Pinengnengan to Lalakaw no Mitosilay ato Nikaˈorip Rayray no Saˈopo
© 2024 Watch Tower Bible and Tract Society of Pennsylvania
SAKA 7 FOLAD 1-7 ROMIˈAD
O ODOˈ KO KIMAD NO KAWAS ˈOLIC 57-59
Cowa ko Papakihateren ni Yihofa ko Malaˈosi ko Misafelitay Kitanan a Tamdaw
bt-CH 220-221 fiedac 14-15 fatac
‘Tangasa i Saraa:yay a Pala no Hekal’
14 ˈAyaw no mamapatay no ˈada ci Stifano i, timoloay cingra a misawacay. (Dmak 6:5; 7:54-60) Itira toya ‘tada pakidemay ko pihakokay’ a laliyadan, edengan aca o tarokos ko materekay, romaroma nisawawaan maemin maliwasakay tayra icowacowa pala no Yutiya ato Samariya. Kawra cowa ka tomerep ko misawacayay a demak. Tayraay i Samariya ci Filip ‘mitenak ci Kristoan’, kadofahay ko minaroˈan. (Dmak 8:1-8, 14, 15, 25) Sowal no Fangcalay Cudad: ‘Mapatayto ci Stifano i, romaroma nisawawaan misatapangay a tahalifa to pades, maliwasakto tayra icowacowa pala. Tayraay cangra i Foinikiya, Sayprus, ato Antiyok, kawra o Yutaya tamdaw aca ko mitenakan to kimad no Kawas. Nikawrira ilalomaˈay nangra a naitiniay i Sayprus ato Kirini a tamdaw tangasaayto i Antiyok, mitosil to sano Krisiyaay ko sowal a tamdaw, milasil to ngaˈayay lihaf ni Yis.’ (Dmak 11:19, 20) Oya hakokay itiya ˈarawhan mapatenakay ko ngaˈayay lihaf no Hongti Kitakit tayni i ra:ayay a pala.
15 Anini a lintad, iraay ko malecaday demak mafekad i Sowiay. Mangalefay isaka l950 a mamihecaan, pinaay patek pinaay ˈofad a Misawacayay Tamdaw ni Yihofa mapalafelay tayra i Sipoliya. Patayraan cangra icowacowa pala, hato mapatenakayto ko ngaˈayay lihaf no Hongti Kitakit itini tonini kakahaday a pala. O ˈalomanay a Misawacayay Tamdaw ni Yihofa co:wa ko papakasoped to payci, tayra tora cecayay ˈofad kongli ko karaay a pala milasil to ngaˈayay lihaf, ˈarawhan o sifo ko patayraay cangranan tonini kakahaday a sera. Sanay ko sowal no cecay faˈinayan salikaka: ‘O saˈosi no sifo mafafelihay a mipadama to ˈalomanay moecelay ko falocoˈ a tamdaw i Sipoliya mafanaˈ to soˈlinay kimad.’
Odoˈ no Sinael
w23.07 18-19 fiedac 16-17 fatac
“Ka Tanektek a Tomireng, Aka ka Ngiyangi”
16 Tanekteken ko falocoˈ. Misetekay ci Tafiti to falocoˈ hakelong no kaˈorip maolah ci Yihofaan, sanay cingra: ‘Kawasaw, tanektekay ko falocoˈ ako.’ (ˈOlic 57:7) Ano kitato ngangaˈay tanektek ko falocoˈ, misarocod a mitadiˈec ci Yihofaan. (ˈOsien ko ˈOlic 112:7.) Masowalay i fafekang no fatac salikaka ci Pawpo, tiya mafanaˈ to papatado ko ising cingranan misaday to remes i, tangsolay a paihkal, ano pacomoden no ising ko remes cingranan, tatangsol cingra minokay. Ikor sanay ci Pawpo: “Itiya awaay ko mimimiming aca a sasa ato cariraw ako.”
17 Ngaˈay tanektek ci Pawpo, samanen ˈayaw no tatayra i ising, maherekayto misetek tatanektek ko saaroˈan. Hano ira ko mahaenay a pisetek ningra hani? Saka cecay, makalimay cingra pakahemek ci Yihofaan. Saka tosa, misongilaˈay cingra mikingkiw to Fangcalay Cudad ato mitepangan a cudad, micalep a cipinang to pinengneng no Kawas pakayni remes ato ˈorip. Saka tolo, pakasoˈlinay cingra mitoor to sakayat ni Yihofa, o papaira to midaˈocay a haepoc. Ano minanam kita ci Pawpoan, tanektek ko falocoˈ, tahalifa to maamaan a sapalifet i, cowa ko mamangiyangi.
SAKA 7 FOLAD 8-14 ROMIˈAD
O ODOˈ KO KIMAD NO KAWAS ˈOLIC 60-62
Paparihaday ci Yihofa Kitanan
it-2-CH 363 fiedac 3 fatac
Pisitaraan
Sapatinako. O tamdaw ano mitiˈenec to pasoˈlinay falocoˈ midofdof ci Yihofaan i, tada rihadayay, matira to sowal ni Tafiti: ‘Kiso [Yihofa] malo pikiˈadingan no mako, malo pisitaraan no mako, toha ngangaˈay kako micoˈay to ˈada.’ (ˈOlic 61:3) O tamdaw ano mihayi to tatodong no ngangan ni Yihofa, mitiˈer ci Yihofaan, halo madimadi a pakayni i ngangan Ningra a midemak i, cowato ko mamatalaw, samanen ‘o tanektekay a pisitaraan ko ngangan ni Yihofa, micomod tayra ko moecelay ko falocoˈ a tamdaw o rarihaday.’—Taneng 18:10; nengnengen ko 1 Samuil 17:45-47.
it-2-CH 1134 fiedac 10 fatac
Pakopangan
O romaroma tinakoan i Fangcalay Cudad paihkalay ‘o pakopangan’ hananay i, iraay ko roma sapatinako a tatodong. O pakopangan i, o pikilidongan ato pahanhanan a kitiraan. (Satapangan 18:1) O Kakawalian a tamdaw hinalafangay, ano mipalafang ko tamdaw tayra i pakopangan no nima i, mitaraay to dadimokosen ato kakangodoen cangra. Mihaenay haw i, itini i Paˈarawan 7:15 somowalay to Kawas ‘mamicelak to pakopangan a midipot’ to taˈangayay ˈopo a tamdaw, tatodong i, o dadimokosen no Kawas cangra, midipot cangranan, parihadayen cangra. (ˈOlic 61:3, 4) O sowal ni Isaya, o papataraen no Kawas ko misofocan a wawawawa no Cion o fafahi Ningra, ‘micowat to kitiraan no pakopangan iso’ sanay. (Isaya 54:2) Tatodong nora sowal i, o cacowaten Ningra ko pidipotan to wawawawa Ningra o sanay.
w02-CH 4/15 16 fiedac 14 fatac
Sarikec no Kawas Tada Ciepocay i Kitaanan
14 Sarikec no Kawas midaˈocay co:wa ka falic. Soˈliˈlin mafodifoday konini kaˈoripan ita a hekal, ci Yihofa matiraay o lotok a tanektek, midaˈocay a materek. (ˈOlic 90:2) Milasilay ci Yihofa: ‘Kako ci Yihofa, co:wa ko mamafalic.’ (Malaki 3:6) Itini i Fangcalay Cudad, o palinian no Kawas soˈlinay tatiˈeren, caay ka matira to sasowalen no hekal, hato maˈalolay a tafok no riyar, safalifalic saan. (Yakop 1:17) Tinakoen, ˈayaw no pina miheca o sowal no nofalocoˈan a ising pasalat han ko wawa a lomahad sanay, ikor mafalicay ko sowal no romaroma ising, somowal to mararaway ko mahaenay demak sanay. Itini toninian a demakan, o palinian ato sakayat no hekal safalifalic sanay, edengan o Kimad ni Yihofa co:wa ka falic. Nai litenganho, o Fangcalay Cudad palimoˈotay to wama wina tano olah a mipalahad to wawa. Sanay ko sowal no tarokos ci Pawlo: ‘Kamo o wama tamdaw, aka paketeren ko wawa, edengan doedoen ko harateng ni Yihofa a mirikec cangranan, mifikel to harateng nangra, midipot a palahad cangranan.’ (Ifiso 6:4) Palinian ni Yihofa co:wa ka falic, ngaˈayay tiˈeren tada rihadayay ko falocoˈ ita!
Odoˈ no Sinael
w06-CH 6/1 11 fiedac 6 fatac
Kalimlaan no Saka Tosa Rayray no ˈOlic Cudad
62:11. O Kawas cowa ko mamitiˈer to nai papotalay a ˈicel. O pipowaran no ˈicel Cingra, samanen ‘naitiniay i Kawas ko ˈicel.’
SAKA 7 FOLAD 15-21 ROMIˈAD
O ODOˈ KO KIMAD NO KAWAS ˈOLIC 63-65
“O Madimadiay Olah Iso Mikikakaay to ˈOrip ko Nika Ngaˈay”
w01-CH 10/15 15-16 fiedac 17-18 fatac
Cima ko Mamiketon to Olah no Kawas i Kitaanan Hani?
17 Hakowaay ko nika pisalimla iso to olah no Kawas hani? Malecaday ko harateng iso ci Tafitian han? Sanay ko sowal ningra: ‘O madimadiay a olah Iso, mikikakaay to ˈorip ko nika ngaˈay, saka pahemeken no mako Kiso. Papahemeken Kiso i hakelong no ˈorip ako, milayaˈ to kamay a micangacang i Tisowanan.’ (ˈOlic 63:3, 4) Ano sasoˈlinen ko sowal i, maˈorip kita itini i hekal, iraayho ko maanan a demakan to mikikakaay to olah no Kawas ato midaˈocay a kalawidang i Cingranan saw? Tinakoen, ˈakawangay ko lifon a tayal i hekal, mikikakaay to nika lawidang ato Kawas a ira ko rihaday saw? (Luka 12:15) Romaroma Krisciyang tahasiˈayaway to patay ato ˈorip, mamifalah ci Yihofaan ha, anoca mifalah to ˈorip ha. Itini isaka tosa lalood no hekal, ˈalomanay Misawacayay Tamdaw ni Yihofa itini i tapalitan no Naci iraay ko mahaenay a nalifetan. O ˈalomanay a Krisciyang misetekay to falocoˈ a materek i olah no Kawas, soˈlinto tahasiˈayaw to patay cowa ka talaw cangra. Ano madimadi ko tamdaw, materek i olah no Kawas i, o mamilifok to midaˈocay a ˈorip. O mahaenay a sakalemed, cowa ko papafeli ko hekal. (Marko 8:34-36) Kawrira o hatokel ita cowa ko midaˈocay aca a ˈorip.
18 Ano awa ci Yihofa, o tamdaw cowa ko mamidaˈoc a maˈorip. Haratengen hena, ano maketon ko kalalaˈed ita to Misangaˈay a Tatapangan, soˈlinto koedaw ko ˈorip, samaanay ko kaˈorip hani? Mahoracay ko kaˈorip, awaay ko epoc. Itini tonini salikoray ˈawaled, pafeliay ci Yihofa to finawlan Ningra to cecay a tayal, padama cangranan marenecen ko kaˈorip. Mihaenay i, aka marawraw kita, ikor pafelito ci Yihofa to midaˈocay ˈorip i, adihayay ko nananamen ita ciepocay a demak. (Patnakay 3:11) Soˈliˈlin misarocod kita a mikingkiw to ‘kadofahay a sidaˈit, taneng ato sifanaˈ no Kawas,’ kawrira, citolasay ko ˈorip ita, cowa ko mamahaemin ita a mitinako.—Loma 11:33.
‘Kararid a Miakoˈid’
Mangalefay o aakoˈiden ita ko Kawas. Maharatengay iso nolatekay, padadotocay ci Yihofa padama tisowanan a miingid Cingraanan, halo pafeli tisowanan to adihayay a makapahay dafong han? (Limoˈot 8:17, 18; Dmak 14:17) Kawra, hamaan nolatekay aca miharateng to samanay ci Yihofa a hinapaladaˈ tisowanan, papalaken ko toki a midotim to adihayay sapalemed no Kawas tisowanan. Mihaen to demak, wa matongal ko piakoˈid iso to misangaˈay a Tatapangan, wa padama tisowanan a pakasoˈlin to maolahay Cingra ato masemeray tisowanan.—1 Yohani 4:9.
w15-CH 10/15 24 fiedac 7 fatac
Mararid a Midotim to Noˈadingoan a Demak
7 O tamdaw ano miˈosi i, madoloay caay ka adihay ko haharatengen, ano midotim i, mamisamacay ko falocoˈ. Kawra cowa ka lefot ko tamdaw, mararid cowa ka olah tano ponoˈ a miharateng. Ano hatiraay i, o ngaˈayay ikor no pahanhanto kita, awa ko mikalisangaay ngaˈ midotim. Mitiliday to ˈOlic a tamdaw maolahay itini i dadaya matienang i takal a misimsim. (ˈOlic 63:6) Ci Yis iraay ko malefotay a ˈicel a misaharateng, kawra mipiliˈayho cingra to awaay ko adeses kitiraan a misimsim ato mitolon, mafanaˈay cingra to o sangaˈayay pakayraan konini.—Luka 6:12.
w09-CH 7/15 16 fiedac 6 fatac
Todongen ci Yis Mitawmec to Olah a Pasifanaˈ to Tao
6 Kita maolahay a somowal to kahemekan a demak no niyah, ano somowalho i, mahemekay ko pising, ˈifowaay a pasowal. Ano somowal to kaolahan a tamdaw i, mangalefay a mahaen. Ciharatengay kita to sapasowalaw to tao to hakowaay ko nika ngaˈay no kaolahan ita a tamdaw. Papakahemek kita cingranan, mikangodo cingranan, midama cingranan, halamham to tao mihaen a masemer cingranan, masolot no makapahay a capeling ningra.
Odoˈ no Sinael
w07-CH 11/15 15 fiedac 6 fatac
Pasayaran Iso ko Falocoˈ no Tao Han?
Madoloay ko mitastasay to lomaˈ to mipatirengay to lomaˈ. Itini i sasowalen, malecaday hatira. Kita cowa ko malefotay, iraay ko patelac, mararaway. Hongti ci Solomon, sanay ko sowal: ‘Itini hekal awaay ko midemakay aca to makapahay a eca ka raraw a moecelay tamdaw.’ (Patnakay 7:20) Mihaenay i, madoloay kita mitoroˈ to raraw no tao, mirikec i cingranan, pakangodo matoleden ko tao. (ˈOlic 64:2-4) Ano ciharatengay kita tawlik ko sasowalen i, mamisaˈicel wangaˈ.
SAKA 7 FOLAD 22-28 ROMIˈAD
O ODOˈ KO KIMAD NO KAWAS ˈOLIC 66-68
To Romiˈamiˈad Mitamorongan ni Yihofa ko ˈInorong no Mita
Samaanay ci Yihofa Pacaˈof to Satolon Ita
15 O Wama ita i kakarayan tocerid cowa ka tano masakafahkaˈan a pakayraan pacaˈof to satolon no mita, kawra oha papacaˈof Cingra, o sapadama Ningra o soˈlinay a nisaalian no mita, ho ngaˈay kita padadotoc a madimadi Cingranan. Mihaenay haw i, sinanoten a minengneng ko pipacaˈof ni Yihofa tisowanan. Salikaka ci Yoko na miharatengay to cowa pacaˈof ci Yihofa to satolon ningra, kawra ikor mitilidan ningra ko micangacangan a demak ci Yihofaan. Mataˈlifto ko cecay liyad ikor, mitikolan ningra minengneng ko na mitilidan no niyah, ˈarawhan mipacaˈofanto ni Yihofa ko adihayay satolon ningra, ano oyato a matawalay ningra a satolon, pacaˈofan ni Yihofa. Ngaˈayay kita misalatelatek a tomerep, misongilaˈ a miharateng to samaanay ci Yihofa pacaˈof to satolon no mita.—ˈOlic 66:19, 20.
w10-CH 12/1 23 fiedac 6 fatac
Ka Ciharateng to Awaay ko Ramod a Wama Wina
Patemeran ni Yihofa ko tamdaw papitilid to pina sapakahemek a ˈOlic, ngangaˈay ko Israil itini i modokoay to Kawas a saˈopo a romadiw a mapolong. Ano romadiw ko pakoyoc wawa ato maponengay fafahiyan i, papatalipaˈelal cangranan to o ci Yihofa ko Wama nangra, ano masamsam no tao i, o papaˈadingen no Kawas cangra, romadiw cangra itiya mamasayar ko falocoˈ nangra. (ˈOlic 68:5; 146:9) Malecaday, ngaˈayay kita pasowal a pakalalok to awaay ko ramod a wama wina. Ikor no pi:na a miheca, o nano sowal ita latek mamaterek i falocoˈ nangra. Ci Losi o awaay ko faˈinay a wina, anini maharatengayho ningra ko sowal no halafinayto mala wama a widang i ˈayaw no 20 a miheca, sanay ko sowal ningra: “Mangaˈayayto ko pidimokos iso to tatotsa wawa, padadotocen a mikiemel haw!” Saan ci Losi: “O sowal ningra malecaday sapaˈicel to falocoˈ a cemel, taˈangayay ko pidama takowanan.” Sowal no Fangcalay Cudad ‘o sapaiyo ko sidaˈitay a sowal’ sanay, o mahaenay a sowal mikowaday to awaay ko ramod a wama wina, latek cowa ko mamaharateng ita. (Taneng 15:4) Kiso i, ngangaˈay a mikifalocoˈ a pakahemek to cima awaay ko ramod a wama wina han?
w09-CH 4/1 31 fiedac 1 fatac
Wama no Pakoyoc Wawa
‘O KAWAS itiniay i fangcalay kitiraan Ningra malo Wama no pakoyoc.’ (ˈOlic 68:5) Onini tano fangcalay saocor a mipatemeran no Kawas a sowal, mahapinangay ita to siniˈada Ningra to pakoyoc a wawa, halamhamay sapilidongaw cangranan. Oya sapafeli no Kawas sarikec to Israil ihkalay mahapinang, tada ciharatengay ko Kawas to pakoyoc a wawa. Sakinacecay somowal ko Fangcalay Cudad to ‘pakoyoc’ sanay a tilid itiniay i Kasadakan 22:22-24, sanay yaca nengnengen ita nohatini konini sowal.
Padamaay ci Yihofa Tisowanan Malaˈosi ko Demak
17 ˈOsien ko ˈOlic 40:5. O patosokan no macokacokay i lotok tahira i fafekangay a taporo, kawra itini i fatad no lalan adihayay a kitiraan, ngangaˈay cingra pahanhan misongilaˈ minengneng to makapahay a pinaloma. Malecaday, o mamararid kita pahanhan to hawang, misongilaˈ miharateng itini pihadidian ita to pasangaray a tatokian i, samaanay ci Yihofa padama kitaanan malaˈosi ko demak. Maharerek ko kahacecay romiˈad i ngaˈayay a licayen ko niyah: “Anini mahapinangay ako samaanay ci Yihofa palemed takowanan hani? Soˈlin cowaho ka hererek ko sapalifet, kawra samaanay ci Yihofa padama takowanan padadotoc mihadidi hani?” Sapadamaaw tisowanan malaˈosi ko demak, adihayay ko sapafeli ni Yihofa a sapalemed tisowanan, ngaˈayay tanamen iso mikilim ko cecay sapalemed han?
Odoˈ no Sinael
w06-CH 6/1 10 fiedac 5 fatac
Kalimlaan no Saka Tosa Rayray no ˈOlic Cudad
68:18—Cima koya ‘malo sidaˈitay a sapafeli a tamdaw’ hani? Cangra oyanan tiya malowid no Israil ko mikiˈokan pala a macepetay a tamdaw. Ikor mipadangay to Lifi tamdaw matayal.—Icra 8:20.
SAKA 7 FOLAD 29–8 FOLAD 4 ROMIˈAD
O ODOˈ KO KIMAD NO KAWAS ˈOLIC 69
ˈOlic Saka 69 Fedengan Pairasolay to Hamamasiˈayaw ni Misiya a Pasangar
w11-CH 8/15 11 fiedac 17 fatac
Halamhamay a Mitala Cangra ci Misiyaan
17 Padeteng sanay ko tamdaw a ˈinteh ci Misiyaan. (ˈOlic 69:4) Kitinien to mitilidan ni Yohani, na somowalay ci Yis: ‘Kako itini lalomaˈ nangra, ano cowa ka pidemak to caayho ka demaken no tao a demak i, awaayto ko raraw nangra. Kawra, maˈarawayto nangra kako nohatini, ˈintehayho i takowanan, ˈintehay to Wama ako. O sapalaˈosiaw to sowal no Rikec nangra: ‘Padeteng sanay ko tamdaw ˈinteh takowanan,’ sanay. (Yohani 15:24, 25) ‘Rikec’ sanay a tilid marariday mitoroˈ to polong a Fangcalay Cudad. (Yohani 10:34; 12:34) O maˈoningay i Ratoh cudad paihkalay, soˈlinay makaˈinteh no tamdaw ci Yis, o kakeridan no Yutaya mangalefay ko kaˈinteh ci Yisan. Na somowalay ci Kristo: ‘O hekal tamdaw awaay ko lalangian a mikaˈinteh tamowanan, o kako ko kaˈintehan nangra, samanen mitoroˈay kako to tatiihay a demak no hekal tamdaw.’—Yohani 7:7.
w10-CH 12/15 8-9 fiedac 7-8 fatac
Pakayni i Matatodongay Pihakelongan a ˈIfowa ko Falocoˈ
7 Nidemakay ci Yis to cecay a demak, ciˈicelay paihkal konini to nika ˈifowa no falocoˈ ningra to matatodongay pihakelongan. Onini demak itiniay mafekad isaka 30 miheca ta mangata ko Pitaˈlifan a Lisin, itiya caayho ka halafin misatapang ci Yis to tayal no Kawas. Ci Yis ato nisawawaan tayniay i Yirusalim, maˈaraw ‘itini fangcalay sefi iraay ko paliwalay to kolong, siri ato topi, maroˈay itira ko mifafalicay to payci a tamdaw.’ Samaanay ko pinengneng ni Yis hani? Ora demak ningra samaanay misemer to nisawawaan hani?—ˈOsien ko Yohani 2:13-17.
8 Matengilay no nisawawaan ko sowal ni Yis ato maˈaraway ko nidemakan ningra, maharatengay koya nitilidan ni Tafiti a cecay sowal. Paliˈayaway pasowal konini sinael: ‘Pakayni to fangcalay sefi Iso ˈifowaay ko falocoˈ, cowa ka tomeseng kako.’ (ˈOlic 69:9) Misamaanay hano maharateng no nisawawaan ko sowal ni Tafiti hani? Samanen mihaen to demak ci Yis tada katalawan no ˈorip ningra, maedeng macorohay noka ˈifowa no falocoˈ sakapihaen to demak cingra. Tada timolo ko tamdaw itini i sefi a paliwal mietan to payci, maedeng iraay ko misimaway to fangcalay sefi a tamdaw ato mitatiliday to sinael a tamdaw a midama cangranan ilalikor. Patalahekalen ni Yis ko tatiihay demak no kakeridan no pidoyongan, mihaen cingra a misaˈada cangranan. Soˈlinay ˈifowaay ko falocoˈ ni Yis to fangcalay sefi. ˈIfowaay ko falocoˈ pakayni to matatodongay pihakelongan, maˈaraway no mata konini. Hay, o manan ko ˈifowaay a falocoˈ hananay hani? O ˈifowaay a falocoˈ ato macalohay iraay ko kasasiromaan han?
g95-CH 10/22 31 fiedac 4 fatac
Mapelpel ko Falocoˈ a Masomaden o Sakapatay Han?
Mapelpel ko falocoˈ a masomaden o cecay lalangian to sakapatay ni Yis Kristo sanay ko sowal no tamdaw. Somowal ko Fangcalay Cudad pakayni ci Yisan i, na sanay pairasol ko sowal: ‘Mapelpelay ko falocoˈ a masomaden to nika malokes, cowa ka adah ko adada.’ sanay. (ˈOlic 69:20) Onini a sowal soˈlinay malaˈosi han? Hay alatek, samanen ˈayaw no patay ci Yis pinaay tatokian a mapasemsem ko tireng ato falocoˈ. (Matay 27:46; Luka 22:44; Hipray 5:7) Roma i, mapelpel ko falocoˈ sa i, ngangaˈay a mitadtad, ta patay saho ci Yis, cocoken no sofitay to ˈidoc ko tireng ni Yis hano ira masadak ko ‘remes ato nanom’. Ano matopelak ko falocoˈ anca hoso no remes i, iraay masadak nai falocoˈ ko ‘nanom ato remes.’—Yohani 19:34.
it-1-CH 373 fiedac
Ciwarakay a Talod
Pakayni ci Misiyaan, pairasolay ko Fangcalay Cudad to iraay ko tamdaw ‘mapakaen ko ciwarakay a talod i cingranan,’ sanay. (ˈOlic 69:21) I ˈayaw no tatingen i hecek ci Yis Kristo i, palamlaman no tamdaw to ˈacicimay epah pananom ci Yisan, sapifasawaw to adada ningra, kawra ˈinip han ni Yis i, cowa ka kahi minanom tonini mipaˈelay a epah. Mitilid ko Matay (27:34) tonini sapairasol i, tano kho·leʹ (ke lay) hananay a Krisiya a sowal, tatodong o salang no tilaˈ sanay, itini i Marko 15:23, o “sapayo” hananay, mansa ora minanoman ni Yis a nipacamolan to sapayo a fadisosoˈ a epah, pacamolanho ko salang no tilaˈ.
Odoˈ no Sinael
w99-CH 1/15 18 fiedac 11 fatac
Milayaˈ to Kamay Mitolon to Kawas
11 Micangacangan no ˈalomanay tamdaw i Kawas ko o niyah aca a demak. Kawra, ano soˈlinay maolah kita to Kawas ci Yihofaan i, mamasemer ko falocoˈ, anca miakoˈid ato i kaˈayaw no tamdaw a pakahemek Cingranan. Sanay ci Pawlo a mitilid: ‘Aka cariraw to maamaan, edengan aca pakaynien i satolon ato pingitangit, halo piakoˈid, pasowalen ko Kawas to saali namo. Mihaen i, oya mitaˈlifay to kihcod a harateng a rihaday, papakaynien ci Yis Kristoan, misimaw to falocoˈ ato piharateng namo.’ (Filipi 4:6, 7) Hay hatiraay, cowa pingitangit aca kita, o aakoˈiden ita ci Yihofa to macadaay ita a noˈadingoan ato notirengan a sapalemed. (Taneng 10:22) Sanay moradiw ko mitiliday to ˈOlic: ‘Kamo tatano piakoˈid a mipatoayaˈ to Kawas, patikoen ko Kawas to niketonan a sowal namo.’ (ˈOlic 50:14) Mitiliday ci Tafiti to cecay miˈolicay a satolon, ilalomaˈ iraay ko mahaenay mikifalocoˈay a sowal: ‘Papaˈolicen ako mipahemek ko ngangan no Kawas, miakoˈid a mipatakaraw Cingranan!’ (ˈOlic 69:30) Itini i kaˈayaw no ˈalomanay ato notekedan a pitolon ita, coko mamihaen to demak han?
SAKA 8 FOLAD 5-11 ROMIˈAD
O ODOˈ KO KIMAD NO KAWAS ˈOLIC 70-72
Lengoen ko ˈIcel no Kawas i Teloteloc
w99-CH 9/1 18 fiedac 17 fatac
Kapah Tamdaw, Ka Pahatatanamen ko Taneng Iso a Cipinang!
17 O mamararid kiso a talipaˈelal, hongaˈ maliyas ko satalakal ni Satan; nolatekay, mihaen to demak tada misaaliay to timolo. Nolatekay, cowa ka pilecad kiso to selal a kapot, latek cowa pikihatiya to polong a hekal. Sanay ko pitolon ni Tafiti i ˈOlic: ‘Tapangaw Yihofa, Kiso ko halamhaman no mako; nano kaemangho, Kiso ko mitiˈeran no mako. Kawasaw, nano kaemangho kako, Kiso ko pasifanaˈay takowanan; tahanini, palosiyangay kako to kasapaan a demak Iso.’ (ˈOlic 71:5, 17) Masowalay ko nika timolo ni Tafiti. Ihacowaay mapalahad ko timolo ningra hani? Itiniay i kaemangaho cingra! ˈAyaw no pakalowid ci Koliyatan a malo kafanaˈan no ˈalomanay i, paihkalayto cingra to tadamaanay a timolo, midipotay to siri no wama, mipatay to cecay layong ato tomay. (1 Samuil 17:34-37) O pafelian ni Yihofa a timolo, padamaay ci Tafitian pakalowid to ˈada. Mihaiyay cingra, nano ‘kaemangho’, mitiˈerayto ci Yihofaan cingra. Tona mitiˈeray cingra ci Yihofaan, iraay ko ˈicel a misiˈayaw to maamaan a pasangar ato pades. Ano misarocod kiso a mitiˈer ci Yihofaan i, o papafelien Ningra kiso to timolo ato ˈicel, padama tisowanan ‘pakalowid to hekal.’—1 Yohani 5:4.
g04-CH 10/8 31 fiedac 3 fatac
Sasamaan Kita Padama to Matoˈasay Tamdaw Hani?
Sanay a mitolon ko mitiliday to ˈOlic: ‘Ano matoˈasto kako i, nanay aka falahen kako; ano malonayto kako i, nanay aka liyasen kako.’ (ˈOlic 71:9) O madimadiay to Kawas a tamdaw, soˈlinto maliteng awato ko kapo, cowa ko ‘fafalahen’ no Kawas cangra. Mifalahan no Kawas cingra cowa ka saan ko sowal nora mitiliday to ˈOlic, ao mihaiyay ano matoˈasto i, mamangalef ko pitiˈer to Misangaˈay a Tatapangan sanay. O madimadiay ci Yihofaan a tamdaw, o dadipoten ni Yihofa i hakelong no ˈorip nangra. (ˈOlic 18:25) Anini o papakaynien no Kawas i salikaka, mipadang ato mikowad ko matoˈasay tamdaw.
w14-CH 1/15 23 fiedac 4-5 fatac
Ano Awaho ko “Kapadesan Romiˈad”, Adihayen ko Tayal Saki Yihofa
4 Pinaayto poloˈ ko mihecaan iso, cinalifetayto kiso. Tahanini, saharateratengen hena: “Ngaˈayho ko tireng nohatini, iraayho ko ˈicel, ngangaˈay kako mimaan ko demak hani?” Pinaayto mihecaan mafanaˈ kiso to soˈlinay kimad, maedeng iraay ko kaikakaan iso to kaemangay. Ngaˈayay kiso paladaˈ to kaemangay to mananamay iso, ngaˈayay lomalen ko pina makapahay a nalifetan, patanoktok cangranan. Ci Tafiti na mihaenay a micangacang ci Yihofaan, padama cingranan pasifanaˈ to kaemangay. Sanay cingra: ‘Kawasaw, nano kaemangho kako pasifanaˈanto Iso kako, Kawasaw soˈlinto maˈofadayto kako, nanay aka liyasen kako, ho ngaˈay kako milomal to kaemangay to nika ciˈicel no patelaw Iso, palosiyang to nika tataˈang Iso i polong a tamdaw.’—ˈOlic 71:17, 18.
5 Sasamaan kiso misakadademak to inaneng iso hani? Ngaˈay kiso mipataheka to kaemangay a Krisciyang, patanoktok to pasoˈlinay falocoˈ nangra han? Ngaˈay kiso miata cangranan a mitosil, paˈarawen cangra to hakowaay ko lipahak iso midoko ci Yihofaan han? Sanay ko sowal ni Iliho: ‘Aisaˈayaw pasowal ko malitengay, makakaay ko mihecaan a tamdaw papasifanaˈ to taneng.’ (Yopu 32:7) Tarokos ci Pawlo palimoˈotay to matenesay fafahiyan Krisciyang tano sasowalen ato waywayan a mipakalalok to tamdaw, sanay cingra: ‘O matoˈasay fafahiyan . . . papasifanaˈ to tamdaw to fangcalay a demak.’—Titus 2:3.
Odoˈ no Sinael
it-2-CH 1006 fiedac
Iufratis ˈAlo
Salawacay Sera no Nipafelian no Kawas to Israil a Pala. Matatelekay ko Kawas aci Apraman, ‘naitiniay i ˈalo no Icip tangsa i Iufratis ˈalo’ a sera, o pafelian ko teloteloc ningra. (Satapangan 15:18) Ikor miliyawan no Kawas somowal konini sakiˈok. (Kasadakan 23:31; Limoˈot 1:7, 8; 11:24; Yosuwa; 1:4) 1 Rayray 5:9 sanay ko sowal, ˈayaw no mala hongti ci Tafiti, o romaroma teloc ni Riupin misakakahaday to kamaroˈan, ‘tangasa i kohkohan, mingataay to Iufratis ˈalo.’ Nikawrira, ano ‘pasikawali no Kiliyat’ a romakat (1 Rayray 5:10), maedeng 800 kongli ko rarakaten ngaˈ tangsa i Iufratis ˈalo, mankora o tatodong no sinael i, o Riupin tamdaw micowatan ko kawaliay a sera tayra i salawacan no kohkohan no Siriya alatek, onini kohkohan manayalay tayra i Iufratis ˈalo. Ano nengnengen oya mikiˈokan ni Yihofa ci Tafitian aci Solomonan itiniay i pikowan nangra a malaˈosi maemin, itiya o pala no Israil kitakit macowatayto tayni i Copah no Arami tamdaw, tangasa i Iufratis ˈalo, oyanan mitaˈlifay to kaˈamis no Siriya a ˈalo ko mitoroˈan. (2 Samuil 8:3; 1 Hongti 4:21; 1 Rayray 18:3-8; 2 Rayray 9:26) Awaay ko caay ka fanaˈ to Iufratis ˈalo, marariday o ‘Taˈangayay ˈAlo’ hananay misaˈapoto a mipangangan.—Yosuwa 24:2, 15; ˈOlic 72:8.
SAKA 8 FOLAD 12-18 ROMIˈAD
O ODOˈ KO KIMAD NO KAWAS ˈOLIC 73-74
Masemeran Nanay Kiso Toya Cowa Pidoko to Kawas a Tamdaw Han?
‘Milidongan ni Yihofa ko Matoleday a Tamdaw’
14 O mitiliday to saka 73 fedengan no ˈOlic o Lifi a tamdaw, malikoay cingra matayal i fangcalay sefi ni Yihofa, kawra matoleday cingra to cecay liyad. Misamanay hani? Maˈaraw ningra ko tatiihay tamdaw rihadayay ko kaˈorip. Cowa ka ciharateng cingra malecad cangranan midemak to tatiihay demak, kawra kamayan a masemer cangranan. (ˈOlic 73:2-9, 11-14) Ano nengnengen hato kadofahay ko kaˈorip no tatiihay tamdaw, haratengay sanay midemak, awaay ko cariraw, mansa tada matoleday koniya mitiliday. Sanay cingra: ‘Mitafo kako to makoracay falocoˈ, awaay ko kapo, mikorac kako to kamay, awaay ko epoc.’ O mahaenay harateng ningra wa miconged cingranan a midoko ci Yihofaan.
w20.12 19-20 fiedac 15-16 fatac
‘Milidongan ni Yihofa ko Matoleday a Tamdaw’
15 ˈOsien ko ˈOlic 73:16-19, 22-25. Ikor, ‘Micomoday i fangcalay sefi’ koniya Lifi tamdaw. Itira, sahtoay o midokoay ci Yihofaan a tamdaw ko itihiay ningra, ngaˈayay cingra pasayra ci Yihofaan a mitolon, ngaˈayay rihaday ko falocoˈ a misimsim. Telocto mahapinangay ningra mararaway ko harateng noniyah, mararaway ko mirakatan a lalan, saikor o mamalahdaw ko kalawidang ci Yihofaan. Mahapinangayho ningra itiniay i ‘kohnacay a sera’ tomireng ko tatiihay tamdaw, katalawan ko hateloc. Oniya Lifi tamdaw misaaliay tano harateng ni Yihofa a minengneng to demak, hongaˈ maliyas ko matoleday harateng, ecato ka masemer to tatiihay tamdaw. Mihaento ko demak ningra i, miliyawayto a rihaday lipahak ko falocoˈ. Sanay cingra pasowal ci Yihofaan: ‘Edengan Kiso, awaayto ko maanan kasemeran ako.’
16 Mananamay ita ko maanan? Soˈlin kadofah ko kaˈorip no tatiihay tamdaw, cowa ko mamasemer kita cangranan, samanen ora lipahak nangra ono potal aca, cowa ka halafin, awaay ko hano ikor nangra. (Patnakay 8:12, 13) Ano masemer cangranan o saka toled ita, mamalahdawho ko kalawidang to Kawas. Ano mahapinang ita iraay ko malecaday noniya Lifi ko harateng noniyah, palecaden cingra midoedo to sidaˈitay a limoˈot no Kawas, hanaca micawmaˈ to midokoay to Kawas a tamdaw. Ono kalipahak ita ano pakayniay kaira ni Yihofa, o lipahak ita o soˈliˈlinay a lipahak. Mihaen o mamaterek kita i matatodongay a lalan, milifok to ‘soˈliˈlinay a ˈorip.’—1 Timoti 6:19.
w14-CH 4/15 4 fiedac 5 fatac
Todongen ko Pakasoˈlinay Falocoˈ ni Mosi
5 Sasamaan kiso micoˈay to ‘ˈapotoay hemek no raraw’ hani? Aka mapawan, ano mararaw ko tamdaw, ˈapotoay aca ko malifokay a hemek. Pakasoˈlinen ko falocoˈ a minengneng, pakahapinang to ‘manornorto a malasawad ko hekal ato itiniay i hekal a kangalayan no tamdaw a maemin.’ (1 Yohani 2:15-17) Songilaˈen ita a miharateng, iraay ko masamaanay teloc no mararaway caay ka pasasiyor a tamdaw, soˈlinay i, tomirengay cangra i kohenacay a sera, saikor mamapatay a matekop. (ˈOlic 73:18, 19) Ano makayhid i, licayen ko niyah: “Ano makayhid kako a mararawto i, aira ko masamaanay a teloc han? Maolahay kako to matiniay a teloc han?”
w13-CH 2/15 25-26 fiedac 3-5 fatac
Remoen ko Saconged, Milifok to Sapaˈdil no Kawas
3 Oya mitiliday to ˈOlic a tamdaw paihkalay to nika pakasoˈlin no niyah to kakitingen ni Yihofa a midama cingranan, hanaca pacomoden i ˈdil Ningra. (ˈOsien ko ˈOlic 73:23, 24.) Sasamaanen ni Yihofa pacomod ko tamdaw i ˈdil Ningra hani? Papafelien Ningra ko misapoeneray a sikawdan Ningra to adihayay a fadangalan, tinakoen pahapinangen Ningra cangra to araaw Ningra. (1 Korinto 2:7) Roma i, ano mitengil ko tamdaw to sowal Ningra i, iraay ko fadangalan a malawidang Ningra.—Yakop 4:8.
4 Minilnilan ni Yihofa ko sikawdan to karetengay a ˈinorong, patoroden cangra to kalimlaan a mitosilay tayal. (2 Korinto 4:1, 7) O mitosilay tayal pairaay ko ˈdil no tamdaw. Pakayni to mitosilay demak pakahemek to Kawas, palemed to tao, o mamalifok ko mikiˈokan no Kawas. Sanay ko sowal ni Yihofa: ‘O mikangodoay Takowanan i, o kakangodoen no Mako cingra.’ (1 Samuil 2:30) Misaˈicelay a mitosil a tamdaw mamilifok to sapafeli no Kawas a makapahay a ngangan, hanaca o mamilifok to sapahemek no romaroma a sikawdan no Kawas.—Taneng 11:16; 22:1.
5 O tamdaw ano ‘mitapal ci Yihofaan, midofdof to kimad Ningra’ i, aira ko masamaanay noikoran hani? Sanay mikiˈok ko Fangcalay Cudad: ‘Ta pafelien Ningra [ci Yihofa] kamo to mamirocek tora sera, o mamaˈaraw haca ko tatiihay tamdaw a malaplap.’ (ˈOlic 37:34) Sikawdan no Kawas halamhamay a hinatala to sapilayapaw to midaˈocay a ˈorip, rihaked a milifok to tadamaanay a ˈdil.—ˈOlic 37:29.
Odoˈ no Sinael
it-1-CH 566 fiedac
Kangic no Riyar, Lifiyatan
Ta mitilid ko ˈOlic saka 74 fedengan to nipilidong no Kawas to finawlan Ningra i, itini isaka 13 ato 14 a sinael i, tano sapatinako a sowal, ˈaˈadopen no riyar [Hipray, than·ni·nimʹ (cecayay), anca tan·nin (adihayay)] ato kangic no riyar (Lifiyatan), paihkal to samaanay Cingra milidong to Israil tamdaw masadak nai Icip. Itini tonini sinael ‘mipelpelan ko fongoh no kangic no riyar’ sanay, mitoroˈan i, tiya milidong ci Yihofa to Israil mipadikan ci Falaw, mitekopay to sofitay ningra. Itini Aram a sowal a Hipray Sowal Fangcalay Cudad [Targums, ta·ku·mu (Amis)], o ‘fongoh no kangic no riyar’ hananay a sowal, mahongyakay to “sofitay ni Falaw” (Icikil 29:3-5: “Matiya o manafoyay i ˈalo a tataˈangay a wani” ci Falaw; nengnengen ko Icikil 32:2.) Itini Hipray sowal a Isaya 27:1 tano “Lifiyatan” mipatinako to miˈimeran noya “tataˈangay a kangic” ato “katelangay a ˈoner” a ciˈicelay a lekakawa no hekal. (Paˈarawan 12:9) Onini sapairasol ni Isaya milingatay to nika patikol no Israil, mansa onini ‘tatekopen’ ni Yihofa a kangic no riyar, mahawpay ko Papilon. Roma i, somowalay ko Isaya to Asiriya ato Icip (Isaya 27:12, 13). Mahapinangay ita, oya nisowalan no Paˈarawan a “tataˈangay a kangic (Lifayatan)” misafelitay ci Yihofaan ato midokoay i Cingranan a tamdaw, mitoroˈay to cecay lekakawa no hekal anca cecay ciˈicelay a kitakit no hekal.
SAKA 8 FOLAD 19-25 ROMIˈAD
O ODOˈ KO KIMAD NO KAWAS ˈOLIC 75-77
Hano Caka Ngaˈay Pasengi to Niyah?
Mahapinangay ko Kasasiroma no Midokoay to Kawas ato Cowa Pidoko to Kawas a Tamdaw
4 Salakat somowalay ci Pawlo toya misatekeday maolah to niyahan ato maolahay to payso a tamdaw, o mahaenay tamdaw patalahkalay to pasenengay, misatakaraway ko falocoˈ, malitaˈangay. Saka mahaen a tatiih ko pinangan nangra, samanen o inanengay, makapahay, cihafayay, ˈakawangay ko saaroˈan no niyah sanay cangra. Nanay kaolahen ato taˈongen no tao kako sanay ko ngalay no falocoˈ nangra. O cecay matanengay tamdaw somowal to hatiraay pakinaliay ko nika malitaˈang a tamdaw, sanay: “Ilalomaˈ no falocoˈ nangra, iraay ko mimingay patafangan a mitaˈong cangra to niyahan.” O sowal no roma a tamdaw, o mahaenay malitaˈangay tada o kaˈesangan no tao, ano o romaromato a malitaˈangay a tamdaw mapiliˈay cangranan sanay.
5 Tada kapiliˈan ni Yihofa ko malitaˈangay a pinangan. ˈIntehay Cingra to ‘misatakaraway minengneng’ a tamdaw. (Taneng 6:16, 17) Malitaˈangay tamdaw awaay ko pakayraan a miingid to Kawas. (ˈOlic 10:4) Ci Akoma paihkalay to malitaˈangay a pinangan. (1 Timoti 3:6) Ka adayayan i, ano o madimadiay sikawdan ni Yihofa, madengaay no matiniay tatiihay a pinangan. Hongti no Yutaya ci Uciya, pinaay miheca madimadi a midoko to Kawas, kawra, miˈoningay ko Fangcalay Cudad: ‘Macakat a ciˈicel ci Uciya saka malataˈang cingra, onini ko sakatefad ningra. Ciraraw cingra i Kawas ci Yihofa, patedo sa cingra a micomod i Pitaˈongan a paexiw i pipaexiwan.’ Ikor, ya madimadiay a Hicikiyaan matalakalay no malitaˈangay a pinangan, paihkal to misatakaraway.—2 Rayray 26:16; 32:25, 26.
w06-CH 7/15 11 fiedac 3 fatac
Kalimlaan no Saka 3 ato Saka 4 Rayray no ˈOlic
75:4, 5, 10—O manan ko tatodong no “waˈa” hananay hani? O waˈa no ˈaˈadopen tada ciˈicelay a sapiˈodot a lalosidan. Mankora tatodong no “waˈa” mitoroˈay to fadangalan anca ˈicel. Misaˈakawangan ni Yihofa ko waˈa no finawlan Ningra, kawra ‘miketonan ko polong waˈa no mariˈangay tamdaw.’ O Fangcalay Cudad mirikecay kitaanan ‘aka misatakaraw to niyahan,’ aka malitaˈang, samanen o ci Yihofa ko misaˈakawangay kitanan, o sapanilnil Ningra ko tayal ato ˈinorong ita i kasakopang han a minengneng.—ˈOlic 75:7.
Odoˈ no Sinael
w06-CH 7/15 11 fiedac 4 fatac
Kalimlaan no Saka 3 ato Saka 4 ˈOlic Cudad
76:10—‘O ngolaw no tamdaw’ misamaanay mifelih a mipakahemek ci Yihofaan hani? O tao ano pakayniay to o sikawdan no Kawas kita a miˈodis kitanan, ano pasalatan no Kawas konini demak i, iraay ko ciepocay a minaroˈan. Ano o mananto ko malifaay ita, o mamapahatatanam kitanan itini i maanan a demak. Pakihateren ni Yihofa misemsem kita o sapahatatanamaw kitanan, ora macadaay a roray o cecay aca a liyad. (1 Pitiro 5:10) Ano mapatay kita i pisemseman i, o papahemek ci Yihofaan konini, samanen maˈaraw no tao kita misemsem madimadiho ato miemem tahatolas i, latek o papaˈodingar to Kawas cangra.
SAKA 8 FOLAD 26–9 FOLAD 1 ROMIˈAD
O ODOˈ KO KIMAD NO KAWAS ˈOLIC 78
Cowa ka Madimadi a Israil, Oha Taˈarawan no Mita
w96-CH 12/1 29-30 fiedac
Hano ‘Tikoren a Miharateng ko Itiyaayho a Romiˈad’ Hani?
Ka adayayan i, marariday matawal no Israil ko sidaˈit ni Yihofa. Samaanayto ko teloc aki? ‘Kina pinapinaay cangra mipalifet to Kawas, paketer to Kawas no Israil. Caay ka pitikol a miharateng to ˈicel Ningra ato nipilidong cangranan a miliyas to ˈada.’ (ˈOlic 78:41, 42) Tona misilikoran nangra ko sapalimoˈot ni Yihofa, salikor misafayaˈan no Kawas cangra a mifalah.—Matay 21:42, 43.
ˈArawhan patirengay to ngaˈayay taˈarawan ko mitiliday to ˈOlic a tamdaw. Sanay a mitilid cingra: ‘O sasowalen ako ko nano demak ni Yihofa; o haharatengen ako ko kasapaan demak Iso ino litenganho. Haharatengen ako ko tayal no Miso.’ (ˈOlic 77:11, 12) Ano tikolen ita a miharateng samaanay ko nika madimadi ita a midoko to Kawas, halo misimsim to sidaˈitay a waywayan ni Yihofa i, o mamalifok ko sakowad kitanan, mamasadak ko miakoˈiday a falocoˈ. Roma sa i, ‘mitikol a miharateng to itiyaayho a romiˈad’ i, o mamalahdaw ko nika lotay i noˈadingoan, mikowad kitanan a mikiemel, madimadi a kodaˈit.
w06-CH 7/15 17 fiedac 16 fatac
‘Aka Ngaliwngiw’
16 Ano ngaliwngiw kita i, edengan ono niyah aca pasangar ko miharatengan, mapawanayto maemin ko malifokay ita a sapalemed malo Misawacayay Tamdaw ni Yihofa. Ano sapiˈimeraw kita to halingaliwngiway a pinangan i, haratengen ita to maanan ko malifokay ita nohatini a sapalemed i noˈadingoan, tinakoen: O ngangan no mita ‘Misawacayay Tamdaw ni Yihofa’ mahawpay ‘ci Yihofa’ onini tadamaanay a ngangan, tada o kalikoan ita konini! (Isaya 43:10) Roma sa i, iraay ko makedecay a kalalaˈed ita aci Yihofa, ano hacowato ngangaˈay pasayni tonini ‘mitengilay to satolon a Tatapangan’ a micangacang. (ˈOlic 65:2; Yakop 4:8) Cipinangay kita to lacongis pakayni i saˈakawangay a fadangalan noka pikowan, mafanaˈay ano madimadi to Kawas taˈangayay ko sakaˈodingar, ano paifalocoˈen konini iraayto ko soˈlinay epoc itini i nokaˈorip ita. (Taneng 27:11) Roma i, ngaˈayay mararid kita mitenak to ngaˈayay lihaf no Hongti Kitakit. (Matay 24:14) O roma sa i, pakasoˈlin kita to sapatefoc ni Yis Kristo, mamalifok ko tingalaway falocoˈ i kaˈayaw no Kawas. (Yohani 3:16) Ano tahalifato to maanan a sapalifet, o mamalifokho ko matiniay a sapalemed.
w11-CH 7/1 10 fiedac 3-4 fatac
Ci Yihofa o Iraay ko Nafalocoˈan a Kawas Han?
Sanay ko sowal no mitiliday to ˈOlic a tamdaw: ‘Itini i kohkohan kina pinapinaay a micoli cangra Cingraan.’ (saka 40 sinael) Ilaenoay a sinael sanay ko sowal: ‘Kina pinapinaay cangra mipalifet Takowanan.’ (saka 41 sinael) Itini tonini ˈOlic, somowalay to samaanay ko Israil misaliyaliyaw a mitowakang to Kawas. Malidong cangra nai Icip halo micomod i kohkohan i, caho ka halafin, patalahekalayto cangra to micoliay a pakayraan. Misatapang ngaliwngiw to Kawas, cisasa to Kawas ira ko ˈicel midimokos cangranan ato mamakahi mihaen to demak Cingra hokira. (Saˈosi 14:1-4) O cecay sakayat no sapihongyak a cudad somowalay, ‘mitowakang cangra’ sanay a sowal ngaˈayay hongyaken to ‘ˈatekakay ko falocoˈ nangra, misafelit to Kawas’ anoca ‘cowa ka hatira saan a pasowal to Kawas!’ ˈArawhan ano pasasiyor ko Israil i, sidaˈitan ni Yihofa cangra a misodod. Kawra mataˈlifto ko cecay liyad, miliyaw haca cangra a mitowakang to Kawas. Saliyaliyaw sanay a mahaen ko demak nangra.—ˈOlic 78:10-19, 38.
Safalifalic sanay ko falocoˈ no Israil tamdaw. Ano mitowakang cangra i, samaanay ko harateng ni Yihofa hani? Sanay ko sowal no saka 40 a sinael, o Israil tamdaw “pasomaday to falocoˈ’’ no Kawas sanay, o roma a mihongyakan, “pararomay to falocoˈ Ningra” sanay. O cecay taˈarawan to pitadtad to Fangcalay Cudad sanay ko sowal: “O tatodong nora sowal itini, pakayni to waywayan no Hipray tamdaw mararomay ko falocoˈ no Kawas, malecaday to waywayan no maliyangay a wawa” sanay. Mahaenay mipasomad ko maliyangay wawa to wama wina, ora mitowakangay a Israil tamdaw ‘pasomaday to falocoˈ no Kawas.’ (saka 41 sinael)
Odoˈ no Sinael
it-1-CH 1053 fiedac 5 fatac
Mana
‘O kakaenen matefaday nai kakarayan’ (ˈOlic 78:24; 105:40), ‘kakaenen no coyoh (roma pihongyak)’ han ko sowal no ˈOlic. (ˈOlic 78:25) “O kiemelay ciˈicelay a coyoh” (ˈOlic 103:20), sanay ko sowal no Fangcalay Cudad, mansa o “ciˈicelay” mitoroˈan ko coyoh. Mihaenay, komaenay cangra to mana han, cowa ka saan. O tatodong noniya sinael, paihkalay tona misakadademakan ni Yihofa ko coyoh, pafeli to Israil tora mana. (Nengnengen ko Kalatiya 3:19.) Tona itiniay i kakarayan ko coyoh, mansa ‘o kakaenen no coyoh’ han ko sowal, patalahkalay to o naitiraay i kakarayan a matefad kora mana.