Todongen ko Madimadiay a Coyoh

1-2. (1) O manan ko kasasiroma no mita ato coyoh? (2) O manan ko kahecadan ita ato coyoh?

MALO finawlan ni Yihofa, itiniay kita to matomesay ko olah a paro no lomaˈ no Kawas. Coko itiniay aca i paro no kakarayan a salikaka, mahawpayho ko masaˈokay a madimadiay a coyoh. (Taniil 7:9, 10) Pakayni i coyoh, adihayay ko kasasiroma ita cangranan. Tinakoen, o coyoh nano itiyaho iraayto a materek. (Yopu 38:4, 7) O ˈicel nangra ikakaayto no tamdaw. O roma i, pakayni makoracay moecelay a pakayraan, o coyoh ikakaay to cowa ka lefot kita a tamdaw.—Luka 9:26.

² Soˈlin, o tamdaw ato coyoh iraay ko kasasiroma, kawra adihayay ko kahecadan ita. Tinakoen, kita ato coyoh paihkalay to makapahay capeling ni Yihofa, iraay ko pasalat no kapipiliˈ. Mahecaday kita to coyoh iraay ko ngangan, pinangan no niyah, hanaca iraay ko masakenakenaay a ˈinorong. O roma i, mahecaday kita to coyoh maolahay midoko to Misangaˈay a Tatapangan.—1 Pitiro 1:12.

3. I masamaanay a pakayraan kita minanam to madimadiay a coyoh?

³ Adihayay ko kahecadan ita ato coyoh, wa ngaˈay kita mikitini i coyoh a minanam, milifok to sapakalalok. Madimadiay a coyoh misapoeneray maolahay to tamdamdaw, ano tahasiˈayaw to pasangar cangra i, padadotocay mihadidi. O roma i, misaˈicelay cangra mitawmec to makoracay no kasakopang no Krisciyang. Oniya lalakaw mamilengo, misamaan kita mitodong to taˈarawan nangra.

O COYOH TADA MISAPOENERAY

4. (1) Samaanay paihkal ko coyoh to misapoeneray? (2) Hano misapoeneray ko coyoh hani? (ˈOlic 89:7)

⁴ Madimadiay a coyoh sahtoay misapoeneray. Soˈlin iraay ko nalifetan nangra, ciˈicelay, citanengay, kawra mahemekay mitengil to sapalimoˈot ni Yihofa. (ˈOlic 103:20) Ano dademak cangra i, cowa ka pisatakaraw, cowa ka pasengi to ˈicel no niyah. Mahemekay cangra midofdof to araaw no Kawas, soˈlin cowa ka fanaˈ ko tao to ngangan nangra, kawra cowa ka ciharateng cangra.a (Satapangan 32:24, 29; 2 Hongti 19:35) Panokayan nangra ko ˈdil ci Yihofaan, cowa ko niyah. Misamaanay hano misapoener ko coyoh hani? Samanen tangongolay ko olah nangra a mikangodo ci Yihofaan.—ˈOsien ko ˈOlic 89:7.

5. Mirikec ko coyoh ci Yohanian i, samaanay paihkal to misapoeneray? (Nengnengen ko coka.)

⁵ Dotoc a tinakoan mitadtaday hano misapoener ko coyoh. Maedeng itini Kongyen 96 miheca, o cecay a coyoh milasilay ci Yohanian to kasapaan a mafolosi, kawra cowa ka sowal no Fangcalay Cudad ko ngangan nora coyoh. (Paˈarawan 1:1) Manengneng ko mapolosi ikor, samaanayto ci Yohani hani? Mipitorosay sapidokoaw to coyoh. Kawra, oniya madimadiay a coyoh tangsolay a miconged cingranan, sanay a pasowal: ‘Aka! Hamaan mihaen to demak! Ka pidoko kiso to Kawas! O koli kako mahecaday tisowanan ato romaroma . . . salikaka.’ (Paˈarawan 19:10) Tada misapoeneray ko coyoh! Cowa ka ˈanof cingra to sapaˈdilaw ato sakasemeraw no tao, ao panokayay to ˈdil i Kawas ci Yihofaan. O roma i, cowa ka pisakahmaw ko coyoh minengneng ci Yohanian. Soˈlin, o coyoh midoko to Kawas mikikakaayto ni Yohani ko kahalafin, ikakaay ko ˈicel ningra, kawra misapoenerayho ko coyoh a pasowal, mahecaday ci Yohanianto o koli ko niyah. Soˈlin o coyoh mamirikec ci Yohanian, kawra cowa ka pakidem a mirikec toniya matoˈasay a tarokos. Mahapinang ningra mipitoros ci Yohani, o pakayniay i mikangodoay harateng, mansa, sidaˈitay a pasowal ci Yohanian.

6. Misamaan kita mitodong to misapoeneray a taˈarawan no coyoh hani?

⁶ Sasamaan kita mitodong to taˈarawan no coyoh a misapoener? Matayal saki ci Yihofaan i, pahecad kita to coyoh cowa ka pasengi to niyah a midemakan ato inaneng. (1 Korinto 4:7) O roma i, soˈlin matayal kita i ci Yihofaan ikakaay tono tao ko kahalafin, hanaca iraay ko mikiriwiˈay a tayal, aka misakahmaw minengneng to tao. Soˈlin adihay ko ˈinorong ita i, wa mangalef ko pisapoener no niyah. (Luka 9:48) Pahecaden to coyoh, hamaan a misatakaraw to niyah, ka mahemek matayal saki tamdaw.

7. Misamaan kita misapoener a mihadak to sapirikec?

⁷ Ano mihadak kita to sapirikec i, ngangaˈay paihkalen ita ko misapoeneray. Nolatekay, wa mihadak kita to sapirikec i salikaka, o wawa no niyah ato roma tamdaw. Todongen ita koya mirikecay ci Yohanian a coyoh, songilaˈen a pasowal, kawra aka a patoleden ko tamdaw. Hamaan a misaidahidahi kita, wa misapoener a mihadak to nai Fangcalay Cudad a sapirikec, halo ciharateng to nafalocoˈan no tao.—Kolosay 4:6.

MAOLAHAY KO COYOH TO TAMDAMDAW

8. (1) Mikitini i Luka 15:10, samaanay mahapinang ita maolahay ko coyoh to tamdaw? (2) Samaanay padama ko coyoh kitaanan a mitosil? (Nenegnengen ko coka.)

⁸ Tangongolay ko olah no coyoh to tamdamdaw, ciharatengayho cangra to tamdaw. Mihaenay ano pasasiyor ko cecay mararaway a tamdaw, soˈlin o makalioratay a siri patikolayto tayni ci Yihofaan, anca cowaho ka fanaˈ ci Yihofaan a tamdaw, mafalic ko kaˈorip micada to soˈlinay kimad, tada mahemekay ko coyoh maemin. (ˈOsien ko Luka 15:10.) Roma i, tawlikay ko coyoh mirienang to mitosilay a demak. (Paˈarawan 14:6) Cowa ka pasayra cangra i tamdaw a mitosil, kawra mikayatan nangra kita alatek, makilim ko sakafanaˈaw ci Yihofaan a tamdaw. Nikawrira, polong sakafanaˈaw to Fangcalay Cudad a tamdaw, o mikayatan no coyoh koni, aka haenen ko harateng, samanen alatek pakaynian ni Yihofa i roma pakayraan padama kita, tinakoen, tano fangcalay saocor Ningra a mikayat kita. (Dmak 16:6, 7) Kawra, maceriday ci Yihofa miocor to coyoh padama kitaanan mitosil. Ano mitenak kita to ngaˈayay lihaf i, wa pakasoˈlinen ikatihiay ita ko coyoh midama kitaanan. —Nengnengen ko sapatongal lalakaw “Pacaˈofan ni Yihofa ko Satolon Nangra.”b

9. Sasamaan kita mitodong to taˈarawan no coyoh paihkal to olah i tamdaw?

⁹ Sasamaan kita mitodong to taˈarawan no coyoh paihkal to olah i tamdaw? Ano tahatengil to salasil ira ko patatikolay a tamdaw i kasakopang, wa pahecad kita to coyoh, nai falocoˈ a mahemek micada cangranan. Wa ngaˈay litemohen ita cingra, ho pakasoˈlin cingra to maolahay kita cingranan. (Luka 15:4-7; 2 Korinto 2:6-8) Ngaˈayay todongen ita ko coyoh misongilaˈ misaˈicel a mitosil. (Patnakay 11:6) O roma i, mahecad to pidama no coyoh kitanan mitenak to ngaˈayay lihaf, wa ngaˈayho kita miharateng sasamaan a midama to salikaka a mitosil. Tinakoen, tahidangen ita ko awaayho ko milifetan a salikaka malacafay a mitosil, padamaenho ko matoˈasay ato malonayay ko tireng a salikaka, ho ngaˈay cangra mirienang to mitosilay a demak.

10. Mikitini i nalifetan ni Sara, o manan ko mananamay ita?

¹⁰ Ano pakayni roma a lalangian citolasay ko demak ita ci Yihofaan, samaanto hani? Wa ngaˈay kita misaˈicel malacafay to coyoh a mitosil. Nengnengen ita ko tinakoan ni Sara,c naitiniay i Intiya a fafahiyan a salikaka. Malo miceriday misakafahay maedeng 20 miheca, ikor pakidemay ko adada ningra, cowato ka lomowad i kafotiˈan. Matoleday cingra to hatiniay noka samoˈ ningra. Ikor macadaay ni Sara ko sapadama no salikaka, miceriday cingra mikingkiw to Fangcalay Cudad. Palidlid sanayto a talifak ko falocoˈ ningra. Sapiremoaw toniya pakayraan, wa misalof cingra ngaˈ. Samanen cowa ka ngaˈay cingra patikami, edengan patingwaay cingra a mitosil. Mansa patingwaen ningra ko lalisoˈen no niyah, ora milisoˈan i, misiwkayho to roma a maolahay to kimad a tamdaw. Telocto i? Cato ka pina a folad, 70 ko patirengan ni Sara a pakingkiwan. Cowa ka kiyamaw cingra midimokos to pakingkiwan, mansa mitahidangan ningra ko roma salikaka pakingkiw cangranan. Nohatini, ˈalomanay ko mirienangay to saˈopo a pakingkiwan. ˈAlomanay ko salikaka mahecaday ci Saraan, misarocod a mitosil, o coyoh malacafayay toniya tawlikay a salikaka a matayal, tada o kahemekan konini!

PADADOTOCAY KO COYOH A MIHADIDI

11. Madimadiay a coyoh, samaanay patireng to mihadidiay a taˈarawan?

¹¹ Itini pihadidi i, madimadiay a coyoh tada ngaˈayay a taˈarawan. Itini pina caˈol a mihecaan, mihadidiay cangra to cowa ka sadafdaf ato mariˈangay a demak. Maˈaraway nangra ci Satan atoya na malacafayay matayal a coyoh, sahtoay mitowakangay ci Yihofaan. (Satapangan 3:1; 6:1, 2; Yuta 6) Na masowalay no Fangcalay Cudad, iraay ko cecay madimadiay a coyoh, macongeday no kaloykoy cingra, pinaay a romiˈad a makarisangaˈ. (Taniil 10:13) O roma i, maˈaraway no coyoh, nai nolitengan tahanini, mimingayho a ˈopo a tamdaw ko midamaay to matatodongay noka pidoko. Soˈlin mahaen, oniya madimadiay a coyoh padadotocay mahemek a midoko ci Yihofaan, halo fanekfek a tawlik, samanen mafanaˈay cangra, ano maraodto ko toki i, wa palahdawen no Kawas ko cowa ka sadafdaf a demak.

12. O manan ko papadama kitaanan padadotoc a mihadidi?

¹² Samaanen ita mitodong ko coyoh padadotoc a mihadidi hani? Mahecad kita to coyoh, alatek wa maˈaraw ko cowa ka sadafdaf a demak, kawra pakasoˈlin kita itini matatodongay a toki, wa palahdawen no Kawas ko kihcod a mariˈangay tamdaw ato demak. Mansa, todongen ita ko madimadiay a coyoh, cowa ko ‘sapisawadaw to makapahay a demak’ kita. (Kalatiya 6:9) Mikiˈokay ko Kawas wa padamaen Ningra kita a mihadidi. (1 Korinto 10:13) Cangacangen ita ko fangcalay saocor ni Yihofa, ho ngangaˈay kita mahemek a mihadidi. (Kalatiya 5:22; Kolosay 1:11) Nohatini ano tahasiˈayaw kiso to saroero i, sarocoden a pakasoˈlin mitiˈer ci Yihofa, hamaan a calemcem. Papadamaen ni Yihofa kiso a tanoktok ko pakasoˈlinay falocoˈ.—Hipray 13:6.

PADAMAAY KO COYOH MIKORAC TO KASAKOPANG

13. Itini salikorayto a lintad, o manan ko mikiriwiˈay a ˈinorong no coyoh? (Matay 13:47-49)

¹³ Itini salikorayto a lintad, pafelian ni Yihofa ko coyoh to mikiriwiˈay a ˈinorong. (ˈOsien ko Matay 13:47-49.) Mitosilay a tayal, misolotay to masacaˈolay masaefanay a tamdaw, o roma tamdaw makahiay a misalof to niyah, midofdof to palinian ni Yihofa a maˈorip, kawra o roma tamdaw cowa ka pihaen to demak. O ˈinorong no coyoh i, ‘pafafidaˈ to moecelay ato mariˈangay a tamdaw.’ Mihaenay i, iraay ko ˈinorong nangra midipot to sakakoracaw no kasakopang. Soˈlin, o roma tamdaw pakayniay i roma lalangian, cowato ka picawmaˈ to Misawacayay Tamdaw ni Yihofa, kawra wa ngaˈayho cangra a patatikol. Soˈlin ira ko sapadama no coyoh, iraay aca mifekad ko pasangar i kasakopang. Kawra oha papakasoˈlinen ita, o coyoh maemin misaˈicelay a matayal, padama to sakakoracaw no kasakopang.

14-15. Samaanen ita mitodong ko taˈarawan no coyoh, mitawmec to sakakoracaw no kasakopang? (Nengnengen ko coka.)

¹⁴ Misamaan kita mitodong to taˈarawan no coyoh, mitawmec to sakakoracaw no kasakopang hani? Saˈicelen ita midipot ko kalalaˈed no niyah aci Yihofa, ho itini i masakenakenaay a pakayraan mitawmec to makoracay. Sakalaˈosiaw konini a demak i, piliˈen ita ko maolahay ci Yihofaan a tamdaw malawidang, liyasenho ko mararaway harateng no hekal. (ˈOlic 101:3) O roma i, wa ngaˈay kita padama to salikaka padadotoc a madimadi ci Yihofaan. Tinakoen, ano mahapinang ita ko cecay Krisciyang pakidem ko raraw i, samaanen ita ko demak hani? Pairaen ita ko maolahay falocoˈ a patalipaˈelal cingranan mikilim to malohemay malitengay. Ano caka kahi cingra i, wa fanaˈen ita ko malohemay malitengay to mafekaday a demak. Makalimay kita toya mararaway Krisciyang kahnay macada ko sapadama.—Yakop 5:14, 15.

¹⁵ Kaadayayan i, o roma pakidemto ko raraw a tamdaw, mapadeng ko ngangan nai kasakopang. Ano mahaenay i, cowato ka cawmaˈen ita cangra.d (1 Korinto 5:9-13) Ora mapadeng ko ngangan a limasmas, oha mamakorac ko kasakopang. O roma i, cowato ka micawmaˈ to mapadengay ko ngangan nai kasakopan a tamdaw, o sakaciepoc nangra koni, alatek hongaˈay cangra pasasiyor a patikol. Ano nai falocoˈ cangra a pasasiyor i, wa malacafayto kita ci Yihofaan ato coyoh a mahemek.—Luka 15:7.

16. Misamaan kiso mitodong to taˈarawan no coyoh?

¹⁶ Pakafanaˈan ni Yihofa kita to coyoh, halo malacafay cangranan a matayal, tada o kalikoan ita koni! Nanay todongen ita ko taˈarawan no coyoh, paihkal to misapoeneray, maolah to tao ato padadotoc a mihadidi, pakayni i waywayan ato pidokoan misaˈicel a mitawmec to sakakoracaw no kasakopang. Ano mihaen kita i, wa pahecad to madimadiay a coyoh, itini taˈangayay a paro no lomaˈ ni Yihofa midoko Cingranan tahadaˈoc!