Salicay No Miˈosiay Tamdaw

Itini ˈOlic 61:8 somowalay ci Tafiti to ‘mamidaˈoc’ ko niyah pakahemek to fangcalay ngangan no Kawas sa i, pakinaliay kora sowal ningra, cowa ko soˈlinay han?

Soˈlinay kora sowal ningra, cowa pakinali ci Tafiti a pasowal, o mamalaˈosi kora sowal ningra.

Haratengen kora sowal ningra itini tonini sinael ato romaroma sinael. Sowal sa cingra: ‘Mihaen i, mamidaˈoc kako pakahemek to fangcalay ngangan no Miso, to romiˈamiˈad milahci to miketonan a sowal ako.’ ‘Yihofaaw Kawas ako, sarocoden ako ko falocoˈ pakahemek Kiso, midaˈoc a paˈdil to fangcalay ngangan no Miso.’ ‘Pakahemek kako to fangcalay ngangan no Miso, tahadaˈoc cowa ko mamafalic.’—ˈOlic 61:8; 86:12; 145:1, 2.

Mitilid ci Tafiti tonini a sowal i, cowa ko mamapatay kako caay ka saan cingra. Kitinien i sasawkit ni Yihofa, mafanaˈay cingra to mamapatay ko tamdamdaw pakayni i raraw, mihayiay ci Tafiti to o ciraraway tamdaw ko niyah. (Satapangan 3:3, 17-19; ˈOlic 51:4, 5) Mafanaˈay cingra ano o mihaydaanto no Kawas a tamdaw, matira ci Aprahaman, ci Isak aci Yakop, mapatayayto cangra. Mafanaˈay ci Tafiti to citolasay ko ˈorip no niyah. (ˈOlic 37:25; 39:4) Soˈlinay haw i, o sowal ni Tafiti itini ˈOlic 61:8 paihkalay, iraay ko kalim ningra, hanaca misetekay ko falocoˈ mamidaˈoc a pakahemek to Kawas, tatodong i, ano maˈoripho cingra o papadadotoc a pakahemek ci Yihofaan.—2 Samuil 7:12.

O nitilidan ni Tafiti a ˈolic milingatay to milifetan no niyah, itini i lalangian a sowal no ˈOlic 18, 51 ato 52 fedengan mahapinangay konini. Itini ˈOlic saka 23 fedengan, somowalay ci Tafiti to o mipakaenay to siri ci Yihofa, mikayatay, midipotay cingranan, parihadayay cingranan. O mahaenay a pakaenay to siri ci Tafiti. Mankora, makalimay tano ‘hakelong no ˈorip’ ningra matayal saki Yihofaan.—ˈOlic 23:6.

Kawra haharatengen, pakaynian ni Yihofa i fangcalay saocor mikayat ci Tafiti mitilid to ˈolic ningra. O nitilidan ningra a pinapina ˈolic pairasolay to noikoran, paliˈayaway pasowal to mamafekad a demak noikor. Tinakoen, itini ˈOlic saka 110 fedengan, somowalay ci Tafiti to Tapang ningra o ‘mamaroˈ i kawanan no [Kawas]’ i kakarayan, hanaca mamilifok to taˈangayay a fadangalan, ikor mamilowid to ˈada no Kawas, ‘misawkit’ to kasakitakit. Ci Misiya o Tapang ni Tafiti, o teloc ni Tafiti cingra, aitini kakarayan a mikowan, halo ‘midaˈoc a mala saysi.’ (ˈOlic 110:1-6) Somowalay ci Yis tora sapairasol i ˈOlic saka 110 fedengan, o cingra ko misowalan, o mamalaˈosi noikor konini sapairasol.—Matay 22:41-45.

Mahapinangay itini, mikayatan no Kawas ci Tafiti mitilid to pinapina ˈolic, milingatay to ˈorip ningra i hekal, milingatayho to noikoran patikol maˈorip cingra a demak, itiyato i, mamidaˈocto cingra pakahemek ci Yihofaan. Padamaay kitaanan cipinang to ˈOlic 37:10, 11, 29, somowalay to nolitengan a Israil a pakayraan, somowalayho to noikoran a pakayraan no polong a hekal. Itiyato i, papalaˈosi ci Yihofa to kihcod a sakiˈok Ningra. (Nengnengen konini a casi ‘Wa Kalacafay Kiso Takowanan i Lakoing’ onini a lalakaw saka 8 fatac.)

Mihaenay haw i, itini ˈOlic 61:8 ato romaroma malecaday a sinael paihkalay, halamhamay ci Tafiti maˈoripho cingra i, papakahemek ci Yihofaan. O roma sa i, paihkalay konini a sinael, ano patikolen ni Yihofa paˈorip ci Tafiti i, wa misasoˈlinto cingra midaˈoc a mihaen to demak.