay ko mapalakay a toki, pananaw mahawpay ko mipaˈacaay cingranan a Yuta. Kawra, kamayan misapoener ci Yis milahci toniya tayal. Dotoc, mihadidiay cingra ato tarokos a mifolfol: ‘Oniya midemakan ako tamowanan, cipinangay kamo han? “Singsi,” “Tapang” han namo kako a pangangan, matatodongay koni, onini aca kako. Mala o Singsi, Tapang kako, mihaenho a pananaw tamowanan, ano kamo i, wa malo palananawnanaw to ooˈ kamo.’—Yohani 13:12-14.

11. Samaanay paihkal ci Pitiro to mafanaˈayto to misapoeneray ko niyah? (1 Pitiro 5:5 ato roma pihongyak.) (Nengnengen ko coka.)

¹¹ Mikitini i taˈarawan ni Yis mananamay ni Pitiro ko misapoeneray. Patikol tayra i kakarayan ci Yis ikor, miadahan ni Pitiro ko mapiˈiway a tamdaw. (Dmak 1:8, 9; 3:2, 6-8) Oniya kafahkaˈan a demak misolotay to ˈalomanay tamdaw a minengneng. (Dmak 3:11) Mahemekan ci Pitiro to kasemer no ˈalomanay cingranan han? O kalomahadan ni Pitiro sahto o misakaretengay to fadangalan ato saaroˈan. Cowa pahiyo ci Pitiro to niyah, ao misapoeneray ci Pitiro panokay to kasapaan i ci Yihofaan aci Yisan, paˈodingar Cangranan. Sanay ci Pitiro: ‘Samanen pakayni i ngangan ni “Yis,” ato pakasoˈlinay ita to ngangan ningra, oniya maˈaraway namo a tamdaw maadahayto cingra.’ (Dmak 3:12-16) Ikor masowalay ni Pitiro i tikami ko misapoeneray tada kalimlaan, oniya sowal ningra papiharatengay to tamdaw mahecad mikedecay to sasifing i tatelecan ni Yis, mipananaw to ooˈ no tarokos.—ˈOsien ko 1 Pitiro 5:5 ato roma pihongyak.

12. Sasamaan kita mitodong ci Pitiroan, padadotoc palahad to misapoeneray?

¹² Ngaˈayay kita mitodong ci Pitiroan padadotoc palahad to misapoeneray. Tatodong i, masowal ni Pitiro ko misapoeneray sa i, o soˈlinay a misapoeneray mikifalocoˈay, cowa ko sasowalen aca, milingatayho to nafalocoˈan samaanay minengneng to niyah ato tao. Padama kita to tao, nao maolahay ci Yihofaan ato tao, cowa ko sapicadaaw to sapakahemek no tao. Soˈlin cowa ka ˈaraw no tao ko midemakan ita, kamayan kita lipahak a matayal saki Yihofaan ato salikaka, mihaen ko demak, paihkalay to soˈlinay a misapoeneray kita.—Matay 6:1-4.

KA “PADADOTOC TANEKTEK KO HARATENG”

13. O manan ko tatodong no “padadotoc tanektek ko harateng?”

¹³ O manan ko tatodong no “padadotoc tanektek ko harateng?” (1 Pitiro 4:7) O cecay tanektekay ko harateng a Krisciyang wa misaˈicel midofdof to harateng ni Yihofa citaneng ko pisaˈosi. Itini nokaˈorip ningra awaay ko maamaan a demak pakafiloay to kalalaˈed no niyah aci Yihofa. Pakayni to niyah iraay ko matatodongay a saali, o mananto o kafanaˈan ako cowa ka saan. Roma i, tanektekay ko harateng a Krisciyang misapoeneray a micangacang mitolon ci Yihofaan, paihkalay to misarocoday pakasoˈlinay ko niyah Cingranan.b

14. Kinacecay, o manan ko lalangian caka pitiˈer ci Pitiro ci Yihofaan?

¹⁴ ˈAyawho no kinafalah ni Yis toya dadaya i, sanay pasowal to nisawawaan: ‘Anini a dadaya, pakayni takowanan wa miliyas kamo.’ Pakasoˈlinay ci Pitiro to niyah saan: ‘Soˈlin o roma tamdaw pakayni to demak iso a miliyas cangra, cowa ko mamiliyas kako tisowanan!’ Toya dadaya, palimoˈotay ci Yis to nisawawaan: ‘Ka padadotoc kamo a mikacaw, padadotoc a mitolon.’ (Matay 26:31, 33, 41) Ano mitengil ci Pitiro to sapalimoˈot ni Yis, ikor wa timolo cingra mihayi to o nisawawaan ni Yis cingra. Kawra ka adayayan i, cowa padadotoc cingra mikacaw a mitolon, telocto, kinatoloay caka pihayda to o mafanaˈay ci Yisan, tada talalikoray ko harateng ningra.—Matay 26:69-75.

15. ˈAyaw no mamapatay ci Yis toya dadaya mimaanay cingra, mansa padadotoc a tanektekay ko harateng aki?

¹⁵ Misarocoday ci Yis mitiˈer ci Yihofaan. Soˈlin o malefotay cingra a tamdaw, kawra cowa ko niyah ko mitiˈeran ningra, ao padadotocay cingra a mitolon, ho ira ko timolo ningra midoedo to araaw ni Yihofa. (Matay 26:39, 42, 44; Yohani 18:4, 5) Cowa ko mamatawal ni Pitiro, ˈayaw no mamapatay ci Yis toya dadaya, saliyaliyaway a mitolon to kakarayan a Wama.

16. Misamaanay ko demak ni Pitiro, paihkal to palahaday cingra to tanektekay a harateng? (1 Pitiro 4:7)

¹⁶ Mataˈlifto ko romiˈad i, mafanaˈ mafanaˈay ci Pitiro pakayni i satolon mitiˈer ci Yihofaan. Patikol ci Yis a maˈorip ikor pasayni ci Pitiroan ato roma tarokos a mikiˈok, wa pafelien cangra to fangcalay saocor, padama cangranan milahci to mitosilay a demak. Kawra, papiterekanho ni Yis cangra itini i Yirusalim, mitala to sakalaˈosiaw noniya demak. (Luka 24:49; Dmak 1:4, 5) I pitala a tatokian i, samaanay ko demak ni Pitiro? Saan ko Fangcalay Cudad, malacafayay cingra ato roma Krisciyang ‘padadotoc a mitolon.’ (Dmak 1:13, 14) Ikor, itira i tikami ni Pitiro pakalalokay to sakatanektekaw ko harateng, pakayni i satolon mitiˈer ci Yihofaan. (ˈOsien ko 1 Pitiro 4:7.) Mafanaˈayto ci Pitiro mitiˈer ci Yihofaan, mala midamaay to kasakopang no Krisciyang.—Kalatiya 2:9.

17. Ano samaanto ko inaneng ita, sasamaanen padadotoc ko demak hani? (Nengnengen ko coka.)

¹⁷ Sakairaaw no tanektekay a harateng i, ceriden ita mitolon ci Yihofa. Cipinang kita, ano samaanto ko inaneng, misaaliay to micerid a mitolon. Mihaenay, ano misaˈosi kita to kalimlaan a demak i, pakaynien ita i satolon micangacang to sakayat ni Yihofa, pakasoˈlin to mafanaˈay Cingra to o manan ko sakangaˈay ita.

18. Misamaan ko demak ita ngaˈ, o harateng ita ngaˈayay pahecad ci Yihofaan?

¹⁸ Misangaˈan ni Yihofa kita ira ko ˈicel paihkal to pahecaday Cingranan a capeling, tada o aakoˈiden ita Cingra! (Satapangan 1:26) Manaokaniw cowa ka lefot kita mansa cowa ka mahecad ci Yihofaan. (Isaya 55:9) Kawra, mahecad ci Pitiroan, o harateng ita ngaˈayay pahecad ci Yihofaan. Sakalaˈosiaw noniya patosokan, nanay padadotoc kita misaˈicel, pahecad ko harateng ita ci Yihofaan, palahad to misapoeneray, malo o tenektekay ko harateng a tamdaw.