Unaan̄-Ejit Irọ Ibe Ekpan̄ Ene

Eyi Adam mè Îfu enan̄abe me uko Iden, ema ekakaan̄ owuwa nsabọn. Adasi gwun̄ kiban̄ Ken ire ogwu okiwop uko, òso gwun̄ iba kiban̄ Eben ire ogwu okikpukpo arọọn̄.

Usen ge, Ken mè Eben egwagwa ngwugwa inyi Jioba. Ire oriọọn̄ mkpọ ngwugwa orebe ni? Ire inyinyi osisibi esese. Jioba ibele ejit me lek ngwugwa kè Eben, ire, ikabele ejit me lek eyi Ken. Eya irọ ibe Ken inaan̄ ejit. Jioba otataba Ken ubọk me utọn̄ ibe ke unaan̄-ejit kan̄ mokọt irọ ibe irọ ijo inu. Ire, Ken ikagban̄.

Kpan̄asi ikeya, Ken otutumu inyi Eben ibe: ‘Na gọọk emi si uko.’ Me mgbọ ema gaalek ekupbe me uko ya, Ken ojeje inin̄ lek ogwu ngwan̄ mè ibọn̄ ikpan̄. Keke ke Jioba oborọ Ken? Jioba isut Ken osusut sa me iraria ọmọ isi ere ojojọn̄ọ ere ida ibọkọ me lek ebi ototun̄ ukan̄ kan̄. Ken ikpoboyaka ika.

Ire ikaan̄ inu eji ebekọt ikween̄ ni? Eji mekọt ibene ikinaan̄ ejit ire mkpọ ikakije ike eji eweekbe. Ire eji imun̄ ibe ke ejit ibene ikinaan̄ eji​—mè iyaka ire, ire ebi ofifi ife itaba eji ubọk me utọn̄ bak lek emun̄be ibe ke eji mekinaan̄ ejit​—eji megwat lek irọ unwene inyi unaan̄-ejit ya ikabieen̄ eji ibe erọ ijo inu.

Bak me lek Eben omabe Jioba mè irọ inu otatat, Jioba mokeek ọmọ. Awaji mojomo Eben inu me ugwem me mgbọ iborọ ibe inyọn̄ ijọn̄ yi ikana paradais.