O Mararaway a Pihakelongan Samaanay Miorat to Tamdaw Pakayni i Kawas?

Ano o olah ko Kawas i, oya misao mitaypiyaway to Kawas a pihakelongan hano midemak to adihayay tatiihay a demak hani? Kantangen ko sowal i, sahtoay o mararaway ko hatiniay a pihakelongan, mioratay cangra to tamdaw pakayni i Kawas. Midemakay cangra to maanan hani? Samaanay ko harateng no Kawas to midemakan nangra? Pakayni toninian mamidemak ko Kawas to maanan?

1. O sapasifanaˈ no mararaway pihakelongan samaanay miorat to tamdaw pakayni i Kawas?

O mararaway a pihakelongan cowa pasifanaˈ to tamdaw to soˈlinay kimad no Kawas, ˈarawhan pakasoˈlinay ato mitenakay to mangah a sowal cangra. (Loma 1:​25) Tinakoen, adihayay a pihakelongan cowa pasifanaˈ to tamdaw mafanaˈ to ngangan no Kawas. Nikawrira paihkalay ko Fangcalay Cudad, sakadademaken ko ngangan no Kawas a pangangan Cingraanan tada masakalimlaan. (Loma 10:​13, 14) O roma i, pasifanaˈay cangra to mihakelongay nangra, o tatiihay a demak sahtoay o mikitiniay i Kawas sanay. Kawra o mangah a sowal konini, kihcod tatiihay a demak no hekal cowa ko naitiniay i Kawas. (ˈOsien ko Yakop 1:13.) Ka adayayan i, o patenakan no kalodoyongan a masakenakenaay a mangah pasangarayto ko tamdaw miingid to Kawas.

2. O waywayan no mararaway a pihakelongan samaanay miorat to tamdaw pakayni i Kawas?

O picada no mararaway pihakelongan to tamdaw i, cowa ka lecad ci Yihofaan. Sowal no Fangcalay Cudad, o mararaway a pihakelongan ‘mitekohayto i kakarayan ko nika taring no raraw ningra’ sanay. (Paˈarawan 18:5) Nolitengan tahanini, micapiday to mirikecay no hekal ko mararaway a pihakelongan, midamaayho to lalood, onini a demak milingatay to sakapatay no ˈalomanay tamdaw. O romaroma ˈaˈideman no pihakelongan pakayni sakasinowayaw no kaˈorip, pacieciay misaali to payci i mihakelongay a tamdaw. Mahaenay a waywayan paihkalay to cowa kafanaˈ cangra to Kawas, awaay ko fadangalan nangra mitaypiyaw to Kawas.​—ˈOsien ko 1 Yohani 4:8.

3. Samaanay ko pinengneng no Kawas to mararaway a pihakelongan?

Maketeray kiso to waywayan no mararaway pihakelongan han? Samaanay ko piharateng ni Yihofa sanay kiso hani? Tangongolay ko olah Ningra to tamdaw, nikawrira tada maketeray to ˈaˈideman no kalodoyongan, samanen mioratay cangra to tamdaw pakayni i Kawas, misamsamayho to mihakelongay a tamdaw. Mikiˈokay ko Kawas o mamalaˈafo ko mararaway a pihakelongan, ‘tahadaˈocto a malahdaw.’ (Paˈarawan 18:21) Kakalikito ko Kawas a midemak, palaˈafo to polong a mararaway a pihakelongan.​—Paˈarawan 18:8.

CALEPEN MIKADKAD

4. Cowa ka pihayda ko Kawas to polong a pihakelongan

O harateng no ˈalomanay tamdaw, polong a pihakelongan malecaday ko pinokayan sanay, kawra soˈlinay konini han? ˈOsien ko Matay 7:​13, 14, ikor lengoen ko ilaenoay a salicay:

• Samaanay ko Fangcalay Cudad somowal to saka tayraaw i sakaˈorip a lalan?

Nengnengen ko IKA, ikor lengoen ko ilaenoay a salicay:

IKA: O Kawas Micadaay to Kalo a Pidoyongan Han?​—JW Tilifi (3:22)

• Masakenakenaay a pihakelongan mihaydaan no Kawas sanay ko Fangcalay Cudad han?

5. O mararaway a pihakelongan cowa patalahkal to olah no Kawas

Mararaway a pihakelongan itini adihayay pakayraan mioratay to tamdaw pakayni i Kawas, o cecay i, mirienangay to lalood cangra. Tada kasimelanganto ko matiniay a demak. Nengnengen ko IKA, ikor lengoen ko ilaenoay a salicay:

IKA: O Kiyokay ato Saka Tosa Lalood (2:22)

• Saka tosa taˈangayay lalood no hekal i, adihayay a kiyokay midemakay to maanan a demak?

• Pakayni i nidemakan nangra samaanay ko piharateng no miso hani?

ˈOsien ko Yohani 13:34, 35 ato 17:16, ikor lengoen ko ilaenoay a salicay:

• Maˈaraw ni Yihofa ko pihakelongan mirienang to lalood samaanay ko falocoˈ Ningra sanay kiso hani?

• O mamitamorong to ˈinorong ko mararaway pihakelongan to adihayay tatiihay a demak. Cangoˈotay cangra to olah, misilikoray to limoˈot no Kawas. Maˈaraway iso ko maanan a tinakoan hani?

6. Makalimay ko Kawas padama to tamdaw miliyas to mararaway a pihakelongan

ˈOsien ko Paˈarawan 18:4,a ikor lengoen ko ilaenoay a salicay:

• Makalimay ko Kawas milidong to maolatay no mararaway a pihakelongan a tamdaw. Mafanaˈ tonini i, samaanay ko piharateng iso hani?

7. Padadotocen mitongal ko kafanaˈ to Kawas

Maˈaraw no romaroma tamdaw ko midemakan no mararaway pihakelongan, tatiihayto ko pinengneng no tamdaw to Kawas, mahaenay kiso saw? Tinakoen ano caay pitengil ko wawa to sowal no wama, liyas sato to lomaˈ, midemak to adihayay tatiihay demak. Pakayni to waywayan nonini a wawa, caay pihayda ko wama ningra. Ano pakayni i tatiihay a demak no wawa roroh han ko wama, mihaen a miroroh masadafdafay to wamaan sanay kiso miharateng han?

• Ano pakayni i midemakan no mararaway pihakelongan a roroh han ci Yihofa, awato ko harateng to sakafanaˈaw Cingraanan, ano mahaen i, matatodongay haratengen iso han?

KALIMLAAN

O sapasifanaˈ ato tatiihay a demak no mararaway pihakelongan mioratay to tamdaw pakayni i Kawas. O papalaˈafoen no Kawas ko mararaway a pihakelongan.

Lomalen

• Pakayni i sapasifanaˈ ato waywayan no mararaway pihakelongan, samaanay ko pinengneng iso?

• Pakayni i mararaway a pihakelongan samaanay ko pinengneng ni Yihofa?

• Pakayni i mararaway a pihakelongan mamidemak ko Kawas to maanan?

MALALITINGAY A LALAKAW

Tosaay ko kapiliˈan no Kawas a demak pakayni i pihakelongan, nengnengen ita hena.

“Ano o Mananto ko Pihakelongan Ngaˈayayto Han?” (Lalakaw no wangcan)

Hano misaali ci Yihofa kitaanan malisopsop a midoko Cingraanan?

“Sapidokoaw ko Tamdaw to Kawas, O Mamirienang to Cecay a Kasacefang no Pihakelongan Han?” (Lalakaw no wangcan)

O cecay simpo maolatan nanay to pihakelongan no niyah, kawra cowa ka pisawad cingra mikilim to pakayniay i Kawas a soˈlinay kimad.

“Onini a Simpo Hano Miliyas to Tingsokiw?” (Katalipaˈelal! Saka 2 Folad 2015)

Halafinayto matenak a mangah a sowal no pihakelongan, mara:ayay ko Kawas awaay ko olah sanayto ko harateng no tamdaw. Nengnengen, samaanay konini tolo mangah a sowal.

“O Maanan Mangah a Sowal Paliyasay to Tamdaw i Kawas” (Mikecolay, 2013/11/1)