Pinengnengan to Lalakaw no Mitosilay ato Nikaˈorip Rayray no Saˈopo
© 2024 Watch Tower Bible and Tract Society of Pennsylvania
SAKA 5 FOLAD 6-12 ROMIˈAD
O ODOˈ KO KIMAD NO KAWAS ˈOLIC 36-37
“Hamaan Pakayni i Mariˈangay Tamdaw a Mangolaw”
w17.04 10 fiedac 4 fatac
Ano Irato ko Hongti Kitakit no Kawas i, Mamalaˈafo ko Maanan?
4 Samaanay ko pifiyor no tatiihay tamdaw kitanan hani? Paliˈayaway pasowal ci Pawlo ‘o pasangaray siˈayawen a mikiriwiˈay a lintad’, ‘tatiitatiihay ko mariˈangay tamdaw ato misaˈfitay a tamdaw’ nohaniti sanay. (2 Timoti 3:1-5, 13) Maˈaraway iso malaˈosi konini sapairasol han? O romaroma tamdaw mikariˈangay to tao, o romaroma tamdaw matomesay ko ˈinteh no falocoˈ, pakidem ko demak, midokaˈ to tamdaw. Orira tatiihay tamdaw patalasekal sanay a midemak, o romaroma ‘misakaniway a misaˈfit’, tano ngaˈayay ngangan a midemak to adihayay a tatiihay. Soˈlinto cowa ka macapid kita, kawra mafiyorayho. Matengil ko kakokiˈan a demak nangra, ˈintehan nanay kita. Matengil to misamsamay cangra to kaemangay, matoˈasay ato malonayay a tamdaw i, ciˈangiay kita. Mahecaday o ˈaˈadopen cangra, paihkalay to sani Akomaay a waywayan. (Yakop 3:15) Soˈliˈlin ira ko hatiniay tatiihay lihaf, kawra pairaay to tokel ko Fangcalay Cudad.
O Makahiay Misodod to Tamdaw o Mamilifok to Sapalemed ni Yihofa
10 ˈInteh ko falocoˈ midokaˈay to niyah. O ˈintehay o karetengay a ˈinorong, makalimay ci Yihofa kitaanan mihepol tonini a ˈinorong. (ˈOsien ko Ifiso 4:31, 32.) Palimoˈotay Cingra kitaanan ‘palasawaden ko keter, falahen ko mangolaway.’ (ˈOlic 37:8) Tada citanengay konini a sapatalipaˈelal, samanen ano caka fasaw ko keter o mamipalak to tireng ato no haratengan no mita. (Taneng 14:30) Ano padadotoc kita a maketer, o mamidokaˈ to niyah, cowa ko mamifiyor to midokaˈay kitaanan a tamdaw, malecaday o komaenay to warak o niyah aca ko madokaˈay. Masafelitay, ano misodod kita to tao malecaday o pafeliay to sapatelong to niyah. (Taneng 11:17) Mamilifok kita to rihadayay falocoˈ, wa ngaˈay padadotoc misarocod matayal saki Yihofaan.
w03-CH 12/1 13 fiedac 20 fatac
Pakayni ci Yihofaan a Lipahak ko Falocoˈ
20 Itiyato i, ‘o mamilifok to sera ko lopayˈay a tamdaw.’ (ˈOlic 37:11a) Cima kora ‘lopayˈay a tamdaw’ hani? O ‘lopayˈay’ hananay a sowal, mikitiniay i roma a Hipray a tilid, iraay ko ‘misemsemay, misapoeneray’ sanay a tatodong. Mahapinangay itini, o ‘lopayˈay a tamdaw’ oyanan misapoeneray a mitala ci Yihofaan, mitapal to Kawas a patatodo cangranan a midoˈis. Cangra i, ‘o rarihaday, lipahk ko falocoˈ’. (ˈOlic 37:11b) ˈArawhan, micawmaˈ kita to Krisciyang anini i, itiniayto i noˈadingoan a lakoing kita rihaday a maˈorip.
Odoˈ no Sinael
it-2-CH 115 fiedac 4 fatac
Lotok, Tokos
O tanotokay, midaˈocay, takarawy a lotok, somowalay to tanoktokay ato midaˈocay ko Kawas. (Isaya 54:10; Hapakuk 3:6; palalinien ko ˈOlic 46:2.) O nika moecel a masadafdaf ni Yihofa malecaday ‘o lotok no Kawas’. (ˈOlic 36:6) Latek mitoroˈan cowa ka ngiyangi ko nika moecel a masadafdaf ni Yihofa. Tona takaraway ko lotok, o nika moecel a masadafdaf no Kawas ikakaay ko kangaˈay tono hekal tamdaw. (Palalinien ko Isaya 55:8, 9.) Ta mataktakto koya saka 7 a wakong a keter no Kawas ikor, sanay ko sowal i Paˈarawan: ‘Malahdawayto ko lotolotok’ sanay. Alatek mitoroˈan nonini, o maamaan mahaenay hato lotok a takaraway a dafong, cowa ko mamilaliw to keter no Kawas o sanay.—Palalinien ko Yirimiya 4:23-26.
SAKA 5 FOLAD 13-19 ROMIˈAD
O ODOˈ KO KIMAD NO KAWAS ˈOLIC 38-39
Hepolen ko Miˈfiay a ˈInorong, Ecato ka Piroroh to Niyah
“Pasiˈayaw ko Pinengneng,” Misaˈimer to Hanoikor
12 ˈOsien ko 1 Yohani 3:19, 20. Makesem ko falocoˈ o matatodongay konini. Tinakoen, o roma tamaw makesemay ko falocoˈ samanen iˈayaw mafanaˈ to soˈlinay kimad midemakay to mararaway a demak, o roma tamdaw makesem ko falocoˈ samanen ikor micada to paputisem midemakay to mararaway a demak. (Loma 3:23) Manaokaniw, sapidemakaw kita to matatodongay a demak, kawra “soˈlinay adihay ko patelac no mita a maemin.” (Yakop 3:2; Loma 7:21-23) Soˈlin cowa ka olah kita to makesemay a falocoˈ, kawra o ngaˈayay kora harateng, samanen o makesemay a falocoˈ micorohay kitanan misalof to mararaway, misetek to falocoˈ ecato piliyaw mararaw.—Hipray 12:12, 13.
13 Ano maharekayto pasasiyor kita, paihkalayto ci Yihofa misododan Ningra kita, ano padadotocho kita makesem to iˈayaway a raraw, mihaen o pakidemay a makesem ko falocoˈ. O tatiihay ko hatiniay makesemay a falocoˈ. (ˈOlic 31:10; 38:3, 4) Misamanay? O cecay fafahiyan salikaka pakayni pakidem a makesem ko falocoˈ a misemsem, sowal ningra: “Ano misaˈicel kako a matayal saki Yihofaan awaay ko kapo saan miharateng, samanen cowato ka kiyamaw.” ˈAlomanay tamdaw mahecaday ko harateng toniya fafahiyan salikaka alatek, kawra haharetengen, ano cowa pisawad ci Yihofa kitaanan, sawad han ita ko niyah, mihaen o pakahemekay ci Satanan. (Palalinien ko 2 Korinto 2:5-7, 11.) Mihaenay, aka pakidem a makesem ko falocoˈ.
w02-CH 11/15 20 fiedac 1-2 fatac
To romiˈamiˈad Milifok to Hemek ni Yihofa –O Maanan ko Hapakayraan Hani?
O ˈorip no tamdaw mahecaday o ˈoˈol, sahosaho malahedawayto. Ci Tafiti pakayni to ˈorip no tamdaw mahecaday o ˈoˈol sanay, saan a mitolon: ‘Yihofaaw, pasifanaˈen kako to teloc no ˈorip ako, mafanaˈ to hahakowa ko romiˈad ako, ho ngaˈ mafanaˈ kako to kakaliki a malahedaw kako. Nengengen! Cowa ka hakowa ko romiˈad ako. Hakelong no ˈorip ako, itini i kaˈayaw Iso mato o awaay.’ Mikifalocoˈay ci Tafiti to nokaˈorip no niyah, o sasowalen ato waywayan no niyah, mehemeken ko Kawas. Paihkalay cingra to mamitiˈer to Kawas, sowal sa: ‘Yihofaaw, itiniay i Tisowanan ko tokel ako.’ (ˈOlic 39:4, 5, 7) Mitengilan ni Yihofa ko satolon ni Tafiti. Soˈlinay a misinanot Cingra ci Tafitian, pakayni i waywayan ningra a palifon cingranan.
O hekal a tamdaw fangafang sanay to romiˈamiˈad, adihay ko tatayalen. Kalikiay a comikay ko toki, haen sanayto a mataˈlif. Kareteng ko tayal, mitongalay to sakafanaˈ, ˈarawhan citolasay ko toki, macariraway kita alatek. Kawra, o cima ko kaciharatengan ita hani? Makalimay ci Tafiti hakelong no ˈorip ningra pahemek to Kawas, iraay ko mahaenay a harateng iso han? Awaay ko sasa ita, mikingsaay ci Yihofa to cecacecay a tamdaw. ˈAyaw no 3,600 a mihecaan, ihkalay a mafanaˈ ci Yopu toninian, misongilaˈan ni Yihofa a misinanot ko waywayan ningra. Saan milicay ci Yopu: ‘Ano miliclic Cingra takowanan i, sasamaanen ako a pacaˈof hani?’ (Yopu 31:4-6, 14) Pakahemek to Kawas to romiˈamiˈad, o mamadangar ita, edeng ano sakaretengen ita ko noˈadingoan a demak, midoddof to sarikec no Kawas, ato sangaˈayen a misaka dademak ko toki o ngaˈayayto. Sanay yaca folfolen ita ko pina a demak.
Miliyaw Patireng to Kalawidang Iso aci Yihofaan
Micerid masasowal ci Yihofaan. Mafanaˈay ko kakarayan Wama, ano padotocay kiso makesem ko falocoˈ, papasangar pasayra Cingranan a mitolon. (Loma 8:26) Kawra sowal no Fangcalay Cudad ‘ka padadotoc a mitolon,’ mansa papasowalen iso ci Yihofa tada makalimay kiso malo widang Ningra. (Loma 12:12) Sowal ni Anteli: “Na tada makesemay kako, kawra ano maharek mitolon, malowanay ko makesemay a falocoˈ, rihadayayto ko falocoˈ.” Ano cowa ka fanaˈ kiso o manan ko hasowal ci Yihofaan, ngaˈayay nengnengen ko pasasiyoray a satolon ni Tafiti itini ˈOlic saka 51 ato 65 fedengan.
Odoˈ no Sinael
Malo Ngaˈayay Pakasoˈlinen a Tamdaw
16 Ano sapilifokaw kita to pikangodo no tao, o miˈimeray cowa ka ngaˈay malawa. Latekay, ciharatengay kita sapatalahkalaw to pina mahimeday a demak i roma tamdaw alatek, kawra o miˈimeray wa ngaˈay padama kitanan mitawmec to sasowalen no niyah. (ˈOsien ko Taneng 10:19.) Itini pisakadademak to sapicawmaˈ to widang a wangcan i, sapitafoaw to miˈimeray cowa ko madoloay, ano caka pinaˈon ˈalomanto ko tamdaw mafanaˈ to hahimeden a demak. Onini a lihaf ano pasadaken itini wangcan, sasamaanen no tao misaka dademak konini a lihaf, anca onini a lihaf papaira to hakowaay ka taˈangay no pidokaˈ, cowato ko mamaˈimer ita konini. Roma pakayraan i, ano mikayhid ko misafelitay to kimad a tamdaw kitanan patalahkal to milingatay to salikaka a lihaf i, o miˈimeray wa ngaˈay padama kitanan padotoc a tomerep, midipot to salikaka. Tinakoen, itini makecengay ko mitosilay a tayal anca makecengay a kilac, o laliclicen no dimeng kita milicay alatek. Itini mahaenay pakayraan ato roma pakayraan, wa ngaˈay kita malecad to mitiliday to ˈOlic ‘mitoem to ngoyos no niyah.’ (ˈOlic 39:1) Itini pinengneng no paro no lomaˈ no niyah, widang, salikaka anca tao, o mamalo ngaˈayay pakasoˈlinen a tamdaw kita. Sakalaˈosiaw konini a demak, kalimlaan ko miˈimeray a ˈicel.
SAKA 5 FOLAD 20-26 ROMIˈAD
O ODOˈ KO KIMAD NO KAWAS ˈOLIC 40-41
Misamaanay Hano Mamakahi Padama to Tamdaw?
Hinapaladaˈ Pakahemekay Tisowanan
16 O hinapaladaˈay a tamdaw cowa pilongoc to papatikolen. O sowal ni Yis: “Ano patala kiso to tadamaanay a tahka i, kao pakoyoc a tamdaw, tatiihay ko tireng, o mapiˈiway, o mapohaway a tamdaw ko tatahidangen. Ta mapalemed kiso.” (Luka 14:13, 14) O cecay patemeran no Kawas a tamdaw pasowalay cingra: “O siniˈadaay a pafeli i pakosiya a tamdaw to kakaenen i, o mamalemed cingra.” Roma tamdaw pasowalayho: “O mafanaˈay a miharateng to pakosiya a tamdaw i, tada o malmeday.” (Taneng 22:9; ˈOlic 41:1) Mihaenay, hinapaladaˈ kita to tamdaw, samanen padamaen ko tao wa lipahak kita.
17 O sowal ni Yis: ‘O paladaˈay ikakaay ko hemek to milayapay.’ Pasowal ko tarokos ci Pawlo toniya sowal i, cowa ko pafeli aca to tamdaw to dafong, mahaopay ko pakalalok, mikayat, padama to iraay ko saali a tamdaw. (Dmak 20:31-35) Tano sowal ato waywayan ci Pawlo pasifanaˈ kitanan to sasamaan kinafalah to toki no niyah, ˈicel, ciharateng ato maolah to tamdaw.
18 Mahapinangay no mikingkiway to siyakay a tamdaw, o hinapafeliay wa malipahak ko falocoˈ sanay. Milengoay ko cecay lalakaw: “O sowal no ˈalomanay a tamdaw, ano midemak to ngaˈayay i, mamalifok ko taˈangayay a lipahak.” Somowalay ko mikingkiway a tamdaw, padama to tamdaw ‘matongalay ko araaw ato epoc no kaˈorip, samanen mihaen to demak mirenecay to sasafaay a saali no tamdaw.’ Mihaenay, ngaˈay padama kita to ˈalomanay a tamdaw hamaan ko lifon, mihaen to demak tanoktokay ko tireng, matongalay ko lipahak. Mihayay kita toniya sowal, samanen sowal no misangaˈay to tamdaw a Yihofa o paladaˈay ikakaay ko hemek to milayapay.—2 Timoti 3:16, 17.
w15-CH 12/15 24 fiedac 7 fatac
Oha Dadamaen ni Yihofa Kiso
7 Nikawrira, ano adada kita i, ngaˈayay ngitangiten ita ko sahinom, taneng ato sadama no Kawas. Nolitengan a madimadiay sikawdan na mihaenay to demak. Sanay mitilid ci Tafiti tonini sowal: ‘O ciharatengay to pakoyoc a tamdaw, tada malemeday! Ano tahapades cingra i, papaˈoripen ni Yihofa cingra. Sasimawen ni Yihofa cingra, mitafo to ˈorip ningra.’ (ˈOlic 41:1, 2) Itini i lintad ni Tafiti, iraay ko ciharatengay to pakosiya a tamdaw, kawra cowa ka tahanini ko ˈorip nangra. O tamdaw ano ciharateng to pakoyoc i, o mamidemak ci Yihofa to kafahekaan mitafo to ˈorip ningra tahanini cowa ka saan ci Tafiti. Mihaenay i, sasamaan ko Kawas padama to hatiraay ngaˈayayko falocoˈ a tamdaw hani? Dotoc sanay ci Tafiti a mitadtad: ‘Ano adada cingra i, dadamaen ni Yihofa; itini i takal ningra, mato papacelolen to faelohay a cawfan.’ (ˈOlic 41:3) O tamdaw ano siniˈada to pakoyoc a tamdaw, papasoˈlinen to maˈaraw no Kawas ko makapahay demak ningra, ano adadato cingra, hinomen ato pafelien to taneng cingra. Misafaco ko Kawas to tireng no tamdaw i, iraay ko miadahay no tireng a ˈicel, o mahaenay a ˈicel papatanoktok to tireng ningra.
Todongen ci Yihofa Patahekal to Siniˈadaay Falocoˈ
17 Nikawrira, cowa ko nika ciepocay to niyahan saan a patahekal kita to siniˈadaay. Mihaen kita to demak tona sapipaˈodingaraw ci Yihofaan, makalim mitodong to ciolahay ato siniˈadaay a Kawas. (Taneng 14:31) Patirengay Cingra to malefotay a taˈarawan, kakiemelen ita mitodong Cingra! Nanay padadotoc kita patahekal to siniˈadaay, mihaen o rarihaday a kala cafay ato tao, tangongol ko nika lawidang ato salikaka.—Kalatiya 6:10; 1 Yohani 4:16.
Odoˈ no Sinael
it-2-CH 793 fiedac 4 fatac
Yihofa
O Fangcalay Cudad naitini satapangan tahira i salikor o pakayniay to nika tatodong no pikowan ni Yihofa hokira sanay ko misowalan, patalahkalay to sakakaay a araaw o Kawas: Toha sapi patalahkalaw to nika fangcal no ngangan no Niyah. O ngangan no Kawas ano hasaka fangcalaw i, oha papalahdawen ko kihcod sapakadit tora makapahay ngangan wa ngaˈ, kawra cowa koninian aca. Polong itiniay i paro no kakarayan a matanengay a nisangaˈan oha mamisakareteng a mipafangcal to ngangan no Kawas. Tatodong nonini i, o mamakahi cangra misakareteng to nika ˈakawang no saaroˈan ni Yihofa, makalim a midoko Cingranan, tona maolahay Cingranan a makahi a midofdof to araaw Ningra. ˈOlic 40:5-10 miˈongingay to satolon ni Tafiti ci Yihofaan, patalahkalay to mahaenay a kalim no falocoˈ ningra, ato maˈaraw ko nika masaheci a mapafangcal ko makapahay ngangan ni Yihofa a kalim no falocoˈ ningra. (Sinanoten, tarokos ci Pawlo itini i Hipray 10:5-10 misakadademakan konini sinael no ˈOlic a mitoroˈ ci Kristo Yisan.)
SAKA 5 FOLAD 27–6 FOLAD 2 ROMIˈAD
O ODOˈ KO KIMAD NO KAWAS ˈOLIC 42-44
O Sapakafanaˈ ni Yihofa Awaay ko Tolas to Sakaciepoc Iso
w06-CH 6/1 9 fiedac 4 fatac
Kalimlaan no Saka Tosa Lolod no ˈOlic
42:4, 5, 11; 43:3-5. Ano o pakayniay i maanan cowa ka ˈimer a lalangian, hato mapacieci a malaliyas to kasakopang i, lomalen a miharateng ko hemek to nika picawmaˈ to salikaka itiyaho, o papadama kitanan padadotoc a miemem. O mahaenay pilomal a miharateng latek matongal ko toˈol ita, kawra patalipaelalay kitanan konini, o pikiˈadingan ita ci Yihofa. Talaen ita ci Yihofa, pasayra Cingranan mikilim to sasayar.
w12-CH 1/15 15 fiedac 2 fatac
Sasamaan a Micekiw to Fangcalay Cudad Wangaˈ matongal ko Hemek, Matongal ko Epoc Hani?
1 Mitolon. Saka 1 i, mitolon. (ˈOlic 42:8) Misamaanay hano isalakat a mitolon hani? Samanen o cecay no midokoay to Kawas a pakayraan koni. Mihaenay haw i, ngitangiten ci Yihofa padama kitanan ira ko matatodongay a falocoˈ, pafeli to fangcalay saocor i kitanan. (Luka 11:13) Ci Papara o iraay ko nalifetan a milakowitay to riyar a mitosilay, sanay ko sowal ningra: “ˈAyaw no micekiw to Fangcalay Cudad, mitolonay kako. Matinakoay ako hato mikapotay ci Yihofa takowanan, mafanaˈay to mahemekay Cingra to picekiw ako.” ˈAyaw no micekiw tolonen ko Kawas mifohat to falocoˈ ita, mihaen i, mamasaheci a milayap to kadofahay a noˈadingoan a kakaenen.
w16.09 5 fiedac 11-12 fatac
“Nanay o Kamay Iso Cowa ko Lalomaying”
11 Kita itini i saˈopo no Krisciyang, taykay ato masakenakenaay a sapahatatanam no likakawa no Kawas, micadaay kita to sapasifanaˈ no Kawas, padama kitanan matongal ko ˈicel, padama kitanan ira ko matatodongay a kalim no falocoˈ, patireng to noˈadingoan a patosokan ato mitamorong to ˈinorong no Krisciyang. (ˈOlic 119:32) Misongilaˈan iso misaka dademak ko sapatakci no Kawas a milifok to ˈicel han?
12 Ci Yihofa padamaay to Israil tamdaw mipadik to Amalik ato Iciyupiya tamdaw, padamay ci Nihimiyaan ato finawlan ningra milaheci to patirengay to fangcalay sefi a tayal. Anini, ci Yihofa malecaday o papadama kitanan ciˈicel a micoˈay to safelit, to nika lietec no tao, miremo to masomaday a falocoˈ, mihaen i, o ngangaˈayto padadotoc kita milaheci to mitosilay a demak. (1 Pitiro 5:10) O tatalifahal saan a malahdaw ko pasangar aka ka saan a miharateng kita, masafelitay ano hasapiremoaw to pasangar i, miˈosi to Fangcalay Cudad to romiˈamiˈad, misongilaˈ a misaday to lalakaw no saˈopo ato mirienang to lipalipayan a saˈopo, pakaynien i picekiw ato pakalomaˈay a pidoko mirenec to noˈadingoan a saali ita, ato tiˈeren ci Yihofa mararid a mitolon Cingranan. Tano ninian pakayraan ci Yihofa mikowad ato paˈicel kitanan, aka a pasalaten ko maamaan a demak micona kitanan micada to sapadama Ningra. Ano mahapinangay iso ko niyah to mahokaay i maanan a noˈadingoan a demak, hato lomayingayto ko kamay i, tolonen ko Kawas, nengnengen ko fangcalay saocor ni Yihofa to samaanay a dademak, padama kitanan ‘ira ko fanekfekay harateng, halo ira ko ˈicel a midemak.’ (Filipi 2:13) Mihaenay i, ano misaali ko tamdaw to sapadama i, sasamaan kiso patanoktok to kamay nangra hani?
Odoˈ no Sinael
it-1-CH 595 fiedac 1 fatac
Oles a Kitiraan
O Fangcalay Cudad marariday tano oles a kitiraan a patatinako. Sowal ni Yopu ‘malo salikaka no oles a kitiraan’ ko niyah sanay, somowal to nika tada mararom cingra. (Yopu 30:29) O mitiliday to ˈOlic a tamdaw somowalay to nika padik no ˈada ko finawlan no Kawas, sanay mararom a pasowal: ‘Itiniay i oles a kitiraan a mipaekel tamiyanan’ (ˈOlic 44:19), latek tona marariday masadak ko oles a kitiraan i kalaloodan, mikilim to maponiˈay a tireng no mapatayay a komaen (palalinien ko ˈOlic 68:23). ˈAyaw no Kongyen 607 miheca, miˈalikotan no sofitay no Papilon ko Yirusalim, tada pakidemay ko cahiw ilalomaˈ no niyaroˈ, ano o winato kaen hananayto ko wawa no niyah, tada masaka adayayan. Pakayni to mipatayay to wawa a ‘finawlan’ tamdaw, patatinakoan ni Yirimiya to pacocoay to wawa a oles a kitiraan.—Radiw no mararomay 4:3, 10.
SAKA 6 FOLAD 3-9 ROMIˈAD
O ODOˈ KO KIMAD NO KAWAS ˈOLIC 45-47
Radiw no Pakaetimay no Hongti
w14-CH 2/15 9-10 fiedac 8-9 fatac
Lipahak i Pakaetimay to Tofor a Siri!
8 ˈOsien ko ˈOlic 45:13, 14a. Faelohay fafahi pakayni tonini pakaetimay to hongti cirikoˈay to ‘tadamaanay a caˈedong’. Paˈarawan 21:2 patinakoan ko faelohay fafahi pao ‘fangcalay a Yirusalim’, somowal ‘o faelohay fafahi milafaay saki faˈinay.’ Onini naitiniay i kakarayan matefad a niyaroˈ ‘iraay ko ˈodingar no Kawas’, maˈdilay ‘mahecaay o tadamaanay a ˈodo, malecaday o tingalaway maliemiay a kangdaway a ˈodo.’ (Paˈarawan 21:10, 11) Maˈdilay ko faelohay Yirusalim, misongilaˈay a somowal ko Paˈarawan. (Paˈarawan 21:18-21) O sowal no ˈOlic i, ‘tada maˈdilay koya faelohay fafahi’ sa i, cowa ka pakinali ko sowal! Samanen o itiniay i kakarayan konini pakaetimay no hongti kira!
9 Mikeridan koya faelohay fafahi pasasoˈaraw to faˈinay—oyanan Misiya a Hongti cingra. Tohatiniay patadoay cingra toya faelohay fafahi a misaday, ‘pakaynian i fancalay a sowal, mato nanom’ a mikorac cingranan, padama cingranan ‘makorac awa ko patelac.’ (Ifiso 5:26, 27) Cingra i, ‘cirikoˈay to malikatay, makoracay a mowa a rikoˈ. Onini mowa a rikoˈ todong no moecelay waywayan no fangcalay finawlan.’ (Paˈarawan 19:8) Ano pakaetim i, o faelohay fafahi no Tofor a Siri o cacicaedong to matatodongay a rikoˈ. ‘O rikoˈ ningra tano ekim a walay a teselen. Tomeliˈay ko rikoˈ ningra, tayni i ˈaˈayaw no hongti.’—Paˈarawan 19:8.
O Paˈarawan ato Hanoikor no Miso
10 Mihaen ko demak no ˈada, samaanay ko harateng ni Yihofa hani? Sanay Cingra: ‘O mamangolaw Kako.’ (Icikil 38:18, 21-23) Itini saka 19 fedengan no Paˈarawan mitadtaday to midotocay mifekad a demak. Wa ocoren ni Yihofa ko wawa Ningra ci Yis milidong to finawlan Ningra, hanaca mihadefek to ˈada maemin. O madimadiay coyoh ato 144,000 a tamdaw makakapot malo ‘kakarayan a sofitay’ malacafay ci Yisan milood. (Paˈarawan 17:14; 19:11-15) O salikoray a teloc nonini a kalalood: Polong misafelitay ci Yihofaan a tamdaw ato lekakawa mamasongilaˈ a mapalaˈafo.—ˈOsien ko Paˈarawan 19:19-21.
11 Saharateratengen, o polong a ˈada no Kawas masongilaˈto a mapalaˈafo, hanaca o madimadiay midoko to Kawas a tamdaw wa maˈorip cangra, tada o kalipahakan a tatokian korira! Masongilaˈ mapalaˈafo ko Taˈangayay Papilon i, i kakarayan a ˈadingo a tireng maedeng o mamaacang a mahemek. Kawra ikakaay a kahemekan a demak i, itiniayho i lalikor! (Paˈarawan 19:1-3) Onini i, o saˈakawangay a demak no Paˈarawan—‘o pisikayan to raramod no tofor a siri a toki maraodayto.’—Paˈarawan 19:6-9.
12 O raramod no tofor a siri ihacowaay misikay hani? Itini ˈayaw no Armakiton a lalood, polong no 144,000 tamdaw tayraayto i kakarayan, kawra cowaho ko pisikayan to raramod a toki itiya. (ˈOsien ko Paˈarawan 21:1, 2.) Mahererek ko Armakiton a lalood, mapalahdaw ko polong a ˈada no Kawas ikor, wa itiya misikay to raramod no tofor a siri.—ˈOlic 45:3, 4, 13-17.
it-2-CH 1119 fiedac
Lalood
Mahererekto konini lalood i, o dadipayal to 1,000 miheca ko cikiw. Saan ko sowal no ˈOlic; ‘Patomerepen ni Yihofa ko lalood, tangasa i lihoc no sera; papiteken Ningra ko panaˈ, mitodoh to sapilood a paliding.’ Onini a ˈolic sakina cecayay a malaˈosi to nika palaˈafo no Kawas to sapilood a lalosidan no ˈada, paira to dipayal no Israil. Ci Kristo aitini i Armakiton a mipadik to halilooday a ˈada ikor, o rarihadayto ko hekal, tangasa i lihoc no sera. (ˈOlic 46:8-10) Oya ‘palo sapikangkang ko fonos, palo kawkaw ko ‘idoc’, ‘caayto pinanam to lalood’ a tamdaw o mamilifok to midaˈocay a ˈorip. O nano sowal noya Makomoday ko Sofitay a Yihofa konini.’—Isaya 2:4; Mika 4:3, 4.
Odoˈ no Sinael
w17.04 11 fiedac 9 fatac
Ano Irato ko Hongti Kitakit no Kawas i, o Manan ko Mamalaˈafo Hani?
9 Ano midemakto ci Yihofa i, aira ko manan ngaˈayay teloc hani? Ikor no Armakiton i, wa iraho ko likakawa han? Sowal no Fangcalay Cudad: ‘Doedoen ita ko sakiˈok Ningra, mitala to faelohay kakarayan ato faelohay sera, aira ko moecelay ilalomaˈ.’ (2 Pitiro 3:13) Itiniay i hekal ni Satan a ‘kakarayan’ ato ‘sera’, oyanan manaholay a sifo ato makowanay nira a tamdaw o mamalaˈafo. Oya matelangay a ‘kakarayan’ ato ‘sera’ o mamakotay no manan hani? Sowal no sinael ‘o faelohay kakarayan faelohay sera’ ko mamikotay sanay, ‘faelohay kakarayan’ i, mitoroan o faelohay a sifo, ‘faelohay sera’ i, o mamakowan no faelohay sifro a iseraay a finawlan. Ci Yis o mamisaheci a patahekal to capeling no Kawas, o faelohay sifo mamasielod itini i sakowan ningra. (1 Korinto 14:33) Itini i laeno no sakayat ni Yis ato 144,000 a dama a hongti, aira ko ˈalomanay faˈinayan mamidimokos to iseraay a tayal, itiyato i, ‘o faelohay sera’ aira ko likakawa ira ko masieloday a demak. (ˈOlic 45:16) Ano ikor, polong manaholay a likakawa o mamalaˈafo, oyato a makakelecay cowa ka nahol a likakawa ko mamikotay, o mahaenay a noikoran tada makapahay!
SAKA 6 FOLAD 10-16 ROMIˈAD
O ODOˈ KO KIMAD NO KAWAS ˈOLIC 48-50
Wama Wina—Padamaen ko Wawa Mitiˈer to Likakawa ni Yihofa
O Matatodongay a Pidoko Papatongal to Lipahak Iso
11 Micekiw kita to Fangcalay Cudad ato pasifanaˈ to wawa mafanaˈ ci Yihofaan o midokoay Cingranan. Itini Paselaˈan Romiˈad misawaday to tayal ko Israil tamdaw, misamacay patanektek to kalawidang aci Yihofaan. (Kasadakan 31:16, 17) Roma i, o madimadiay a Israil tamdaw pasifanaˈayho to wawa mafanaˈ ci Yihofaan, pasifanaˈ to wawa o ngaˈayay Cingra. Anini, o mamilimasmas kita to toki misongilaˈ micekiw to Kimad no Kawas, mihaen ko demak o midokoay ci Yihofaan, wa ngaˈay padama kitanan miingid Cingranan. (ˈOlic 73:28) Roma i, ano malacafay kita to paro no lomaˈ minanam to Fangcalay Cudad i, wa ngaˈay padama to teloteloc palahad to tangongolay a kalawidang to ciolahay a Wama i kakarayan.—ˈOsien ko ˈOlic 48:13.
w11-CH 3/15 19 fiedac 5-7 fatac
Iraay ko Lalangian Iso a Lipahak a Mahemeken
“Rakaten a mitaliyok ko Cion a lotok, saˈosien ko pikacawan no niyaroˈ nira, hapinangen a minengneng ko adipel no niyaroˈ ato pisitaraan nira, ta ira ko sasowalen namo i teloc namo.” (ˈOlic 48:12, 13) Itini, o mitiliday to ˈOlic a tamdaw palimoˈotay to Israil tamdaw mingata a minengneng to Yirusalim. O lalomaˈan no Israil to mihecahecaan malacafayay tayra i Yirusalima a misalisin, maˈaraway nangra ko nika tadamaan no fangcalay sefi, padamaay cangranan ira ko makapahay a noka piharateng nangra, cowa saw? Maedeng o mamakowad cangra, ‘sapipasowalaw to teloc nangra’.
Haratengen ko nalifetan no fafahiyan hongti ci Sipa. Pakayni to hakowaay ko nika citaneng ni Solomon, hakowaay ko nika tadamaan no pikowan ningra, fafahiyan hongti ci Sipa isalakat cisasaay ko falocoˈ. Ano hatiray i, hano pakasoˈlinto cingra hani? Sanay ko sowal ningra ci Solomonan: ‘Isalakat cowa pakasoˈlin kako, tangasa to nika tahini ako, maˈaraw ako, hongaˈ mafanaˈayto to nika tangongol no taneng iso.’ (2 Rayray 9:6) Mihaenay haw i, o ‘maˈaraway no mata ita’ a demak taˈangayay ko pifiyor i titaanan.
Ngangaˈay kiso misamaan to demk, hongaˈ ‘maˈaraw no mata’ no wawa ko nika tadamaan no likakawa ni Yihofa hani? O kitiraan iso a pala ano iraay ko fenpo no likakawa ni Yihofa i, saˈicelen a milimasmas ko paro no lomaˈ a minengneng to fenpo. O lomaˈ ni Manti aci Pisani 1,500 kongli (km) ko karaay to fenpo. Kawra, itini i kalomahadan nangra, marariday keriden no wama wina cangra minengneng to fenpo. Sanay ko sowal nangra: “ˈAyaw no minengneng kami to fenpo, sahetoay o malitengay ko matayalay itira na sanay kami miharateng, nohatini sa mafanaˈay kami, ˈalomanay ko kaemangay tamdaw malalok a matayal saki Yihofa itira, hanaca lipahakay cangra a matayal! Mahapinangay niyam to tada taˈakayay ko likakawa ni Yihofa, mikikakaay ko nika kakahad to kitiraan niyam a pala. To kina cecacecay maharek kami minengneng to fenpo i, itini noˈadingoan hato matongalay ko tingki.” Tona mingataay a minengneng ci Manti aci Pisani to samaanay ko kadademak no likakawa no Kawas, telocto i, makowaday cangra malo misakafahay, ikor matahidangay tayra i Pitil a matayal to ˈapotoay tatokian.
w12-CH 8/15 12 fiedac 5 fatac
Malo Finawlan no Hongti Kitakit no Kawas
5 Ka cipinang to likisi. Ano sakala finawlan no nima kakitakitan ko tamdaw i, isalakatho a cipinang to likisi nora kitakit wa ngaˈ. O tamdaw ano sakala finawlan no Hongti Kitakit no Kawas i, mamisaˈicel a cipinang to likisi no Hongti Kitakit no Kawas. Itini toninian, todongen ita ko teloc ni Kora. Itiniay nolitengan Israil matayal ko teloc ni Kora, maolahay cangra to Yirusalim ato pidokoan a kitiraan, maolahay mikitoh to likisi no Yirusalim, cowa ko nika tadamaan ko Yirusalim, ao samanen ‘o niyaroˈ no sakakaay Hongti ci Yihofa’ kora, o satenokan no matatodongay a pidoko konini, o pipasifanaˈan to Rikec ni Yihofa a kitiraan. O roma i, o milifokay to madimadiay olah i, oyanan finawlan no ‘sakakaay hongti’ no Yirusalim. (ˈOsien ko ˈOlic 48:1, 2, 9,12,13.) Kiso i, sapitodongaw to teloc ni Kora, sakacipinangaw to likisi no likakawa ni Yihofa i sera han? Ano matongal ko kacipinang iso to likakawa no Kawas, matongal ko kacipinang to samaanay midama ci Yihofa to finawlan Ningra i, o mamatongal ko kapasoˈlin iso to Hongti Kitakit no Kawas. Hanaca o mamakalim kiso mitenak to ngaˈayay lihaf no Hongti Kitakit no Kawas.—Yirimiya 9:24; Luka 4:43.
Odoˈ no Sinael
it-1-CH 200 fiedac 6 fatac
Hafay
Kadofahay ko Israil, adihayay ko kakaenen lipahakay ko finawlan (1 Hongti 4:20; Patnakay 5:18, 19) O cihafayay cangra caay ka manikaw. (Taneng 10:15; Patnakay 7:12) Kawrira, soˈliˈlin matayal ko Israil tamdaw a rihakeden ko ˈorip malecaday to araaw ni Yihofa (palalinien ko Taneng 6:6-11; 20:13; 24:33, 34), kawra patalipaˈelalan ni Yihofa cangra, aka a mapawan o sapafeli no Kawas ko hafay nangra, aka a cipaycito a matawal ko Kawas (Limoˈot 8:7-17; ˈOlic 49:6-9; Taneng 11:4; 18:10, 11; Yirimiya 9:23, 24). Haharatengen nangra malecaday o ˈoˈol a malahedaw ko hafay (Taneng 23:4, 5) Cowa ka ngaˈay malo sapatefoc a pafeli to Kawas, miliyas to sakapatayaw (ˈOlic 49:6, 7) Awaay ko epoc to mapatayay tamdaw (ˈOlic 49:16, 17; Patnakay 5:15). Mapalimoˈotay cangra, o tamdaw ano macoos to hafay, madoloay a masaˈfit no tatiihay tamdaw, telocto i, malahedaway ko hemek ni Yihofa. (Taneng 28:20; palalinien ko Yirimiya 5:26-28; 17:9-11.) Palimoˈotayho ko Fangcalay Cudad tano ‘kalimlaan a hafay, misaˈakawang ci Yihofaan’ sanay.—Taneng 3:9.
SAKA 6 FOLAD 17-23 ROMIˈAD
O ODOˈ KO KIMAD NO KAWAS ˈOLIC 51-53
Samaan ko Demak Ngaˈ Caka Mapakidem ko Raraw
Samaan Midipot to Falocoˈ Iso?
4 Itini Taneng 4:23 a “falocoˈ”, o pakayraan no “i kemoday no falocoˈ” ko mitoroˈan, cowa ka ˈaraw no tamdaw. (ˈOsien ko ˈOlic 51:6.) O falocoˈ—mitoroˈay to harateng, nafalocoˈan, araaw, kaolahan. Cowa ko potalay aca a mahapinangay, mahawpay ko kemoday a harateng no mita.
5 Sapitadtadaw to kalimlaan ko kemoday a harateng, ngaˈayay saka dademaken ita ko pakayraan no tireng. Sapitafoaw to tanoktokay a tireng, wa matatodong ko kakaenen no mita, micerid a mionto. Mahecaday, sapitafoaw kita to noˈadingoan a tanoktok, wa komaen to noˈadingoan a kakaenen, micerid a mitiˈer to Kawas, mahawpay ko misaka dademak to minanaman i nokaˈorip ita ato mitosil. (Loma 10:8-10; Yakop 2:26) Latekay, tanoktokayho ko tireng no niyah, sanay ko harateng, ˈarawhan, iraayto ko dangoc no tireng. Mahecaday, miceriday kita mirienang to noˈadingoan a tayal, hato tanoktokay ko pakasoˈlin no niyah, ˈarawhan lomahadayto ko mararaway a harateng i kemod no falocoˈ. (1 Korinto 10:12; Yakop 1:14, 15) Sasinanoten ita, sapinaholaw ci Satan to falocoˈ ita. Wa samaan koha demak ningra hani? Wa samaan kita midipot to falocoˈ no niyah hani?
w15-CH 6/15 14 fiedac 5-6 fatac
Tawmecen ko Makoracay Harateng, Moecelay a Waywayan
5 Mararid kita mitolon, misaali ci Yihofaan padama kitanan milowid to cikaditay a ˈanof no harateng. Papafeli ci Yihofa to fangcalay saocor, ira ko ˈicel ita mitawmec to makoracay a harateng, moecel ko waywayan. Pasowalen ita ci Yihofa, maolahay ko niyah ira ko makowacay a harateng, pakahemek Cingranan. (ˈOlic 19:14) Toha sakaecaaw ka mararaw, cangacangen ita ci Yihofa papinengnengen to kemod no falocoˈ iraay ko cikaditay a harateng hokira. (ˈOlic 139:23, 24) Padodotoc kita misaali to sapadama ni Yihofa, misetek to falocoˈ eca ka mapadik no sakayhid, misaˈicel a midemak to matatodongay a demak.—Matay 6:13.
6 ˈAyaw no mafanaˈ ci Yihofaan, marariday kita midemak to kapiliˈan Ningra a demak alatek. Mafanaˈto to Kawas ikor, kakamayan miˈodot kita to coos no harateng alatek. Kawrira, ngangaˈay padama ci Yihofa kitanan a mifalic, midemak to kahemekan Ningra a demak. Maaˈodang ci Tafiti aci Patsipa, ikor pacekosay ko falocoˈ ningra, mingitangit ci Yihofaan: ‘Nanay itini ilalomaˈ no mako sangaˈen Iso ko makoracay a falocoˈ, teliˈen ko faelohay harateng i lalomaˈ no falocoˈ ako, patanektek takowanan.’ (ˈOlic 51:10, 12) Papadadotoc kita miˈodot to coos no falocoˈ alatek, nikawrira, papaˈicelen ni Yihofa ko falocoˈ ita, padama kitanan makalim a midofdof Cingranan, midemak to matatodongay. Soˈliˈlin cowa ka lefot kita, kawra papadamaen ni Yihofa kita miˈimer to harateng ita.—ˈOlic 119:133.
Odoˈ no Sinael
it-1-CH 383 fiedac
Ci Towik
O Itom a tamdaw; ˈakawangay ko saaroˈan, mikowanay to ilaenoay ni Sawlo a mipakaenay to siri a tamdaw. (1 Samuil 21:7; 22:9) Ci Towik o mitooray a mihakelong a roma finacadan tamdaw alatek. Pakayniay i miketonay to sowal alatek, anca mitefingay to caay ka korac, latek o matonoˈay ko adada a tamdaw hokira. Itiniay i Nop a niyaroˈ ikaˈayaw ni Yihofa materek cingra, mansa maˈaraway ningra ko sakakaay saysi ci Ahimilik pafeli ci Tafitian to pina epang ato fonos ni Koliyat. Ikor milolohay ci Sawlo to sapikariˈangaw ko sikawdan i cingranan, pasowal hananayto ni Towik ci Sawlo to maˈaraway ningra itini i Nop a niyaroˈ. Oraanto, tahidangen ni Sawlo ko sakakaay saysi ato itiniay i Nop a romaroma saysi, miliclic ci Ahimilikan, ikor palimoˈoten ko sofitay papipatay tora saysi maemin. Kawra cowa ka kahi ko sofitay mipatay to saysi ni Yihofa, papipatayen ni Sawlo ci Towik. Tangsol midemak ci Towik, mipatay ko 85 a saysi. Maharekto midemak tonini mariˈangay a demak ikor, haeminen ni Towik mipatay ko polong a tamdaw no niyaroˈ, o faˈinayan fafahiyan ato matoˈasay kaemangay, hadefek han a miemin, ano o pinaˈoripto cowa ka lawaen ningra mipatay.—1 Samuil 22:6-20.
O salakatay sowal no ˈOlic saka 52 fedengan, mitiliday to sowal ni Tafiti pakayni ci Towikan: ‘O sema iso mikariˈangay to tamdaw, mato cisinangay a fonos, misafakofako ko demak. Maolah kiso to mikariˈangay a demak, maolah misamangah caay ko moecelay a demak. O misafakofakoay ko sema, mihadefekay to tamdaw a sowal, maolahay kiso a pasowal.’—ˈOlic 52:2-4.
SAKA 6 FOLAD 24-30 ROMIˈAD
O ODOˈ KO KIMAD NO KAWAS ˈOLIC 54-56
I Katihiay Iso ci Yihofa
w06 8/1 22 fiedac 10-11 fatac
Ka Pikangodo to Kawas, Mataneng ko Demak
10 Toha sapilimekaw ci Sawloan, kina cecayay pasayniay ci Tafiti to hongti no Kat ci Akisan misaali to sadipot, o Kat a niyaroˈ, o nalacolan a lomaˈ ni Koliyat kora. (1 Samuil 21:10-15) Mahapinangay no matayalay no hongti no Kat ci Tafiti, mikapoiˈ cingranan nao ˈada no Filistin cingra. Itiya tada matalaway ci Tafiti, samaanayto ko demak ningra hani? Mitolonay ci Yihofaan cingra, mifowah to falocoˈ ˈOlic 56:1-4, 11-13) Ikorto i, misasingkisingkiay ci Tafiti hato maliyasayto ko katalawan. Soˈliˈlin hatira, mafanaˈay ci Tafiti to nika maliyas ningra ko katalawan, samanen o pakayniay i pipalemed ni Yihofa, paˈorip cingranan. Misarocoday ci Tafiti mitiˈer ci Yihofaan, paihkalay to misasoˈlinay mikangodo to Kawas cingra.—ˈOlic 34:4-6, 9-11.
11 Matira ci Tafitian, tiˈeren ita ko sakiˈok no Kawas, pakasoˈlin to papadama Cingra kitanan misiˈayaw to pasangar, mihaen kita a paihkal to soˈlinay mikangodo to Kawas. Sanay ko sowal ni Tafiti: ‘Patoroden ko noikoran iso i ci Yihofaan, tiˈeren Cingra, o papalaˈosien Ningra kiso.’ (ˈOlic 37:5) Cowa ko mamisamaan kita, edeng patorod han aca ci Yihofa to pasangar ita, mitala Cingranan misaysay to demak cowa ka saan. Pasayra ci Tafiti ci Yihofaan a mitolon to sapadama ikor, cowa ka tatala saan misaysay ko Kawas to pasangar. Misaka dademakan ningra ko sapafeli ni Yihofa a taneng ato ˈicel misiˈayaw tora ikaˈayaway a pakayraan. Soˈliˈlin hatira, mafanaˈay ci Tafiti pitiˈer aca to ˈicel no tamdaw cowa ko mamalaˈosi. Papairaen ita ko malecaday a harateng. Tatiˈeren ita ci Yihofa, misaˈicel ko niyah, ikor patorod hanto ko Kawas. Soˈlinay haw i, itini adihayay a pakayraan, awaay ko ˈicel ita, sasrocoden mitiˈer ci Yihofa wa ngaˈ. Itiya paihkalay kita to mikangodoay to Kawas, ngangaˈay kita mikitini i nafalocoˈan a sowal ni Tafiti a milifok to sasayar, sanay ko sowal ningra: ‘Edengan o mikangodoay ci Yihofaan a tamdaw ko miingidan Ningra.’—ˈOlic 25:14.
cl-CH 243 fiedac 9 fatac
Awaay ko Maanan ‘Papaliyas to Olah no Kawas i Titaanan’
9 Misalimlaay minengneng ci Yihofa to madimadiay tahatolas a tamdaw. (Matay 24:13) Aka a mapawan, mihalakaay ci Satan misilikor kiso ci Yihofaan. Ano madimadiho kiso to cecay romiˈad, o ngangaˈayto a mipacoli to pilokes ni Satan ci Yihofaan. (Taneng 27:11) Nolatekay, padadotoc miemem cowa ko madoloay. Tatiih ko tireng, caˈongot ko payci, matoled ko falocoˈ ato romaroma a pasangar, caay ka mahadidi ko romiˈad. Ano awaawa sa ko mitalaan a demak, matoleday a masawi ko tamdaw. (Taneng 13:12) Tahasiˈayaw kiso to mahaenay a sapalifet padadotoc a miemem, mamangalef ko pisalimla ni Yihofa tisowanan. Pakayniay toninian mansa misaaliay ci Tafiti to Kawasan patelien i ‘lofok’ Ningra ko losaˈ ningra, oraanto, pakasoˈlinay cingra pasowal: “Caay ka tilid i cudad Iso konini a maemin saw?” (ˈOlic 56:8) Hatiraay, misalimlaay ci Yihofa to marowisay a losaˈ ita, cowa ko mamapawan to nika madimadi a miemem kita to roray. Itini pinengneng Ningra, tada kalimlaan konini.
Mamalowid no Olah ko ˈAngi
16 Mafanaˈay ci Satan to misalimlaay kita to ˈorip no niyah. Kita to sapidipotaw to ˈorip caay ka pikihar to kihcod, ano o kalawidang aci Yihofaan makahiyay a mifalah sanay. (Yopu 2:4, 5) ˈArawhan tada mararaway ci Satan! Nikawrira, o papakaynien ni Satan to ˈangi ita to patay a pacieci kitanan misafelit ci Yihofaan, samanen ‘iraay ko ˈicel ningra mipatay to tamdaw.’ (Hipray 2:14, 15) Tinakoen, latek papatalaw ko mafiyoray ni Satan a tamdaw kitanan, ano caka pisawad kita to pihakelongan i, o papatayen kita sanay. O roma sa, ano tahalifa kita to kacalohan a pipaisingan a demak i, sakadademaken ni Satan konini toki a mipacieci kitanan misafelit to sarikec no Kawas. O ising anoca o cowa pihakelong a paro no lomaˈ papacieci kitanan alatek, papicada kitanan pacomod to remes, o romaroma tamdaw latek papicadaay kitanan to misafelitay to safalod no Fangcalay Cudad a sapaising a pakayraan.
17 Soˈlinto cowa ko sakapatayaw kita, kawra mafanaˈay ano tahatolasto ko ˈorip ita i, o olah ni Yihofa kitanan cowa ko mamitolas. (ˈOsien ko Loma 8:37-39.) Maharatengay ni Yihofa ko mapatayay widang Ningra, itini pinengneng Ningra hato o maˈoripayho cangra. (Luka 20:37, 38) Halamhamay Cingra to sapatikolaw paˈorip cangranan. (Yopu 14:15) Soˈlinay haw i, toha sapilifokay ita to midaˈocay ˈorip, pasadakayto ci Yihofa to matekesay a ˈaca. (Yohani 3:16) Mafanaˈay kita, tangongolay ko olah ni Yihofa kitaanan, ciharatengay kitaanan. Mankora, ano kareteng ko adada ita anoca tahasiˈyaw to patay i, cowa ko mamiliyas ci Yihofaan, ao papasayra Cingranan mikilim to sahinom, taneng ato ˈicel. Ci Walayli ato faˈinay ningra mahaenay ko pidemak.—ˈOlic 41:3.
Odoˈ no Sinael
it-2-CH 1030 fiedac 6 fatac-1031 fiedac 2 fatac
Paliˈayaw a Mafanaˈ, Paliˈayaw a Misaˈosi
Ci Yuta o Iskariyot tamdaw pacakayay ci Yisan, palaˈosiay to sapairasol no Fangcalay Cudad, hanaca paihkalay to mafanaˈay ci Yihofa ato kanonoˈan Wawa Ningra paliˈayaw tono ikoran. (ˈOlic 41:9; 55:12, 13; 109:8; Dmak 1:16-20) Nikawrira, cowa paliˈayaw ko Kawas a misaˈosi to mamidemak ci Yuta to matiniay misafelitay a demak. Edengan aca paliˈayaw mifanaˈ to mamapacakay no makedecay a widang ci Yis, kawra cowa ka somowal to cima a makedecay a widang. Soˈlinay haw i, kitinien to safalod no Fangcalay Cudad, cowa ko papaliˈayaw misaˈosi ko Kawas to mamararaw ci Yuta. Somowalay ci Pawlo to cecay safalod no Kawas, sowal sa: ‘O mikapaay a minilnil a tamdaw, aka a macaloh; aka itini i raraw no tao a ira ko ˈinorong. Ka padadotoc kiso makorac.’ (1 Timoti 5:22; palalinien ko 3:6.) ˈAyaw no cecay dadaya to mamipiliˈ ci Yis to 12 tarokos i, misalafiˈiay mitolon to Wamaan ci Yis, mahapinangay itini to makalimay cingra matatodong ato citaneng ko pipiliˈ. (Luka 6:12-16) Ano maharekayto paliˈayaw ko Kawas to papacakay ci Yuta ano han i, coko mararaway ko pikayat Ningra ci Yisan saw, ano sakadademaken kora ifafekangay safalod i, o caciˈinorong ko Kawas kira.
Mahapinangay itini, tiya mipiliˈ ci Yis ci Yutaan a mala tarokos i, awaay ko tatiihay harateng ni Yuta. O cingra ko pasalatay ‘to ciwarakay a lamit a lomahad’ mipakadit to falocoˈ no niyah, caay picada to sakayat no Kawas, ao micadaay to pikerid ni Akoma, salikor mararawto a mitakaw ato misafelit. (Hipray 12:14, 15; Yohani 13:2; Dmak 1:24, 25; Yakop 1:14, 15; nengnengen ko YUTA No. 4.) Tangsa ihacowaayto, mahapinangto ni Yis ko nika falic no falocoˈ ni Yuta, hato paliˈayawto pasowal to papacakay ci Yuta i cingranan.—Yohani 13:10, 11.