1925—Tikolen Miharateng ko Simoˈot Miheca

HINATALAAN A DEMAK COWA KA MALAˈOSI

1925 miheca, ˈalomanay mikakingkiway to Fangclay Cudad hinatalaay tora mihecaan mala lakoing ko cikiw, misamaanay hani? Mapatayayto a Malohemay Malitengay i Congpo a salikaka ci Aypote Selaote na mihaenay a mitadtad: “Itiya i, ˈalomanay saan, maˈoripayho itini toniya hekal a salikaka ni Kristo itira tora mihecaan tayra i kakarayan mala hongti, ci Apraham, ci Tafiti ato lalitengan madimadiay a faˈinayan papatikol a maˈorip, mamala ˈaˈideman itini fafekang no sera.” Kawra, mikakingkiway to Fangcalay Cudad a tamdaw hinatalaan nangra a demak cowa ka pifekad tora mihecaan, o roma tamdaw tada matoledan nanay ko falocoˈ.—Taneng 13:12.

Soˈlin mahaen, o ˈalomanay mikakingkiway to Fangcalay Cudad a tamdaw padadotocay fanekfek a mitosil. Mahapinang mahapinangay nangra iraay ko ˈinorong no niyah a misawacay ci Yihofaan. Dotoc nengnengen ita, samaanay cangra pakayni laciw mitenak to soˈlinay kimad.

MITONGAL TO TINGTAY

ˈAyaw no cecay miheca ˈalomanay tamdaw mikitini i WBBR tahatengil to ngaˈayay lihaf, mikakingkiway to Fangcalay Cudad a tamdaw misaˈosiay itini Ilinoi a Cikake patireng to roma a tingtay, o WORD hananay. Salikaka ci Ralfo Layfole mamipadamaay a patireng tonini faelohay a tingtay, sanay cingra: “Mangalefay toniya lietecay a Kasienawan a lafii, adihayay ko mikilomaˈay i raayay a tamdaw sahtoay mitengil to WORD a kamok.” Tinakoen, o cecay paro no lomaˈ itiniay i Alaska a Pilot a ciyataw, oniya pala mataˈlifay ko 5,000 kongli ko raay to WORD a tingtay. Matengil nangra ko cecay kamok ikor, patikamiay to matayalay itini tingtay a tamdaw, miakoˈiday cangranan toniya pakalalokay to tamdaw a kamok, pakacipinang cangranan to Kawas ato Fangcalay Cudad.

Hano ˈaloman ko pakatengilay to WORD tingtay a kamok hani? Mitadtad ko Mikecolay i 1925 miheca saka 12 folad 1 romiˈad (Padaka), o pipafeselan no WORD tingtay ngaˈayay tahira i maraayay a pala, mikikawali mililis to Atelantis Riyar, mikikaetip mililis to Taypin Riyar, mikikatimol tahira i Kopa, mikikaˈamis tahira i kakaˈamisayto no Alaska, ihkalayto a matengil nangra. O ˈalomanay isaˈayaw cowa ka pakatengil to soˈlinay kimad a tamdaw pakatengil toniya kamok no laciw ikor, ciharatengayto cangra to soˈlinay kimad.

I mahecaday a tatokian, mikakingkiway to Fangcalay Cudad a tamdaw misaˈicelay itini Kanata tano laciw a mitenak to ngaˈayay lihaf no Kitakit no Kawas. 1924 miheca, patirengay cangra itini i Saskaton CHUC a tingtay, o salakatay no Kanata a tingtay no pihakelongan. 1925 miheca, oniya tingtay mamalinah tayra i taˈangayay a pala. Mansa miˈacaay ko fenpo i Saskaton to matelangay ikakang a misafaeloh, ikor palinahan tayra ko tingtay.

Saskaton adihayay a kilac kakahaday ko pala, cowa ka hakowa ko tamdaw, kawra irato koniya tingtay i, ˈalomanay ko itiniay toniya kilac a tamdaw sakinacecay pakatengil to soˈlinay kimad. Tinakoen, itini maraayay a niyaroˈ iraay ko cecay fafahiyan ci Kelayham mitengil to laciw ikor, patikamiay misaali to lalakaw no Fangcalay Cudad. Mitikol miharateng ko faˈinayan salikaka ci Ciyawci Naic sanay: “Macalohay koniya fafahiyan, sakacipinangaw to Fangcalay Cudad, palingadan niyam ko emin a Sapikingkiw to Fangcalay Cudad.” Cowa ka halafin, fafahiyan ci Kelayham satapangayto cingra mitenak to ngaˈayay lihaf no Kitakit no Kawas, hanaca tayraayho i maraayay a pala mitosil.

FAELOHAY NOKA PITADTAD

Mikecolay 1925 miheca saka 3 folad 1 romiˈad (Padaka) iraay ko cecay masakalimlaan a lalakaw. Icowaay ko mikiriwiˈay noniya lalakaw hani? ˈAyaw nonini i, mikakingkiway to Fangcalay Cudad a tamdaw mafanaˈay to iraay ko cecay lekakawa ni Satan, oniya lekakawa ikakarayan a tatiihay a coyoh ato ifafekangay no sera a kalodoyongan, misasingdiay ato mirikecay ko makakadepay a palaˈosi. Kawra ‘madimadiay citanengay a koli’ pakayni toniya lalakaw ihkalay a mitadtad, iraay ko likakawa ni Yihofa, cowa ka hecad toni Satan a lekakawa koni, matatowakangay macacoˈay. (Matay 24:45) O roma i, sanay ko ‘madimadiay citanengay a koli,’ 1914 miheca mapatirengayto ko Kitakit no Kawas, hanaca mifekaday ko lalood i kakarayan, malaplapay ci Satan atoya tatiihay coyoh nai kakarayan, mikitiya itiniayto cangra i ngata no cikiw a masaˈot.—Paˈarawan 12:7-9.

Pakayni to roma tamdaw, mamicada toniya faelohay pitadtad cowa ko madoloay. Oniya pakalalokay to miˈosiay sanay: “O miˈosiay ano pasangaran nanay mihayi toniya masowalay i, painien ita cangra paira to mihadidiay, padadotoc mipakasoˈlin to Tatapangan, madimadi matayal saki Cingranan.”

Ci Tamo Ayer salikaka itiniay i Ikok a mala payonia (anini o misakafahay hananayto), o sowal ningra mahapinangay ita, pakayni toya lalakaw ˈalomanay tamdaw samaanay ko harateng no mikakingkiway to Fangcalay Cudad a tamdaw. Sanay cingra: “Maˈosi koya faelohay noka pitadtad to Paˈarawan 12 fedengan ikor, tada mapakalalokay ko salikaka itiya. Cipinangay kami tomirengayto ko Hongti Kitakit no Kawas i kakarayan, sapifanaˈaw kami to tao toniya ngaˈayay lihaf. Ciharatengay kami misaadihay to toki ato ˈicel a mitosil, ihkalayto a mahapinang niyam, mikeridan ni Yihofa ko finawlan Ningra, padama cangranan militemoh to hanoikor hamamifekad a demak.”

MISAWACAY CI YIHOFAAN

Anini Misawacayay Tamdaw ni Yihofa mananamayto to Isaya 43:10, sanay ko sinael: ‘Milasilay ci Yihofa: “O Misawacayay Tamdaw Ako kamo, o mipiliˈan Ako a sikawdan.”’ ˈAyaw no 1925 miheca, o mitepangan no mita cowaho ka pitadtad toniya sinael. Kawra mahaenay a pakayraan i 1925 miheca mafalicayto, toniya mihecaan, itinito cowa ka hecad a 11 liyad a Mikecolay milengoayto to Isaya 43:10, 12.

1925 miheca 8 folad, mikakingkiway to Fangcalay Cudad a tamdaw misikayay to taykay itini Indianapolis no Indiana. O rayray no taykay iraay ko misowalan no Yosif Rosofo salikaka to mirienangay to taykay a tamdaw a sowal, sanay cingra: “Mirienang kami toniya taykay, wa mikitini i Tatapangan micada to ˈicel, mihaen i, wa fanekfekto ko falocoˈ no mita patikol tayra i kilac, misarocod malo misawacayay Ningra.” Toniya falo a romiˈad a taykay, mapakalalokay koniya mirienangay to taykay a tamdaw, misaˈicelay misawacayay ci Yihofaan.

Saka 8 folad 29 romiˈad Pieneman, mikimaday ci Rosofo to cecay kimad, lalangian i, “Pala Waywayen.” Itini toniya kimad i, o sowal ni Rosofo misawacayay o masakalimlaan sanay, sanay cingra: “Hananay ni Yihofa ko finawlan Ningra: ‘Kamo o misawacayay Ako a tamdaw, o Kawas Kako.’ Dotoc, ci Yihofa tano ihkalay ciˈicelay a pakayraan a palimoˈot, sanay: ‘Patirengen ko tatafing ho maˈaraw no ˈalomanay a ngasangasaw.’ Itini toniya hekal edengan ko finawlan no Kawas, awaayto ko cimacima tamdaw toha papatireng to tatafing Ningra. Edengan cangra iraay ko fangcalay saocor no Tatapangan, cangra aca o Misawacayay Tamdaw no Tatapangan.”—Isaya 43:12; 62:10.

Mahererek ko kimad no salikaka ci Rosofo pasowalay to misaˈosian, lalangian i, Lihaf no Hatokel. Oniya saˈosi sanay, edengan ko Hongti Kitakit no Kawas ngaˈ paira to soˈlinay a hatokel, wa milifok to ‘dipayal, macowat, tanoktok ko tireng, ˈorip, pasalat ato tahadaˈocay a raheker.” Mihayiay ko polong a tamdaw toniya saˈosi. Ikor, oniya saˈosi mahongyakay to romaroma a sasowalen, halo miinsac to tancang. Oniya tancang mapalilamay to 4,000 efan ko kaadihay.

Soˈlin mikakingkiway to Fangcalay Cudad a tamdaw hato pinato a miheca ngaˈ misakadademak to “Misawacayay Tamdaw ni Yihofa” toniya ngangan, kawra itiyato i, mahapinangayto nangra ciˈinorongay ko niyah misawacay ci Yihofaan.

MILISOˈ TO MAOLAHAY TO NGAˈAYAY LIHAF A TAMDAW

O mikakingkiway to Fangcalay Cudad a tamdaw matongal matongalay i paro no kakarayan, o likakawa no Kawas pakalalokay cangranan mitikol milisoˈ toya maolahay to ngaˈayay lihaf a tamdaw. Mahererek ko pipalilam to Lihaf no Hatokel toniya tancang ikor, Pakafoladay a Salasila (Padaka) pakalalokay to polong a tamdaw: “Ano o salikaka miterekay to Lihaf no Hatokel a tancang i, mamitikol milisoˈ to cilomaˈay.”

Saka 1925 miheca saka 1 folad a Pakafoladay a Salasil matiliday ko nalifetan no cecay mikakingkiway to Fangcalay Cudad a tamdaw, oniya mikakingkiway naitiniay Polano no Teksas, sanay cingra: “O mitikolan to milisoˈ a kilac, ikakaay to faelohay a kilac ko nika ngaˈay, isaˈayaw na cowa ka harateng niyam konini. Itini toniya kilac niyam, iraay ko mimingay a niyaroˈ isaˈayaw no moetep a miheca kinalimaayto a tikolen a milisoˈ. . . . Toniya ngata, fafahiyan salikaka ci Hentriks malacafay to wina ako miliyaw a milisoˈ i, adihayay ko mapalilamay a casi, ikakaayto no saˈayaway ko kaadihay.

Nai Panamaay a payonia sanay: “Soˈlin isaˈayaw ˈalomanay ko tamdaw cowa ka olah mitengil to ngaˈayay lihaf, kawra sakinatosa sakinatolo a milisoˈ i, mafalicayto ko waywayan nangra. ˈAyawho no cecay miheca, o pitosil ako sahtoay o mitikolay milisoˈ, hanaca adihayay ko ngaˈayay nalifetan.”

MITAPAL TO HANOIKORAN

Saka 1925 hererekan no miheca, salikaka ci Rosofo patikamiay to payonia, itini tikami milahcian ningra ko cecay miheca a mitosilay tayal, halo pasowal to o mananto ko tayal nangra anoikor, sanay cingra: “ˈAyaw no cecay miheca, iraay ko kalikoan namo mihinom to mararomay tamdaw, wa palipahak tamowanan. . . . Dotocto a cecay miheca, adihayto ko toki namo misawacay to Kawas ato Kitakit Ningra, patireng to tatafing, ho maˈaraw no ˈalomanay a ngangasaw. . . . Padadotoc kita pakahemek to Kawas ato Hongti ita.”

Saka 1925 hererekan no miheca, misahalakaay ko salikaka micowat a patireng to Pitil no Prokelin. Saka 1926 miheca, o salikaka satapangayto a patireng, itiya i, o sataˈangayay a patirengay a tayal i likakawa koni.