SAKA 10 FEDENGAN

Safalifalicen ko Ngihaˈ

Taneng 8:4, 7

KALIMLAAN: Safalifalicen ko kataˈangay anca ˈakawang no ngihaˈ, ato cikay no sowal, ho ihkal a mahapinang ko sasowalen iso, mitemer to falocoˈ no mitengilay.

HAPAKAYRAAN:

Taˈangayen mimingen ko ngihaˈ. Misataˈangay to ngihaˈ paihkal to kalimlaan, mikowad to mitengilay. Miˈosi to sasawkit taˈangayen ko ngihaˈ. Misamiming to ngihaˈ i, hinatalaay ko tamdaw, patalahkal to kokiˈ ato rawraw no falocoˈ.

Hamaan mararid a misataˈangay to ngihaˈ, mihaen hato mamirikec to mitengilay. Hamaan pakinali a misafalifalic to ngihaˈ, to sakaecaaw ka pisamacay no mitengilay i tireng iso.
Saˈakawangen samadahen ko ngihaˈ. Misaˈakawang to ngihaˈ anca minayat to sowal i, paihkalay to fanekfekay, taˈangayay mimingay anca maraayay ingataay. Ano samadahen ko ngihaˈ i, paihkalay to masomaday ato cariraway a harateng.
Kalikien naˈonen ko cikay no sowal. Ano paihkal to hemek no falocoˈ i, ngaˈayay pacikayen ko sowal. Ano milengo to kalimlaan i, ngaˈayay naˈonen ko hasowal.

Aka fahal sa misakaliki to sowal, wa macekok ko mitengilay. Ano sahacikay han a kaliki ko sowal i, caayto ka longilaˈ a tengilen.