Pinengnengan to Lalakaw no Mitosilay ato Nikaˈorip Rayray no Saˈopo
© 2023 Watch Tower Bible and Tract Society of Pennsylvania
SAKA 1 FOLAD 1-7 ROMIˈAD
O ODOˈ KO KIMAD NO KAWAS | YOPU 32-33
Mihinom to Matoleday ko Falocoˈ a Tamdaw
it-2-CH 891
Ilihu
Cowa pisakakinih ci Ilihu to tamdaw, cowa pisamangah ko sowal a misaˈakawang to tamdaw. Ihkalay cingra cipinang, malecaday ko niyah ci Yopuan ‘tano seraan’ a sangaˈen no Kawas cingra, mankora cowa sapipatalawaw ci Yopuan; misawidangan ningra ci Yopu, ano pasowal cingra i, tano ngangan a pasowal ci Yopuan. Ci Pilitat aci Cofac cowa ka pihaen to demak.—Yopu 32:21, 22; 33:1, 6.
w14 6/15-CH 25 fiedac 8-10 fatac
Mahaenay Oni Yihofa ko Pinengneng Iso to Dangoc no Tamdaw Han?
8 Sasamaan kita siniˈada to kalonayan no salikaka hani? Saharateratengen ita, o ˈalomanay salikaka iraay ko pades, tinakoen cowa ka ngaˈay ko tireng, micolian no paro no lomaˈ, anoca matoleday a masomaden ko falocoˈ. Ano o kita kora tahapdesay, coko halamhamay to tao a siniˈada kitanan han? Ci Yihofa na patalipaˈelalay to itiniay i Icip a misemsemay to roray a tamdaw, ano micomodto cangra i mikiˈokan a pala i, ano maˈaraw ko manikaway a salikaka misaaliay to sapadama, aka a ‘saˈatekak sa ko falocoˈ’ eca ka pikihar cangranan.—Limoˈot 15:7, 11; Lifi 25:35-38.
9 Ano tahasiˈayaw ko salikaka to pasangaray i, aka a saolatekay sa miharateng, to o nangra a raraw kora. Kalikien ita mihinom cangra, padamaen cangra i noˈadingoan. (Yopu 33:6, 7; Matay 7:1) Patinakoen ita, ano parakat to otopay pakidem a madokaˈ ko cima i, o tatangsolen patayra i pipaisingan, o ising a tamdaw cowa ko mamipalak to adihayay toki a milicay to o ningra a raraw hokira? Cato. O kakaliki cangra miadah tora madokaˈay. Malecaday, o salikaka ano malonayay to pakayniay i maanan a pasangar i, salakat a dadademaken ita i, padamaen cangra itini noˈadingoan.—ˈOsien ko 1 Tisalonika 5:14.
10 O romaroma salikaka ano nengnengen hato malonayay, kawra ano haratengen kora pakayraan, mamahapinang to cowa ka hatira. Tinakoen, o romaroma fafahiyan salikaka misafelitan no paro no lomaˈ, hato malonayay cangra, ˈarawhan ciˈicelay ko kemod no falocoˈ, fanekfekay ko nika pakasoˈlin no falocoˈ. Haratengenho ko roma, maˈaraw iso ko cecay awaay ko faˈinay a wina, marariday a mihawikid to wawa tayra mirienang to saˈopo, coko masemeran nanay kiso to pasoˈlinay ato misetekay a falocoˈ ningra han? O romaroma kaemangay soˈlinto tahasiˈayaw to saroero no cahay i picudadan, kamayanayho a mitawmec to soˈlinay kimad han? Ano iraay ko misapoeneray falocoˈ ita mamahapinang, orira hato malonayay a salikaka ‘kadofahay ko pakasoˈlinay falocoˈ’ nangra, malecaday toya awaay ko pasangar a tanoktokay a tamdaw.—Yakop 2:5.
Itini i Matatodongay a Tatokian a Caciyaw
17 O saka sepat miˈaraway ci Yopuan a tamdaw ci Ilihu, o salawina ni Apraham cingra. Tiya masasowal ci Yopu atoya tatoloay tamdaw i, tengil sanay cingra itihi. Misongilaˈay ci Ilihu a mitengil, mansa sidaˈit ato ihkal ko mihadakan a limoˈot, padama ci Yopuan a misalof to harateng. (Yopu 33:1, 6, 17) O kaciharatengan ni Ilihu i mikangodo ci Yihofaan, eca ko niyah ato roma tamdaw. (Yopu 32:21, 22; 37:23, 24) O taˈarawan ningra mananamay ita, latekay o tatomerep kita, misongilaˈ mitengil to sowal no tao. (Yakop 1:19) Mananamayho ita, ano palimoˈot to tamdaw i, paˈdil ci Yihofaan o sakakaay kalimlaan.
18 Dofdofen ita ko limoˈot no Fangcalay Cudad, itini matatodongay tatokian a somowal to matatodongay a sowal, o paihkalay to misalimlaay to inaneng a caciyaw. Citanengay a hongti ci Solomon sanay: ‘O cecay sowal itini matatodongay tatokian a somowal, malecaday o ekim a lingko mitelian i linkim a piyal.’ (Taneng 25:11) ˈAyaw no papasowal kita to tamdaw, misinanot mitengil ato misongilaˈ a misimsim, o mihadakan a sowal malecad o ekim a lingko a makapah ira ko epoc. Mihaenay, ano hakowato ko sowal, wa ngaˈay pakalalok to tao ko sowal ita, wa ngaˈayho pakahemek ci Yihofaan. (Taneng 23:15; Ifiso 4:29) Mihaen ko demak ita, o miakoˈiday to pafeliay to saka inaneng ita a caciyaw a Kawas!
Odoˈ no Sinael
w13 1/15-CH 19 fiedac 10 fatac
Padadotoc Miingid ci Yihofaan
10 Malecaday, misinanot to papotal no tireng no mita cowa ko mararaway, kawra aka pakinali a sapipalahedawaw to nika liteng. O mahaenay noka falic no tireng o tahapinangan noka tenes, taliˈang ato nokemoday a kapah. Patinakoen, sanay ko sowal no Fangcalay Cudad: ‘O tamdaw ano romakat to moecelay lalan, o tamohong ko maˈofaday fokes.’ (Taneng 16:31) Mahaenay ko pinengneng ni Yihofa kitaanan. Haenen ita oni Yihofa a minengneng ko niyah. (ˈOsien ko 1 Pitiro 3:3, 4.) Mihaenay haw i, toha sapisakapahaw mitokad a misalof to pising anoca komaen to cemel, o matanengay demak konini han? Ano hakowato ko mihecaan, samaanto ko tireng, o soˈlinay a kapah naitiniay ‘sapafeli ni Yihofa a hemek’, o mikitiniay i falocoˈ ko mahaenay a kapah. (Nihimiya 8:10) Itinito kita i faelohay hekal ngaˈ ira ko malefotay a tireng, midaˈoc a kaemang a makapah. (Yopu 33:25; Isaya 33:24) ˈAyaw no aaira ko faelohay hekal, sarocoden ita misaka dademak ko iraay no mita anini, paihekal to taneng ato pakasoˈlinay falocoˈ, mitawmec to makedecay noka lalaed ita aci Yihofa.—1 Timoti 4:8.
SAKA 1 FOLAD 8-14 ROMIˈAD
O ODOˈ KO KIMAD NO KAWAS | YOPU 34-35
Sasamaan Misiˈayaw to Cowa ka Sadafdaf a Demak
wp19.1-CH 8 fiedac 2 fatac
O Masamaanay ko Kawas Hani?
O midemakan no Kawas sahtoay o masadafdafay, sowal no Fangcalay Cudad, ‘cowa pidemak ko Kawas to tatiihay, cowa ko mamidemak to mararaway.’ (Yopu 34:10) Pakayni to pisawkit no Kawas, sowal no ˈOlic, ci Yihofa ‘masadafdafay a misawkit to kasakitakit’ sanay. (ˈOlic 67:4) Mitaeselay minengneng ci Yihofa to falocoˈ no tamdaw, cowa ko mamasaˈefit no tamdaw Cingra, mihapinangay Cingra to demak, masadafdaf ko pisawkit. (1 Samuil 16:7) ˈIntehay ci Yihofa to caay ka sadafdaf ato manaholay a demak, ano mafekadto i caniˈiw no hekal ko mahaenay a demak i, ihekalay mafanaˈ. Mikiˈokay Cingra, kakaliki Cingra ‘miwanik to tatiihay nai hekal.’—Taneng 2:22.
w17.04 10 fiedac 5 fatac
Ano Irato ko Hongti Kitakit no Kawas Sasamaan ko Demak?
5 Mamisamaan to demak ci Yihofa hani? Maharekayto milasil to mamisawkit tonini cilikakawaay a hekal, kawra cowaho pisawkit to kahacecay a tamdaw, pairaan Ningra ko toki a pasasiyor ko mariˈangay a tamdaw. (Isaya 55:7) Nikawrira, ano eca ka pifalic ko mariˈangay tamdaw, irato ko taˈangayay padiing midamaayho tonini cilikakawaay a hekal i, sasamaanto ko teloc nangra hani? Mikiˈokay ci Yihofa to papalaˈafoen a tahadaˈoc ko mariˈangay tamdaw. (ˈOsien ko ˈOlic 37:10.) ˈAlomanay mariˈangay tamdaw mihimeday to nidemakan a tatiihay demak, cowa ko mamasawkit kako saan a miharateng. (Yopu 21:7, 9) Sowal no Fangcalay Cudad: ‘Mata no Kawas pamotekay to lalan no tamdaw, mitiwca to nirakatan no tamdaw. Awaay ko toˈemanay kitiraan to pilimekan no tamdaw.’ (Yopu 34:21, 22) Mitaeselay minengneng ci Yihofa to papotal no demak, awaay ko maanan mamalawa no mata Ningra, awaay ko mamilimek i toˈeman, cowa ko mamasaˈfit no tamdaw ko Kawas. Ikorto no Armakiton, cowato ko mamahela ko mariˈangay tamdaw, samanen o mamatekopto cangra, midaˈoc a malahdaw!—ˈOlic 37:12-15.
Wa Pakayni Kiso ci Yisan a Mahafikod Han?
19 Anini iraay ko malecaday a demak han? Iraay. ˈAlomanay tamdaw pakayni i pisatenok ita i mikowanay a demak, mapiliˈay kitanan. O harateng nangra itini misinkiway wa mitopa kita. Kawra, mafanaˈay kita itini pinengneng ni Yihofa, ano o tamdaw ko mipiliˈan ita malo mikowanay, o mifalahayto Cingranan. (1 Samuil 8:4-7) Roma i, harateng no roma tamdaw ngaˈay patireng kita to picudadan, paisingan ato roma ngaˈayay a demak. Maˈaraway nangra misarocoday kita to mitosilay a tayal, eca ka pisaysay to pasangaray no hekal, caayto pitengil to lihaf ita.
20 Samaan ko demak ngaˈ eca ka mahafikod? (ˈOsien ko Matay 7:21-23.) Wa misarocod kita midemak to sapalimoˈot ni Yis kitaanan a demak. (Matay 28:19, 20) Caay ka ngaˈay makalisanga ko falocoˈ ita pakayni toniya mikowanay ato pasangaray no hekal. Maolahay kita to tao, ciharatengayho to misiˈayawan a pasangaray nangra. Kawra mafanaˈay kita, pasifanaˈ to tao mafanaˈ to Hongti Kitakit no Kawas, padama cangranan patireng to kalawidang ci Yihofaan, ngaˈ ira ko taˈangayay haepoc nangra.
Odoˈ no Sinael
w17.04 29 fiedac 3 fatac
Nanay Mikifalocoˈ a Mipafeli Kiso Pahemek ci Yihofaan!
3 Hananay ni Ilihu pasowal ci Yopu: ‘Ano moeceecelay kiso, ngangaˈay mipafeli to maanan i Kawas saw? O maanan ko lalayapen Ningra i tisowanan saw?’ (Yopu 35:7) O noka pisaˈicel no tamdaw a midoko to Kawas awaay ko epoepoc sanay ko tatodong nora sowal ni Ilihu han? Cowa, pasowal ci Ilihu tonini sowal cowa ka rikecen no Kawas, o sapitadtadaw cingra ano midokodoko to Kawas to tamdaw, cowa ko mamifiyor to nika ˈakawang no saaroˈan no Kawas o sanay. Caay ko mamitiˈer ci Yihofa to maamaan a dafongan, awaay ko kacangoˈotan Ningra, awaay ko pakayraan ita pahafay Cingranan anoca mitongal to ˈicel Ningra. Masafelitay, o iraay ita a kangaˈayan, taneng anoca ˈicel sahetoay o sapafeli no Kawas, hanaca o maminengneng ci Yihofa to misamaanay kita misaka dademak tonini sapafeli Ningra.
SAKA 1 FOLAD 15-21 ROMIˈAD
ODOˈ KO KIMAD NO KAWAS | YOPU 36-37
Wa Tahadaˈocen ni Yihofa ko ˈOrip Iso
w15 10/1-CH 13 fiedac 1-2 fatac
Ngangaˈay Kita Pakakilim to Kawas Han?
MIDAˈOCAY KO KAWAS: Sowal no Fangcalay Cudad: ‘Nai ti:yaho o Kawas Kiso tangasa i daˈoc. (ˈOlic 90:2) Ano falicen ko sowal, awaay ko satapangan Ningra awaay ko pihererekan Ningra o sanay, ano kitinien i pinengneng no tamdaw, “caay ko mamafilo ita a misaˈosi ko mihecaan Ningra.”—Yopu 36:26.
O manan ko epoc i tisowanan hani? Ano makahi kiso miraod to Kawas, ngangaˈayto a midaˈoc ko ˈorip. (Yohani 17:3) Ano cowa ko midaˈocay a Kawas ci Yihofa i, sasamaan Cingra pafeli to midaˈocay ˈorip i tisowanan hani? Edengan o ‘midaˈocay a Hongti’ ko papalaˈosi tonini sakiˈok.—1 Timoti 1:17.
Misalimlaay Kiso to Sapafeli no Kawas a Sapatelong Han?
6 O nanom tano malosoˈay a pakayraan materek i cikiw, samanen matatodongay ko laˈed no cikiw ato cidal. Ano mangata to miming, o mamalo lahod ko polong a nanom, o fafaedet a maˈicang ko cikiw, awato ko maˈoripay. Ano maraay to miming, o mamalo soeda ko polong a nanom, malo soeda koniya cikiw. Patatodongan ni Yihofa ko kitiraan no cikiw, hato ngaˈayay ko pikoliyol no nanom i cikiw, midama to sakaˈorip. O cidal palahoday to nanom no riyar ato fafekangay no sera a nanom, tayra kakarayan malo ˈoˈol. To mihecahecaan tada adihayay ko malo lahoday a nanom. O lahod no nanom maedeng 10 romiˈad materek i kakarayan, ikor malo ˈorad ato soeda matefad, salikor patikolay i ˈalo, fanaw ato riyar. Oniya pikoliyol padamaay to cikiw ira ko maedengay a nanom, misawacayay to citanengay, taˈangayay ko ˈicel ni Yihofa.—Yopu 36:27, 28; Patnakay 1:7.
Kedecen Mitafo ko Sapafeli no Kawas a Hatokel
16 O midaˈocay ˈorip a hatokel o sapafeli ni Yihofa kitanan a kalimlaan a sapatelong. Fanekfekay kita hinatala toniya makapahay a hatokel malaˈosi a romiˈad, hanaca pakasoˈlinay kita to aira konini a romiˈad. O hatokel hato o ˈenor no tamina, ngaˈay patanektek kitanan, ira ko ˈicel miemem to sapalifet, sapalak, anca o saroero no patay. O hatokel malecaday o kafong, ngaˈayay midipot to harateng no mita, padama kitanan mifalah to mararaway a demak, padadotoc midemak to matatodongay a demak. O sapafeli no Kawas a hatokel padamaay kitanan miingid Cingranan, pakahapinangho kitanan tangongolay ko olah Ningra kitanan. Mikedec kita mitafo to hatokel no niyah, hanaca ihkal ko pinengneng tonini a hatokel, mamalifok ko taˈangayay a epoc.
Odoˈ no Sinael
it-1-CH 244
Patenak to Lihaf
Itini i masowalay no Fangcalay Cudad a pala, nolitengan a tamdaw tano masakenakenaay a pakayraan a mafafalic to lihaf. Ono i niyaroˈay anoca nai papotalay a lihaf tano ngoyosan a patenak. (2 Samuil 3:17, 19; Yopu 37:20) O milaliwkoay ato misasingdiay tamdaw, ano pahanhan i fatad anoca micakay to dafong i, tohati:niay miˈorongay to nai raayay a lihaf. O Palistin ato Asiya, Afrika ato Uropa, o karomakatan no misasingdiay a lalan, mihaenay i, o itiraay a tamdaw marariday pakatengil to mafekaday demak i roma a pala. Itini picakayan to dafong a kakahaday a potal no niyaroaroˈ, ngaˈayay ko tamdaw pakatengil to lihalihaf no icowacowaay.
SAKA 1 FOLAD 22-28 ROMIˈAD
O ODOˈ KO KIMAD NO KAWAS | YOPU 38-39
Hakowaay ko Mapalakay a Toki Iso Mihapinang to Masangaˈay ni Yihofa Hani?
Wa Makahi Kiso Mihadidi Mitala ci Yihofaan han?
7 Pakayni samanay ci Yihofa misangaˈ to cikiw, sanay ko sowal no Fangcalay Cudad ‘mifakciwan’ koniya sera, ira ko ‘katomirengan no hecek,’ ‘paranaan a fakeloh.’ (Yopu 38:5, 6) Paselaˈayho ci Yihofa, mipalakay to toki miharateng to misangaˈan Ningra a maamaan. (Satapangan 1:10, 12) Ngaˈay haratengen iso maˈaraw no coyoh palidlid saan ko pisangaˈ ni Yihofa to kihcod, samanay ko nafalocoˈan nangra hani? Maedeng masemeray ko harateng nangra! Sowal no Fangcalay Cudad misatapang cangra a ‘mawaho milekal.’ (Yopu 38:7) Soˈlin o pisangaˈ ni Yihofa halafinay ko mapalakay a toki, kawra tiya songilaˈen Ningra minengneng to misangaˈan no Niyah i, marenecay ko falocoˈ, saan ko sowal ‘tada ngaˈayayto.’—Satapangan 1:31.
O Patikolay Maˈorip a Limasmas Paihkalay to Olah, Taneng ato Mihadidiay no Kawas
2 Salakat misangaˈan ni Yihofa ko Wawa Ningra ci Yis, dotoc malacafayay toniya Wawa misangaˈ to ‘romaroma a maamaan,’ mahawpay ko masacaˈolay masaemangay a coyoh. (Kolosay 1:16) Malacafay ci Yis ci Yihofaan a matayal tada lipahakay, o romaroma a coyoh malecaday a lipahak, samanen pakaˈaraway cangra to pisangaˈ ni Yihofa ato ‘Ngaˈayay Sayho’ Ningra ci Yis to maamaan i paro no kakarayan. (Taneng 8:30) Samanay ko coyoh a paihkal to kalipahak nangra hani? Sowal no Fangcalay Cudad, tiya masangaˈ ko cikiw i, ‘mawahoay a mahemek’ cangra. Ikorto, misangaˈ ci Yihofa to kihcod i fafekang no cikiw, mangalef ko tamdaw, tada lipahakay cangra! (Yopu 38:7; Taneng 8:31) O kihcod misangaˈan ni Yihofa paihkalay to olah ato taneng Ningra.—ˈOlic 104:24; Loma 1:20.
Pakaynien i Nisangaˈan ni Yihofa a Maamaan Mitongal to Kafanaˈ Cingranan
8 Ngaˈayay tatiˈeren ita ci Yihofa. Padamaan ni Yihofa ci Yopu matongal ko kapitiˈer Cingranan. (Yopu 32:2; 40:6-8) Itini kasasowal aci Yopuan, masowalay ni Yihofa ko adihayay a nisangaˈan a maamaan, tinakoen o foˈifoˈis, toˈem ato fitiliˈ, efa ato kolong. (Yopu 38:32-35; 39:9, 19, 20) Onini a kihcod misawacayay, cowa ka ciˈicel aca ci Yihofa, matomesayho ko olah, mikiriwiˈay ko taneng. Mikitini tonini kasasowal, o nika pakasoˈlin ni Yopu ci Yihofaan matongalayto. (Yopu 42:1-6) Malecaday, ano songilaˈen ita misolap a minengneng ko nisangaˈan a maamaan mamahapinang ita, ci Yihofa iraay ko mikiriwiˈay a taneng ato ˈicel, mikikakaay kitaanan. Mankora pakasoˈlinen ita, cowa ka ciˈicel aca Cingra mipalahdaw to kihcod a pades ita, hanaca oha mamihaen Cingra to demak. Mafanaˈ toninian i, matongalay ko kapitiˈer ita Cingranan.
Odoˈ no Sinael
it-1-CH 907
O Mipatirengay to Rikec
O Mipatirengay to Rikec ci Yihofa. O edengan cecay Cingra ko mipatirengay to rikec itini tonini a dohaw. O cowa ko maˈoripay dafong (Yopu 38:4-38; ˈOlic 104:5-19), ato maˈoripay a pinaˈorip (Yopu 39:1-30), midoedoay cangra to safalod no serayan, nao Kawas ko mipatirengay torira. Tona o misangaˈan ni Yihofa ko tamdaw, maˈimeray no safalod no serayan ni Yihofa cangra. Mafanaˈay ko tamdaw miharateng, iraay ko saali ino ˈadingoan, mankora maˈimeray no rikec no Kawas ino waywayan. (Loma 12:1; 1 Korinto 2:14-16) Ano i kakarayanay a coyoh mamidofdof to rikec ni Yihofa.—ˈOlic 103:20; 2 Pitiro 2:4, 11.
O safalod no serayan cowa ko mamapalak. (Yirimiya 33:20, 21) Onini a safalod mahapinangay itini i dohaw. O kakakusiya ngangaˈay mikitini tonini safalod, misaˈosi to rakat no folad, ato foˈifoˈis, awaay ko mimimiming a kasasiromaan. Ano padeteng sa misafelit to safalod no serayan i, tatangsol a tahacada to tatiihay a teloc. Malecaday, o misaˈosian no Kawas ino waywayan cowa ko ngangaˈay a taˈelifen, misilikoray tonini saˈosi o mamatefoc cangra. O saˈosi no Kawas ino waywayan malecaday to safalod no serayan caay ka ngaˈay a safeliten, soˈlinto caay ka tangsol sa matefoc ko tamdaw, kawra samaamaanen o mamapadiing cingra. ‘Aka pisakahemaw to Kawas. Ano o manan ko nipalomaan no tamdaw i, orira ko lalitoden ningra.’—Kalatiya 6:7; 1 Timoti 5:24.
SAKA 1 FOLAD 29-2 FOLAD 4 ROMIˈAD
O ODOˈ KO KIMAD NO KAWAS | YOPU 40-42
I Nalifetan ni Yopu Mananamay Ita ko Manan?
w10 10/15-CH 4 fiedac 4-6 fatac
“Cima ko Mamafanaˈ to Harateng ni Yihofa Saw?”
4 Ano misimsim to nidemakan ni Yihofa i, aka tano tamdawen a palinian a misawkit to Kawas. ˈOlic 50:21 paihkalay, iraay ko mahaenay a pinangan no tamdaw sanay. Onini sinael mitiliday to nano sowal ni Yihofa: ‘Mahecaday Kako i tisowanan sanay kiso saw.’ ˈAyaw no 175 mihecaan iraay ko hatiraay a sowal no mikakingkiway to Fangcalay Cudad a tamdaw: “O tamdaw madoloay misano niyahan a palinian a misawkit to Kawas, ano mamidofdof cangra to rikec i, mamidofdof ko Kawas sanay.”
5 Aka a tano niyahen a palinian a milalat ci Yihofaan, anoca saolatekay saan miharateng to o masamaanay a Kawas Cingra. Hano mamiliyas kita to mahaenay a noka piharateng hani? Samanen ano haenen ita tano malomotay ato cowa ka lefot a noka pinengneng to Kawas i, ano micekiw sato kita to Fangcalay Cudad i, wa miharateng to mararaway ko pidemak ni Yihofa. Nolitengan a Israil na mihaenay ko piharateng. Pakayni to picada ni Yihofa i cangranan, patelas sanay a mipateloc to sowal. Sinanoten ko nano sowal ni Yihofa i cangranan: ‘O sowal namo i: “Caay ka sadafdaf ko demak ni Yihofa” saan. Kamo o Israil tamdaw, ka pitengil, o Kako ko caay ka sadafdaf ko demak saw? Coko kamo ko caay ka sadafdaf ko demak saw?”—Icikil 18:25.
6 Toha sakaecaaw ka tano niyah a palinian a misawkit ci Yihofaan, oha mamihayi kita, malomotay ko pinengneng no mita, latek tada mararaway. O cacipinang ci Yopu toninian. Tiya tahapades cingra i, tada matoleday ko falocoˈ, o niyah aca ko miharatengan. Hato cowato pakahapinang to ikakaay ko nika masakalimlaan a demak. Kawra sidaˈitay ci Yihofa padama cingranan misakakahad to kapinengneng. Milicayan ni Yihofa ci Yopu to 70 a salicay, kawra awaay ko cecacecay to mafanaˈay ci Yopu a pacaˈof, itiniay a mipadama ci Yihofa cingranan to adihayay ko kafokilan ningra. Misapoeneray ci Yopu, makahi a mifikel to pinengneng no niyah.—ˈOsien ko Yopu 42:1-6.
Sarocoden ko Falocoˈ to Masaka Limlaan a Demak
12 Harek saho misemsem ci Yopu, patodicek han ni Yihofa mirikec cingra, tada pakinaliay kora han? Cowa, caay ka haen ko harateng ni Yopu. Ikor mifalicay ci Yopu, micada to sasalof no Kawas, saan a somowal cingra: “Orasaka, mangodoto kako toya nisowalan ako a sowal, aroˈ sato kako i sera ato i ˈafoˈafoan a mifalic to falocoˈ,” sanay. Sapalimoˈot ni Yihofa ihekalay mikowad to tamdaw, paˈicel ci Yopuan. (Yopu 42:1-6) O roma i, kaemangay a Ilihuan pasowalay to matatodongay a sapalimoˈot. (Yopu 32:5-10) Ta mitengil ci Yopu to sapalimoˈot a mifalic ikor, patahekalay ko Kawas to nika hemek noka madimadi ni Yopu.—Yopu 42:7, 8.
“Ka Halamham ci Yihofaan”
17 ˈAlomanay madimadiay sikawdan ni Yihofa na iraay ko timolo itini pakidemay sapalifet padadotoc a mihadidi, o masalalomaˈay a tinakoan ci Yopu. Itini Hipray masowalay no tarokos ci Pawlo ko adihayay ngaˈayay taˈarawan, hanaca pangangan cangraanan to ‘taˈangayay a ˈopo sano toˈemay a misawacayay tamdaw.’ (Hipray 12:1) Na tahasiˈayaway cangra to pasangaray katalawan a demak, kawra padadotocay cangra madimadi to Kawas ci Yihofaan. (Hipray 11:36-40) O pihadidi nangra ato karoray sahtoay awaay ko epoc han? Cowa ka hatira. Itiniho cangra toniya hekal i, soˈlin cowa pakaˈaraw to kalaˈosi no sakiˈok no Kawas, kawra kamayanho padotoc halamham ci Yihofaan. Pakasoˈlinay cangra malifokayto no niyah ko pihayda no Kawas, mansa pakasoˈlin to papakaˈaraw ko niyah to mamalaˈosi maemin ko sakiˈok no Kawas. (Hipray 11:4, 5) O taˈarawan nangra o papaˈicel to pisetek ita to falocoˈ, pakalalok kitaanan padadotoc halamham ci Yihofaan.
18 Anini, o pakayraan no hekal mangalefay ko tatiih. (2 Timoti 3:13) Padotocay ci Satan paira to pasangaray no finawlan no Kawas. Ano o maananto ko masiˈayaway ita a pasangaray, o mamisetek kita to falocoˈ padadotoc misaˈicel matayal saki Yihofaan, pakasoˈlin o halamhaman ita i ‘o soˈlinay materek a Kawas.’ (1 Timoti 4:10) Haratengen, o sapafeli ni Yihofa ci Yopuan a minaroˈan misawacayay ‘matomesay to damsayay ci Yihofa, hanaca siniˈadaay to tamdaw.’ (Yakop 5:11) Nanay padadotoc kita madimadi ci Yihofaan, pakasoˈlin Cingranan to ‘papalifon to mikifalocoˈay a micangacang Cingranan a tamdaw.’—ˈOsien ko Hipray 11:6.
Odoˈ no Sinael
it-1-CH 671
Milokes
Soˈliˈlin malokes no tao ci Yopu, kamayan moecel ko falocoˈ, madimadi cowa ka sawi. Kawra tona mararaway ko pinengneng ningra, o sasalafon cingra. Sanay ko sowal ni Ilihu pakayra ci Yopuan: ‘Cima ko matiraay ci Yopuan, taˈowak han a mienoc ko pilokes no tao, matira pinanom to nanom saw?’ (Yopu 34:7) O niyah aca ko mipaˈadingan ni Yopu, cowa paˈading to Kawas, samacay sanay paˈodingar to niyahan, cowa paˈodingar to Kawas. (Yopu 35:2; 36:24) Miharateng ci Yopu, ora pakidemay a pilokes noya tatoloay “widang”, o cingra ko mitoroˈan sanay, cowa ka hapinang ningra to o Kawas ko malokesay. Telocto i, haemin hananay ni Yopu micada kora pilokes nangra, hato caloh sanay a mitaˈowak a minanom. Ikor pasowalan no Kawas ci Yopu, mararaway kora kasomowal nangra pakayni i Kawas sanay. Mihaenay haw i, o Kawas ko milokesan nangra. (Yopu 42:7) Malecaday, pakayni to pisaali no Israil tamdaw to hongti, pasowalan ni Yihofa ci Samuil: “Caay ka ˈosi cangra i tisowanan, Kako ko kaˈosian nangra.” (1 Samuil 8:7) O roma sa i, pasowalan ni Yis ko nisawawaan ningra: ‘O papakayni kamo i ngangan no mako a makaˈinteh no kasakitakit [cowa ko pakayniay i tamowanan.] (Matay 24:9) Haratengen konini, ano tahasiˈayaw ko Krisciyang to pilokes no tao i, hongaˈ tahatolas a miemem, milifok to sapalifon.—Luka 6:22, 23.
SAKA 2 FOLAD 5-11 ROMIˈAD
O ODOˈ KO KIMAD NO KAWAS | ˈOLIC 1-4
Damaen ko Hongti Kitakit no Kawas
‘Wa Ngerngeren Ako ko Kasakitakit’
8 Samanay ko harateng no tamdaw toniya lihaf hani? Cowa kaolah ko ˈalomanay tamdaw. (ˈOsien ko ˈOlic 2:1-3.) Malecad o misowalan no Fangcalay Cudad, macariraway ko tamdaw no kasakitakit, minaˈayay to minilnilan ni Yihofa a mikowanay. O milasilan ita a lihaf no Hongti Kitakit cowa ko ngaˈayay lihaf sanay, o roma sifo mikecengay to mitosilay a tayal ita. Adihayay mikowanay no kitakit soˈlin pasowal to midokoay to Kawas, kawra caay kakahi misawad to fadangalan no niyah. Malecaday cangra to saka 1 hahekalan a mikowanay misafelitay to minilnilan ni Yihofa a ˈaˈideman, miˈodisay to madimadiay a finawlan no Kawas.—Dmak 4:25-28.
w16.04 29 fiedac 11 fatac
Maintain Your Neutrality in a Divided World
11 Pakadafongay a waywayan: Ano sakaretengen ita minengneng ko pakadafongay, ano tahasiˈayaw sato to misatenokay ko saaroˈan a sapalifet i, mamadolo a mapadik. Itini isaka 1970 a lalintadan i, mahakokayay ko i Malawiyay a salikaka, o cecay ci Rucu hananay a fafahiyan salikaka maˈaraway ningra ko papinapina Misawacayay Tamdaw cowa pitawmec to misatenokay a saaroˈan, sanay ko sowal ningra: Cowa sapisawadaw cangra to sinowayay a kaˈorip. Mihakelongay kamiyanan ko romaroma milaliw, ikor mitekoay to yofayof, patikol minokay i niyaroˈ, samanen cowa makahi a marorayen ko kaˈorip i pitepangan to mapadesay a tamdaw.” Nikawrira, soˈlinto tada manikaway, malahedawto ko polong a dafong, kamayan madimadi a misatenok to saaroˈan ko ˈalomanay a salikaka.—Hipray 10:34.
Odoˈ no Sinael
it-1-CH 839
Afih
O safak no emi mitafoay to ilalomaˈay a felac, cowa ka ngaˈay a kaenen, awaayto ko epoc, mankora mitaypiyaway to awaay ko epoc a dafong, o tatolaken a pafafidaˈ, ikor falahen. Itini i Fangcalay Cudad, o afih hananay i, misaka dademakan itini i sapatinako, itira tora sinael somowalay to samaanay ko nolitengan tamdaw a misafak.
O misafakay hananay i, mipafafidaˈan ko safak ato felac. Ikor mitapesan ko afih, kahemaway ko afih, maferferay no fali. Malecaday, ci Yihofa Kawas mihaenan ko pakayraan, mifalah to mitowakangay a tamdaw ilalomaˈ no finawlan Ningra, o fafalahen Ningra ko mariˈangay tamdaw ato misaˈadaay Cingranan a kasakitakit. (Yopu 21:18; ˈOlic 1:4; 35:5; Isaya 17:13; 29:5; Hosiya 13:3) O papesiˈen ko ˈada no Hongti Kitakit, mahaen to mapesiˈayto a afih, maferfer no fali, awaayto ko ˈosaw.—Taniil 2:35.
Oya awaayto ko epoc a afih tohatiniay misaˈopoan a mitodoh, ho eca ka maiyof no fali patikol a micomod i felafelacan. Malecaday, paliˈayaway pasowal ci Yohani ya mipaputisemay, o mariˈangay a pidoyongan o papalaˈafoen sanay, tano namalen a mitodoh. Oya misafakay ci Yis Kristo o lalidongen ningra ko emi patayni i paˈaririan, ‘tatano caay ka padeng a namal mitodoh to afih.’—Matay 3:7-12; Luka 3:17; nengnengen ko MITAPESAY.
SAKA 2 FOLAD 12-18 ROMIˈAD
O ODOˈ KO KIMAD NO KAWAS | ˈOLIC 5-7
Ano Samaanto ko Demak no Tao, ka Padadotoc Kiso Madimadi ci Yihofaan
Samaan Mikitini Fangcalay Cudad Milifok to ˈIcel?
7 Na misafelitan no pakasoˈlinan a paro no lomaˈ anca widang kiso han? Ano iraay i, miasip to nalifetan ni Tafiti wa padama tisowanan. O wawa ni Tafiti ci Apsalom misafelitay cingranan, sapiˈafasaw to saaroˈan no hongti. Nengneng ita samanay ci Tafiti miremo itiya.—2 Samuil 15:5-14, 31; 18:6-14.
8 (1) Mitolon. Itini ˈayaw no misongilaˈ miˈosi toniya maˈoningay i Fangcalay Cudad i, pasowalen ci Yihofa, masafelitay no tao kiso tada marorayay. (ˈOlic 6:6-9) Ihkalen ko sowal, ikor cangacangen ci Yihofa padama tisowanan mihapinang, o manan a safalod ngaˈay padama tisowanan miremo toniya pasangaray a pakayraan.
Hapinangen to o Soˈlinay Kimad ko Minanaman Iso
3 Pakasoˈlin kita to Kawas, cowa ko pakayniay aca i kasasiolah no Krisciyang. Misamanay hani? Haratengen ko laenoay pakayraan: Itini kasakopang iraay ko tamdaw karetengay ko raraw, o mararaway a tamdaw o malohemay malitengay anca misakafahay. Cecay tamdaw i kasakopang midokaˈay tisowanan. Irako misafelitay to kimad i kasakopang, pasowal to cowa ko soˈlinay kimad ko minanaman ita. Ano malifa ko hatiniay pakayraan i, o mamapolin kiso, ecato pidoko ci Yihofaan hokira? Ora taˈeneran iso ano o ngaˈayay aca waywayan no salikaka, eca ko tangongolay a kalawidang no niyah to Kawas, cowa ko tatanektek ko pakasoˈlin iso. Soˈlin o olah ci Yihofaan ato salikaka ngaˈayay padama tisowanan palahad to pakasoˈlinay falocoˈ, kawra mamisarocod kiso a micekiw to Fangcalay Cudad, cipinang to mananamay a lalakaw, halo pikilim to milingatay a lalakaw, mihaen ngaˈ pakasoˈlin to pakayniay ci Yihofaan a sowal i Fangcalay Cudad sahtoay o soˈlinay kimad.—Loma 12:2.
4 Sowal ni Yis o roma tamdaw pakatengil to soˈlinay kimad, ‘tangsolay lipahak a micada,’ kawra tahalifa to sapalifet i, malahdawayto ko pakasoˈlinay falocoˈ. (ˈOsien ko Matay 13:3-6, 20, 21.) Cowa ka harateng nangra alatek malo nisawawaan ni Yis o tatahalifa to pasangaray ato sapalifet. (Matay 16:24) Anca, ano malo Krisciyang wa rihadayto, sinowayto ko kaˈorip sanay cangra miharateng. Kawra, itini toniya cowa ka lefot a hekal, o tatahalifa kita to pasangaray. Itini kaˈorip wa mifekad ko cowa kaharateng a kafalic alatek, hato pasangarayto kita mitafo to lipahakay.—ˈOlic 6:6; Patnakay 9:11.
Odoˈ no Sinael
it-1-CH 1145
Tadem, Patademan
Itini i Loma 3:13 mialaan no Tarokos ci Pawlo ko sowal nai ˈOlic 5:9, somowal toya mariˈangay ato misaˈfitay a tamdaw, o takolaw nangra malecaday to mafohatay a tadem sanay. O kaacekan ko sowal nangra, awaay ko epoc i tamdaw, malecaday o mafohatay a tadem, matomesay ko mapatayay tamdaw ato maponiˈay a tireng no mapatayay.—Nengnengen ko Matay 15:18-20.
SAKA 2 FOLAD 19-25 ROMIˈAD
O ODOˈ KO KIMAD NO KAWAS | ˈOLIC 8-10
‘Yihofaaw, wa Sarocoden Ako ko Falocoˈ a Pakahemek Kiso’!
Malo Paro no Lomaˈ ni Yihofa o Kalimlaan a Sapalemed!
6 Patadoay ci Yihofa kitaanan misaday to mikiriwiˈay a lomaˈ. Itini ˈayaw no misangaˈ ci Yihofa to sakacecay tamdaw i, maharekayto Cingra misaday toniya cikiw. (Yopu 38:4-6; Yirimiya 10:12) Samanen patadoay ci Yihofa miharateng ato hinapaladaˈay, misangaˈay to adihayay makapahay a dafong i cikiw, o kaˈorip ita matomesay ko lipahak. (ˈOlic 104:14, 15, 24) Pakayni misangaˈan a kihcod no Niyah marenecay ko falocoˈ Ningra. (Satapangan 1:10, 12, 31) Ci Yihofa misaaretengay minengneng to tamdaw, ‘papikowanan’ Ningra ko tamdaw to kasapaan a masangaˈay. (ˈOlic 8:6) O araaw no Kawas o malefotay tamdaw wa ngaˈay tahadaˈoc midimokos to misangaˈan Ningra a kihcod, lipahak i lalomaˈ. Marariday kiso miharateng toniya makapahay araaw ni Yihofa ato miakoˈid Cingranan han?
Misalimlaay Kiso to Sapafeli no Kawas a Sapatelong Han?
10 Ngaˈayay kita pasayra i pakasoˈlinay to sinkalon a tamdaw mitadtad to no niyah a pihakelongan, paihkal to misalimlaay kita to sakacaciyaw a inaneng. (ˈOlic 9:1; 1 Pitiro 3:15) Pakasoˈlinay to sinkalon a tamdaw sapasifanaˈaw to tamdaw, o cikiw ato pinaˈorip i cikiw sahtoay o fahal sanay a masadak. Ngaˈay kita misakadademak to Fangcalay Cudad, ato kalimlaan noniya lalakaw misawacayay to kakarayan a Wama, pasayra i makahiay mitengil a tamdaw mitadtad hano pakasoˈlin kita ci Yihofa ko misangaˈay to kakarayan ato sera.—ˈOlic 102:25; Isaya 40:25, 26.
Itini Kiso i Sasowalen o Ngaˈayay a Taˈarawan Han?
13 Ano romadiw to sapahemek a radiw i, samacayen ko falocoˈ. Romadiw kita to radiw no Hongti Kitakit sakakaay a patosokan papakahemek ci Yihofaan. Ci Sara fafahiyan salikaka cowa kangaˈay tengilen ko radiw no niyah sanay miharateng, kawra makalimay cingra sapakayniaw i radiw pakahemek ci Yihofaan, mihaenay i, misongilaˈay cingra itini i lomaˈ mihatatanam a romadiw, malecad pakayni i roma a kamok no saˈopo misaˈicel a misaday. Itini pihatatanam i, misongilaˈay cingra miharateng to lalakaw no radiw iraay ko manan kalaliting to lalangian no saˈopo, sowal ningra: “Padamaay konini takowanan misinanot to lalakaw no radiw, ao cowa ko ngihaˈ no takolaw ako.”
Odoˈ no Sinael
it-2-CH 1161
Tarodoˈan
Tano sapatinako a sowal ko Fangcalay Cudad, somowal tano “tarodoˈ” ko Kawas a midemak to masakenakenaay a demak sanay, tinakoen itiniay i sano sapaday a fakeloh mitilid to Moetep a Rikec (Kasadakan 31:18; Limoˈot 9:10), midemak to kafahekaan a demak (Kasadakan 8:18, 19) ato misangaˈ to kakarayan (ˈOlic 8:3) Tano “tarodoˈan” no Kawas misangaˈ ko maamaan, onini “tarodoˈ” o fangcalay saocor no Kawas, o ˈicel Ningra, sanay a patalahekal ko Satapangan. O sowal no sinael tano ˈicelan no Kawas dademak i fafekang no nanom sanay. (Satapangan 1:2) Itini i no Krisiya a Fangcalay Cudad iraay ko mahaenay a sapatinako, pakaynian ni Yis to ‘fangcalay saocor no Kawas’ milaplap ko kaloykoy, ci Luka somowalay to malecaday a demak, pakaynian i “tarodoˈ no Kawas” mihaen ci Yis sanay.—Matay 12:28; Luka 11:20.
SAKA 2 FOLAD 26–3 FOLAD 3 ROMIˈAD
O ODOˈ KO KIMAD NO KAWAS | ˈOLIC 11-15
Haratengen Itiniayto Kiso i Dipayalay Rihadayay Faelohay Hekal a Maˈorip
w06 5/15-CH 18 fiedac 3 fatac
Kalimlaan no ˈOlic Cudad
11:3—O manan kora maperaray a paranaan hani? Ora paranaan hananay i, mitoroˈay to sarikec, masieroday ato masadafdafay, o paranaan no sakarihaday no hekal konini. Ano mapalak ko sakasierod no hekal, mafodifod i, aawa ko masadafdafay. Itini to matiniay a pakayraan, ‘o moecelay tamdaw’ oha mamisarocod a mitiˈer to Kawas.—ˈOlic 11:4-7.
wp16.4-CH 11 fiedac
Ngangaˈay Kita Itini i Dipayalay Hekal a Maˈorip Han?
Somowalay ko Fangcalay Cudad, papalahdawen no Kawas ko mariˈangay, mikiˈokay Cingra, polong cowa ka ngodo to Kawas a tamdaw ‘o mamasawkit a malaˈafo.’ (2 Pitiro 3:5-7) Itiyato i, awato ko mariˈangay a tamdaw, awato ko masamsamay a tamdaw. Kawra, hano pakasoˈlin kita, makalimay ko Kawas sapipalahdawaw to polong mariˈangay demak hani?
Sowal no Fangcalay Cudad, ˈintehay ci Yihofa to mikariˈangay to tamdaw. (ˈOlic 11:5) Maolahay ko Kawas to dipayalay ato masadafdafay, cowa ko papasalaten cangra midaˈoc a materek.—ˈOlic 33:5; 37:28.
Mihadidiay a Mitala Kiso Han?
15 Misamaanay hano makahi mihadidi a mitala ci Tafiti hani? Kina toloay cingra milicay i ˈOlic saka 13 fedengan: “Hakowaho ko halafin?” Ikor sanay ko sowal: “Nikawrira, mitadiˈec kako to caay ka falic a olah Iso, o nano pipaˈorip Iso i takowanan ko sakalipahak ako. Tapangaw, o hahemeken ako Kiso a romadiw, nawhani tadamaan ko siniˈada Iso i takowanan.” (ˈOlic 13:5, 6) Mitiˈeray ci Tafiti to midaˈocay a olah ni Yihofa, lipahakay a mitala to sapaˈorip Ningra, milomal to nika siniˈada ni Yihofa i cingranan. Hay, miharateng ci Tafiti to nika pitala ningra, tada o ciepocay.
kr-CH 236 fiedac 16 fatac
Hongti Kitakit Papalaˈosi to Araaw no Kawas i Fafekang no Sera
16 Rihaday. Oya kadihekoan no falocoˈ a sapairasol no Isaya 11:6-9 salikor o mamasaheci a malaˈosi. Ano o faˈinayanto fafahiyanto, malitengay anoca wawa, ano talacowato cangra rihadayan nanany ko falocoˈ. Ano o tamdaw, anoca ˈaˈadopen, cowa ko mamidokaˈ tisowanan. Haratengen hena, malo lomaˈ iso ko polong a sera, misalama i fanaw i riyar, milakowit to tokotokosan, morakat i rengorengosan, cowa ko mamakokiˈ. Ano lafiiˈto, cowa ko mamatalaw. O sowal itini i Icikil 34:25 mamalaˈosi, o finawlan no Kawas ngangaˈay ‘rihaday maroˈ i kohkohan, mafotiˈ i colicoliman.’
Odoˈ no Sinael
w13 9/15-CH 19 fiedac 12 fatac
Mafalicayto Kiso Han?
12 Kadayayan, aniniay tamdaw mahaenay o nisowalan ni Pawlo. Miharateng cangra midoedo to safalod ato rikec cowa ito ko matatodongay sanay. ˈAlomanay a sinsi ato wama wina pasalat han ko wawa sanay cangra. Itini pinengneng nangra ano maananto ngaˈayayto sanay. Ano oyato misao mihakelongay to Kawas a tamdaw, ano ngaˈayan nanay ko niyah demak han aca, awaay ko ˈinorong a mitoor to limoˈot no Kawas sanay. (ˈOlic 14:1) O mahaenay a waywayan tada tatiihay to Krisciyang, ano caka pinaˈon i, mamahaen a minengneng to sakayat no likakawa no Kawas, itini i kasakopang eca ka pitoor to pakayraan no kasakopng a midemak, latek ngaliwngiw to caay pitoor to niharatengan no niyah. Pakayni to lawla, misangwang ato ˈakawang ko picudadan a sapalimoˈot, caay kakahi a micada.