Pinengnengan to Lalakaw no Mitosilay ato Nikaˈorip Rayray no Saˈopo
© 2025 Watch Tower Bible and Tract Society of Pennsylvania
SAKA 7 FOLAD 7-13 ROMIˈAD
O ODOˈ KO KIMAD NO KAWAS | TANENG 21
Sakadademaken ko Safalod, wa Raheker ko Kararamod
w03-CH 10/15 4 fiedac 5 fatac
Sasamaan Mataneng ko Pisaˈosi?
Forifor sa macaloh ko pisaˈosi i, marariday mararaw ko demak. Taneng 21:5 sanay: ‘O masongilaˈay ko pisahalaka a misafaco a tamdaw i, o mamalaˈosi ko demak ningra. O forifor sanay a macaloh ko demak a tamdaw i, o mamanikaw cingra.’ Tinakoen, o kaemangay a tamdaw madoloay maolahen to faˈinayan anca fafahiyan, mansa ˈayaw no mamararamod i, palaken ko toki misongilaˈ a miharateng. Ano eca i, mahaen o sowal no mitiliday to cudad a tamdaw ci Wilien Kankelifo: “Forifor sa macaloh a ciraramod i, cikiyam ko falocoˈ to hakelong no ˈorip.”
g-CH 7/08 7 fiedac 2 fatac
Samaanen Mahemek Raheker ko Kararamod
Paihkalen ko misapoeneray a falocoˈ. “Ano o maamaanto a demak i, aka ka o misatekeday, aka ka o mipasenengay ko demak namo. Ka o misapoeneray ko falocoˈ namo. Ikakaay no mako ko tao, han ko falocoˈ.” (Filipi 2:3) O adihayay a lacongis pakayniay i misatakaraway a falocoˈ ko sakapifekad. Nolatekay ira ko pasangar no raramod, samanen o makamirorohay to raramod, caay ka patado miharateng, cowa ka misapoener ko falocoˈ a pacaiˈ a misaysay to pasangar. Ano misapoener ko falocoˈ iso i, mafekad sato ko lacongis, cowa kono niyah aca harateng ko matatodongay wa saan.
w06-CH 9/15 28 fiedac 13 fatac
‘Malacafay to Kaemanganho a Fafahi Iso a Lipahak’
13 Ano pakayniay i noka caka lecad ko kapicada to tihi, tatiih ko kalalaˈed no mararamoday i, samaanto aki? Mamisaˈicel cangra misaysay to pasangar. Tinakoen, latek saˈayaw caay ko padetengan masadak ko milokesay a sowal, dengkini sato malo pinanganto konini. (Taneng 12:18) Matira masowalay no isaˈayaway lalakaw, o mahaenay a sasowalen tada midokaˈay to raramod. Sowal no Taneng: “O nika itira i kohkohan a maroˈ ko ngaˈay to nika lacecay a maroˈ atoya karapoˈiyay a karangaliwngiway a fafahi.” (Taneng 21:19) Ano o karapoˈiyay a fafahi kiso, sasinanoten iso ko niyah: “Mapiliˈ ko faˈinay takowanan o pakayniay nika haliketeray kako hokira?” Mahaenay ko sowal no Fangcalay Cudad: “Kamo o faˈinay i, kaolahen ko fafahi namo, aka pisafayaˈ i cangranan.” (Kolosay 3:19) Ano o faˈinay kiso i, licayen ko niyah: “Cowa ka pikihar kako to fafahi to saka hatira ningra hokira, hato pasayraay i roma faˈinayan misayar to falocoˈ ningra han?” Ano masamaanayto i, o mararamoday cowa ka ngaˈay sapihaenaw a mikilif to sowal a maˈodang ato tao. Tona iraay ko mahaenay a kaadayayan a tinakoan, o mararamoday tamdaw patalahkalen a malalengo tora pasangar.
Odoˈ no Sinael
w05-CH 1/15 17 fiedac 9 fatac
Paliˈayaway to Hongti Kitakit no Kawas a Mapolosi Malaˈosiayto
9 Anini, ci Yis cowato koya midakaway to lofa a tamdaw, o ciˈicelayto a Hongti cingra, midakaway to comikayay a efa. Itini i Fangcalay Cudad, o efa hananay i, mitaypiyaway to lalood. (Taneng 21:31) Sanay ko sowal no Paˈarawan 6:2: “Nengneng sa kako i, ira ko cecay a kohcalay a efa. Mitatoy to panaˈ ko midakaway toya efa. Mapatamohong cingra. O pakalowiday cingra saka, o mamilowilowid aca ko nika lomowad ningra.” Pakayni ci Yisan, sanay ko sowal ni Tafiti oya mitiliday to ˈOlic: ‘O mamicowat ci Yihofa to nikowanan iso naitini i Cion. Sowal sa Cingra: “O mamikowan kiso to ˈada,” saan.’—ˈOlic 110:2.
SAKA 7 FOLAD 14-20 ROMIˈAD
O ODOˈ KO KIMAD NO KAWAS | TANENG 22
Sakadademaken ko Safalod, Mipalahad to Wawa
Lomahad ko Wawa Iso wa Midoko ci Yihofaan han?
7 Ano ciraramodayto kiso, ciharateng saka ci wawaaw, ngaˈayay licayen namo ko niyah: ‘O misapoeneray a tamdaw kami han? Soˈlinay kami maolah ci Yihofaan ato sowal Ningra han? Wa rihaday ci Yihofa patorod tamiyanan midimokos to faelohay ˈorip han?’ (ˈOlic 127:3, 4) Ano iraayto ko wawa iso, ngaˈayay licayen ko niyah: ‘Pasifanaˈan ako ko wawa malalok a matayal han?’ (Patnakay 3:12, 13) ‘Itini hekal ni Satan, madokaˈay ko tireng no wawa alatek, o harateng nangra mafiyoray alatek, misarocoday kako a midipot cangranan han?’ (Taneng 22:3) Manaokaniw, midipot to wawa hoeca ka madokaˈ cowa ko madoloay. Kawra, ngaˈayay hadidien iso a pasifanaˈ cangra, padama cangranan minanam ano tahasiˈayaw to masakenaay a pasangaray i, mikilim to sakayat no Fangcalay Cudad. (ˈOsien ko Taneng 2:1-6.) Tinakoen, ano cato pidoko ko salawina ci Yihofaan, ngaˈayay saka dademaken iso ko Fangcalay Cudad padama to wawa mihapinang, padotoc a madimadi ci Yihofaan o kalimlaan. (ˈOlic 31:23) Ano ira ko mapatayay tamdaw i lomaˈ, ngaˈayay paˈarawen iso ko wawa to mamihinom cingranan, padama to sakarihaday no falocoˈ ningra a sinael.—2 Korinto 1:3, 4; 2 Timoti 3:16
O Wama Wina—Pasifanaˈen ko Wawa Maolah ci Yihofaan
17 Kahnayen pasifanaˈ ko wawa. Ano kahnay misatapang pasifanaˈ to wawa maolah ci Yihofaan, wa taˈangay ko haepoc. (Taneng 22:6) Ci Timoti o ngaˈayay a tinakoan, o cafay ni Pawlo itini milakowitay to riyar mitosil cingra. O wina ningra ci Iunici ato fofo ningra ci Lois, “nano kaemanganho” a pasifanaˈ to cingranan mihatatanaman to Fangcalay Cudad.—2 Timoti 1:5; 3:15.
18 O roma mararamoday i Ketetiwa ci Kelote aci Pis, aenemay ko wawa nangra. Itini pipasifanaˈ nangra, maolahay ci Yihofaan ko aenem a wawa. Hano malaˈosi cangra hani? Minanamay cangra ci Iunician aci Loisan. Sowal nangra: “Hofoc han ko wawa, misaˈicelayto kami milinaˈ i falocoˈ nangra to Kimad no Kawas.”—Limoˈot 6:6, 7 ato roma pihongyak.
19 Sasamaan ngaˈ malinaˈ i falocoˈ no wawa ko Kimad ni Yihofa hani? Pakayni i pisaliyaliyaw a pasifanaˈ. Mihaenay, caceriden no wama wina kalacafay ko wawa. Latekay, karorayan a misaliyaliyaw patalipaˈelal to wawa, kawraan o sangaˈayay a pakayraan konini a padama to wawa cipinang ato misaka dademak to safalod no Fangcalay Cudad.
w06-CH 4/1 9 fiedac 4 fatac
O Wama Wina—Malo Ngaˈayay Taˈarawan no Wawa
O wa:wa aca ko wawa, latekay caay pitengil to sowal, maliyangay cangra. (Satapangan 8:21) Sasamaan ko wama wina padama to wawa hani? Sanay ko sowal no Fangcalay Cudad: “Mingata i apa ko pinangan no kaemangay, o sasetiˈ ko sapisalof a palatamdaw i cangranan.” (Taneng 22:15) O roma tamdaw miharateng, tano sasetiˈen mirikec to wawa tada pakidemay, matelangayto ko mahaenay a pakayraan sanay. O Fangcalay Cudad caay ka kahi to mikariˈangay ato pasemsemay to wawa. O “sasetiˈ” hananay i, latekay mitoroˈay to soˈlinay a pitefoc, kawra itini i, mitaypiyaway to fadangalan no wama wina. To sakangaˈayaw no wawa noikor, o mamisinanot ko wama wina to sasamaanen ko hapakayraan, sasidaˈit hanaca kakodait a mirikec cangranan.—Hipray 12:7-11.
Odoˈ no Sinael
Itini Katayalan Nohatini Mahela ko Lipahak
11 Malecaday, misarocod to falocoˈ kita midemak to sapatorod a tayal, wa matongal ko lipahak a matayal. Misamacay ko harateng mirienang to mitosilay, misaˈicelho matayal saki salikaka. (Dmak 18:5; Hipray 10:24, 25) Misaday kiso to lalakaw no saˈopo, wa ngaˈay mihadak to pakalalokay to tamdaw a sapacaˈof. Misarocod a misaday to kamok i pihatatanaman. Ano mitahidang ko malohemay malitengay papidemak tisowanan, tooren ko toki milahci, malo ngaˈayay tadiˈecen a tamdaw. Aka miharateng to cowa ko kalimlaan ko roma demak, cowa ka ngaˈay mipalak to toki midemak, wa misaˈicel ko niyah pacakat to inaneng a matayal. (Taneng 22:29) Ano misamacay kiso matayal saki Yihofaan, wa matongal ko kacakat, wa matongal ko lipahak no niyah. (Kalatiya 6:4) Ano maˈaraw ko tao milifok to kaolahan iso a tayal i, patadoen cingra a mahemek.—Loma 12:15; Kalatiya 5:26.
SAKA 7 FOLAD 21-27 ROMIˈAD
O ODOˈ KO KIMAD NO KAWAS | TANENG 23
Sakadademaken ko Safalod, Patatodongen ko Piˈowak to Epah
w04-CH 12/1 19 fiedac 5-6 fatac
Pakayni to Miˈowakay to Epah Pairaen ko Matatodongay a Noka Pinengneng
5 O haliepahay ano caay patalahkal to malasangay, o ngaˈayayto han? O romaroma tamdaw adihayto ko miˈowakan, cowa ka lasang. Ano soˈlinto hatira, aka miharateng to awaay ko katatiihan, o misamangahay to niyah konini. (Yirimiya 17:9) Ano halafinto i, o haliepahay a tamdaw cinahiyanayto, mala ‘koliay no epah.’ (Titus 2:3) O mitatiliday to cudad ci Karolinapo somowalay to maenepay to epah a tamdaw, sanay cingra: “Palidlid sanay ko hiyan to epah, cowa ka mahapinang.” O haliepahay a demak o satalakal no ˈorip!
6 Roma i, sinanoten ko saparikec ni Yis: ‘Pinaˈon kamo, latek yo maacang kamo, yo malasang, marawraw ko falocoˈ namo to sakiˈorip i, talifahal sa a ira konini a romiˈad a mitakop i tamowanan. O romiˈad ni Yihofa tatalifahal sa ira matiya o tilo. Nawhani o mamasalalomaˈ nonini a romiˈad ko polong no maroˈay itini i hekal a tamdaw.’ (Luka 21:34, 35) Adihay ko miˈowakan to epah i, soˈliˈlin caay ka wakang no lasang, kawra maohotayto itini i tirengan ato itini noˈadingoan, mahokaˈayto matayo ko tireng. O romiˈad ni Yihofa talifahal sa a ira, ano makoraro no epah hinawalho i, wa tanoktok a tomireng han?
it-2-CH 1237 fiedac
Malasang no Epah
Mirikecay ko Fangcalay Cudad to malasangay no epah. Mikecengay ko Fangcalay Cudad to malasangay no epah. Pakayni to latiih no haliepahay, somowalay ko Taneng to matatodongay ino kakaku a sowal. Sanay ko sinael: ‘Ano cima ko iraay ko latiih? O cima ko mararaway? Cima ko malacongisay? Cima ko cariraway? Cima ko madokaˈay? Cima ko malawmaway ko mata? O maˈemekay i epah, mikilimay to aˈowaken a tamdaw. Kahngangay ko fadisosoˈ a epah, safelafelat sanay i takid, [misolotay to tamdaw,] seday sanay i takoraw, kawra aka nengnengen. Salikor malecad o ˈoner a mikalat tisowanan, malecad o sawarak no ciwarakay a ˈoner, [o haliepahay mamipalak to tireng ˈatekak ko ˈatay, mamirmirto ko tireng, o sakapatay konini.] Mifiyoray to ponoˈ maˈaraw ko patelacay a demak, patelas sato a caciyaw.’—Taneng 23:29-33; Hosiya 4:11; Matay 15:18, 19.
Padadotocay somowal ko Taneng to nika lasang no haliepahay tamdaw, sowal sa: ‘Matiya o midakaway to tamina i sifoˈ no riyar a masinawar kiso [hato mamaˈemek no nanom caayto ka fanaˈ tono tamdawan], matiya o mikafitay kiso i teloc no satoko no tamina [macowaco ko tamina, pakidemay mangiyangi ko satoko, o halitepahay latek talifahal wasa mapolin, macongfongto anca malaˈodot to tao a mapatay]. “Misetiˈ ko tao takowanan cowa ka dokaˈ kako, mikemo ko tao takowanan cowa ka fanaˈ kako [hatiniay ko malasangay sacaciyaw sanay to niyahan aca, cowa ka fanaˈ o manan ko mafekaday i taliyok, cowa ka fanaˈ to roray no lasang]. Hacowa kako mapalal hani? Miˈowakho kako to epah [mafanaˈay to papahanhan cingra ngaˈ patikol ko ˈicel, ˈarawhan pakidemay ko hiyan ningra, saromiˈad sanay a mikakilim to epah].”’ Adihayay ko mapalakay a payci to sapiˈowakaw aca to epah, tatiihay ko ngangan ningra, caay ka hela ko katayalan, telocto i, malo pakosiyato a manikaw ko kaˈorip.—Taneng 23:20, 21, 34, 35.
Odoˈ no Sinael
w04-CH 11/1 31 fiedac 2 fatac
Salicay no Miˈosiay Tamdaw
Tinakoen, o halikaenay a tamdaw pakidem ko nika soeso alatek, kawra awaay ko pinang tonini. Pakidem ko soeso no tamdaw, nolatekay pakayniay i adada no tireng, anca mirocokay ko saka haen. Roma i, aka mapawan kita, masoesoay ono tirengan konini, o halikaenay pakayniay i noharatengan. Pakidem ko nika soeso, adihayay ko simal no tireng, o halikaenay awaay ko tolas no ˈanof a komaen, pakidemay ko kakomaen. Mihaenay i, halikaenay ko cecay tamdaw hokira, cowa ko mikitiniay i tatirengan ko piˈarawan, ao mikitiniay samaanay ko pinengneng ningra to kakaenen. O tatirengan no halikaenay a tamdaw makapahay anca mangiliway alatek. Roma i, cowa ka lecad a kitiraan pakayni i palinian noka pinengneng to tatirengan ato kareteng no tireng cowa ka hecahecad.
SAKA 7 FOLAD 28–8 FOLAD 3 ROMIˈAD
O ODOˈ KO KIMAD NO KAWAS | TANENG 24
Ano Tahalifa to Pasangar i, Kiemelen ko Harateng
it-1-CH 1260 fiedac 6 fatac
Hakokay
O Krisciyang pakasoˈlinay ano tahatolas ko pihadidi mamilifok to sapalifon. Pakayni toninian, sowal ni Yis: ‘Pakayniay i moecelay tahacadaay to hakokay a tamdaw o malemeday, samanen i kakarayan a Hongti Kitakit ono nangra.’ (Matay 5:10) Mafanaˈay cangra to patikolay maˈorip a hatokel, mafanaˈayho toya ngaˈay patikol paˈorip to tamdaw a Kawas, mansa iraayto ko ˈicel. Paˈicelay konini a sifanaˈ cangranan, cowato ka kokiˈ to pakidemay a hakokay ato saroero no patay, misetekay to falocoˈ a madimadi to Kawas. Pakayni palaˈosian no patay ni Yis a demak iraay ko pakasoˈlinay falocoˈ nangra, oranto i, cowato ka kokiˈ cangra fahal sa a mapatay. (Hipray 2:14, 15) O Krisciyang pairaen ko matatodongay a harateng, ho ngaˈay itini hakokay padadotoc a madimadi. Sowal no Fangcalay Cudad: ‘Samaanay ko harateng ni Yis Kristo i, pairaen namo ko malecaday a harateng. Tahiraay i patay ko pidofdof . . . ningra, itiniay i pisemseman a hecek mapatay.’ (Filipi 2:5-8) Ci Yis ‘pakayni halipahak noikor, sakahmaway minengneng to sapakangodo, itini i pisemseman a hecek mihadidi.’—Hipray 12:2; nengnengen ko 2Korinto 12:10; 2Tisalonika 1:4; 1Pitiro 2:21-23.
w09-CH 12/15 18 fiedac 12-13 fatac
Tahalifa to Pades, Kamayan Padadotoc Lipahak
12 Taneng 24:10 sanay: ‘I kapadesan iso a romiˈad ano malonay kiso i, wa malahdaw ko ˈicel iso.’ Roma sowal no Taneng: “O mararomay a tamdaw i, matoled ko pising ningra.” (Taneng 15:13) O roma Krisciyang matoleday ko falocoˈ, o nika toled no falocoˈ awaayto ko harateng sapiˈosiaw ato midotim to Kimad no Kawas, kasimaan sanayto ko pitolon. Palidlid sanay miliyas to salikaka, misiwatid to niyah. Mahapinangay, ano mapaekel no cariraw, o niyah ko marorayay.—Taneng 18:1, 14.
13 O roma sa i, ano raheker tawlik kita i, oyato kalipahakan no kaˈorip ko misamacayan a minengneng. Sowal ni Tafiti: ‘Kawas ako, tada maolah kako a midoedo to araaw Iso.’ (ˈOlic 40:8) Ano caka rihaday ko kaˈorip i, hamaan misakahmaw to nofalocoˈan a saali, misawad to nanaman i midokoay a demak. Soˈlinay haw i, midemak to sakalipahak no miso a demak, wa ngaˈay malahdaw ko cariraw. Pasowalay ci Yihofa kitaanan, micerid miˈosi to Kimad Ningra halo picalep mikingkiw, wa ngaˈayto malifok ko lipahak. (ˈOlic 1:1, 2; Yakop 1:25) Wa ngaˈay kita mikitini i Fangcalay Cudad ato saˈopo no Krisciyang tahacada to ‘masakahemekan a sowal,’ ho miliyawto talifak ko niyah, lipahak ko falocoˈ.—Taneng 12:25; 16:24.
Salicay no Miˈosiay Tamdaw
Sowal i Taneng 24:16: ‘Kina pito mapolin ko moecelay tamdaw, miliyaway lomowad. Tahapades ko tatiihay tamdaw, cowato pakalowad.’ Tatodong noniya sinael, soˈlin misaliyaliyaw mararaw ko cecay tamdaw, wa ngaˈayho milifok to sasodod no Kawas hokira?
Cowa ka haen ko tatodong noniya sinael. Tatodong i, soˈlin misaliyaliyaw tahapades ko tamdaw, wa ngaˈayho miliyaw a talifak.
Mihaenay, misowalan no Taneng 24:16 cowa ko mararaway, o misaliyaliyaway micada to sasetiˈ ato katoled. Itini ciraraway a hekal, misiˈayaway ko moecelay tamdaw to tatiih no tireng ato roma pasangaray, micadaay to sapalak no mirikecay alatek. Kawra wa ngaˈay pakasoˈlin cingra, o dadamaen no Kawas cingra, padama cingranan malaˈosi ko piremo to pasangaray. Haratengen: Kinapinaay pakaˈaraw kita ikor no mifekad ko demak iraay ko epoc no finawlan no Kawas hani? Pakasoˈlinay kita, ‘midamaan ni Yihofa ko mamapolin a tamdaw, palowad to mapaekelay a tamdaw.’—ˈOlic 41:1-3; 145:14-19.
Odoˈ no Sinael
w09-CH 10/15 12 fiedac
Salicay no Miˈosiay Tamdaw
Itini nolitengan, ano sakaciraramodaw ko faˈinayan ‘patireng to paro no lomaˈ,’ mamisongilaˈ a miharateng: “Maharekayto kako misaday han? Iraay ko ˈicel ako paririˈ to fafahi han? Ikor ano irato ko wawa, madangar ako midimokos han?” ˈAyaw no milikakawa cingra to paro no lomaˈ i, mamisaˈicel a matayal, misongilaˈ a midimokos to omah ato pinaloma. Mihaenay, o cecay mihongyakan sanay mihongyak tonini a sinael: ‘Edeng maharekto kiso misaday to omah, mihayi to ngangaˈay kiso misaday to sakaˈorip, ano ecaho i, akaho patireng to lomaˈ ato paro no lomaˈ.’ Onini a safalod matatodongayho to aniniay a Krisciyang han?
Matatodongay. Sakaciraramodaw a faˈinayan tatalaˈayaw misaday, ho ngaˈay mitamorong to ˈinorong no raramod. Ano tanoktokay ko tireng ningra i, oha mamisaˈicel a matayal. Oha mamalalok ko faˈinayan a matayal, midimokos to paro no lomaˈ, cowa ko saka fecol aca no paro no lomaˈ ko dadimokosen ningra. Patalahkalay ko Kimad no Kawas, ano caka pafeli ko faˈinayan to sakaˈorip no paro no lomaˈ, eca ka pirenec to saali no paro no lomaˈ i noolahan ato nofalocoˈan i, ikakaay toya cowa pakasoˈlin a tamdaw ko nika tatiih! (1 Timoti 5:8) Sahatiraay, o faˈinayan sapatirengaw to paro no lomaˈ a misaday i, licayenho ko niyah: “Maharekayto kako misaday to sapaririˈaw to paro no lomaˈ han? Malahciayto kako misaday, itini midokoay a demak a mikerid to paro no lomaˈ han? Oha mamisaˈicel kako to ˈinorong no tawki no lomaˈ, micerid malacafay to fafahi ato wawa mikingkiw to Fangcalay Cudad han?” Ihkalay ko sowal no Kimad no Kawas, tawki no paro no lomaˈ oha mamitamorong tonini kalimlaan a ˈinorong.—Limoˈot 6:6-8; Ifiso 6:4.
Mihaenay, makalimay sakaciraramodaw a kapah mamisongilaˈ misimsim to safalod no Taneng 24:27. Malecaday, o limocedan o mamiharateng to maharekayto ko niyah misaday hokira, ho ngaˈay mitamorong to ˈinorong no fafahi ato malo winaay. O kaemangayho a mararamoday ato misadayay sakaciraramodaw a kapah ato limocedan, ano sakaciwawaaw i, mamiharateng to i fafekangay a salicay. (Luka 14:28) Tooren ita ko hatiniay a sakayat no Kawas, o mamaliyas ko adihayay a roray ato cariraw, lipahak ko kaˈorip no paro no lomaˈ, milifok to sapalemed no Kawas.
SAKA 8 FOLAD 4-10 ROMIˈAD
O ODOˈ KO KIMAD NO KAWAS | TANENG 25
Sakadademaken ko Safalod, Matatodong ko Sasowalen
w15-CH 12/15 19 fiedac 6-7 fatac
Songilaˈen Misakadademak ko Inaneng a Somowal
6 Taneng 25:11 tano cecay a sapatinako a mitadtad, mipiliˈ to matatodongay a tatokian somowal o masakalimlaan. Sanay ko sinael: ‘O cecay sowal itini matatodongay tatokian a somowal, malecaday o ekim a lingko mitelian i linkim a piyal.’ O ekim a lingko na ngaˈangaˈayay aca nengnengen, telien i cihanaay a linkim a piyal mangalefay makapah a nengnengen. Malecaday, minaˈon a mipiliˈ to matatodongay a tatokian somowal, o mihadakan ita a sowal wa irato ko epoc. Samaanen ko kasomowal hani?
7 O sowal ita o misaalian no tao mitengil a sapakalalok alatek, kawra ano eca ka tatodong ko toki somowal i, cowato ko mamalaˈosi ko araaw alatek. (ˈOsien ko Taneng 15:23.) Nengnengen ko dotoc a tinakoan. Isaka 2011 miheca saka 3 folad, ˈatoray ato malodisay ko riyar miliyaway mipeleng to pina a na niyaroˈan i kakawalian no Dipong, mataˈlifay ko 15,000 a tamdaw mapatayay. Itiraay a Misawacayay Tamdaw ni Yihofa mafiyoray nonini a pades, kawra kamayan cangra mimamet to toki, tano Fangcalay Cudad mihinom to tamdaw. Kawrira, ˈalomanay mapadesay a tamdaw iraay ko halafinayto i mararaway pihakelongan, pakayni to Fangcalay Cudad cowa ka adihay ko kafanaˈan. Mahapinangay no itiraay salikaka, itiya pasayra i mapadesay a tamdaw milengo to patikol maˈorip a tokel, cowaho ko matatodongay a tatokian. Mansa, isalakatay cangra mihinom ato pakalalok to tamdaw, halo mikitini i Fangcalay Cudad mitadtad o awaay ko raraw a tamdaw hano tahalifa to mahaenay masakatalawan a pades.
w15-CH 12/15 21 fiedac 15-16 fatac
Songilaˈen Misakadademak ko Inaneng a Somowal
15 O ngihaˈ ita a somowal tada masakalimlaan. Damsay ko ngihaˈ somowal, cowa ko mamilowan to ˈicel no sasowalen ita, oha mamitemer to falocoˈ no tamdaw, wa ira ko ˈicel misalof. (Taneng 25:15) Ci Yis itini i kasaˈopoan no Nacali pasowal to ˈalomanay tamdaw i, fahkaˈay cangra mitengil to mitemeray a sowal ni Yis. (Luka 4:22) Samaan kita ngaˈ mahecad ci Yisan mitemer ko sasowalen hani? O pakayraan i, paihkalen ko sidaˈit ato mikangodoay, haratengenho ko nafalocoˈan no roma tamdaw. Tinakoen kinacecayay, maˈaraw ni Yis ko ˈalomanay mikotod cingranan, sapitengilaw to sasowalen ningra, iraay ko siniˈadaay a falocoˈ, ‘pakafanaˈ cangranan to adihayay a demak.’ (Marko 6:34) Hanaca soˈlin makapoˈi no tamdaw, cowa ka pacoli cingra to tao.—1 Pitiro 2:23.
16 Kita ato kananamanto a tamdaw masasowal, mangalefay ano masasowal to paro no lomaˈ anca widang i kasakopang i, alatek pafafesofesot sa ko sowal, telocto pasangaray damsay ko ngihaˈ a pasowal. Ci Yis cowa ka pakayni i kafanaˈ to nisawawaan no niyah, kasimaan sato ko ngihaˈ a pasowal cangranan. Kinacecayay, malacongisay ko nisawawaan to cima ko sakakaay, sapatinakoan ningra ko cecay wawa, damsayay a misalof cangranan. (Marko 9:33-37) O malohemay malitengay mirikec to salikaka i, ngaˈayay todongen ko taˈarawan ni Yis, padadotoc a damsay ko waywayan.—Kalatiya 6:1.
w95-CH 4/1 17 fiedac 8 fatac
Mikowad to Maolahay Falocoˈ ato Midemak to Ngaˈayay—Samaanen Misakadademak?
8 Pakayni pihodop to Kawas, o kahacecay tamdaw wa ngaˈay misaˈicel masasikowad to ciolahay a falocoˈ. Maedeng mikidatay ci Yis to ciolahay a falocoˈ no mitengilay. Maolahay cingra to tayal no Krisciyang, hanaca misaaretengay minengneng tonini a tayal. Sowal ningra o tayal no Krisciyang malecaday o kakaenen masakalimlaan. (Yohani 4:34; Loma 11:13) O mahaenay a fanekfek iraay ko ˈicel mifiyor to tamdaw. Malecaday, wa ngaˈay kiso patalahkal to lipahak mikitini tonini a tayal han? O laliyasen ita ko pahiyoay to niyah a sasowalen, wa ngaˈay paladaˈen ko salikaka i kasakopang to ngaˈayay nalifetan no niyah. Ano kalacafay kiso to tao mitosil i, padamaen ko tao mikitini pilasil to kasapaan ni Yihofa a demakan milifok to soˈliˈlinay a lipahak.—Taneng 25:25.
Odoˈ no Sinael
it-2-CH 443 fiedac
Damsayay
Damsay ko tamdaw i, samanen iraay ko pakasoˈlinay falocoˈ, iraay ko ˈicel. Cowa ka ranikay a marawraw, anca malahdaw ko inaneng a pafafidaˈ to demak. O saka eca ka damsay no tamdaw i, samanen caay ka rihaday, mafawfaway ko falocoˈ, cangoˈotay ko pakasoˈlinay falocoˈ, awaay ko hatokel. Sanay ko sowal no Taneng to cangoˈotay ko damsayay a tamdaw: “O karafirangay a tamdaw i, matiya o caay ka ciˈadipel a niyaroˈ, narikay a malowid no tao a mipeleng.” (Taneng 25:28) Madoloay mafiyor no tatiihay a harateng, papidemak cingranan to tatiihay a demak.
SAKA 8 FOLAD 11-17 ROMIˈAD
O ODOˈ KO KIMAD NO KAWAS | TANENG 26
Liyasen ko ‘Maapaay Tamdaw’
it-2-CH 1014 fiedac 8 fatac
ˈOrad
Kasasiroma no fafoladan. O kaciherangan ato kasienawan o kalimlaan no fafoladan i Mikiˈokan a Pala, sakoniya sowal i, o kaciherangan o kakedalan, kasienawan i, o kaˈoradan. (Nengnengen ko ˈOlic 32:4; Kolosay 2:11, ato roma pihongyak.) Satenokan no Kasepatan folad tangasa satenokan no Kamoetepan folad o pipanayan a tatokian, cowa ka rarid maˈorad. Mikitini Taneng 26:1, pipanayan a tatokian caka ngaˈay maˈorad. (Nengnengen ko 1Samuil 12:17-19.) Soˈlin itini kaˈoradan a tatokian, latekay macidalay, latekay mafaliyosay maˈoraday. Samanen itiniay kasienawan ko kaˈoradan, ano taˈangayay ko ˈorad i, sienaway ko romiˈad. (Icra 10:9, 13) Toniya tatokian, mahela ko pilimekan to ˈorad a kitiraan tada ngaˈayayto.—Isaya 4:6; 25:4; 32:2; Yopu 24:8.
w88-CH 4/1 30 fiedac 12 fatac
O Sapirikec Dipayalay ko Minaroˈan
12 Mahecad toya sowal itini Taneng 26:3, pakaynien i roma tamdaw, o pakidemay a sapirikec o masakalimlaan: “O sasetiˈ ko sapapihakelong to efa, o kadang i ngoyos ko sapapihakelong to lofa, o ˈoway ko sapapihakelong to maapaay a tamdaw.” Nolatekay, mihayian ni Yihofa ko Israil tamdaw tahacada to sapirikec no midemakan no niyah: ‘Nawhani pacoli cangra to limoˈot no Kawas, manaˈay cangra to sifanaˈ no Isatakaraway a Kawas. Orasaka, pakarorayen no Kawas cangra a pakatayal a mikedec to falocoˈ nangra, mapolin cangra i, awaay ko padamaay. I nika pades nangra i, mingitangit cangra ci Yihofaan, sakapaˈoripen Ningra cangra a paliyas nai kapadesan nangra.’ (ˈOlic 107:11-13) Nikawrira, o roma maapaay a tamdaw pakayni i sarikec ˈatekakay ko falocoˈ, mansa awaayto ko hapakayraan padama: “Kapoˈiyen a mitefoc i, maliyangay a ˈatekak a ˈatekak ko falocoˈ a tamdaw i, o mamatalifahal a matekop, caayto ko mamapaˈorip cingra.”—Taneng 29:1.
it-1-CH 186 fiedac 7 fatac
Mapiˈiway
Itini Taneng. Citanengay a Hongti ci Solomon sanay: “O patoroday i maapaay a tamdaw to saparatoh i, matiya o miketonay to waˈay no tireng a pakaroray to tireng.” Soˈlinay, O cima ko patoroday to maapaay a tamdaw a dademak i, mahecaday o pakarorayay to tireng no niyah. Mihaen i, o mihalakaan o mamalahorac, o mamidokaˈho to niyah.—Taneng 26:6.
Odoˈ no Sinael
it-2-CH 1013 fiedac
Maapaay a Tamdaw
O tamdaw ano ‘tano sowal no maapaay a tamdaw ko sapacaˈof cingranan,’ pahecad cingranan haratengay saan a pacieci to tao, ano mahaen malecaday o mihayiay to mararaway a sasowalen no maapaay tamdaw. Mihaenay, palimoˈotay ko Taneng aka pahecaden ko harateng to maapaay a tamdaw, ‘aka o sowal no maapaay a tamdaw ko sapacaˈof cingranan.’ O roma pakayraan i, Taneng 26:4, 5 sanay, ‘tano sowal no maapaay a tamdaw ko sapacaˈof cingranan,’ tatodong i, sapihapinangaw to mararaway ko mihadakan no maapaay a tamdaw a sasowalen, patalahkalen kora mararaway a demak, misawacay to caay ka tatodong ko sowal ningra.
SAKA 8 FOLAD 18-24 ROMIˈAD
O ODOˈ KO KIMAD NO KAWAS | TANENG 27
O Soˈlinay Widang Mahecaday o Hafay i Hakelong no ˈOrip Iso
Misalimlaay ci Yihofa to Misapoeneray a Tamdaw
12 Oya misapoeneray ko falocoˈ a tamdaw, wa naifalocoˈ a miakoˈid to limoˈot no tao. Tinakoen, ano itini i kasaˈopoan kiso a macacawmaˈ to salikaka, ikor pasowal ko cecay salikaka tisowanan, citingalay ko wadis iso. Tada mangodoay kiso, kawra wa miakoˈid kiso cingranan, hano caka kahenay a pasowal sanay ko harateng no miso. Mahecaday i, itini i matatodongay a toki, ano timoloay ko salikaka palimoˈot tisowanan, sapoeneren ita a micada ngaˈngaˈay, halo miakoˈid to nano demak nangra. O widang no mita cangra, cowa ko ˈada.—ˈOsien ko Taneng 27:5, 6; Kalatiya 4:16.
it-1-CH 962 fiedac 6 fatac
Fiyaw
Kawra, palimoˈotay ko Taneng pakasoˈlinen ko widang ato fiyaw iso, ano iraay ko saali i, kilimen cangra mipadang o citanengay konini: “Aka pitawal to widang iso ato widang no wama iso, ano malitemoh iso ko pades i, aka pingitangit i salikaka iso to pipadama ningra, nawhani ikaka no iraayay a salikaka iso ko nika ngaˈay no i fiyaway iso.” (Taneng 27:10) O tatodong no mitiliday i, oha mamisakareteng a minengneng to ifiyaway a widang iso, saalien a mipadang tisowanan, cowa koya iraayay a salawina (tinakoen o salikaka) ko misaalian to sapadama. Samanen o iraayay a salawina cowa ko tatangsol sa padama tisowanan, cowa ko mamahecad to ifiyaway iso a widang tangsol sa mipadang tisowanan.
Kaemangay Tamdaw, Makalimay Kiso Ira ko Masamaanay a Hatokel?
7 Mikitini ci Yoasan mananamay ita a cecay sapasifanaˈ i, mamalawidang kita to maolahay ci Yihofaan, pakahemekay Cingranan a tamdaw, samanen tawlikay ko pifiyor nangra kitaanan. Cowa ko sahto sa malecaday ko mihecaan a tamdaw ko hawidang ita, haratengen o mihecaan ni Yihoyata ikakaay ko taˈangay ci Yoasan, kawra o sangaˈayay a widang cangra. Itini pipiliˈ to widang i, ngaˈayay licayen ko niyah: ‘Ngaˈay cangra padama takowanan paˈicel to pakasoˈlin ci Yihofaan han? Pakalalokay cangra takowanan midofdof to palinian ni Yihofa han? Maolahay cangra milengo to pakayniay ci Yihofaan ato soˈlinay kimad a demak han? Mikangodoay cangra to palinian no Kawas han? Edengan o kaolahan ako mitengil a sowal ko sowal nangra, anca itini matatodongay a tatokian misalof takowanan han?’ (Taneng 27:5, 6, 17) Soˈlinay i, ano cowa ka olah ko widang iso ci Yihofaan, o cowato ko misaalian iso a widang cangra. Kawra ano maolahay ci Yihofaan ko widang iso, o sasalimlaen ko hatiniay a widang, o papadama cangra tisowanan!—Taneng 13:20.
Odoˈ no Sinael
w06-CH 9/15 19 fiedac 12 fatac
Kalimlaan no Taneng
27:21. Mapakahemek patalahkalay to masamaanay a tamdaw kita. Ano o misapoeneray a tamdaw kita, mapakahemek no tao i, o mamihayi ano o mananto ko malaˈosiay ita a demak i, o narorayan papanokayen ci Yihofaan, mapakalalok padadotoc a midoko to Kawas. Safeliten ko sowal i, ano misatakaraw ko waywayan, mapakahemek no tao i, wa misaidahidahi to niyahan.
SAKA 8 FOLAD 25-31 ROMIˈAD
O ODOˈ KO KIMAD NO KAWAS | TANENG 28
Taˈangayay ko Kasasiroma no Moecelay Tamdaw ato Tatiihay Tamdaw
w93-CH 5/15 26 fiedac 2 fatac
Masahciay ko Pidofdof Iso ci Yihofaan Han?
‘O moecelay a tamdaw i, matiya o layong a timolo caka ciˈangi.’ (Taneng 28:1) Iraay ko pakasoˈlinay falocoˈ nangra, misarocoday mitadiˈec to Kimad no Kawas, ano o mananto ko masiˈayaway a katalawan, timoloay eca ka ciˈangi cangra milahci to tayal ni Yihofa.
it-2-CH 462 fiedac 3 fatac
Sakacipinang to Demak a Inaneng
Miliyasay to Pipowaran no inaneng. Misafelitay to sarikec no Kawas a tamdaw, ano mamisaˈosi anca misahalaka, caay ka pisikol to Kawas. (Yopu 34:27) O mahaenay a tamdaw misamangahay to niyah, talimaan sanay to raraw no niyah, telocto caayto pakahapinang to demak. (ˈOlic 36:1-4) Soˈlin o midokoay ko niyah to Kawas saan cingra, kawra ono tamdaw a limoˈot ko midofdofan, caay pidofdof to safalod no Kawas. (Isaya 29:13, 14) Matatodongay ko sowal saan cingra, o kaacekan a demak no niyah o ‘misalamaay’ aca konini saan. (Taneng 10:23) Cowa ka tatodong ko waywayan, mariˈangay, maapaay, oya cowa ka ˈaraw no tamdaw a Kawas caay pakaˈaraw to raraw ningra, cowa ka fanaˈ to midemakan ningra tatiihay a demak saan miharateng, hato madoengay mapohaway ko Kawas. (ˈOlic 94:4-10; Isaya 29:15, 16; Yirimiya 10:21) Pakayni i midemakan ningra, mahecaday to somowalay cingra ‘awaay ci Yihofa’ (ˈOlic 14:1-3), silikor hananayto ko Kawas. Pakayni noka eca picada to sakayat no fangcalay safalod, caay ka tatodong ko pisaˈosi ningra to demak, mihapinang to icowaay ko mararaway, caayto ka ngaˈay matatodong ko misaˈosian.—Taneng 28:5.
it-2-CH 1181 fiedac 2 fatac
Madimadiay
Sakakiemelaw tahatolas madimadi ko tamdaw, cowa ka ngaˈay tiˈer han ko ˈicel no niyah, pairaen ko tanektekay pakasoˈlinay falocoˈ ci Yihofaan, sarocoden a mitadiˈec ko Kawas to iraay ko ˈicel a milidong. (ˈOlic 25:21) Mikiˈokay ko Kawas, o ‘mamalo sapatada’ no madimadiay a tamdaw Cingra, midipot to lalan nangra. (Taneng 2:6-8; 10:29; ˈOlic 41:12) O madimadiay a tamdaw ano mananto ko demak i, makalimay milifok to sakahemek ni Yihofa, mahapinangay ko patosokan, rihaday ko nikaˈorip, masadafdaf ko mirakatan a lalan. (ˈOlic 26:1-3; Taneng 11:5; 28:18) Maˈaraw ni Yopu ko moecelay a tamdaw pakayni saroero no mariˈangay tamdaw a misemsem, hanaca malacafay to tatiihay a tamdaw malaˈafo, fokil sanay a miharateng. Kawrira mikiˈokay ci Yihofa, cipinangay Cingra to masamaanay ko kaˈorip no moecelay tamdaw, mikiˈokay o hafay nangra o tahacelem a materek, o dadipayal cangra, tahacada to makapahay a minaroˈan. (Yopu 9:20-22; ˈOlic 37:18, 19, 37; 84:11; Taneng 28:10) O tinakoan ni Yopu paihkalay, madimadi ko demak ikakaay to kacihafay no lomaˈ, o hatiniay a tamdaw o masakalimlaan, citodongay to kakangodoen. (Taneng 19:1; 28:6) O teloteloc no madimadiay ko demak a tamdaw o malemeday (Taneng 20:7), iraay ko materekay no wama nangra a ngaˈayay taˈarawan, pakayniho makapahay a ngangan ato ngaˈayay midemakan no wama milifok to sapaˈdil.
Odoˈ no Sinael
w01-CH 12/1 11 fiedac 1 fatac
Talaˈayaw Paˈading to Nofalocoˈan a Adada
Pakidem ko pakasoˈlin to niyah. ˈAlomanay tamdaw ˈayaw no mafekad ko adada no falocoˈ, tanoktokay ko tireng no niyah saan miharateng. Pakayni to pikinsa to tireng, talimaamaan sanay cangra, cowa kalimlaan konini. Malecaday, roma tamdaw sanay a miharateng, halafinayto cangra malo Krisciyang, caay ko mamararaw ko niyah. Malawaay nangra mikinsa ko saali noˈadingoan, mapolinayto. Mihaenay i, paifalocoˈen ko sapalimoˈot no tarokos ci Pawlo, patalipaˈelalay to tamdaw aka a pakidem ko pakasoˈlin to niyah, sanay: ‘O tanektekayto ko nika tomireng ako, ya sanay ko harateng a tamdaw i, naˈonen ko demak to sakaecaaw ka polin.’ Mihaenay, o mamihayi kita to cowa ko malefotay tamdaw, ceriden a mikinsa ko noˈadingoan no niyah, ano mihaen i, o citanengay ko pidemak.—1 Korinto 10:12; Taneng 28:14.