Cima ko Kawas?

1. Misamaanay hano midoko kita to Kawas?

O Misangaˈay to maamaan ko soˈlinay Kawas. Awaay ko satapangan, awaay ko hererekan Ningra. (ˈOlic 90:2) O ngaˈayay lihaf no Fangcalay Cudad naitiraay i Cingranan. (1 Timoti 1:11) Pafeliay to ˈorip kitanan, mankora edengan Cingra ko dadokoen no mita.​—ˈOsien ko Paˈarawan 4:11.

2. O masamaanay a Kawas Cingra?

O ˈAdingoan ko tatirengan no Kawas, cowa ka ˈaraw no mita, ikakaay no mita ko ˈicel Ningra. (Yohani 1:18; 4:24) Kawra ngaˈayay pakaynien i nisangaˈan Ningra a maamaan a mafanaˈ Cingranan. Patinakoen, fangsisay a nanges ato makapahay a hana, pasifanaˈay kitanan, matomesay ko olah ato taneng no Kawas. O nika tataˈang no dohaw, pasifanaˈay kitanan to taˈangayay ko ˈicel no Kawas.​—ˈOsien ko Loma 1:20.

Pakayni piˈosi to Fangcalay Cudad mamafanaˈ kita to Kawas. Patinakoen, pasowalay ko Fangcalay Cudad to maanan ko kaolahan, maanan ko kanaˈayan no Kawas; samaanay ko hademak Ningra, samaanay Cingra ciharateng to tamdaw.​—ˈOsien ko ˈOlic 103:7-10.

3. Iraay ko ngangan no Kawas han?

Hay, iraay. Sanay ci Yis: ‘Wama niyam i kakarayan, nanay, mapaˈdil a mapafangcal ko ngangan no Miso.’ (Matay 6:9) Adihayay ko sapangangan to saaroˈan no Kawas, kawra cecayay aca ko tadangangan Ningra. Masasiromaay a sowal sasiromaay ko pipangihaˈ, no Amis a sowal i, ci “Yihofa” hananay.​—ˈOsien ko ˈOlic 83:18.

Adihayay a mihongyakan tano “Tapang” ato “Kawas” pakotay to ngangan Ningra. Kawra o nano litengan a Fangcalay Cudad, o ngangan no Kawas maedeng kina 7,000 a matilid. Ano pasifanaˈ ci Yis pakayni i Kawas i, marariday pakafanaˈ to ngangan no Kawas.​—ˈOsien ko Yohani 17:26.

Nengnengen ko ika Iraay ko Ngangan no Kawas Han?

4. Ciharatengay ci Yihofa kitanan han?

Adihayay ko pades i hekal, hato cowa ka ciharateng ci Yihofa kitanan sanay han? O sowal no tamdaw i, pasemseman no Kawas kita a palifet kitanan sanay, kawra cowa ka hatira.​—ˈOsien ko Yakop 1:13.

Misakaretengay ko Kawas kitanan, pafeliay to pasalat no mita a mipiliˈ. Coko sasalimlaen ita koniya pasalat, mipiliˈ a mihodop to Kawas han? (Yosuwa 24:15) Kawra mipiliˈay ko ˈalomanay midemak to tatiihay, pakaroray to roma a tamdaw. Maˈaraw ko tatiihay tamdaw tatiihay demak i, tada adadaay ko falocoˈ ni Yihofa.​—ˈOsien ko Satapangan 6:5, 6.

Ciharatengay ci Yihofa kitanan, mitokelay to lalipahak ko kaˈorip no mita. Mangataayto Cingra palaˈafo to tatiihay a maamaan. Pakihateren Ningra to cecay liyad ko pades, iraay ko lalangian Ningra. Itini saka 8 fedengan mamifanaˈ to manan kora lalangian.​—ˈOsien ko 2 Pitiro 2:9; 3:7, 13.

5. Misamaan kita miingid to Kawas hani?

Ciharatengay ci Yihofa to cecacecay a tamdaw, mitahidangay kitanan malo widang Ningra, mitolon Cingranan. (ˈOlic 65:2; 145:18) Ano misaˈicel kita midemak to kaolahan no Kawas i, maˈaraway Ningra. Soˈlin nolatekay cowa ka tadangaˈay ko demak ita, makahiyay Cingra misodod kitanan. Mankora, soˈlin cowa ka lefot kita, ngaˈayayho ira ko makedecay a kalalaˈed ato Kawas.​—ˈOsien ko ˈOlic 103:12-14; Yakop 4:8.

Pafeliay ci Yihofa to ˈorip kitanan, mankora o sakakaay a kakaolahen no mita Cingra. (Marko 12:30) Ano maolahay kiso Cingranan, misaˈicel a mafanaˈ Cingranan, mitengil to limoˈot Ningra i, o ngangaˈay a makedec ko kalawidang Cingranan.​—ˈOsien ko 1 Timoti 2:4; 1 Yohani 5:3.