Liyasen ko Toˈemanay, Materek i ˈOdingaray

1-2. (1) Itini maanan a pakayraan mitilid ci Pawlo to Ifiso a cudad hani? (2) Onini a lalakaw mamilengo to maanan a salicay?

ITINI kapalitan no tarokos ci Pawlo i Loma a tatokian, makalimay sapakalalokaw to salikaka, caay ka ngaˈay cingra masasoˈaraw cangranan, oranto i, patikamiay cangranan. O cecay a tikami maedeng itiniay i Kongyen 60 anca 61 miheca tiliden pafeli to Ifisoay a Krisciyang.​​—⁠Ifiso 1:1; 4:1.

² Maedeng ˈayaw no 10 miheca, na itiniay ci Pawlo i Ifiso to cecay liyad, hanaca itira milasil to ngaˈayay lihaf, pasifanaˈ to tamdaw mafanaˈ to soˈlinay kimad no Fangcalay Cudad. (Dmak 19:​1, 8-​10; 20:​20, 21) Tada maolahay cingra to salikaka, makalimay sapadamaaw cangranan padadotoc madimadi ci Yihofaan. Itini sapatikami to manilnilay no fangcalay saocor a Krisciyang, masowalay ningra ko toˈemanay ato ˈodingaray. Hano milengo cingra cangranan tonini a sapatinako hani? Polong a Krisciyang anini mikitini sowal ni Pawlo mamananam ko maanan hani? Dotoc lengoen ita konini a tosa salicay.

MIKITINI TOˈEMANAY MICOMOD I ˈODINGARAY

3. Itini Ifiso a cudad sakadademakan ni Pawlo ko maanan a sapatinako?

³ Pasowalan ni Pawlo ko Ifisoay a Krisciyang: ‘Isalakat itiniay kamo i toˈemanay, nohatini itiniayto i ˈodingaray.’ (Ifiso 5:8) Misaka dademakan ningra ko toˈemanay ato ˈodingaray a sapatinako, mitadtad to tosa cowa ka lecad a pakayraan. Salakat nengnengenho ita hano pasowal ci Pawlo to Ifisoay a Krisciyang ‘isalakat itiniay i toˈemanay.’

4. O Ifiso a tamdaw itiniay i toˈemanay no pihakelongan, hano saan ko sowal hani?

⁴ No pihakelongan a toˈeman. ˈAyaw no mafanaˈ to soˈlinay kimad ko Ifisoay a Krisciyang tada mapaysinay, maapohay no kimad no mararaway pihakelongan. Itiya masalalomaˈay no pito kasemeran no tamdaw a efiw no Timitrius, itiniay i niyaroˈ no Ifiso, ˈalomanay tayraay mitaˈongay a tamdaw fanekfekay to pihakelongan. Misangaˈay ato pacakayay to samiyay no Timitrius o cietanay to payci a singdi. (Dmak 19:​23-​27) Roma i, o niyaroˈ no Ifiso matenakay ko miˈedaway a demak.​​—⁠Dmak 19:19.

5. O Ifiso a tamdaw itiniay i toˈemanay no waywayan, hano saan ko sowal hani?

⁵ No waywayan a toˈeman. Malafoay ko waywayan no Ifiso, kaacekan ko waywayan. Itini misacohiyay, anca misikay to lisin no pihakelongan, marariday a somowal to kaacekan a sowal. (Ifiso 5:3) ˈAlomanay Ifiso a tamdaw ‘malahdawayto ko palinian no waywayan,’ tatodong nonini i, ‘caayto ka adadaen ko falocoˈ ’ sanay. (Ifiso 4:​17-​19) Cowa ka fanaˈ ko Ifiso a tamdaw to ngaˈayay ato tatiihay palinian ni Yihofa, mansa mapaelayto ko makapahay falocoˈ nangra, caay ka ciharateng to araaw ni Yihofa. Mansa, pasowal ci Pawlo ‘mapehelay ko harateng nangra, miliyasay to sapafeli no Kawas a ˈorip.’

6. Hano pasowal ci Pawlo to Ifisoay a Krisciyang o ‘itiniay i ˈodingaray’ hani?

⁶ Nikawrira, o romaroma Ifiso a tamdaw cowa ka padadotoc materek i toˈemanay, sowal ni Pawlo ‘anini sato i, pakayni i Tatapangan hato itiniayto i ˈodingaray’ cangra. (Ifiso 5:8) Pacomodan nangra ko tedi no soˈlinay kimad i kaˈorip no niyah. (ˈOlic 119:105) Mifalahanto nangra ko mararaway pihakelongan ato malafoay a waywayan. Midokoay cangra to Kawas, midemak to kaolahan Ningra a demak, hanaca misarocod ‘mitodong to Kawas.’​​—⁠Ifiso 5:1.

7. O pakayraan no mita ato Ifisoay a Krisciyang itini maanan a demakan hato malecaday hani?

⁷ Malecaday ko pakayraan ita. ˈAyaw no mafanaˈ kita to soˈlinay kimad, itiniay i toˈemanay no pihakelongan ato no waywayan. Ilalomaˈay ita o romaroma tamdaw na misalisinay to lisin no mararaway pihakelongan, anca malafoay ko nokaˈorip, kawra mafanaˈ to palinian ni Yihofa ikor cowato ka pihaen to demak. Misatapangay kita mitoor to moecelay a palinian no Kawas a maˈorip, hanaca mikitini milifok to taˈangayay a epoc. (Isaya 48:17) Nikawrira, sapiliyasaw kita to toˈemanay, ‘padadotoc malo ˈodingaray a wawa,’ o papadadotoc misaˈicel miremo to masakenakenaay a sacona. Sasamaan ko pidemak ita hani?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

MILIYAS TO TOˈEMANAY

8. Mikitini Ifiso 5:​3-5, Ifisoay a Krisciyang oha mamidemak to maanan?

⁸ ˈOsien ko Ifiso 5:​3-5. Sapiliyasaw to no waywayan a toˈemanay, itiniay Ifiso a Krisciyang papadadotoc mihadak to ˈicel, kiemel eca ka pidemak to kapiliˈan no Kawas a demak, mahawpay ko malafoay madadiˈiyay a waywayan ato kaacekan a sasowalen. Patalipaˈelalay ko tarokos ci Pawlo to Ifisoay a Krisciyang, oha mamiliyas cangra to hatiniay a demak, hongaˈ ‘micomod i Hongti Kitakit ni Kristo ato Kawas micada to hafay.’

9. Hano cowa ko ngangaˈay kita miingid to masamaamaanay malafoay a demak hani?

⁹ Ano kitato papadadotoc mihadak to ˈicel, miliyas to ‘toˈemanay awaay ko epoc a demak.’ (Ifiso 5:​11) Misawacayay ko nalifetan, ano mararid ko tamdaw mitengil, minengneng anca malalengo to tao to cowa ka korac ato malafoay a demak, oha mamidemakto to mahaenay a demak alatek. (Satapangan 3:6; Yakop 1:​14, 15) Itini cecay kitakit, ˈalomanay salikaka itiniay i picawmaˈan to widang a wangcan makakapot malo masakapotay. Salakat, o milengoan nangra o milingatay ci Yihofaan ato soˈlinay kimad. Kawra palidlid sanay, mafalicayto ko milengoan nangra a lalakaw, misatapangay cangra mararid milengo to pakayniay i madadiˈiyay a demak. Ikorto, lalomaˈay nangra a pina salikaka mihayiay, milengo to kaacekan a sasowalen mafiyoray cangra, telocto maˈaˈodangayto to roma a tamdaw.

10. Mihalakaay ci Satan sasamaan milipalaw kitanan hani? (Ifiso 5:6)

¹⁰ O hekal ni Satan sahtoay sapilipalawaw kitanan, papiharateng kitanan o malafoay kaacekan a demak i pinengneng ni Yihofa cowa ko tatiihay saan. (2 Pitiro 2:​19) Cowa ko kafahkaˈan konini, samanen mananamay ci Satan misaka dademak to mioratay to tamdaw a pakayraan, ho ecato ka hapinang no tamdaw ko ngaˈayay ato tatiihay. (Isaya 5:​20; 2 Korinto 4:4) Mansa o milasilan no adihayay ika, kamok no tilifi ato wanglo a sasowalen, sahtoay misafelitay to moecelay palinian ni Yihofa. Mihalakaay ci Satan misaˈefit kitanan, o kaacekan a waywayan ato pakayraan a maˈorip cowa ko mararaway, cowa ko papaira to tatiihay a teloc, hanaca o papairaho to lipahak no mita sanay.​​—⁠ˈOsien ko Ifiso 5:6.

11. Nalifetan ni Ancila samaanay mitadtad, mihakelong to sapalimoˈot no Ifiso 5:7 tada kalimlaan? (Nengnengen ko coka.)

¹¹ ˈAlomanay tamdaw midemakay to mararaway demak i pinengneng no Kawas, makalimay ci Satan makakedec ko kacacawmaˈ ita to mahaenay a tamdaw. Kawra, ano mararid kita malacafay to mahaenay a tamdaw, wa pasangarto midofdof to palinian ni Yihofa. Mihaenay, somowalay ci Pawlo: ‘Aka a malacafay cangranan.’ (Ifiso 5:7) Anini, o masiˈayaway ita a pakayraan ikakaay to masiˈayaway no Ifisoay a Krisciyang ko pasangar, samanen o micawmaˈan ita a tamdaw cowa ko maˈaraway aca i nokaˈorip, mahawpayho ko micawmaˈan i wangcan a tamdaw. Itiniay i Asia ci Ancila mahapinangay ningra iraay ko katalawan no picawmaˈan to widang a wangcan.a Sanay cingra: “O picawmaˈan to widang a wangcan o taˈangayay a talakal, itini coko kafanaˈan iso a pakayraan palidlid sato mapaˈel ko falocoˈ. Harateng ako isalakat ‘mala widang’ to cowa pikangodo to palinian no Fangcalay Cudad a tamdaw cowa ko maanan. Salikor, midemak to kapiliˈan ni Yihofa a demak i kaˈorip cowa ko mararaway sanay ko harateng ako.” Kao ngaˈayay, mikitini ciolahay falocoˈ a padama ko malohemay malitengay ci Ancilaan a midemak to kalimlaan a pisalof. Sanay ci Ancila: “Nohatini misamacayay kako misimsim to pakayniay ci Yihofaan a demak, cowato ka ˈenep to picawmaˈan to widang a wangcan.”

12. Samaan ko pidemak ita ngaˈ kiemel mitoor to ngaˈayay ato tatiihay a palinian ni Yihofa hani?

¹² Harateng no ˈalomanay tamdaw o malafoay a waywayan cowa ko maanan sanay, mafanaˈay kita o mararaway ko mahaenay a harateng, oha mamisaˈicel kita micoˈay. (Ifiso 4:​19, 20) Ngaˈayay licayen ita ko niyah: “Ano cafayto matayal, cafay micudad, anca romaroma cowa pidofdof to palinian ni Yihofa a tamdaw, misaˈicelay kako miliyas cangranan eca ka picawmaˈ cangranan hokira? Soˈliˈlin pasowal ko tamdaw pakidemay ko harateng ako, caay ka kahi micada to tao, kawra kamayan kako a timolo midofdof to palinian ni Yihofa han?” Roma i, patalipaˈelalay ko 2 Timoti 2:​20-​22 kitanan, ano itinito i kasakopang, maminaˈon kita mipiliˈ to ngaˈayay cawmaˈen a tamdaw, samanen o romaroma tamdaw tatiihay ko pifiyor kitanan alatek, ho ecato ka ngaˈay kita padadotoc madimadi midoko to Kawas.

‘PADADOTOC MALO ˈODINGARAY A WAWA’

13. ‘Padadotoc malo ˈodingaray a wawa,’ o manan ko tatodong hani? (Ifiso 5:​7-9)

¹³ Cowa ko patalipaˈelal aca ni Pawlo to Ifisoay a Krisciyang padadotoc miliyas to toˈemanay, pakalalokayho cangranan ‘padadotoc malo ˈodingaray a wawa.’ (ˈOsien ko Ifiso 5:​7-9.) O manan ko tatodong no sowal ningra hani? Kantangen ko sowal, mamicerid kita malo soˈliˈlinay a Krisciyang. Sapidangaraw tonini, cecay pakayraan i, malalok mikingkiw to Fangcalay Cudad ato mitepangan a cudad, mangalef misongilaˈ misinanot to taˈarawan ni Yis Kristo ato sapasifanaˈ ningra a kimad, samanen o ‘tedi no hekal’ cingra.​​—⁠Yohani 8:​12; Taneng 6:​23.

14. O fangcalay saocor iraay ko maanan sapadama kitanan?

¹⁴ Sapadadotocaw ‘malo ˈodingaray a wawa,’ misaaliayho kita to sapadama no fangcalay saocor, samanen itini tonini a mapelalay ko waywayan a hekal sapadadotocaw a makorac, cowa ko madoloay. (1 Tisalonika 4:​3-5, 7, 8) O fangcalay saocor papadama kitanan micoˈay to harateng no hekal, mahawpay ko kihcod misafelitay to araaw no Kawas a sasowalen ato harateng. Papadamaho ko fangcalay saocor kitanan palahad to ngaˈayay minaroˈan, o ‘masakenakenaay ngaˈayay, moecelay, madimadiay.’​​—⁠Ifiso 5:9.

15. Sasamaan kita milifok to fangcalay saocor? (Ifiso 5:​19, 20)

¹⁵ O cecay pakayraan milifok to fangcalay saocor i, pasayra i Kawas mitolon. Sowal ni Yis, ci Yihofa ‘papafeli to fangcalay saocor i micangacangay Cingranan a tamdaw.’ (Luka 11:13) Mirienang kita to saˈopo, malacafay to salikaka pakahemek ci Yihofaan, mamilifok to fangcalay saocor. (ˈOsien ko Ifiso 5:​19, 20.) Taˈangayay ko ˈicel no fangcalay saocor pairaay to tawlikay, padama kitanan malo kahemekan ni Yihofa a tamdaw.

16. Samaan ko pidemak ita o cacitanengto ko misaˈosian hani? (Ifiso 5:​10, 17)

¹⁶ Ano mamidemak kita to kalimlaan a sasaˈosien i, hapinangen ‘o maanan ko araaw ni Yihofa,’ dotoc tooren ko araaw Ningra a midemak. (ˈOsien ko Ifiso 5:​10, 17.) Miharateng kita to cecay demak milingatay to maanan safalod no Fangcalay Cudad, mihaen micangacangay ci Yihofaan samaanay ko pinengneng tonini a demak. Ikor sakadademaken ita konini a safalod, mamadoloto citaneng ko pisaˈosi.

17. Sasamaan ko pidemak ita o ngaˈayay ko pisaka dademak to toki hani? (Ifiso 5:​15, 16) (Nengnengen ko coka.)

¹⁷ Palimoˈotayho ci Pawlo to Ifisoay a Krisciyang ngaˈay ko pisaka dademak to toki. (ˈOsien ko Ifiso 5:​15, 16.) O ˈada ita ci Satan, oyaan ‘mariˈangay,’ makalimay cingra kitanan ˈifowa micangacang to demak nonini a hekal, mihaen awato ko toki ita matayal saki Yihofaan. (1 Yohani 5:​19) Ano caka pinaˈon kita, itini pinengneng to hafay, picudadan no hekal ato tayal no niyah mamadoloto paikaka to tayal ni Yihofa. Ano iraay ko hatiniay a pasangaray no cecay Krisciyang, mitadtaday konini mafiyorayto no hekal ko harateng ningra. Manaokaniw, masowalay i fafekang a demak cowa ko mararaway, kawra o hatiniay a demak cowa ko ngangaˈay paisalakaten i nokaˈorip ita. Sapadadotocaw ‘malo ˈodingaray a wawa,’ oha ‘mamisongilaˈ kita misaka dademak to toki,’ misamacay to soˈliˈlinay kalimlaan a demak.

18. Pakayni sakangaˈayaw misaka dademak to toki, midemakay ci Tanate to maanan a demak?

¹⁸ Mameten ko toki adihay ko tayal saki Yihofaan. Itiniay i Nanfi faˈinayan salikaka ci Tanate mihaenay ko demak, sanay cingra: “Mifolfolan ako ko pakayraan no niyah maˈorip, hanaca mitolon micangacang ci Yihofaan padama takowanan macakat ko kangaˈay no mitosilay tayal. Micangacangayho kako mahela ko matatodongay a katayalan, ho ngaˈay kako adihay ko toki a mitosil. Ikor, soˈlinay padama ci Yihofa takowanan mahela ko mahaenay a katayalan, oranto kako ato fafahi malacafayay misatapang miemin to toki matayal saki Kawas.”

19. Sasamaan ko pidemak ita ngaˈ padadotoc ‘malo ˈodingaray a wawa’ hani?

¹⁹ Maˈosi no Ifisoay a Krisciyang ko tikami ni Pawlo ikor, maedeng padamaay cangranan matongal ko ˈicel padadotoc madimadi ci Yihofaan. Ano kitato ngaˈay mikitini i tikami ni Pawlo milifok to adihayay epoc. Oha mamisinanot kita mipiliˈ to lawla ato widang, ngaˈayho pakalalok kitanan padadotoc misongilaˈ a mikingkiw to Fangcalay Cudad, micada to sakayat no citediay a soˈlinay kimad. Misaˈicelayho ko sowal ni Pawlo kalimlaan ko fangcalay saocor, padama kitanan palahad to adihayay makapahay capeling. Sakadademaken ita ko sowal ni Pawlo, ngangaˈayto mitoor to araaw ni Yihofa citaneng ko misaˈosian. Sinanoten ita konini a demak, ngangaˈayto miliyas to toˈemanay, padadotoc materek i ˈodingaray!