1. O sapairasol no Fangcalay Cudad wa mifanaˈ kitaanan to maanan a demak hani?

CATO ka halafin, wa tahalifa ko finawlan no Kawas to maanan hani? Pakayni tonini, cowa ko cacisasa kita, samanen o sapairasol no Fangcalay Cudad wa mifanaˈ kitaanan o maanan a demak ko mamifekad no ikor. O cecay sapairasol paˈayaway to hademak no ciˈicelay mikowanay no hekal, oniya sapairasol matiliday i Taniil saka 11 fedengan, milengoay to tatosaay macacoˈayay a ˈicel, panganganan to ‘kaˈamisay hongti’ ato ‘katimolay hongti.’ O adihayay lalakaw noniya sapairasol malaˈosiayto, iraay ko lalangian ita pakasoˈlin o maˈosaway a sapairasol o mamalaˈosi maemin.

2. Mikitini Satapangan 3:15; Paˈarawan 11:7; 12:17 mahapinang ita, saka cipinangaw to sapairasol no Taniil, haratengen ko maanan hani?

² Saka cipinangaw to sapairasol no Taniil saka 11 fedengan, haratengen, o misowalan noniya sapairasol oyaan mifiyoray to finawlan no Kawas a mikowanay ko mitoroˈan. O finawlan no Kawas toniya hekal o mimingay, hano ˈodisen noniya mikowanay hani? Samanen o patosokan ni Satan ato miontingan ningra a hekal miˈodis i, oya midokoay ci Yihofaan ato mihakelongay ci Yisan a tamdaw. (ˈOsien ko Satapangan 3:15; Paˈarawan 11:7; 12:17.) Roma i, saka tatodongaw no kacipinang ita to sapairasol no Taniil, oha patatiriˈen to roma sowal no Fangcalay Cudad, samanen o sapairasol no Taniil malacecayay to roma sapairasol no Fangcalay Cudad.

3. Oniya lalakaw ato dotoc a lalakaw wa milengo to maanan hani?

³ Oniya lalakaw wa mitadtad to Taniil 11:25-39, nengnengen mikitini 1870 miheca tangasa 1991 miheca, o cima ko kaˈamisay hongti ato katimolay hongti, ato hano mamisalof kita to salakatay a pitadtad. O dotoc a lalakaw wa mitadtad to Taniil 11:40–12:1, nengnengen mikitini 1991 miheca tangasa i Armakiton mifekaday a demak, ato misalofan ita i salakat ko maanan a pitadtad. Ano minanam toniya tosa lalakaw i, ngaˈayay nengnengen ko coka no “Pahererekan a Tatokian Kaˈamisay Hongti ato Katimolay Hongti.” Salakat, nengnengen ita sasamaan mihapinang to kaˈamisay hongti ato katimolay hongti.

SAMAAN MIHAPINANG TO KAˈAMISAY HONGTI ATO KATIMOLAY HONGTI

4. Katimolay ato kaˈamisay a hongti iraay ko maanan toloay tahapinangan hani?

⁴ Pasowalan no coyoh ci Taniil: ‘Tayni kako, pasifanaˈ tisowanan o mamifekad i finacadan iso [finawlan no Kawas] a demak.’ (Taniil 10:14) Mihaenay, salakat o kaˈamisay hongti ato katimolay hongti itiniay i kaˈamis ato katimol no Israil a mikowanay. Kawra ikor no saka 33 miheca a Kocinsic, o finacadan no Israil cowato ko finawlan no Kawas. Mikitini Kocinsic misatapang, pahapinangan ni Yihofa ko ˈalomanay, edengan oya madimadiay mihakelong ci Yisan a tamdaw ko finawlan Ningra. Mihaenay, o adihayay lalakaw no Taniil saka 11 fedengan cowa pilingat to finacadan no Israil, milingatay to nisawawaan ni Yis. (Dmak 2:1-4; Loma 9:6-8; Kalatiya 6:15, 16) Pakayni kalingad no toki, mafalicay ko saaroˈan no kaˈamisay hongti ato katimolay hongti, kawra iraay ko cecay tahapinangan cowa ka falic. Saka 1, o pifiyor nangra to finawlan no Kawas, sakoniya sowal, itini pala nangra adihayay ko finawlan no Kawas, anca o pipalak nangra to finawlan no Kawas. Saka 2, o pakayraan no katimolay ato kaˈamisay hongti micada to finawlan no Kawas, paihkalay to ˈintehay cangra ci Yihofaan. Saka 3, malalifetay ko katimolay ato kaˈamisay a hongti.

5. Mikitini saka 2 hahekalan tangasa 1870 miheca, iraay ko kaˈamisay hongti ato katimolay hongti han? Tadtaden.

⁵ Mikitini saka 2 hahekalan misatapang, matongalay ko makaniway a Krisciyang micomod i kasakopang, tano mararaway a kimad cangra mitahepo to soˈlinay kimad no Fangcalay Cudad. Mikitiya misatapang tahini 1870 miheca, cowa ka likakawaen ko soˈlinay midoko to Kawas a tamdaw. O makaniway Krisciyang malecaday ciwarakay emi kalikiay a matongal, hato cowa ka hapinang no tamdaw o cima ko soˈlinay a Krisciyang. (Matay 13:36-43) Mahapinangay ita, oya tatokian awaay ko ‘kaˈamisay hongti’ anca ‘katimolay hongti.’ Samanen mikitini saka 2 hahekalan tahini 1870 miheca, cowa ka likakawaen ko soˈlinay midoko to Kawas a tamdaw, mansa awaay ko mikowanay to mamiˈodis to finawlan no Kawas. Ikor no 1870 miheca, masadakayto ko kaˈamisay hongti ato katimolay hongti. Hano mafanaˈ kita tonini hani?b

6. I hacowaay miliyaw malikakawa ko finawlan no Kawas? Tadtaden.

⁶ Itini 1870 miheca, malikakawaay haca ko finawlan no Kawas. Toya miheca, ci Loso ato roma tamdaw mikapotay to minanamay to Fangcalay Cudad a kasakapot. Oya mipairasolan no Fangcalay Cudad i ˈayaw no tomireng ko Misiya Hongti Kitakit ‘misadayay to lalan’ a sikawdan. (Malaki 3:1) Malikakawaayto ko finawlan no Kawas a midoko to Kawas! Mihaenay, itiya iraay ko mifiyoray to finawlan no Kawas a mikowanay hokira? Nengnengen ita hena.

O CIMA KO KATIMOLAY HONGTI?

7. Tahira i Saka Cecay Lalood no Hekal, cima ko ‘katimolay hongti’ hani?

⁷ 1870 miheca, o sakakahaday ko pala no Ikok, iraay ko ciˈicelay a sofitay. O Ikok oya pairasolan no Taniil a ‘mimingay waˈa,’ o milowidan nira a toloay waˈa o Frans, Sipanya ato Helan. (Taniil 7:7, 8) Tahira i Saka Cecay Lalood no Hekal, o ‘katimolay hongti’ ko Ikok. Toniya tatokian, malo sacihafayay a kitakit ko Padaka, misatapangay makakadep to Ikok.

8. Itini pahererekan a tatokian, o cima ko ‘katimolay hongti’ hani?

⁸ Itini Saka Cecay Lalood no Hekal, malacafayay ko Ikok ato Padaka milood. Mikitiya misatapang, o Ikok ato Padaka malo ciˈicelay mikowan toniya hekal. Malecad o paˈayawan no Taniil, iraay ko ‘ciˈicelay a sofitay’ nangra. (Taniil 11:25) Itini pahererekan a tatokian, o Ikok ato Padaka o ‘katimolay hongti.’c Mihaenay, o cima ko ‘kaˈamisay hongti’ hani?

O CIMA KO KAˈAMISAY HONGTI

9. I hacowaay masadak ko ‘kaˈamisay hongti’ hani? Samanay malaˈosi ko Taniil 11:25 hani?

⁹ Itini saka 2 miheca no patireng ci Loso ato roma salikaka to kapot no micekiway to Fangcalay Cudad, itini 1871 miheca, miliyaway masadak ko ‘kaˈamisay hongti.’ Toya miheca, ikor no malowid ko pina pala no Iwropa, tomirengayto ko Towic a kitakit. Itini dotoc pina poloˈ miheca, macowatay ko mikowanan no Towic a pala, maeminay ko Afrika ato itiniay Taypingyang a pala, misatapang milengat to saaroˈan no Ikok. Patirengay ko Towic to ciˈicelay a sofitay, iraay ko ciˈicelay no riyar a sofitay, itini Saka Cecay Lalood no Hekal mikidatay to lalood.—ˈOsien ko Taniil 11:25.

10. Samanay malaˈosi ko Taniil 11:25b, 26 hani?

¹⁰ Dotoc milengoay ko sapairasol no Taniil to teloc no Towic ato sofitay no Towic. Sanay, o kaˈamisay hongti ‘cowa ko papakatapiˈ cingra, samanen iraay ko misaˈefitay cingraanan, oya komaenay to tahka ningra ko mamitekop cingraanan.’ (Taniil 11:25b, 26a) Itini lintad ni Taniil, o komaenay to tahka no hongti a tamdaw mahawpay ko ‘matayalay i hongti’ a ˈaˈideman. (Taniil 1:5) Mihaenay, o cima ko komaenay to tahka no kaˈamisay hongti? Oya ˈaˈideman no Towic, mahawpay ko tapang no sofitay ato talicayan, salikor cangra ko mipelengay to lekakawa no Towic.d O sapairasol no Taniil somowalayho to teloc no pilood no kaˈamisay hongti to katimolay hongti, sowal sa o sofitay no kaˈamisay hongti ‘malecad o maˈaroray no cedas, wa adihay ko mapatayay.’ (Taniil 11:26b) Itini Saka Cecay Lalood no Hekal, mapadikay ko sofitay no Towic, adihayay ko mapatayay. O adihay no mapatayay a tamdaw toniya lalood awaayho i salakat.

11. Pakayni Taniil 11:27-30a, midemakay to maanan ko kaˈamisay hongti ato katimolay hongti hani?

¹¹ Masowal ko ˈayaw no Saka Cecay Lalood no Hekal a pakayraan, sowal i Taniil 11:27, 28 sanay, o kaˈamisay hongti ato katimolay hongti ‘soˈlin malacafayay maroˈ i cecay eto, kawra masasimangahay,’ somowalayho ‘adihayay ko mitalingan a hafay’ no kaˈamisay hongti. Itini likisi mahaenay ko demak, o potal no Towic ato Ikok hato dipayalay, kawra itini 1914 miheca malalooday, hanaca itiya malo saka tosa a cihafayay kitakit ko Towic. Ikor, malecad o paˈayawan no Taniil 11:29, 30a, milooday ko Towic to ‘katimolay hongti,’ kawra salikor mapadikay cangra.

TOSA HONGTI MIˈODISAY TO FINAWLAN NO KAWAS

12. Itini Saka Cecay Lalood no Hekal i, midemakay to maanan ko kaˈamisay hongti ato katimolay hongti hani?

¹² Ikor no 1914 miheca, o kasasongtol no kaˈamisay hongti ato katimolay hongti malingaday ko rokirok, matongalay ko pipalak nangra to finawlan no Kawas. Tinakoen, itini Saka Cecay Lalood no Hekal, o mikowanay no Towic ato Ikok mipalakay to manaˈayay mirienang milood a Krisciyang. O mikowanay no Padaka mipalitay to kakeridan no mitosilay a salikaka, oniya demak matatodongay to sapairasol no Paˈarawan 11:7-10.

13. Ikor no 1933 miheca, mangalef itini Saka Tosa Lalood no Hekal, midemakay to maanan ko kaˈamisay hongti hani?

¹³ Ikor no 1933 miheca, mangalef itini Saka Tosa Lalood no Hekal, haratengay sanay ko kaˈamisay hongti a miˈodis to finawlan no Kawas. Malecad paˈayawan no Taniil, cifadangalan ko Naci i Towic i, ci Sitele ato sikawdan ningra maedeng 1500 ko mipatayan a salikaka, mipalitanho ko pina patek a salikaka i pitepengan kapalitan. Cowa ko ‘pakaditay to sano pololay a fangcalay sefi no Kawas aca, palahdawayho to patoˈayaay a limasmas,’ mikeceng to mitosilay a tayal ita. (Taniil 11:30b, 11:31a) Somowalayho ci Sitele papalaˈafo to polong a Misawacayay Tamdaw ni Yihofa i Towic.

FAELOHAY A KAˈAMISAY HONGTI MASADAKAYTO

14. Ikor no Saka Tosa Lalood no Hekal, cima ko malo faelohay a kaˈamisay hongti hani? Tadtaden.

¹⁴ Ikor no Saka Tosa Lalood no Hekal, maˈafasay no Suwiay ko nano pala no Towic. Malecaday to mikowanay no Naci, ano pakakaen no tamdaw minengneng ko midokoay to Kawas to pidofdof to mikowanay, o Suwiay ato kapot ningra misaˈicelay a mipalak cangraanan. Mihaenay, o Suwiay ato kapot ningra malo faelohay a kaˈamisay hongti.

15. Mahererek ko Saka Tosa Lalood no Hekal, midemakay to maanan ko faelohay kaˈamisay hongti hani?

¹⁵ Caka halafin mahererek ko Saka Tosa Lalood no Hekal, o faelohay kaˈamisay hongti misatapangay miˈodis to finawlan no Kawas. O Suwiay ato kapot ningra mikecengay to mitosilay a tayal no mita, paholiwayho to pina patek a Misawacayay Tamdaw ni Yihofa tayra i Sipoliya, malecaday o sowal no Paˈarawan 12:15-17. Itini polong no kahererekan a tatokian, o mifekadan no kaˈamisay hongti a sapalak malecaday o makakoyolay a ‘ˈalo,’ kawra cowa paselaˈ ko finawlan no Kawas a midoko to Kawas.e

16. Samanay malaˈosi ko Taniil 11:37-39 hani?

¹⁶ ˈOsien ko Taniil 11:37-39. O kaˈamisay hongti hano ‘cowa pisikol to Kawas no lalitengan’ hani? O mikowanay no Suwiay tano masakenaay a pakayraan milowan to ˈicel no pihakelongan, tinakoen itini 1918 miheca milasilay ko mikowanay to cecay sarikec, hato pasifanaˈay ko picudadan to awaay ko Kawas sanay a sasowalen. Samanay ko kaˈamisay hongti ‘panokay to ˈdil i polol a kawas’ hani? Sapatanoktokaw to ˈicel, adihayay ko mapalakay a payci no Suwiay micowat to sofitay, misangaˈ to adihayay kakako a sapilood a lalosidan. Adihayay a mihecaan, o kaˈamisay hongti ato katimolay hongti adihayayto ko sapilood a lalosidan, maedengay sapalaˈafo to pinaay poloˈ walwalan a tamdaw.

MAKAKADEPAY KO TOSA HONGTI

17. O manan ko ‘papalahorac a kateliiyan a dafong’ hani?

¹⁷ Soˈlin halafinayto malalifet ko kaˈamisay hongti ato katimolay hongti, kawra itini cecay kalimlaan a demakan makakadepay cangra, ‘patireng toya papalahorac a kateliiyan a dafong.’ (Taniil 11:31) Oniya ‘kateliiyan a dafong’ o Makomoday Kitakit ko mitoroˈan.

18. Hano o ‘kateliiyan a dafong’ ko Makomoday Kitakit hani?

¹⁸ O ‘kateliiyan a dafong’ ko Makomoday Kitakit, samanen oniya lekakawa somowalay to papakadangal to edengan o Hongti Kitakit no Kawas ko papakadangal a demak, paira to dipayal no hekal. Paˈayaway ko Fangcalay Cudad oniya kateliiyan a dafong wa ‘paira to sakalahorac,’ samanen o Makomoday Kitakit wa palaˈafo to polong a mararaway pihakelongan no ikor.—Nengnengen ko coka “Pahererekan a Tatokian o Kaˈamisay Hongti ato Katimolay Hongti.”

HANO TIKOLEN MIHARATENG KONIYA DEMAK?

19-20. (1) Tikolen miharateng ko mafekaday a demak, mahapinangay ita to maanan? (2) Dotoc a lalakaw wa pacaˈof to maanan salicay?

¹⁹ Mitikolay miharateng to mafekaday a demak mikitini 1870 miheca tangasa 1991 miheca, mahapinangay ita, toniya tatokian pakayniay kaˈamisay hongti ato katimolay hongti a sapairasol matatodongayto. Pakasoˈlinay kita, o maˈosaway a sapairasol o mamalaˈosi a maemin.

²⁰ 1991 miheca, maliwasakayto ko Suwiay. Mihaenay, ikorto cima ko kaˈamisay hongti hani? Dotoc a lalakaw wa pacaˈof toniya salicay.

1-2. Oniya lalakaw wa mitadtad to maanan hani?

ANINI, adihay adihayay ko wacay to ngangaˈay pakasoˈlin kita, itiniayto pahererekan no salikoray lintad kita a maˈorip. Caka halafin, ci Yihofa aci Yis wa palahdaw to kihcod misafelitay to Hongti Kitakit no Kawas a mikowanay. Kawra ˈayaw nonini, o kaˈamisay hongti ato katimolay hongti wa miˈodis to finawlan no Kawas, padadotocho a malalifet.

² Oniya lalakaw wa mitadtad to sapairasol no Taniil 11:40—12:1, minengneng to o cima ko aniniay kaˈamisay hongti, ato hano ngaˈay ira ko pakasoˈlinay falocoˈ ita misiˈayaw to sapalifet noikor.

MASADAKAYTO KO FAELOHAY KAˈAMISAY HONGTI

3-4. O cima ko ‘kaˈamisay hongti’ anini hani? Hano mihaen ko sowal hani?

³ Ikor no maliwasak ko Suwiay i 1991 miheca, milifokay to ‘miming a sadama’ ko itiraay a salikaka, toniya tatokian ngaˈayay pasalat cangra midoko to Kawas ato mitosil. (Taniil 11:34) Teloc to, itini mikowanan no Suwiay a kilac, kalikiay macakat ko ˈaloman no mitosilay, pinaayto poloˈ a emang. Kawra mataˈlif ko cecay liyad, o Rowasiya ato kapot ningra malo kaˈamisay hongti. Mahaen o malengoay i fafekang a lalakaw, saka cipinangaw toniya mikowanay o kaˈamisay hongti anca o katimolay hongti hokira, haharatengen ko tolo a lalangian: Saka 1, oniya mikowanay misongtolay ko pifiyor to finawlan no Kawas hokira. Saka 2, oniya mikowanay misaˈadaay ci Yihofaan ato finawlan Ningra hokira. Saka 3, oniya mikowanay malalifetay to misaˈadaay a hongti hokira.

⁴ Hano o kaˈamisay hongti hanko Rowasiya ato kapot ningra hani? Lalangian i: (1) Misongtolay ko pifiyor nangra to finawlan no Kawas, mahawpay ko pikeceng to mitosilay a tayal, ato mipalak to masacaˈolay masaemangay a Misawacayay Tamdaw ni Yihofa i kitakit nangra. (2) Oniya mipalakay a waywayan nangra paihkalay to misaˈadaay cangra to Kawas ato finawlan no Kawas. (3) Padadotocay cangra malalifet to katimolay hongti, o Ikok ato Padaka Ciˈicelay Mikowan to Hekal. Dotoc a lalakaw wa milengo, o Rowasiya ato kapot ningra midemakay to maanan, paihkal to o kaˈamisay hongti cangra anini.

MASASONGTOLAY KO KAˈAMISAY HONGTI ATO KATIMOLAY HONGTI

5. Itini Taniil 11:40-43 milengoay to maanan a tatokian hani? Mitadtaday to maanan hani?

⁵ ˈOsien ko Taniil 11:40-43. Oniya sapairasol mahawpay ko pahererekan a tatokian, mitadtaday to kalalifet no kaˈamisay hongti ato katimolay hongti, somowal to ‘kasasongtol’ nangra i pahererekan a tatokian, sakoniya sowal ‘mifekaday ko kasasongtol.’—Taniil 11:40 ato roma pihongyak.

6. O kaˈamisay hongti ato katimolay hongti samanay ‘masasongtol’ hani?

⁶ O kaˈamisay hongti ato katimolay hongti malaˈafasay to tadamaanay saaroˈan toniya hekal. Tinakoen, ikor no Saka Tosa Lalood no Hekal, o Suwiay ato kapot ningra miˈemetay to adihayay pala no Iwropa, mapacieciay ko Ikok ato Padaka mikomod a patireng to kapot no sofitay, pangangan to ‘Pitasiyang makakiˈokay lekakawa.’ Adihayay ko mapalakay no kaˈamisay hongti a payci, kalalifet to katimoloay hongti a misaday to sapilood a dafong. Itini lalood no Afrika, Asia ato Latin Amilika, na midamaay ko kaˈamisay hongti to mitowakangay to katimolay hongti a sofitay. Caka halafin, o Rowasiya ato kapot ningra micowatay to ˈicel i paro no kakarayan. Tano wangcan a maˈaˈodis to Ikok ato Padaka, mikokotayho to tao mipalakay to pikowan ato kicay no niyah. Toniya tatokian, malecad o sapaˈayaw ni Taniil, kaˈamisay hongti padotocay a miˈodis to finawlan no Kawas.—Taniil 11:41.

KAˈAMISAY HONGTI ‘MICOMODAY I FANGCALAY PALA’

7. O maanan ko ‘Fangcalay pala’ hani?

⁷ Sowal i Taniil 11:41 wa ‘micomod i Fangcalay pala’ ko kaˈamisay hongti. O maanan ko ‘Fangcalay pala’ hani? Nolitengan o sera no Israil ‘lalomaˈ no sera o safangcalay.’ (Icikil 20:6) Hano mikiriwiˈ a makapah koniya sera, samanen o maroˈay itira a tamdaw o midokoay ci Yihofaan. Kawra mikitini saka 33 miheca kocinsic misatapang, ‘fangacalay pala’ cowato ko soˈlinay pala ko mitoroˈan, samanen itiniay i cowa kalecad a kitakit ko kitiraan no finawlan no Kawas. O aniniay ‘Fangcalay pala’ o fafekangay no sera a likakawa ni Yihofa, i lalomaˈay a tamdaw midemakay to masakenaay a tayal, mahawpay ko masaˈopo ato mitosil a midoko to Kawas.

8. O kaˈamisay hongti ‘micomod i Fangcalay pala’ manan ko tatodong hani? Samanay malaˈosi koniya demak hani?

⁸ Itini pahererekan a tatokian, o kaˈamisay hongti kinapinaay ‘micomod i Fangcalay pala.’ Tinakoen, ikor no malo kaˈamisay hongti ko Naci a Towic mipalakay a mipatay to finawlan no Kawas, itini Saka Tosa Lalood no Hekal matongalay ko kariˈang. Mahererek ko saka tosa lalood, o Suwiay ato kapot ningra malo kaˈamisay hongti, mipalakay cangra to finawlan no Kawas, paholiw to salikaka ita tayra i Sipoliya.

9. Toniya pina miheca, o Rowasiya ato kapot ningra samanay ‘micomod i Fangcalay pala’?

⁹ Caka halafin, o Rowasiya ato kapot ningra micomoday i ‘Fangcalay pala.’ 2017 miheca, mikecengay ko mikowanay no Rowasiya to tayal no finawlan no Kawas, mipalitayho to salikaka ita. Mikecengay cangra to mitepangan ita a cudad, mahawpay ko Faelohay Hekal Mihongyakan Fangcalay Cudad, miˈafasayho to Fenpo, kasaˈopoan ato pitaykayan i Rowasiya. Mihaenay, itini 2018 miheca o Malohemay Malitengay i Congpo paihkalay, o Rowasiya ato kapot ningra o faelohay a kaˈamisay hongti. Soˈlin pakidem ko macadaay no finawlan no Kawas a sapalak, kamayan manaˈay mitowakang to mikowanay. Wa mitoor kita to limoˈot no Fangcalay Cudad, patado to ‘polong ˈakawangay ko saaroˈan a tamdaw’ mitolon, ano mifiyor ko saˈosi nangra to pasalat ita a midoko i, mamitongal ko pihaen to demak.—1 Timoti 2:1, 2.

O KATIMOLAY HONGTI WA PALAˈAFOEN NO KAˈAMISAY HONGTI HAN?

10. O katimolay hongti wa palaˈafoen no kaˈamisay hongti han? Tadtaden.

¹⁰ O misowalan no Taniil 11:40-45 o demak no kaˈamisay hongti, sakoniya sowal o mamalaˈafo no kaˈamisay hongti ko katimolay hongti hokira? Cowa. Samanen ano palahdawen ni Yihofa aci Yis ko polong a mikowanay no hekal i, kamayan materek ko katimolay hongti. (Paˈarawan 19:20) Hano mafanaˈ kita tonini hani? Nengnengen ko pitadtad no Taniil ato Paˈarawan.

11. Itini i Taniil 2:43-45 a sapairsol mitadtaday to maanan hani? (Nengnengen ko papotalay a coka.)

¹¹ ˈOsien ko Taniil 2:43-45. Milengoay ci Taniil to cecay taˈangayay samiyay, o kahacecay no samiyay o cowa kalecad a fodawan ko sapisangaˈ, mitaypiyaway to cowa kalecad lintad mifiyoray to finawlan no Kawas a mikowanay. O ooˈ no taˈangayay samiyay o marad ato ditaˈ ko sapisangaˈ, mitaypiyaway to salikoray ciˈicelay mikowanay, o Ikok ato Padaka Ciˈicelay Mikowanay to Hekal. Mitadtaday koniya sapairasol, ano palaˈafo ko Hongti Kitakit no Kawas to polong a mikowanay i, o Ikok ato Padaka Ciˈicelay Mikowanay to Hekal iraayho a materek.

12. O saka pito a fongoh no ˈaˈadopen mitaypiyaway to maanan hani? Hano kalimlaan konini hani?

¹² Masowalay no tarokos ci Yohani ko pina mifiyoray to finawlan no Kawas a ciˈicelay mikowanay. Itini mapolosi maˈaraway ningra ko pitoay ko fongoh a ˈaˈadopen, oniya pito fongoh mitaypiyaway toniya ciˈicelay mikowanay. O saka pito a fongoh o Ikok ato Padaka Ciˈicelay Mikowanay to Hekal. Kalimlaan konini, samanen oniya ˈaˈadopen cowato ka lomahad ko roma fongoh, sakoniya sowal, tiya mikerid ci Kristo to kakarayan a sofitay palaˈafo to ˈaˈadopen i, kamayan a mikowan ko Ikok ato Padaka.b—Paˈarawan 13:1, 2; 17:13, 14.

CATO KA HALAFIN WA MIDEMAK KO KAˈAMISAY HONGTI TO MAANAN?

13-14. O cima ko ‘Makok a kok’ hani? O ‘Makok a kok’ hano miˈodis to finawlan no Kawas hani?

¹³ O mitilidan ni Taniil a sapairasol ngaˈayay mahapinang ita, ˈayaw no malaˈafo ko kaˈamisay hongti ato katimolay hongti wa mifekad ko maanan a demak. O mitadtadan no Icikil 38:10-23; Taniil 2:43-45; 11:44-12:1; Paˈarawan 16:13-16, 21 itiniay i malecaday tatokian mifekad a demak, ano mahaenay, o kalingad no demak wa mahaen o milengoan i laeno alatek.

¹⁴ Ikor no mifekad ko taˈangayay padiing i cecay tatokian, ‘polong no hekal a hongti’ wa makakadep. (Paˈarawan 16:13, 14; 19:19) O makakadepay a kalo kitakit o misowalan no Fangcalay Cudad a ‘Makok a kok.’ (Icikil 38:2) Oha mamiˈodis cangra to finawlan no Kawas. Hano mihaen ko demak nangra hani? Itini mapolosi maˈaraway ni Yohani ko sano ˈikayay a soeda materakay nai kakarayan, patefoay i tireng no ˈada no Kawas. Oniya sano soedaay a pades mitaypiyaway to mihadakan no finawlan no Kawas sapisawkit a lihaf. Pakayniay toniya lihaf alatek, sapiˈodisaw to finawlan no Kawas, ciharateng to sapalahdawaw cangraanan.

15-16. (1) O misowalan no Taniil 11:44, 45 a demak o maanan hani? (2) O kaˈamisay hongti ato palaˈosiay to ‘kok’ a romaroma kitakit wa samaan ko hateloc hani?

¹⁵ Oniya pakidemay a sapisawkit a lihaf, ato mifekadan no ˈada a saˈodis o misowalan no Taniil 11:44, 45 (ˈOsien.) a demak alatek. Sowal ni Taniil, ‘mikitiniay kawali ato kaˈamis a lihaf’ wa pacekid to kaˈamisay hongti, mikidat to ‘taˈangayay ngolaw’ ningra, ciharateng ‘mipatay to ˈalomanay tamdaw.’ Misowalan no sinael ‘ˈalomanay tamdaw’ o finawlan no Kawas ko mitoroˈanc, O misowalan ni Taniil itini o salikorayto a macadaay nangra a saˈodis alatek.

¹⁶ O kaˈamisay hongti ato kapot ningra ano malacafay a miˈodis to finawlan no Kawas i, wa mangolaw ko Kawas, hato mifekad ko Armakiton a lalood. (Paˈarawan 16:14, 16) Itiya, wa malaˈafo ko kaˈamisay hongti, ‘awaay ko papaˈorip cingraanan.’ (Taniil 11:45) Palaˈosiay to ‘kok’ a romaroma kitakit wa malecad ko hateloc.

17. O misowalan no Taniil 12:1 cima ko kasapaan a ˈaˈideman ci Mikail hani? O sowal no sinael wa midemak cingra to maanan hani?

¹⁷ Dotoc, wa mitadtad ko Taniil to sasamaan a malaˈafo ko kaˈamisay hongti ato kapot ningra, ato samaan kita a malidong. (ˈOsien ko Taniil 12:1.) O maanan ko tatodong noniya sinael hani? Ci ‘Mikail’ o roma a ngangan no hongti ita ci Yis Kristo. Mikitini 1914 miheca tomireng ko Hongti Kitakit no Kawas i kakarayan misatapang, ‘padotocay tomireng a miˈading’ cingra to finawlan no Kawas. Cato ka halafin, wa itini Armakiton a lalood a ‘tomireng’ cingra, tatodong i papalaˈafo to ˈada no Kawas. Itiya, o ‘pasangaray a tatokian’ wa mahererekto. Panganganan no Paˈarawan koniya tatokian to ‘taˈangayay padiing.’—Paˈarawan 6:2; 7:14.

O NGANGAN ISO WA ‘MATILID I PIHARATENGAN A CUDAD’ HAN?

18. Ano samaanto ko mifekaday a demak noikor, hano cowa ko mamatalaw kita hani?

¹⁸ Ano samaanto ko mifekaday a demak noikor, cowa ko mamatalaw kita, samanen pakasoˈlinay kita to sowal no Taniil ato Paˈarawan, ci Yihofa aci Yis itini taˈangayay padiing wa milidong to madimadiay Cangraanan a tamdaw. Sowal ni Taniil oya malidongay a tamdaw sahtoay ‘matiliday ko ngangan i piharatengan cudad.’ (Taniil 12:1) Samaan ngaˈ ‘matilid ko ngangan i piharatengan cudad’ hani? Oha mamisawacay kita mihakelongay ko niyah to tofor a siri no Kawas, patafang to tireng to Kawas micada to paputisem. (Yohani 1:29; 1 Pitiro 3:21) Oha mamisarocodho kita padama to tao mafanaˈ ci Yihofaan, paihekal to midopoay ko niyah to Hongti Kitakit no Kawas.

19. Aniniho misamaan ko hademak ita? Misamanay?

¹⁹ Aniniho paˈicel to pakasoˈlinay falocoˈ ci Yihofaan ato likakawa Ningra! Aniniho midopo to Hongti Kitakit no Kawas! Mihaen, ano mapalaˈafo no Kawas ko kaˈamisay hongti ato katimolay hongti i, oha mamalidong kita.

Misilsilan no coka ko cowa kalecad a sapairasol no Fangcalay Cudad, i lalomaˈ milengoay to malecaday tatokian mifekad a demak. Oniya sapairasol misawacayay to itiniay kita i ‘pahererekan a tatokian’ a maˈorip. —Taniil 12:4.

• 

  

  Sinael Paˈarawan 11:7; 12:13, 17; 13:1-8, 12

  Sapairasol Itini lalomaˈ no 3,000 miheca, ‘ˈaˈadopen’ padadotocay mariˈang ko demak i fafekang no sera. Itini pahererekan tatokian, madokaˈay ko saka pito a fongoh no ˈaˈadopen, maadahayto, orato mikotoday ko ‘polong tamdaw no hekal’ to ˈaˈadopen. Misaka dademakan ni Satan koniya ˈaˈadopen ‘milood to maˈosaway a tamdaw.’

  Matatodongay Ikor no Taˈangayay Lenlen, masadakayto ko mitowakangay to Kawas a mikowanay. Ikor no 3,000 miheca, ciˈicelay ko Ikok toni hekal, kawra itini Saka Cecay Lalood no Hekal mapadikay. Ikor makakadepay ko Ikok ato Padaka, miliyaway ciˈicel. Itini pahererekan a tatokian, misaka dademakan ni Satan ko mikowanay no hekal mipalak to finawlan no Kawas.

• 

  Sinael Taniil 11:25-45

  Sapairsol Itini pahererekan a tatokian, malalifetay ko kaˈamisay hongti ato katimolay hongti.

  Matatodongay O Towic macacoˈayay to Ikok ato Padaka ciˈicelay mikowanay to hekal. 1945 miheca, o Suwiay ato kapot ningra malo kaˈamisay hongti. 1991 miheca maliwasakay ko Suwiay, ikor o Rowasiya ato kapot ningra malo kaˈamisay hongti.

• 

  Sinael Isaya 61:1; Malaki 3:1; Luka 4:18

  Sapairsol ˈAyaw no tomireng ko Misiya Hongti Kitakit, miocoran ni Yihofa ko ‘tarokos’ malingad ‘misaday to lalan.’ Satapangay ko ‘tarokos’ ‘pasayra madaˈmaˈay a tamdaw milasil to ngaˈayay lihaf.’

  Matatodongay 1870 miheca, ci Loso ato roma tamdaw misatapangay micekiw to Fangcalay Cudad, adihayay ko makilimay a soˈlinay kimad. 1881 miheca, mahapinang nangra oha mamilasil to ngaˈayay lihaf ko sikawdan no Kawas, orato mitepangay to ‘Mitahidang to 1,000 a Mitosilay’ ato ‘Mapasimal Mitenak to Soˈlinay Kimad’ a lalakaw.

• 

  Sinael Matay 13:24-30, 36-43

  Sapairasol Mikosamay ko ˈada i omah to ciwarakay a sapaloma no emi, ciwarakay a emi ato ngaˈayay a emi malacafayay lomahad, pasangaray hapinangen. Tahira pipanayan a tatokian, itiyaay palicinowas to ciwarakay emi ato ngaˈayay a emi.

  Matatodongay 1870 miheca misatapang, kasasiroma no soˈlinay ato makaniway a Krisciyang ihkalayto mahapinang. Itini pahererekan a tatokian, misaˈopoan ko soˈlinay Krisciyang tayra i kasakopong, masongilaˈ palicinowas to makaniway Krisciyang.

• 

  Sinael Taniil 2:31-33, 41-43

  Sapairasol Taˈangayay samiyay tano cowa ka lecad a fodawan a misangaˈ, o ooˈ tano marad ato ditaˈ a misangaˈ.

  Matatodongay O ditaˈ mitaypiyawan to mitowakangay to Ikok ato Padaka a kalo a tamdaw, milowanay cangra to ˈicel no mikowanay.

• 

  

  Sinael Matay 13:30; 24:14, 45; 28:19, 20

  Sapairasol ‘Ngaˈayay emi’ misaˈopan pacomod i ‘soko,’ ‘madimadiay citanengay a koli’ manilnilay midipot to ‘kolikoli.’ O ngaˈayay lihaf no Hongti Kitakit wa ‘mapatenak i polong no hekal.’

  Matatodongay 1919 miheca, midipotay ko madimadiay citanengay a koli to finawlan no Kawas. Mikitiya misatapang, matongalay ko fanekfek no micekiway to Fangcalay Cudad a mitosil. Anini, Misawacayay Tamdaw ni Yihofa itiniay mataˈlifay ko 200 a kitakit kasakilac a mitosil, mataˈlifay ko 1000 a sasowalen a mitepangan a cudad no Fangcalay Cudad.

• 

  Sinael Taniil 12:11; Paˈarawan 13:11, 14, 15

  Sapairasol Tosaay ko waˈa a ˈaˈadopen palimoˈotay to tamdaw ‘misangaˈ to samiyay no ˈaˈadopen,’ ato ‘miiyof to sakaˈorip a fali i samiyay no ˈaˈadopen.’

  Matatodongay Mikeriday ko Ikok ato Padaka patireng to Koksay Lin-mong, mirienangay ko roma kitakit. Mikitini 1926 miheca tangasa 1933 miheca, masalalomaˈay no Koksay Lin-mong ko kaˈamisay hongti pakasoˈlinay ko tamdaw o papaira to dipayal no hekal ko Koksay Lin-mong to ikoray a Makomoday Kitakit, kawra edengan ko Hongti Kitakit no Kawas ko papakadangal tonini.

• 

  

  Sinael Taniil 8:23, 24

  Sapairasol Cecay ‘mariˈangay ko pising’ a hongti ‘tano kafahkaan a pakayraan mipasemsem to tamdaw.’

  Matatodongay O Ikok ato Padaka ciˈicelay mikowanay to hekal mipalakay to adihayay a pala, adihayay ko mapatayay tamdaw. Tinakoen, Saka Tosa Lalood no Hekal a tatokian, miterakan no Padaka ko tosa kinsi fakotang i ˈada, taˈangayay ko pipalak ato mapatayay.

• 

  Sinael Taniil 11:31; Paˈarawan 17:3, 7-11

  Sapairasol Ira ko moetepay waˈa a ‘hangangayay a ˈaˈadopen’ mikitiniay i awaay ko palaˈ a ofang macakat, malo saka falo hongti. Oniya ˈaˈadopen o misowalan no Taniil a ‘pairaay to sakalahorac a kateliiyan a dafong.’

  Matatodongay Itini Saka Tosa Lalood no Hekal maliwasakay ko Koksay Lin-mong. Maharek ko lalood, ‘patirengay’ ko tamdaw to malecaday ko demak a Makomoday Kitakit, pakasoˈlin to mamademak noniya lekakawan ko edengan o Hongti Kitakit no Kawas ko papakadangal a demak, paira to dipayal no hekal. O Makomoday Kitakit wa miˈodis to polong a pihakelongan.

• 

  

  Sinael 1 Tisalonika 5:3; Paˈarawan 17:16

  Sapairasol Milasilay ko kalo kitakit ‘dipayalayto,’ ‘moetepay waˈa’ ato ‘ˈaˈadopen’, miˈodisay ato palaˈafo to ‘tasalamaan fafahiyan,’ dotoc mapalaˈafo ko kalo kitakit.

  Matatodongay O kalowa kitakit wa milasil to dipayalayto. O midamaay to Makomoday Kitakit a kalo kitakit wa palaˈafo to polong mararaway pihakelongan, o pisatapangan no taˈangayay padiing konini. Ci Yis wa itini Armakiton a lalood palaˈafo to hekal ni Satan, ikor mahererekto ko taˈangayay padiing.

• 

  Sinael Icikil 38:11, 14-17; Matay 24:31

  Sapairasol Micomoday ci Kok i ‘pala’ no finawlan no Kawas, dotoc misaˈopoan no coyoh ko ‘mipiliˈan a tamdaw.’

  Matatodongay O kaˈamisay hongti ato roma kitakit makakadepay a miˈodis to finawlan no Kawas. Tatayra i kakarayan a Krisciyang ano maˈoripayho, ikor no misatapang koniya piˈodis a tatokian wa saˈopoen tayra i kakarayan.

• 

  Sinael Icikil 38:18-23; Taniil 2:34, 35, 44, 45; Paˈarawan 6:2; 16:14, 16; 17:14; 19:20

  Sapairasol Oya midakaway to ‘kohecalay efa’ wa ‘misongilaˈ milowid to ˈada,’ palaˈafo ci Kokan ato sofitay ningra. O ‘ˈaˈadopen’ wa fahkolen i ‘marengrengay namal,’ mapelpelay ko taˈangayay samiyay.

  Matatodongay O hongti no Hongti Kitakit no Kawas ci Yis wa milidong to finawlan no Kawas. Wa mikerid cingra to kalacafayay cingranan mikowan a 144,000 tamdaw ato sofitay no coyoh, misongilaˈ palaˈafo to makomoday a kalo kitakit, wa malaˈafo to ko polong a hekal ni Satan.