O lalangian no Fangcalay Cudad milingatay to Hongti Kitakit no Kawas. Sakadademakan ni Yihofa konini a Hongti Kitakit palaˈosi to araaw Ningra to cikiw. O masamaanay konini Hongti Kitakit hani? Mikowanayto nohatini konini a Hongti Kitakit han? Iraay ko maanan a malaˈosiay a demak? Ano ikor mamidemakho to maanan? Onini a fedengan ato dotoc a tosa fedengan papacaˈof tonini a salicay.

1. O maanan ko Hongti Kitakit no Kawas? O cima ko hongti nonini a Hongti Kitakit?

Hongti Kitakit no Kawas o mipatirengan ni Yihofa a sifo. Ci Yis Kristo ko hongti, itiniay i kakarayan cingra a mikowan. (Matay 4:​17; Yohani 18:36) Sowal no Fangcalay Cudad, ci Yis ‘o mamala hongti cingra, midaˈoc a mikowan.’ (Luka 1:​32, 33) O hongti no Hongti Kitakit no Kawas ci Yis mamikowan to polong a tamdaw i fafekang no cikiw.

2. O cima ko cafay ni Yis mikowan hani?

Cowa ka teked sa ci Yis mikowan to Hongti Kitakit. O sowal no Fangcalay Cudad, ‘naitiniay kasangasaw, kasasiroma no sowal, kasafinacadan, kasakitakit a tamdaw mamala hongti cangra mikowan to polong no sera.’ (Paˈarawan 5:​9, 10) Hakowaay ko tamdaw malacafay ci Kristoan mikowan hani? Tayni ci Yis i fafekang no sera ikor, mala nisawawaan ningra ko masapatepatekay masaˈofaˈofaday a tamdaw, kawra edengan 144,000 ko mamalacafay cingranan a mikowan i kakarayan. (ˈOsien ko Paˈarawan 14:​1-4.) O romaroma itiniay i fafekang no sera a Krisciyang mamalo finawlan no Hongti Kitakit no Kawas.​—ˈOlic 37:29.

3. O Hongti Kitakit no Kawas hano ikaka ko kangaˈay to sifo no tamdaw?

O romaroma mikowanay a tamdaw sapisongilaˈaw mikowan to kitakit, kawra cangoˈotay ko ˈicel. Roma i, ano o ngaˈayayto a mikowanay mikotayan no roma a tamdaw, ora mikotayay a tamdaw awaay ko pinang to papatado to finawlan a miharateng hokira. Kawra, o hongti no Hongti Kitakit no Kawas ci Yis cowa ko mamakotay no tao. Sowal no Fangcalay Cudad, ‘patirengan no Kawas ko cecay cowa ko mamalaˈafo a Hongti Kitakit,’ Sanay. (Taniil 2:​44) O polong no cikiw ko mikowanan ni Yis, cowa pisakakinih cingra to icowacowaay pala a tamdaw. Sidaˈitay cingra, iraay ko olah, masadafdafay ko picada to tamdaw, pasifanaˈayho cingra to tamdaw paihkal tonini a makapahay a capeling. Itiyato i, mamatomes to olah ato damsayay konini a hekal, wa awato ko misakakinihay a demak.​—ˈOsien ko Isaya 11:9.

4. O cecay tadamaanay a sifo mamikowan to polong no cikiw

Palalinien to kalo a lintad a mikowanay, o fadangalan ni Yis Kristo mikikakaay ko nika taˈangay. ˈOsien ko Matay 28:​18, ikor lengoen ko ilaenoay a salicay:

• Ano hakowato ko kataˈangay no fadangalan no hekal a mikowanay cowa ko mamikikaka ci Yisan? Hano mahaen ko sowal hani?

O sifo no tamdaw maceriday makakotay ko mikowanay, hanaca o mikowanan no kahacecay a sifo o mimingay aca a kasakilac no cikiw. Hongti Kitakit no Kawas samaanay hani? ˈOsien ko Taniil 7:​14, ikor lengoen ko ilaenoay a salicay:

• Hongti Kitakit no Kawas ‘cowa ko mamalaˈafo,’ hano o ngaˈayay a demak konini hani?

• Polong no cikiw mamakowan no Hongti Kitakit no Kawas, hano o ngaˈayay a demak konini hani?

5. O kakotayen ko pikowan no tamdaw

Hano kakotayen no Hongti Kitakit no Kawas ko sifo no tamdaw hani? Nengnengen ko IKA, ikor lengoen ko ilaenoay a salicay:

IKA: O Manan ko Hongti Kitakit no Kawas Hani?—JW Tilifi (1:41)

• O nika pikowan no tamdaw pairaay to masamaanay a teloc?

ˈOsien ko Patnakay 8:​9, ikor lengoen ko ilaenoay a salicay:

• O kakotayen no Hongti Kitakit no Kawas ko sifo no tamdaw sanay kiso miharateng han? Misamaanay?

6. Itiniay i Hongti Kitakit no Kawas a mikowanay cipinangay cangra kitaanan

O hongti no mita ci Yis na mala tamdaway i hekal, ‘siniˈadaay to nika lonay no mita.’ (Hipray 4:​15) Ya kalacafayay ci Yisan mala hongti a 144,000 tamdaw, o ‘naitiniay kasangasaw, kasasiroma no sowal, kasafinacadan, kasakitakit a tamdaw’ a piliˈen ni Yihofa cangra. Itiniho i fafekang no sera cangra sahtoay o madimadiay a Krisciyang, iraay ko faˈinayan ato fafahiyan.​—Paˈarawan 5:9.

• Ci Yis atoya kalacafayay cingranan a mala hongti a tamdaw o nao maˈoripay itini fafekang no sera, cipinangay cangra to kaˈorip no tamdaw. Coko sakahinom iso konini han? Misamaanay?

7. Iraay ko malefotay a rikec no Hongti Kitakit no Kawas

Ano patireng ko sifo to rikec o araaw i, sapidipotaw to finawlan, sakaciepocaw nangra. Patirengay ko Hongti Kitakit no Kawas to rikec, misaaliay to finawlan papidofdof. Onini a rikec o safalod no waywayan. ˈOsien ko 1 Korinto 6:​9-11, ikor lengoen ko ilaenoay a salicay:

• Ano dofdofen no tamdamdaw ko patirengan no Kawas a safalod no waywayan i, o pinengneng iso sasamaan konini a hekal hani?a

• Misaalian ni Yihofa ko finawlan Ningra midofdof to patirengan Ningra a safalod no waywayan, o pinengneng iso i, matatodongay konini a saali han? Misamaanay?

• Mikitini i sinael, oya cowa pidofdof to rikec no Kawas a tamdaw wa ngaˈayho a mafalic han?​—Nengnengen ko 11 sinael.

KALIMLAAN

Itiniay i kakarayan ko Hongti Kitakit no Kawas, tada o soˈlinay a sifo, o mamikowan to polong no cikiw.

Lomalen

• O cima ko mikowanay i Hongti Kitakit no Kawas?

• O Hongti Kitakit no Kawas hano ikaka ko kangaˈay to sifo no tamdaw?

• Misaaliay ci Yihofa to finawlan Ningra sasamaan ko pidemak?

MALALITINGAY A LALAKAW

Icowaay ko Hongti Kitakit no Kawas? Nengnengen samaanay ko sowal ni Yis.

“Hongti Kitakit no Kawas Itiniay i Falocoˈ no Tamdaw Han?” (Lalakaw no wangcan)

Hano mipiliˈ ko Misawacayay Tamdaw ni Yihofa midama to Hongti Kitakit no Kawas, eca ko no hekal a kalo a sifo?

Madimadi to Hongti Kitakit no Kawas (1:43)

Mipiliˈan ni Yihofa ko 144,000 tamdaw kalacafay ci Yisan a mikowan. Pakayni tonini a tamdaw, samaanay ko sowal no Fangcalay Cudad?

“O Cima ko Tatayra i Kakarayan?” (Lalakaw no wangcan)

O cecay mapalitay a fafahiyan hano pakasoˈlin, edengan o Kawas ko papaira to masadafdafay a hekal?

“Mahelaayto Ako ko Sapisaysay to Cowa ka Sadafdaf no Hekal a Hapakayraan” (Katalipaˈelal!, Saka 11 Folad 2011)

Isaka 1914 miheca, tomirengayto ko Hongti Kitakit no Kawas, itiniay i kakarayan misatapang a mikowan, o pikowan no tamdaw tayniayto i saikoray a ˈawaled. Hano mihaen ko sowal hani? Wa mikitini i tosa a pakayraan milengo kita: Saka 1, o sapairasol no Fangcalay Cudad. Saka 2, nai 1914 miheca samaanayto ko nika lingad no pakayraan no hekal ato pinangan no tamdamdaw.

1. O sapairasol no Fangcalay Cudad patalahkalay to maanan?

Itini Taniil no Fangcalay Cudad patalahkalay, o Hongti Kitakit no Kawas aitini pihererekan no ‘pito a laliyadan’ misatapang a mikowan. (Taniil 4:​16, 17) Maharek a matilid ko Taniil a cudad mataˈlif ko pina soˈot a miheca i, tano roma a pakayraan ci Yis mitadtad tonini ‘pito a laliyadan,’ o ‘kaleponan no saˈosi no romiˈad no roma a finacadan,’ hananay konini laliyadan, hanaca somowal to cowaho ka hererek itiya konini a laliyadan. (Luka 21:24) Dotoc mamananam ita ko pihererekan no ‘pito a laliyadan’ a toki wa itini isaka 1914 miheca.

2. Mikitini 1914 miheca, o pakayraan no hekal ato pinangan no tamdaw samaanayto hani?

Kinacecayay, milicayay ko nisawawaan ci Yisan: ‘Ano ikor aira ko maanan tahapinangan to iraayto kiso tayni minokay i tamiyanan, patalahkal to isaikorayto ˈawaled konini cilikakawaay a hekal hani?’ (Matay 24:3) Pasowalan ni Yis ko nisawawaan, ikor no mala hongti no Hongti Kitakit no Kawas cingra i kakarayan i, wa adihay ko mamafekad a demak, mahawpay ko lalood, kedal, ˈatoray. (ˈOsien ko Matay 24:7.) Paliˈayawayho ko Fangcalay Cudad itini ‘isaikorayto ˈawaled i,’ o pakayraan ato waywayan no tamdaw pairaay to ‘pasangaray siˈayawen’ i nokaˈorip. (2 Timoti 3:​1-5) Mikitini 1914 miheca, o pakayraan ato pinangan no hekal malecaday to paliˈayawan no Fangcalay Cudad, o maˈaraway no ˈalomanay tamdaw konini.

3. Misatapang a mikowan ko Hongti Kitakit no Kawas ikor, hano mangalef ko nika tatiih no pakayraan nonini a hekal?

Mala hongti ci Yis i Hongti Kitakit no Kawas ikor to cowaho ka halafin, malalooday aci Satan ato romaroma mariˈangay coyoh ningra i kakarayan, pakalowiday cangranan. Sowal no Fangcalay Cudad, ci Satan ‘mafahkolay cingra tayni i sera, o coyoh ningra mihakelongay cingranan a mafahkol tayni i sera.’ (Paˈarawan 12:​9, 10, 12) Mafanaˈay ci Satan to mamalaˈafo ko niyah, mansa tada mangolaway cingra, paira to adihayay a pades no hekal. Mankora tatiih tatiihay ko pakayraan nonini a hekal! Nikawrira, o Hongti Kitakit no Kawas mamisaysay tonini a pasangar, palahdaw to polong a tatiihay noka pifiyor.

CALEPEN MIKADKAD

4. Sapairasol no Fangcalay Cudad mitoroˈay to 1914 a miheca

IKA: Hongti Kitakit no Kawas Satapangay Mikowan i 1914 Miheca (5:02)

Papitiihan no Kawas ko hongti nolitengan a Papilon ci Nipukatnicar, itini i nitiihan patalahkalay to mamifekad noikor a demak. Nengnengen ita ko tatodong nonini a nitiihan ato pitadtad ni Taniil, wa mafanaˈto tonini a nitiihan cowa ko pilingat aca to pikowan ni Nipukatnicar, milingatayho to Hongti Kitakit no Kawas.​—ˈOsien ko Taniil 4:​17.a

ˈOsien ko Taniil 4:​20-​26, ikor lengoen ko ilaenoay a salicay:

• (A) Itini nitiihan maˈaraway ni Nipukatnicar ko maanan?​—Nengnengen ko 20 ato 21 sinael.

• (B) Oya taˈangayay kilang i mitiihan, ikor samaanayto?​—Nengnengen ko 23 sinael.

• (C) Mahererek ko ‘pito a laliyadan’ i, mafekaday ko maanan a demakan hani?​—Nengnengen ko 26 sinael.

Oya Taˈangayay a Kilang i Nitiihan ato Hongti Kitakit no Kawas

SAPAIRASOL (Taniil 4:20-36)

Sapikowan a fadangalan

(A) Taˈangayay a Kilang

Maketonay ko sapikowan a fadangalan

(B) Maletekay konini a kilang, mataˈlifay ko pito a laliyadan

Patikol ko sapikowan a fadangalan

(C) ‘Miliyawto kiso a mala hongti’

Sakina cecay malaˈosi ko sapairasol

• (D) Taˈangayay a kilang cima ko mitaypiyawan?​—Nengnengen ko 22 sinael.

• (E) O sapikowan a fadangalan ningra samaanay a maketon?​—ˈOsien ko Taniil 4:29-33.

• (F) Mahererek ko ‘pito a laliyadan’ i, mafekaday ko manan demakan i tireng ni Nipukatnicar?​—ˈOsien ko Taniil 4:34-36.

SAKINA CECAY MALAˈOSI

Sapikowan a fadangalan

(D) Hongti no Papilon ci Nipukatnicar

Maketonay ko sapikowan a fadangalan

(E) ˈAyaw no kongyen 606 miheca ikor, masingkiay ci Nipukatnicar, pitoay miheca cingra cowa ka ngaˈay mikowan to kitakit

Patikol ko sapikowan a fadangalan

(F) Patatikolto ko inaneng ni Nipukatnicar i, miliyaway haca mala hongti

Sakina tosa malaˈosi ko sapairasol

• (G) Taˈangayay a kilang cima ko mitaypiyawan?​—ˈOsien ko 1 Rayray 29:23.

• (H) O maanan a demakan ko miketonay tonini a sapikowan a fadangalan? Hano mafanaˈ kita, itiniho fafekang no sera ci Yis i, kamayanho a maketon konini a sapikowan a fadangalan hani?​—ˈOsien ko Luka 21:24.

• (I) O mitaypiyawan nonini a sapikowan a fadangalan, ihacowaay a patatikol? Icowaay a patatikol?

SAKINA TOSA MALAˈOSI

Sapikowan a fadangalan

(G) Hongti no Israil, mitaypiyaway cangra to pikowan no Kawas

Maketonay ko sapikowan a fadangalan

(H) Mapalaˈafo ko Yirusalim ikor no 2,520 mamihecaan, awaay ko hongti no Israil mitaypiyaw to pikowan no Kawas

Patikol ko sapikowan a fadangalan

(I) Mala hongtiayto ci Yis i Hongti Kitakit no Kawas, itiniay i kakarayan a mikowan

5. Itini 1914 miheca mafalicayto ko hekal

Nengnengen ko IKA.

IKA: 1914 Miheca Mafalicayto ko Hekal (1:10)

Paliˈayaway ci Yis mala hongti cingra ikor o pakayraan no hekal i, wa taˈangay ko kafalic. ˈOsien ko Luka 21:​9-​11, ikor lengoen ko ilaenoay a salicay:

• Maˈaraway anca matengilay iso ko nisowalan no sinael a masamaanay a pakayraan han?

O sowal no Tarokos ci Pawlo, saikoray a noka pikowan no tamdaw wa ira ko samaanay a pinangan ato waywayan no tamdaw. ˈOsien ko 2 Timoti 3:​1-5, ikor lengoen ko ilaenoay a salicay:

• Itini kaˈorip iso maˈaraway ko nisowalan no sinael a masamaanay a waywayan ato pinangan no tamdaw?

6. Ka dademakto kita

ˈOsien ko Matay 24:​3, 14, ikor lengoen ko ilaenoay a salicay:

• O maanan a masakalimlaan a tayal pahapinangay kitaanan to mikowanayto ko Hongti Kitakit no Kawas?

• Ano sapirienangaw tonini a tayal, sasamaan ko hademak iso?

Hongti Kitakit no Kawas mikowanayto, kakaliki a mikowan tonini a cikiw. ˈOsien ko Hipray 10:​24, 25, ikor lengoen ko ilaenoay a salicay:

• Tona ‘maˈarawayto ita ko nika ngata nora romiˈad,’ sasamaan ko demak hani?

KALIMLAAN

Sapairasol no Fangcalay Cudad ato demak nonini a hekal misawacayay, to mikowanayto ko Hongti Kitakit no Kawas. Patenak kita tonini a lihaf ato mirienang to saˈopo, paihkalay to pakasoˈlinay ko niyah tonini a demak.

Lomalen

• Oya nisowalan ni Taniil a ‘pito a laliyadan’ mahererek i, mafekaday ko manan a demakan?

• Hano pakasoˈlin kiso to  mikowanay ko Hongti Kitakit isaka 1914 miheca?

• Sasamaan paihkal kiso, pakasoˈlinay to mikowanto ko Hongti Kitakit?

MALALITINGAY A LALAKAW

Nengnengen ko sowal no mikakingkiway a tamdaw pakayni to kafalic no hekal nai 1914 miheca.

“Mapelengay ko Waywayan no Tamdaw, Ihacowaay Misatapang?” (Katalipaˈelal! Saka 4 Folad 2007)

Maˈaraw no cecay faˈinayan ko Matay 24:14 a sapairasol ikor i, matemeray ko falocoˈ. Nengnengen samaanay ko kafalic ningra.

“Nao Maolahay Kako to Miyakiway a Onto, Ikakaay to Kihcod!” (Mikecolay, Saka 3 Liyad 2017)

Hano mafanaˈ kita, i Taniil saka 4 fedengan a sapairasol milingatay to Hongti Kitakit no Kawas hani?

“Ihacowaay Misatapang ko Hongti Kitakit no Kawas a Mikowan? (Saka 1)” (Mikecolay, 2014/10/1)

Hano mafanaˈ kita, oya nisowalan itini i Taniil saka 4 fedengan toya ‘pito a laliyadan’ itiniay i 1914 miheca mahererek?

“Ihacowaay Misatapang ko Hongti Kitakit no Kawas a Mikowan? (Saka 2)” (Mikecolay, 2014/11/1)

Hongti Kitakit no Kawas mikowanayto nohatini, wa kaliki palafaeloh to cikiw. Itini i pikowan no Hongti Kitakit i, ano ikor wa ira ko maanan a makapahay a demak hani? Nengnengen ita ko pina a demak.

1. Hongti Kitakit no Kawas sasamaan paira to dipayal ato masadafdafay i polong no hekal?

Hongti no Hongti Kitakit no Kawas ci Yis aitini i Armakiton a lalood palaˈafo to mariˈangay tamdaw ato pikowan no tamdaw. (Paˈarawan 16:​14, 16) Itiyato i, wa malaˈosito ko mikiˈokan no Fangcalay Cudad: ‘Caayto ko hahalafin, mamalahdaw ko tatiihay a tamdaw.’ (ˈOlic 37:10) Itini pikowan ni Yis i Hongti Kitakit, papadipayal ato pasadafdaf to polong no hekal.​—ˈOsien ko Isaya 11:4.

2. Ano malaˈosi ko araaw no Kawas i fafekang no sera i, sasamaan ko kaˈorip no tamdaw?

Itini pikowan no Hongti Kitakit no Kawas, ‘o moecelay a tamdaw mamilayap tonini a sera, midaˈoc rihaday ko kamaroˈ itini i fafekang no sera.’ (ˈOlic 37:29) Haratengen hena, i tatihi iso sahtoay o moecelay a tamdaw, maolahay ci Yihofaan, masasiolahayho cangra. Awaayto ko adadaay a tamdaw, rihadayay raheker a midaˈoc maˈorip ko tamdaw maemin. Mahaenay a kaˈorip tada makapahayto!

3. Mapalaˈafo ko mariˈangay tamdaw ikor, Hongti Kitakit no Kawas papalaˈosi to maanan a demakan?

Mapalaˈafo ko mariˈangay tamdaw ikor, mamala hongti ci Yis to 1,000 miheca, kalacafay to 144,000 a tamdaw itini i kakarayan mikowan. Oha papadama cangra to i fafekangay no sera a tamdaw patikol a malefot ko ˈorip. Mahererek ko 1,000 miheca i, polong no cikiw wa o makapahayto a lakoing, polong a tamdaw pakayniay i pidofdof to rikec ni Yihofa a rahekeren. Dotoc i, wa patikolen ni Yis koya Hongti Kitakit i Wama ningra ci Yihofaan. O ngangan ni Yihofa wa ‘mala fangcalayto.’ (Matay 6:​9, 10) Itiyato i, polong a wacay misawacayay to o sangaˈayay a mikowanay ci Yihofa, ciharatengay Cingra to finawlan Ningra. Wa palaˈafo ci Yihofa ci Satanan ato romaroma a tatiihay coyoh, ato padetengay misafelit to pikowan ni Yihofa a tamdaw. (Paˈarawan 20:​7-​10) O mipairaan no Hongti Kitakit no Kawas a malefotay a hekal mamidaˈoc a materek.

CALEPEN MIKADKAD

4. Hongti Kitakit no Kawas mamitolas to pikowan no tamdaw

Sowal no Fangcalay Cudad: ‘Mikowan ko tamdaw to tamdaw, pasemsemay to tamdaw.’ (Patnakay 8:9) Nikawrira, wa sakadademaken ni Yihofa ko Hongti Kitakit Ningra palahdaw to cowa ka sadafdaf a demak.

ˈOsien ko Taniil 2:44 ato 2 Tisalonika 1:6-8, ikor lengoen ko ilaenoay a salicay:

• Pakayni i sifo no tamdaw atoya midopoay to pikowan no tamdaw a tamdaw, sasamaanen ni Yihofa aci Yis ko demak i cangranan?

• Pakayni i kacipinang iso ci Yihofaan aci Yisan, wa tano masadafdafay, ato moecelay ko pidemak nangra sanay kiso miharateng han? Misamaanay?

5. O malefotay a Hongti ci Yis

O Hongti ci Yis itini i Hongti Kitakit no Kawas o papalemed to fafekangay no sera a finawlan. Nengnengen ko IKA, nengnengen ko nano demak ni Yis i fafekang no sera. Onini a demak paihkalay, makalimay ci Yis padama to tamdaw, hanaca pafelian no Kawas cingra to ˈicel mihaen to demak.

IKA: Kafahkaˈan a Demak ni Yis Paliˈayaway to Mamalaˈosi no Hongti Kitakit a Demak (1:13)

O nano demak ni Yis i fafekang no sera, pahapinangay kitanan to mamalaˈosi no Hongti Kitakit no Kawas ko maanan a demak. Dotoc nengnengen ko mamacada ita a sapalemed, hinatalaay kiso to maanan a demak hani? ˈOsien ko ilaenoay a sinael.

6. Hongti Kitakit no Kawas papaira to maˈdilay a noikoran

IKA: Nengnengen ko Makapahay a Noikoran (4:38)

ˈOsien ko ˈOlic 145:​16, ikor lengoen ko ilaenoay a salicay:

• Mafanaˈ to paparenecen ni Yihofa ko saali no tamdamdaw, samaanay ko harateng iso hani?

KALIMLAAN

Hongti Kitakit no Kawas papalaˈosi to araaw no Kawas, papalakoing to polong no cikiw. O maˈoripay i cikiw a tamdaw sahtoay o moecelay ko falocoˈ, tatahadaˈoc cangra a midoko ci Yihofaan.

Lomalen

• Sasamaan mipafangcal to ngangan ni Yihofa ko Hongti Kitakit?

• O manan ko papadama kitaanan pakasoˈlin, Hongti Kitakit papalaˈosi to mikiˈokan no Kawas?

• Hinatalaay kiso to mamalaˈosi ko maanan a demak?

MALALITINGAY A LALAKAW

‘Armakiton’ o manan ko mitoroˈan?

“O Manan ko Armakiton a Lalood?” (Lalakaw no wangcan)

Nengnengen ko misowalan ni Yis a “ta’angayay padiing“, wa mifekad ko manan a demak?—Matay 24:21.

“Itini i Fangcalay Cudad, O Manan ko Tatodong no Ta’angayay Padiing?” (Lalakaw no wangcan)

O paro no lomaˈ ngaˈayay samaan maka miharateng to sapalemed no Hongti Kitakit no Kawas?

Saharateratengen ko Kaˈorip i Lakoing (1:50)

Na ˈifowaay cingra to misafelitay to sifo a demak, ikorto i, mahelaayto ko sapisaysay to pasangaray no hekal a pakayraan. Nengnengen ‘Adihayay ko Salicay no Falocoˈ Ako’ ilaenoay nonini lalangian a nalifetan.

“Minanam to Fangcalay Cudad a Mafalic ko Nokaˈorip” (Mikecolay, 2012/1/1)