Salicay No Miˈosiay Tamdaw

Tarokos ci Pawlo somowal to niyah o ‘cowa ka tataos ko toki hofocen a wawa,’ o sowal ningra o maanan ko tatodong? (1 Korinto 15:8)

Itini 1 Korinto 15:8 sanay ci Pawlo: ‘Saikoray i, paˈaraw cingra i takowanan o cowa ka tataos ko toki hofocen a wawa.’ O mitoroˈan ni Pawlo itini, oya itiniay i mapolosi maˈaraway ningra ci Yis itini kakarayan pasadak to ˈdil a demak. Kawra sowal ni Pawlo o niyah ‘o cowa ka tataos ko toki hofocen a wawa,’ o maanan ko tatodong hani? Isalakat o pitadtad ita, soˈlin halafinto noikor ngaˈ, ira ko tamdaw patikol maˈorip tayra i kakarayan, kawra maˈaraw ni Pawlo ko mapolosi i, hato talaˈayawayto miliyaw maˈorip ko niyah saan miharateng, patikol maˈorip malo ˈadingo a tireng. Kawra misongilaˈ micekiw toniya sinael ikor, harateng niyam sasalofen ko salakatay a pitadtad.

Mihaenay, misowalan ni Pawlo cingra o ‘cowa ka tataos ko toki hofocen a wawa’ o maanan ko tatodong hani? O sowal ningra iraay ko ilaenoay pina a tatodong alatek:

Malo Krisciyang ci Pawlo fahal sanay mifekad, marorayay cingra. Cowa ka tataos ko toki hofocen a wawa itiniay cowa ka harateng a tatokian. Ci Sawlo, oya kafanaˈan no tamdaw a Pawlo, tatayra i Tamaskus, mipalak itiraay a Krisciyang, cowa ka harateng ningra itini fatad no lalan maˈaraway i mapolosi ko patikolay maˈorip a Yisan. Mihaenay, malo Krisciyang ci Pawlo onini a demak cowa ko cingra aca ko fahkaˈay, oya katayraan ningra mipalak a Krisciyang mafahkaˈay. Roma i, onini a nalifetan tada pakarorayay cingranan. Samanen mapohaway cingra to cecay liyad.—Dmak 9:1-9, 17-19.

Caay ka harateng no tamdaw wa itira toya tatokian pakaˈaraw ci Pawlo to patikolay maˈorip a Yisan. Mihongyakan to ‘cowa ka tataos ko toki hofocen a wawa’ tatodong no Kirisiya a sowal o ‘itiniay cowa ka tatodong a tatokian hofocen a wawa.’ Malo Krisciyang ci Pawlo i, patikolayto ci Yis tayra i kakarayan. Cowa ka lecad to iˈayaway a pina sinael a misowalan ni Pawlo a tamdaw, ˈayaw no tayra ci Yis i kakarayan cowaho pakaˈaraw ci Pawlo cingranan. (1 Korinto 15:4-8) Soˈlin o pipaˈaraw ni Yis itiniay i ‘cowa ka tatodong a tatokian,’ itini i cowa ka harateng no tamdaw a tatokian, kawra pairaay konini to toki ni Pawlo maˈaraw ko patikolayto maˈorip a Yisan.

Misapoeneray ko falocoˈ no niyah sanay ci Pawlo. O roma mikakingkiway sanay, o misowalan ni Pawlo itini ngaˈayay paihkal to masofaway a tatodong. Ano o tatodong ni Pawlo konini, o misaˈicelan ningra i, awaay ko tatodong no niyah milifok to sapafeli no Kawas a kalimlaan a sapalemed. Soˈlinay i, sanay ko dotoc a sowal ningra: ‘O sasafaay a tarokos kako, awaay ko tatodong mala tarokos, nawhani na mipalakay kako to kasakopang no Kawas. Pakayni mikiriwiˈay a sidaˈit no Kawas, mansa malo aniniay a tamdaw kako.’—1 Korinto 15:9, 10.

Mihaenay, o mitoroˈan no sowal ni Pawlo tano kafahkaˈan ato kafahalan a pakayraan ci Yis paˈaraw cingranan, anca mitoroˈay to cowa ka harateng no tamdaw wa itira cingra toya tatokian a pakaˈaraw to patikolay maˈorip a Yisan, anca awaay ko tatodong no niyah pakaˈaraw tonini a kasemeran a mapolosi saan cingra miharateng alatek. Ano o mananto ko tatodong no sowal ni Pawlo, maedeng misaaretengay ci Pawlo minengneng tonini a nalifetan. Padamaay konini cingranan pakasoˈlin to patikolayto ci Yis maˈorip. Mansa ano milasil cingra tonini a demak i, marariday mihadak tonini a nalifetan.—Dmak 22:6-11; 26:13-18.