Pinengnengan to Lalakaw no Mitosilay ato Nikaˈorip Rayray no Saˈopo
SAKA 9 FOLAD 2-8 ROMIˈAD
O ODOˈ KO KIMAD NO KAWAS
ˈOLIC 79-81
Sasamaan ko Pidemak Ngaˈ o Maolahay to Fangcalay Ngangan ni Yihofa?
w17.02-CH 9 fiedac 5 fatac
Sapatefoc—O ‘Malefotay a Sapalifon’ no Kakarayan a Wama
5 Sasamaan kita patalahkal to maolahay ko niyah to ngangan ni Yihofa hani? Doedoen ko saali ni Yihofa, makorac ko kihcod a waywayan. (ˈOsien ko 1 Pitiro 1:15, 16.) Edengan ci Yihofa ko dadokoen ita misarocod midofdof Cingranan. Soˈlin tahacada kita to hakokay, mamisaˈicel midoedo to moecelay palinian no Kawas maˈorip. O waywayan ita mitodong to moecelay palinian no Kawas, o papaˈdil to ngangan ni Yihofa. (Matay 5:14-16) Midoedo kita to limoˈot no Kawas malo makoracay a tamdaw, o patalahkalay to mihaiyay ko niyah to patirengan ni Yihofa a palinian o sakaciepoc no tamdaw, wa ngaˈayho misawacay to pacefaay ko sakokot ni Satan. Soˈliˈlin mararaway kita maemin, nikawrira mamikifalocoˈ kita a pasasiyor, ecato ka pidemak to pakangodoay ci Yihofaan a demak.—ˈOlic 79:9.
ijwbv-CH saka 3 fedengan 4-5 fatac
Loma 10:13—‘Micangacang to Ngangan no Tatapangan’
Itini Fangcalay Cudad, o tatodong no ‘micangacangay to fangcalay ngangan ni Yihofa’ hananay i, cowa ko mamafanaˈ aca to ngangan no Kawas, itini pidoko i, sakadademaken konini a ngangan, mitadiˈecho to Kawas ci Yihofaan, mikilim to sapadama Ningra.—ˈOlic 20:7; 99:6; 116:12-14.
Tada misaaretengay ci Yis Kristo to ngangan no Kawas. Itini taˈarawan a satolon ningra, sanay ko sowal, ‘i kakarayan a Wama niyam, nanay pala fangcalen ko ngangan Iso,’ sanayho mihongyak, ‘kangodoen pala fangcal.’ (Matay 6:9 ato roma pihongyak.) Paihkalayho ci Yis, ano sapilifokaw kita to midaˈocay a ˈorip o mamafanaˈ a maolah ci Yihofaan a Kawas, hanaca midofdof to sowal Ningra.—Yohani 17:3, 6, 26.
Odoˈ no Sinael
it-2-CH 1080 fiedac
Yosif
Materek ko Ngangan i Likisi. Tona mikiriwiˈay ko saaroˈan ni Yosif i ˈalomanay wawa ni Yakop, o ngangan ningra matatodongay mitaypiyaw to polong a ngasaw no Israil. (ˈOlic 80:1) Anca mitaypiyaw toya kaˈamisay moetepay a ngangasaw no Israil. (ˈOlic 78:67; Amos 5:6, 15; 6:6) O ngangan ningra pasadakay itini i sapairasol no Fangcalay Cudad. Itini mapolosi ni Icikil, tosaay ko mililaman ni Yosif a pala (Icikil 47:13), oya panganganan to ‘Kaitiraan ni Yihofa a Niyaroˈ,’ iraay ko cecay fawahan panganganan to ngangan ni Yosif (Icikil 48:32, 35), pakayni to mamiliyaw a malacecay ko finawlan ni Yihofa, somowalay ko sapairasol, o mikayatan ni Yosif a finacadan ato mikayatan ni Yuta a finacadan o mamala cecay. (Icikil 37:15-26) Paihkalay ko sapairasol ni Opatiya, o ‘lalomaˈan ni Yosif’ mamirienang to pipalaˈafo to ‘lalomaˈan ni Isaw.’ (Opatiya 18) Sowal no sapairasol ni Cikariya, o lalidongen ni Yihofa ko ‘lalomaˈan ni Yosif.’ (Cikariya 10:6) Itini noˈadingoan a ngasaw no Israil, o ngasaw ni Yosif mamikotay to ngasaw ni Ifraim.—Paˈarawan 7:8.
Itini Paˈarawan 7:8 masilsilay ko ngangan ni ‘Yosif,’ paihkalay konini toya ˈayaw no patay ni Yakop a sapairasol matatodongay i noˈadingoan a Israil. Mankora, sasinanoten ita, o Ciˈicelay ci Yihofa a Kawas ni Yakop, patirengay ci Yis Kristoan malo Fangcalay Pakaenay to Siri, mikinafalah to ˈorip cingra to saki ‘lopayˈay a siri.’ (Yohani 10:11-16) Ci Yis Kristo i, o taˈeneran no lomaˈ, patirengan itini tonini ˈongcoy ko fangcalay sefi, oyanan noˈadingoan a Israil ko palaˈosiay tonini. (Ifiso 2:20-22; 1 Pitiro 2:4-6) Onini Pakaenay to Siri ato ˈOngcoy mikalacafayay to Tada Ciˈicelay a Kawas.—Yohani 1:1-3; Dmak 7:56; Hipray 10:12; nengnengen ko Satapangan 49:24, 25.
SAKA 9 FOLAD 9-15 ROMIˈAD
O ODOˈ KO KIMAD NO KAWAS | ˈOLIC 82-84
Salimlaen ko Tayal no Miso
wp16.6-CH 8 fiedac 2-3 fatac
Pasayra i ˈAyam Minanam to Sapasifanaˈ
To mihecahecaan adihayay ko papaˈongay ˈayam maeferay tayra i Yirusalim, mihaenay mafanaˈay ko itiraay a tamdaw camiraan. O papaˈongay marariday itini i wisawisan a misadipong, o romaroma maeferay tayra i fangcalay sefi padipong. Rihakeday i lalomaˈ no fangcalay sefi sanay ko papaˈongay ˈayam, cowa ko mamakalisanga a padifo to ciwciw no papaˈongay.
O mitiliday to ˈOlic 84 fedengan masinanotay ningra ko padipongan no papaˈongay i fangcalay sefi. Onini a mitiliday maedeng o teloteloc ni Kola, 6 a folad kinacecay aca a lipay matayal i sefi. Makalimay cingra malecad to papaˈongay ˈayam, padotoc itini i lomaˈ ni Yihofa a maroˈ! Cedaˈah sanay cingra pasowal: ‘O Tapang no sofitay ci Yihofaaw, o fangcalay a pakopangan Iso tada kasemeranto! Makalimay kako to potal no sefi ni Yihofa, malotayay ko falocoˈ, o falocoˈ ato tireng ako, pasayraay Midaˈocay Maˈorip a Kawas milekal a romadiw. O Tapang no sofitay ci Yihofaaw, Hongti ako, o Kawas ako, itini ngata no fangcalay patoˈayaan, mahelaayto no ˈayam ko kitiraan, mahelaay no papaˈongay ko padifoan to ciwciw.’ (ˈOlic 84:1-3) Malecaday, ano kitato ato kaemangay wawa mamisaareteng to kasakopang no Kawas, makalim sapiceridaw malisopsop to finawlan no Kawas han?—ˈOlic 26:8, 12.
w08 7/15-CH 30 fiedac 3-4 fatac
Midemak to Madangaray no Niyah a Demak
O katayal ita ci Yihofaan, latek pakayniay noka toˈas anca kalonay no tireng a citolas. Ano o wama wina kiso i, itini pidimokos to mimingay wawa adihayay ko mapalakay a toki ato ˈicel wa saan kiso a miharateng alatek, itini notekedan a picekiw ato saˈopo no Krisciyang cowa ka hakowa ko macadaay a epoc. Nikawrira, pakayniay kiso to noka samacay sa to iˈayaway a cowa ko mamadangar a demak, hato malawaayto ko maanan a demak, ˈarawhan oha ngangaˈay a madangar iso hokira?
ˈAyaw no pina patek mihecaan, o cecay Lifi a tamdaw paihkalay to iraay ko kalim ningra, kawra onini a kalim cowa ko mamalaˈosi. Onini a Lifi a tamdaw iraay ko fadangalan, ngaˈayay to mihecahecaan itini fangcalay sefi matayal to tosa lipay. ˈArawhan, mangalayay cingra tahadaˈoc materek i ngata no pipatoˈayaan. O mahaenay a kalim ningra papakahemeken, kawra cowa ko mamadangar koni. (ˈOlic 84:1-3) Ikor onini a madimadiay faˈinayan samaanay a minanam to marenecay falocoˈ hani? Cipinangay cingra itini papotal no fangcalay sefi ano cecayto a romiˈad i, o sakalipahak saanto cingra. (ˈOlic 84:4, 5, 10) Malecaday, kita i, aka ka samacay sa to cowa ko mamadangar no niyah a demak, haratengen ko malahciayto a demak, pakayni tonini paihkal to miakoˈiday a falocoˈ.
Tada Misaaretengay ci Yihofa Tisowanan!
12 Ano misemsemay kiso to adada i, ngaˈay rihadayen ko falocoˈ, cipinangay ci Yihofa to roray iso. Cangacangen Cingra padama tisowanan matatodong ko pinengneng to pakayraan no niyah, itini Fangcalay Cudad mikilim to sahinom ni Yihofa a sowal. O roma sinael paihkalay to misaaretengay ci Yihofa minengneng to finawlan Ningra, kiriwiˈen a misinanot koniya sinael. Mihaenay, wa mahapinang iso ngaˈayay ko picada ni Yihofa to polong madimadiay midoko Cingranan a tamdaw.—ˈOlic 84:11.
Odoˈ no Sinael
it-1-CH 502 fiedac
Pakoyoc a Wawa
Tona madoloay a malawa ko pakoyoc maponengay fafahiyan ato romaroma awaay ko pitiˈeran a tamdaw, o sowal ni Yihofa, o pakoyoc a wawa ano ngangaˈay ha cowa ha paihkalay to hakowaay ko nika moecel ato hakowaay ko nika tatiih no demak no Israil. Ano ngaˈay ko noˈadingoan no Israil i, mamadimokos ko pakoyoc a wawa, nikawrira ano matenak ko cowa ka sadafdaf cowa ka moecel a demak i, o pakoyoc a wawa caayto ka sikor, o tahapinangan to mapelalayto konini kitakit. (ˈOlic 82:3; 94:6; Isaya 1:17, 23; Yirimiya 7:5-7; 22:3; Icikil 22:7; Cikariya 7:9-11; Malaki 3:5) O mipaekelay to pakoyoc wawa a tamdaw, o mamaˈekak ni Yihofa. (Limoˈot 27:19; Isaya 10:1, 2) O Milidongay a Tatapangan to pakoyoc a wawa ko Niyah sanay ci Yihofa (Taneng 23:10, 11), o Padamaay (ˈOlic 10:14), ato Wama (ˈOlic 68:5), papatado Cingra to pakoyoc a wawa misapay to demak (Limoˈot 10:17, 18), sidaˈiten cangra (Hosiya 14:3), misaysay to pasangar nangra (ˈOlic 146:9), paˈoripay cangranan.—Yirimiya 49:11.
O cecay tahapinangan no soˈlinay Kristokiyo i, ciharatengay to mapatayay ko raramod anca wama wina a tamdaw. Nisawawaan ci Yakop patikamiay to Krisciyang: ‘Itini pinengneng no Wama a Kawas ita i, o makoracay awaay ko kadit a pidoyongan, oyanan midimokosay to mapadesay a pakoyoc wawa ato maponengay, hanaca caay ka mapakadit no hekal.’—Yakop 1:27.
SAKA 9 FOLAD 16-22 ROMIˈAD
O ODOˈ KO KIMAD NO KAWAS | ˈOLIC 85-87
O Satolon Papadama Kitaanan Mihadidi to Pasangar
w12 5/15-CH 25 fiedac 10 fatac
Patalahkalay Kiso to ˈDil ni Yihofa Han?
10 Ka patalahkal to ˈdil no Kawas, mamikodait a mitolon. (Loma 12:12) Cangacangen ita ko sapadama ni Yihofa, ngaˈ tano kahemekan Ningra a pakayraan mihodop Cingranan. To sapakadangaraw tonini, ngaˈayay saalien ita ko Kawas to fangcalay saocor, paˈicel to pakasoˈlinay falocoˈ no mita, pafeli kitaanan to ˈicel micoˈay to sakayhid, ho ngaˈay kita ‘tano matatodongay a misaka dademak to soˈlinay kimad.’ (2 Timoti 2:15; Matay 6:13; Luka 11:13; 17:5) Malecad o wawa mitiˈeray to wama no niyah, o mamitiˈer kita to i kakarayanay a Wama ci Yihofaan. Cangacangen ita ko sapadama no kakarayan Wama, ano pakayniay i sangaˈayay a mihodop Cingranan, o papakasoˈlinen to papacaˈofen Ningra. Pasayra i kakarayan Wama mitolon malifoten Cingra, aka ka saan miharateng. O aitini kita i satolon a pakahemek ci Yihofaan, miakoˈid Cingranan, halo micangacang to sakayat Ningra, mangalefay ano misiˈayaw to sapalifet i, o mamicangacang kita to sapadama no Kawas, o midemakan ita a kihcod ngangaˈay paˈodingar to fangcalay ngangan Ningra.—ˈOlic 86:12; Yakop 1:5-7.
Samaanay ci Yihofa Pacaˈof to Satolon Ita
17 ˈOsien ko ˈOlic 86:6, 7. Pakasoˈlinay ko mitiliday to ˈOlic a Tafitian, cowa ko pitengil aca ni Yihofa to satolon ningra, o papacaˈofho Cingra. Ano kisoto ngaˈayay ira ko mahaenay a pakasoˈlinay falocoˈ. Malengoay nonini a lalakaw a tinakoan paihkalay, papafeli ci Yihofa to taneng kitaanan, pafeliho to ˈicel kitaanan padadotoc a miemem. Misaka dademakayho Cingra to salikaka, ato cowaho ka pidoko Cingranan a tamdaw, padama kitaanan.
18 Cowa ko mamitoor ci Yihofa to halamhaman ita a pakayraan pacaˈof to satolon no mita alatek, kawra mafanaˈay kita, o papacaˈof Cingra, hanaca itini pisaalian ita a tatokian mihadak to sapadama. Mihaenay haw i, ka padadotoc paira to pakasoˈlinay falocoˈ a mitolon, pakasoˈlin to mamidimokos ci Yihofa tisowanan, hanaca itini faelohay hekal noikor mamirenec to kalim no polong a tamdaw.—ˈOlic 145:16.
Odoˈ no Sinael
it-2-CH 603 fiedac 8 fatac
Falocoˈ
‘Mihaemin ko falocoˈ’ mihodop to Kawas. Ngaˈay a tatemik ko tadafalocoˈ no tamdaw wa mangaˈay ko kadademak, kawra ikemoday a falocoˈ ngaˈayay caka marocek, caka masahci. Sanay ci Tafiti a mitolon to Kawas: ‘Nanay pafelien Iso kako to cecayay falocoˈ cecayay harateng mikangodo to ngangan Iso.’ Paihkalay konini o kaolahan ato kangodoan no kemod no falocoˈ no tamdaw cowa ka cecay aca. (ˈOlic 86:11) O mahaenay a tamdaw ‘misatosaay ko falocoˈ,’ pakayni pidoko to Kawas cowa ka lietec cowa ka faedet. (ˈOlic 119:113; Paˈarawan 3:16) Alatek o tamdaw ira ko ‘tosaay a falocoˈ,’ mihatosa mihodop to tosa a tapang, anoca o falocoˈ ato ngoyos cowa ka lacecay. (1Rayray 12:33; ˈOlic 12:2) Misaˈicelay ci Yis mirikec to mahaenay tosaay ko falocoˈ tosaay ko harateng a mangahay a waywayan.—Matay 15:7, 8.
SAKA 9 FOLAD 23-29 ROMIˈAD
O ODOˈ KO KIMAD NO KAWAS | ˈOLIC 88-89
O Sangaˈayay ko Pikowan ni Yihofa
Dopoen ko Satadamaanay Noka Pikowan ni Yihofa!
5 Iraay ko masahciay a fadangalan ni Yihofa mikowan, o pakayraan no pikowan Ningra masarocoday a masadafdaf. Sanay Cingra: “[Ci Yihofa Kako], o midaˈocay ko olah Ako. O caay pisakakinih, o moecelay ko demak Ako. O matiniay a demak ko kaolahan Ako.” (Yirimiya 9:24) Caay pitoor ci Yihofa to misangaˈan no tamdaw a rikec, misawkit to o manan ko masadafdafay, manan ko moecelay. Masahciay ko nika sadafdaf ni Yihofa, moecelay ko palinian Ningra, misalalangiay toni palinian a pafeli to rikec i tamdaw. Somowalay ko Fangcalay Cudad to “o moecelay ato marayasay a demak ko paranaan no Kitakit” Ningra, mansa pakasoˈlinen ita o sarikec, palinian ato sasawkit no Kawas sahtoay o moecelay. (ˈOlic 89:14; 119:128) Mipakokot ci Satan to cowa ka ngaˈay ko pikowan no Kawas, ˈarawhan o cingra ko cowa ko papaira to masadafdafay moecelay toni hekal.
Dopoen ko Satadamaanay Noka Pikowan ni Yihofa!
10 O pikowan ni Yihofa caka mariˈang caka ˈatekak, pafeliay to pasalat ato hahemek no tamdaw. (2 Korinto 3:17) Sanay ci Tafiti: “Mataliyok no ˈdil ato kasenengan [ko Kawas]. Matomes no ˈicel ato lipahak ko Pitaˈongan a Lomaˈ Ningra.” (1 Rayray 16:7, 27) Ci Itan ya mitiliday to ˈOlic mihaen ko sowal: “Tada malemeday ko paˈolicay a romadiw a mitaˈong i Tisowanan a tamdaw. O mapatediay no siniˈada Iso ko ˈorip nangra. O nano Miso ko sakasaromiˈad sa cangra a lipahak, mipahemek cangra a romadiw to nika ngaˈay Iso.”—ˈOlic 89:15, 16.
11 Rariden misimsim ko nika ngaˈay ni Yihofa, ho pasoˈlin to o sangaˈayay ko kapikowan Ningra. Wa malecad ko harateng ita to mitiliday to ˈOlic: “O nika maroˈ i lomaˈ Iso to cecay a romiˈad ko ngaˈay to nika maroˈ i roma a kamaroˈan to cecay a patek a romiˈad.” (ˈOlic 84:10) Wa icowaho mitama kiso to mahaenay mikowanay saw? Ci Yihofa o sidaˈitay a misangaˈay, mafanaˈay to manan ko sakahemek ita, mirenec to saali ita. Ano o mananto ko saali ni Yihofa, sahtoay o sakangaˈay ita. Midofdof ci Yihofaan soˈlin mamikinafalah to maanan, saikor o mamalifok ko taˈangayay hemek.—ˈOsien ko Isaya 48:17.
w14 10/15-CH 10 fiedac 13 fatac
Tanekteken a Pakasoˈlin ko Falocoˈ to Hongti Kitakit no Kawas
13 Oya sakiˈok no Kawas i Itin, ato katatelekan Ningra aci Aprahaman, somowalay to cecay masakalimlaan a demak: Saˈakawangay a pikowan ni Yihofa o moecelay ko taˈeneran, mankora oya patirengan Ningra a Misiya Hongti Kitakit oha mamitoor to moecelay a palinian Ningra a mikowan. (ˈOlic 89:14) O Misiya Hongti Kitakit oha mamapohed mapelal mapakotay no roma han? Cowa, samanen o cecay mikitiniay i rikec a katatelekan misawacayay cowa ko mamafekad ko hatiniay a demak.
Odoˈ no Sinael
cl-CH 281 fiedac 4-5 fatac
‘Edengan Kiso ko Madimadiay’
4 Itini i Hipray Maloloday Fangcalay Cudad, mihongyak to ‘madimadi’ sanay a tilid i, mikitiniay i maolahay a falocoˈ cowa ka piliyas cowa ka pifalah to cimaanan sanay ko tatodong, kiemelay milahci to makapahay a nihalakaan no falocoˈ. O tatodong nonini tilid mikikakaay to ‘sasoˈlinay’ sanay a tilid. Misasoˈlinay ko demak no tamdaw ano han i, o mikitiniay aca i ˈinorong ko sakahatira, kawra o madimadiay hananay i, mikitiniay i ciolahay a falocoˈ cowa ko pakayniay i ˈinorong aca. Ora ‘sasoˈlinay’ hananay i, latek mitoroˈay to awaay ko ˈorip a dafong. Tinakoen, o sowal no ˈOlic o ‘soˈlinay tatiˈeren a wacay’ ko folad sanay, samanen macaˈitay to romiˈamiˈad i kakarayan ko folad. (ˈOlic 89:37) Kawra, cowa ka ngaˈay o madimadiay han ita ko folad. Misamaanay hani? Samanen o madimadiay hananay i, o paihkalay to ciolahay a falocoˈ, o awaay ko ˈorip a dafong sasamaan a paihkal to ciolahay a falocoˈ hokira.
5 Itini i Fangcalay Cudad, o tatodong no madimadiay i, padihekoay to tamdaw. Madimadi to tamdaw sa i, patirengay to kalaliting to tamdaw sanay. O kiemelay ko madimadiay cowa ka ngiyangi, cowa ka lecad to tapelik no riyar a macowacoˈ no fali. Madimadi anca madimadiay a olah o tanoktokay iraay ko ˈicel, padamaay to tamdaw miwanik to pasangaray.
SAKA 9 FOLAD 30–SAKA 10 FOLAD 6 ROMIˈAD
O ODOˈ KO KIMAD NO KAWAS | ˈOLIC 90-91
Mitadiˈec ci Yihofaan, Papanayaren Ningra ko ˈOrip Iso
wp19.3-CH 5 fiedac 3-5 fatac
Mikilim to Sapidaˈocaw no ˈOrip a Lalan
Paihkalay ko ˈalomanay a kakakusiya, nohatini soˈlinto adihayay ko pakayraan minayar to sakalitengaw, kawra cowa ka fahal sa toedaw ko ˈorip no tamdaw. Manaokaniw, ano hikingen ko mihecaan no tamdaw i, mikitini saka 19 hahekalan padadotocay a manayar, kawra mikitiniay nika cakat no mikoracay a demak, maˈimer ko madengaay a adada ato nika tenak no sapaiyo. O sowal no mikakingkiway a tamdaw, tahiniayto i tolas ko mihecaan no tamdaw caayto ka ngaˈay mitongal a misakoedaw sanay.
Maedeng ˈayaw no 3,500 miheca, o cecay mitiliday to Fangcalay Cudad ci Mosi masemeray a somowal: ‘O hakelong no ˈorip ita maedeng 70 mihecaan, tanoktok sa i, tahiraay i 80 mihecaan. Taharorayay ko kaˈorip, matomesay ko cariraw, kalikiay a mataˈlif, hato maeferay a malahdaw kita.’ (ˈOlic 90:10) Soˈlin misahalakaay ko tamdaw sapinayaraw to ˈorip, kawra tahanini o pakayraan ita kamayan malecad to lintad ni Mosi awaay ko kasasiromaan.
O roma i, fafekang no sera iraay ko koedaway ko ˈorip a pinaˈorip, masakasemeranto no tamdaw. Tinakoen, o rarokoh 150 ko mihecaan, o kahngangay ˈaˈowang no riyar mataˈlifay ko 200 mihecaan, oya takaraway a caleng masacaˈolay ko mihecaan! Nengnengen konini pinaloma, saharateratengen ko ˈorip no tamdaw, masemeran nanay ko ˈalomanay tamdaw: “Edengan aca 70 anca 80 ko mihecaan no tamdaw han?”
wp19.1-CH 5 fiedac sapatongal lalakaw
Naicowaay ko Kawas Hani?
Na miharatengay kiso tonini salicay han? Misimsimay ko ˈalomanay a tamdaw, o dohaw ato maamaan ano iraay ko satapangan i, maedeng iraay ko Misangaˈay a Tatapangan, onini a Misangaˈay a Tatapangan, o Kawas Cingra, hay naicowaay Cingra ira hani?
Anini, matenakay ko piharateng no kakakusiya to iraay ko satapangan no dohaw. Onini a pinengneng malecaday to maˈoningay no Fangcalay Cudad. Mitekaay ko sowal no Fangcalay Cudad: ‘Salakat, o Kawas ko misangaˈay to kakarayan ato sera’ sanay.—Satapangan 1:1.
O maamaan no dohaw i, cowa ko niyah ko misangaˈay, cowa ka fahal sa ira. Ano “awaay” i, nanima sadak sa a “ira,” ano ira ko minaroˈan i, ira ko lalengawan ngaˈ. O nika sadak no dohaw o “minaroˈan” kora, ˈayaw no misatapang ko dohaw i, materekayto ira ko midaˈocay a “lalengawan.” Pasangaran nanay kita cipinang tonini, soˈlinay haw i, iraayto konini “lalengawan.” O Kawas ci Yihofa konini “lalengawan,” o ˈadingo ko tatirengan Ningra, awaay ko tolas no taneng ato ˈicel Ningra.—Yohani 4:24.
Pakayni ci Yihofaan i, o sowal no Fangcalay Cudad: “Yo caho ka sangaˈ ko lotolotok, yo caho ka safaco ko sera ato hekal i, o Kawasto Kiso nai ti:yaho tangasa i daˈoc.” (ˈOlic 90:2) Itiniay mahapinang, edengan o Kawas padadotocay materek. O Cingra ko ‘isalakatay’ misangaˈay to dohaw.—Paˈarawan 4:11.
Malowiday no Olah ko Kaciˈangian
16 Mafanaˈay ci Satan misalimlaay kita to ˈorip no niyah. Sanay cingra pakayni sapidipotaw to ˈorip ita cowa ko mamisalimla to kihcod a dafong, hanaca makahi kinafalah to kalawidang no niyah aci Yihofaan. (Yopu 2:4, 5) Tada mararawayto ci Satan! Nikawrira, wa sakadademaken ni Satan ko kaciˈangi ita to patay pacieci kitaanan mitowakang ci Yihofaan, samanen cingra i, ‘iraay ko ˈicel pakapatay to tamdaw a Akoma.’ (Hipray 2:14, 15) Tinakoen, micadaay to pifiyor ni Satan a tamdaw alatek patalaw a somowal, ano caay pisawad kita to pihakelongan, o papatayen kita. Roma i, malitemoh ita ko kacalohan a sapaising a pakayraan i, sakadademaken ni Satan konini a toki mipacieci kitaanan misafelit to sarikec no Kawas. O ising anca cowa pihakelong a paro no lomaˈ wa miroero kitaanan alatek, papicada kitaanan pacomod to remes, o roma tamdaw palimoˈot kitanan alatek micada to roma misafelitay to safalod no Fangcalay Cudad a sapiadah a pakayraan.
17 Soˈlin cowa ka ciharateng kita mapatay, kawra mafanaˈay kita, soˈlin tahirato i saikor ko ˈorip ita, o olah ni Yihofa kitaanan cowa ko mamahererek. (ˈOsien ko Loma 8:37-39.) Wa maharateng ni Yihofa ko mapatayayto a widang Ningra, itini pinengneng Ningra malecaday o maˈoripayho cangra. (Luka 20:37, 38) Makalimay Cingra miliyaw patikol paˈorip cangraanan. (Yopu 14:15) Soˈlinay haw i, pakayni ‘sapilifokaw ita to midaˈocay a ˈorip,’ maherekayto ci Yihofa mihadak to matekesay a sapiˈaca. (Yohani 3:16) Mafanaˈay kita, tangongolay ko olah ni Yihofa kitanan, ciharatengay kitanan. Mansa, ano macada ita ko pakidemay adada anca misiˈayaw to saroero no patay, cowa ko mamiliyas kita ci Yihofaan, ao papasayra Cingraanan micangacang to sahinom, taneng ato ˈicel. Ci Walayli ato faˈinay ningra o mahaenay ko demak.—ˈOlic 41:3.
Odoˈ no Sinael
wp17.5-CH 5 fiedac
Iraay ko Misimaway a Coyoh no Miso Han?
Awaay ko sowal no Fangcalay Cudad, to iraay ko misimaway a coyoh no kahacecay a tamdaw. Kawrira, mahaenay ko sowal ni Yis: ‘Ka pinaˈon kamo, aka pisakahmaw to kahacecay a wawa (o nisawawaan ni Kristo). Han ako pasowal kamo, ikakarayanay a coyoh nangra, marariday masasoˈaraw to ikakarayan a Wama ako.’ (Matay 18:10) Ora sowal ni Yis i, o kahacecay nisawawaan ningra makiriwiˈay a masimaw no coyoh han? Cowa. O tatodong nora sowal ni Yis i, ciharatengay ko coyoh to kahacecay a Krisciyang o sanay. Mihaenay haw i, o soˈlinay midoko to Kawas a tamdaw cowa ko mamisaolatekay a midemak to katalawan, ano samaanto ko demak nangra, miocoranto no Kawas ko coyoh midipot cangranan aka saan miharateng.
Ano hatiraay i, ocoren no Kawas ko coyoh mipadama kitanan han? (ˈOlic 91:11) Pakasoˈlinay ko romaroma tamdaw, na pakaynian no Kawas i coyoh mikayat ato midipot cangranan sanay. Iraay ko mahaenay a harateng ni Kenis. Soˈliˈlin awaay ko tamdaw misahci a pakasoˈlin, kawra iraay ko coyoh mipadama sanay cingra. Matira ci Kenisan, ˈalomanay Misawacayay Tamdaw ni Yihofa matinakoay nangra ko pikayat no coyoh i pitosilan. Kawra, cowa ka ˈaraw ita ko coyoh, awaay ko pinang itini kahacecay a demakan samaanay ko pidama ato pipadang no coyoh. Ano masamaamaanto ko demak, pakayni to pidama ato pipadang no Kawas, papaihkal kita to miakoˈiday a falocoˈ, o ngaˈayay konini.—Kolosay 3:15; Yakop 1:17, 18.
SAKA 10 FOLAD 7-13 ROMIˈAD
O ODOˈ KO KIMAD NO KAWAS | ˈOLIC 92-95
Midoko to Kawas o Sangaˈayay a Pakayraan Maˈorip!
Kapah Tamdaw, Micangacang to Noˈadingoan a Patosokan Han?
5 Salakat, patireng kita to noˈadingoan a patosokan, pakayniay no piakoˈid ita to paihkalan ni Yihofa a olah ato nano demak Ningra kitaanan. Sowal no mitiliday to ˈOlic: “[Yihofaaw], tada o ngaˈayay a demak ko pikansiya i Tisowanan . . . o nika tadamaan no demak Iso ko sakalipahak ako, o nika tadamaan no tayal Iso ko sakapilekal ako a romadiw.” (ˈOlic 92:1, 4) Kapah tamdaw, haratengen iraay ko maanan lalangian iso a miakoˈid ci Yihofaan. Pafelian ni Yihofa kiso to ˈorip, padama tisowanan palahad to pasoˈlinay falocoˈ, pafeli to Fangcalay Cudad ato kasakopang, pafeliayho tisowanan to makapahay hatokel. Paisalakaten iso miteli ko noˈadingoan a demak i kaˈorip, paihkalay to miakoˈiday kiso to kihcod a sapafeli no Kawas, mihaen to demak matongalayho ko piingid iso to Kawas.
O Harateng Iso Mafiyoray no Nima?
8 Ci Yihofa, mahecaday o maolahay to wawa a wama, tokel Ningra nanay ciepoc ko kaˈorip no mita. (Isaya 48:17, 18) Mihaenay, pafeliay Cingra kitaanan to palinian no waywayan ato safalod, mitokelayho kitaanan palahad to harateng Ningra, ato midoedo to safalod Ningra a maˈorip. Mihaen ko demak Ningra, cowa ko mipalitay kitaanan, wa pacakat to sapiharateng a ˈicel no mita. (ˈOlic 92:5; Taneng 2:1-5; Isaya 55:9) Mahecad ko harateng ita ci Yihofaan i, wa kamayan ira ko kaolahan no niyah, wa ngaˈayho matatodong ko misaˈosian, palipahak to niyah. (ˈOlic 1:2, 3) Ira ko harateng ni Yihofa no mita, tada o saka ciepoc!
Tada Misaaretengay ci Yihofa Minengneng Tisowanan!
18 Soˈlin malitengto kita, wa ngaˈayho misarocod to ˈicel saki Yihofaan. (ˈOlic 92:12-15) Pasowalay ci Yis kitaanan, miharateng kita cowa ka hakowa ko ˈicel, cowa ka samaan ko midemakan, misalimlaay ci Yihofa to nano demak ita Cingraanan. (Luka 21:2-4) O kapot a matayal sanay ko pinengneng no Kawas kitaanan, cowa ko pakayniay i inaneng ita, ao pakayniay i noka makahi ita a midofdof Cingraanan.—1 Korinto 3:5-9.
Odoˈ no Sinael
cl-CH 176 fiedac 18 fatac
Tada Tangongolay ko Taneng no Kawas!
18 Sinanoten samaanay ko tarokos ci Pawlo milengo to taneng ni Yihofa: ‘Wata: ko nika talolong no sidaˈit ato taneng ato sifanaˈ no Kawas! Cima ko mafanaˈay to pisawkit Ningra! Pasangaray kilimen ko lalan Ningra!’ (Loma 11:33) Itini notelangan a Fangcalay Cudad, satapang ci Pawlo milengo tano masemeray a sasowlen paihkal to fahkaˈay a harateng. Itini sinael mihongyakan ‘tangongolay’ no Krisiya a sowal, milingatay to ‘awaay ko tolas no tangongol’ no Krisiya a sowal. Mahapinangay, o sowal ni Pawlo itini ponoˈ no miasipay a tamdaw ihkalay a mahapinang kora coka. Ano misimsim kita to taneng ni Yihofa i, hato itiniay kita i awaay ko tolas no tangongol a fanaw. Hatiraayto, tada tangongolayto ko taneng ni Yihofa, tahadaˈocto cowa ko mamaemin ita a misolap, pasangaray tano sowalen a patalahkal. (ˈOlic 92:5) Ano palalinien i, tada kaemingayto ko tamdaw!
SAKA 10 FOLAD 14-20 ROMIˈAD
O ODOˈ KO KIMAD NO KAWAS
ˈOLIC 96-99
Milasil to ‘Milidongay to Tamdaw a Ngaˈayay Lihaf’!
w11 3/1-CH 6 fiedac 1-2 fatac
O Manan ko Ngaˈayay Lihaf?
O lalasilen no Krisciyang o ‘ngaˈayay lihaf no Hongti Kitakit,’ pasowal to tamdaw o sifo ko Hongti Kitakit, tatano moecelay ko pikowan to polong a tamdaw noikor. Tano romaho a tilid ko pilengo no Fangcalay Cudad tonini a ‘ngaˈayay lihaf,’ tinakoen ‘o sapilidong to tamdamdaw a ngaˈayay lihaf’ (ˈOlic 96:2); ‘o ngaˈayay lihaf no Kawas’ (Loma 15:16); ato ‘ngaˈayay lihaf ni Yis Kristo.’—Marko 1:1.
Kantangen ko sowal, o ‘ngaˈayay lihaf’ o sapasifanaˈ ni Yis ato mitilidan no nisawawaan a kihcod soˈlinay kimad. ˈAyaw no tayra i kakarayan ci Yis palimoˈotay to nisawawaan, sanay: ‘Ka lingad kamo, pala nisawawaan ako ko polong kasafinawlan a tamdaw. Ta pakaynien i ngangan no Wama ato wawa ato fangcalay saocor ko nipipaputisem i cangranan, o kihcod a sapalimoˈot ako tamowanan, pasifanaˈen cangra a papidofdof.’ (Matay 28:19, 20) Mihaenay, o mamilasil ko soˈlinay Krisciyang to Hongti Kitakit, mamisaˈicelho padama to tamdaw malo nisawawaan ni Kristo.
w12 9/1-CH 16 fiedac 1 fatac
Itini Pisawkitan a Romiˈad wa Mifekad ko Maanan a Demakan?
O pinengneng no ˈalomanay tamdaw to Pisawkitan a Romiˈad, malecaday to patalahkalan no i kawananay a coka. Harateng nangra to Pisawkitan a Romiˈad, o masacaˈolay masaemangay a tamdaw wa patayraen i kaˈayaw no tadamaanay kamaroˈan no Kawas, mitoor to waywayan no niyah i salakat micada to sasawkit. O romaroma tamdaw mamilifok to sapalifon lipahak ko kaˈorip i kakarayan, o romaroma tamdaw tatayra i cikok misemsem. Nikawrira sowal no Fangcalay Cudad, patireng to Pisawkitan a Romiˈad o sapicowataw to moecelay ko araaw, milidong to tamdamdaw. (ˈOlic 96:13) Manilnilayto no Kawas ci Yis malo Misawkitay a Tapang, noikor papatado cingra to tamdaw misawkit, paira to moecelay.—ˈOsien ko Isaya 11:1-5; Dmak 17:31.
w12 9/15-CH 12 fiedac 18-19 fatac
Comaˈol Miheca ko Dipayal, Milayap to Rihaday!
18 Ikor, makayhiday ni Satan ci Atam aci Ifa, mitowakang to saˈakawangay a fadangalan no pikowan ni Yihofa, onini a rihadayay no kalalaˈed mapalakayto. Nikawrira, mikitini 1914 miheca misatapang, Hongti Kitakit ni Misiya palidlid sanay patikol pakakedec to taˈangayay paro no lomaˈ i dohaw. (Ifiso 1:9, 10) Itini Pikowan ni Kristo to Comaˈol Miheca a tatokian, o ‘cowa ka ˈaraw’ nohatini adihayay makapahay a demak o mamalaˈosi maemin. Oranto i, tahiniayto i ‘kahererekan,’ mitoroˈan i, salikorayto no Pikowan ni Kristo to Comaˈol Miheca. Itiya o mamifekad ko maanan a demakan hani? Soˈliˈlin malifokayto ni Yis ko ‘fadangalan no kakarayan ato sera,’ kawra awaay ko mimimiming aca a ˈanof ningra, caay ka ciharateng to sapiˈafasaw to saˈakawangay a saaroˈan ni Yihofa. Mamisapoener ko falocoˈ ningra ‘patikol to Hongti Kitakit i Wamaan o Kawas ningra.’ Misongilaˈay ci Yis misaka dademak to fadangalan no niyah ato mikiriwiˈay a saaroˈan, ‘panokay to ˈdil i Wamaan o Kawas ningra.’—Matay 28:18; Filipi 2:9-11.
19 Maraod ko toki, o finawlan no Hongti Kitakit no Kawas patikolayto malefot ko tireng, ngaˈayay micada to salikoray a sapalifet. Ano pakataˈlif cangra tonini a sapalifet, o paihkalay to makalimay ko niyah mitodong ci Yisan, misapoener ko falocoˈ, mikifalocoˈ a makahi mihayi to saˈakawangay a sapikowan a fadangalan ni Yihofa. (Paˈarawan 20:7-10) Ikorto, polong mitowakangay, ano tamdawto ano tatiihayto a coyoh, tatahadaˈoc a malaˈafo. Itiya, lalipahakto ko kakarayan ato sera, polong no dohaw taˈangayay paro no lomaˈ o lalipahak a pakahemek ci Yihofaan! ‘Pakaynien i maˈoripay ko sowal, o kihcod ono Kawasto maemin.’—ˈOsien ko ˈOlic 99:1-3.
Odoˈ no Sinael
it-1-CH 481 fiedac
O ˈOlic, Isaya ato mitilidan no tarokos ci Yohani a Paˈarawan sahtoay somowalay to ‘faelohay a radiw.’ (ˈOlic 33:3; 40:3; 96:1; 98:1; 144:9; 149:1; Isaya 42:10; Paˈarawan 5:9; 14:3) I fafekang ato laeno nonini a sinael paihkalay, romadiw to ‘faelohay a radiw’ tocerid pakayniay i pidemak ni Yihofa to saˈakawangay a pikowan to dohaw paira to faelohay no kalingad. Malecad to ˈOlic 96:10 lipahakay a milasil: ‘Mala Hongtiayto ci Yihofa.’ Ano nengnengen ko lalangian no ‘faelohay a radiw’ i: Palidlid sanayto ci Yihofa patalahkal to fadangalan Ningra a mala Hongti palaˈosiay to faelohay a kalingad, ato pifiyor to polong a maˈoripay.—ˈOlic 96:11-13; 98:9; Isaya 42:10, 13.
SAKA 10 FOLAD 21-27 ROMIˈAD
O ODOˈ KO KIMAD NO KAWAS | ˈOLIC 100-102
Patikoen ko Kadofahay Madimadiay Olah ni Yihofa
Sasamaan Misaday to Sapicadaaw to Paputisem Hani?
18 O olah iso ci Yihofaan tada o masakalimlaan, o sangaˈayay a makapahay a capeling no miso. (ˈOsien ko Taneng 3:3-6.) O mahaenay a olah i, cowa ko cecayay aca a liyad. Ira ko mahaenay a olah, soˈlinto tahasiˈayaw to sapalifet, cowa ko mamisawad kiso midoko ci Yihofaan. Marariday somowal ko Fangcalay Cudad to madimadiay a olah ni Yihofa to sikawdan Ningra, tatodong i, tangongolay ko olah Ningra cangranan, cowa ko mamiliyas a misawad cangranan. (ˈOlic 100:5) Tona o miringiay kiso to Kawas a sangaˈen, ngangaˈay kiso samaan matira Cingranan patalahkal to hatiniay a olah hani?—Satapangan 1:26.
19 Ngangaˈay kiso mikitini pipalahad to miakoˈiday falocoˈ a misatapang. (1 Tisalonika 5:18) To romiˈamiˈad ngaˈayay licayen ko niyah: “Samaanay ci Yihofa patalahkal to olah takowanan hani?” Dotoc itini satolon hadaken ko nano demak Ningra tisowanan, hanaca miakoˈid Cingranan. Haenen oni Pawlo, mihapinang to pakayniay ci Yihofa to kaolah tisowanan, mansa mihaen ko pidemak. (ˈOsien ko Kalatiya 2:20.) Ngaˈayho licayen ko niyah: “Makalimay kako tano olah a patiko to olah han?” O olah ci Yihofaan papadama tisowanan micoˈay to sakayhid, itini sapalifet padadotoc a mihadidi, ngaˈayho mikowad tisowanan padadotoc mirienang to midokoay a demak, to romiˈamiˈad paihkal to tada maolahay kiso Cingranan.
‘Ka Talipaˈelal a Mitapal’
10 O ihkalay mahapinang a katalawan, mahawpay ko mikalonaay, haliepahay, cowa pakaˈimer to kakaenen, tatiihay a sasowalen, malaˈodotay a kamok ato maˈodangay a lalakaw, o hatiniay a demak oha laliyasen ita. (ˈOlic 101:3) O ˈada ita ci Akoma Satan mikakilimay to toki sapipalakaw to kalawidang ita aci Yihofa. (1 Pitiro 5:8) Ano eca ka padadotoc talipaˈelal kita, aitini i ponoˈ ato falocoˈ ita mikosam cingra to ˈinap, misamangahay, maˈanofay, ˈintehay, misatakaraway ato mangolaway a sapaloma. (Kalatiya 5:19-21) Satapangho i, o hatiniay a harateng cowaho ka pakidem alatek, kawra ano caka tangsolen ita a mifaˈenot, hahatira o ciwarakay a semot lomahad, salikor mamidokaˈ kitaanan.—Yakop 1:14, 15.
w11 7/15-CH 16 fiedac 7-8 fatac
Mamitengil Kiso to Masahciay a Sapatalipaˈelal ni Yihofa Han?
7 Ano sapiliyasaw kita to makaniway a singsi i, cowa ko mamidemak to maanan hani? Cowa ko papacomoden ita ko mahaenay a tamdaw micomod i lomaˈ ita, cowa ko papalicay cangranan. Cowa ko mamiˈosi kita to cudad no makaniway a singsi, minengneng to pakayniay cangranan a kamok no tilifi, cowa ko tatayni i wangcan nangra, miterek to sowal. Mihaen a patodicek ko waywayan ita, o manan ko lalangian hani? O olah. Maolahay kita to ‘midoedoay to soˈlinay kimad a Kawas,’ cowa ka ciharateng to sapitefingaw tora mararaway a kimad, samanen misafelitay to soˈlinay kimad no Kawas ko sowal nangra. (ˈOlic 31:5; Yohani 17:17) Hanaca maolahay kita to likakawa ni Yihofa, samanen pakayniay i likakawa Ningra ko sakafanaˈ ita to kalipahakan a soˈlinay kimad, tinakoen o ngangan no Kawas ci Yihofa ato tatodong nonini ngangan, o araaw no Kawas to cikiw, mapatayto ko tamdaw samaanayto, ato patikolay maˈorip a hatokel. Tikolen a miharateng hena, tiya mahatatanam iso ko soˈlinay kimad no Fangcalay Cudad isaˈayaw i, iraay ko masamaanay a piharateng hani? Tona naitiniay i likakawa no Kawas kita a minanam tonini kalimlaan a soˈlinay kimad, wa iraho ko maanan a lalangian a pakihateren ko makaniway a singsi miˈafas to lipahak iso hani?—Yohani 6:66-69.
8 Ano o mananto ko sowal no makaniway a singsi, cowa ko mamihakelong kita cangranan. Nimaan a malipalaw nangra, tayra i maˈicangay a tefon miradom, telocto taˈangay ko nika toled no falocoˈ hani? Halafinay a tatokian, padotocay ko likakawa no Kawas mitoor to patemeran no Kawas a kimad, mihadak to makoracay pasinowayay to tamdaw a nanom no soˈlinay kimad, palahdaw to kasoˈaw ita i noˈadingoan a demak. Nanay seteken ita ko falocoˈ, tahatolas madimadi ci Yihofaan ato likakawa Ningra!—Isaya 55:1-3; Matay 24:45-47.
Odoˈ no Sinael
it-2-CH 390 fiedac
ˈAyam no Kohkohan
Mafocol ko ˈAyam no Kohkohan, maeferay tayra i awaay ko adeses a kitiraan, pacingeray to fongoh i ˈafala, ano nengnengen hato masomaday, pinaay tatokian ko katomireng, caay ka tatemik, mikitini i raay minengneng hato kohcalay fakeloh saan a maoraten. Mitiliday to ˈOlic misaka dademakay to masomaday a papisingan no ˈayam no kohkohan patinako to kasomad no niyah, sanay ko sowal: ‘Malecaday kako to ˈayam no kohkohan.’ (ˈOlic 102:6) O misowalan itini a ‘kohkoh’ cowa ko itiniay i tafotafokan, o awaay ko tamdaw a kitiraan ko mitoroˈan, alatek o henotan. Itini roma tatokian, o ˈayam no kohkohan itiniay i kaˈamis no Yortan ˈalo a henotan a pahanhan. Toloay masasiroma ˈayam no kohkohan maˈaraway i Israil, marariday maˈaraw i o kohcalay a ˈayam no kohkohan (Sapangangan: Pelecanus onocrotalus); Maloloday a sapikpik no ˈayam no kohkohan (Sapangangan: Pelecanus crispus), kahngangay ko kolol a ˈayam no kohkohan (Sapangangan: Pelecanus rufescens) caay ka rarid maˈaraw.
ˈAyam no kohkohan tada maolahay to awaayho ko pinaloma a pala, awaay ko mikalisangaˈay. Itiraay camira padipong a cifitaˈol, maharek mifoting tayraay a paselaˈ. Samanen maolahay ko ˈayam no kohkohan to awaay ko adeses a pala, misaka dademakan no Fangcalay Cudad ko ˈayam no kohkohan mitaypiyaw to mahoracay. Pairasolay ci Isaya mamiˈafas ko ˈayam no kohkohan to Itom, paihkalay malahorac ko Itom a pala. (Isaya 34:11) Pairasolay ci Cifaniya wa itini i hecek no Ninifi a niyaroˈ paselaˈ ko ˈayam no kohkohan, paihkalay konini mamalahorac ko Ninifi, awa ko tamdaw mikilomaˈ.—Cifaniya 2:13, 14.
SAKA 10 FOLAD 28–SAKA 11 FOLAD 3 ROMIˈAD
O ODOˈ KO KIMAD NO KAWAS | ˈOLIC 103-104
Maharatengay Ningra ‘o Nano Sera Kita’
Todongen ci Yihofa Makahi Micaˈi
5 Tada misapoeneray ci Yihofa, iraay ko siniˈada, makahiay Cingra micaˈi to tamdaw. Tinakoen, tiya papalaˈafoen ni Yihofa ko tatiihay Sotom a tamdaw i, salakatayho pakayni i coyoh mirikec toya moecelay a Lotoan, papiˈorong cingranan to paro no lomaˈ milaliw tayra i lotok. Matalaway ci Loto itiya, oranto cangacangay ci Yihofaan mihayi cingranan miˈorong to paro no lomaˈ milaliw tayra i Coar, onini a kaemingay a niyaroˈ nao papalaˈafoen ni Yihofa. Na ngangaˈay ci Yihofa misaali ci Lotoan mitoor to limoˈot Ningra a midemak, kawra mihayian Ningra ko picangacang ni Loto, cowa ka palaˈafo to Coar. Mikitini toniya maˈoningay mahapinangay ita tada misapoeneray ci Yihofa. (Satapangan 19:18-22) Ikor no adihayay mihecaan, pasayraay ci Yihofa i Ninifi a tamdaw patalahkal to siniˈadaay falocoˈ. Miocoran Ningra ko pairasolay ci Yona mihadak to salasil, somowal to papalaˈafoen ko Ninifi ato tatiihay tamdaw itira. Kawra ikor no pasasiyor ko Ninifi a tamdaw, siniˈadaayto ci Yihofa cangranan, cowato palaˈafo to Ninifi.—Yona 3:1, 10; 4:10, 11.
Malecad ci Samsonan Mitadiˈec ci Yihofaan
16 Soˈliˈlin pakayniay ci Samson i raraw no niyah mitamorong to karorayan a teloc, kawra cowa pisawad cingra midemak to sapafeli ni Yihofa cingranan a ˈinorong. Soˈlin pakayni kita i kaciraraw micada to sasalof anca malahdaw ko katayalan, aka a pisawad kita. Haratengen, cowa ko mamisawad ci Yihofa kitanan. (ˈOlic 103:8-10) Soˈlin na mararaway kita, ngaˈayayho sakadademaken ni Yihofa, malecad ci Samsonan.
17 Ci Mayke o kapah a salikaka, nao dama sikawdan ato miceriday misakafah cingra, tawlikay matayal saki Yihofaan. Kaadayayan i, mararaway cingra, telocto malahdaway ko tayal i kasakopang. Sanay cingra: “Itini pidoko ci Yihofaan kalikiay kako talaˈayaw, kawra fahal sanay hato masongtolay ako ko mocoˈ caayto ka ngaˈay midemak to maanan. Na cowa ka piharateng kako to mamifalah ci Yihofa takowanan, kawra na calemcemay kako to ngangaˈay malecad o saˈayaway ko kalalaˈed no niyah Cingranan hokira, calemcemayho itini kasakopang wa ngaˈayho malecad to saˈayaway ko adihay no midemakan hokira.”
18 Kasemeran i, cowa pisawad ci Mayke. Sanay cingra: “Marariday kako micekiw ato midotim, itini satolon mifohat to falocoˈ ci Yihofaan. Mihaen, wa ngaˈayto kako misamacay misalof to kalalaˈed no niyah i Cingranan.” Ikorto, miliyaway milifok ci Mayke to tayal i kasakopang, nohatini o malohemay malitengay cingra, o miceridayho misakafah. Sanay cingra: “Adihayay ko malifokay ako a sadama, mangalef mikitini i malohemay malitengay milifok to taˈangayay sapakalalok, padamaay konini takowanan mihapinang to kamayan maolah ci Yihofa takowanan. Nohatini, miliyaway ira ko makoracay a makapahay falocoˈ ako matayal i kasakopang. Mahatatanamay ako, misododay ci Yihofa to mikifalocoˈay pasasiyor a tamdaw.” Ngaˈay kita pakasoˈlin, soˈlin na mararaway, ano misaˈicel kita misalof to raraw hanaca padadotoc mitadiˈec ci Yihofaan, o sasakadademaken ato papalemeden ni Yihofa kita.—ˈOlic 86:5; Taneng 28:13.
Mamadangar Iso ko Noˈadingoan a Patosokan!
2 Ano iraay ko cecay patosokan iso samaamaanen cowa ka madangar, aka masawi, o mapadikay kiso cowa ka saan konini. Tohati:niay, ano sapilaˈosiaw to cecay kantangay a patosokan, misaaliay to adihayay a toki ato nika pisaˈicel. ˈArawhan cowa ka pisawad kiso tora patosokan, paihkalay konini to misakaretengay kiso to kalalaˈed aci Yihofa, sapafeliaw Cingranan to sangaˈayay. Misalimlaan ni Yihofa ko mihadakan iso a ˈicel, hanaca cowa pisaali tisowanan midemak to caay ko mamadangar iso a demak. (ˈOlic 103:14; Mika 6:8) Mihaenay i, patatodongen ko patosokan iso, tooren ko mamadangar iso a demak. Ano iraay ko mahaenay a patosokan iso i, sasamaan palaˈosi hani? Dotoc mamilengo kita to pina hapakayraan.
Odoˈ no Sinael
cl-CH 55 fiedac 18 fatac
Misaka Dademakay ko Kawas to Taˈangayay ˈIcel Misangaˈ to Kakarayan ato Sera
18 Mikitini masowalay i fafekang cipinangay kita to maanan hani? Misangaˈan ni Yihofa a maamaan adihayay ko kasasiroma, tada kasemeranto. Mitiliday to ˈOlic pakahemekay to Kawas, sanay ko sowal: ‘Yihofaaw, tada kadofahay ko misangaˈan Iso! . . . Misangaˈan Iso a maamaan miedefay i fafekang no sera.’ (ˈOlic 104:24) Awaay ko hasasa tonini a sowal! O mikakingkiway to pinaˈorip a tamdaw mahapinangay nangra mataˈlifayto ko 100 emang a kasasiroma no pinaˈorip, kawra harateng no roma tamdaw, o kasasiroma no pinaˈorip cowa ka hatini aca sanay. O inaneng no matanengay tamdaw iraay ko tolas, nikawrira awaay ko tolas no misangaˈay a harateng ni Yihofa.