Keek Inu Orọrọ Nwa kè Lọt

Lọt igọọk Ebereyam ngwan̄ ogwu ute iluk me lek ijọn̄ Kenan. Ike mgbọ okije, Ebereyam mè Lọt ekakaan̄ anam iwa enenen, ire lek ere ya ikayaka ita ema. Ebereyam otutumu inyi Lọt ibe: ‘Eji kpebeyaka ikọt ikigbaan̄ iluk me ere ge. Soso gobo agan̄ oboma isisi iluk, ke emi masi ofifi agan̄.’ Ebereyam ikaweek ulọk eyi lek kan̄ gaalek, ire ikare ikeya ni?

Lọt ikpọ mè igobo ijọn̄ ojajaan̄ enenen eyi okukup iriak lek ama ile Sodọm, mè isa ebi ototun̄ ukan̄ kan̄ ifo ere ya. Lek ijọn̄ ya ikaan̄ owuwa mun̄ mè mbubet.

Ebi Sodọm mè ebi ama ile ge okukup iriak ekigwen Gomora ire ebi ikirọ ijo inu enenen. Me atikọ, ema mirọ ijo inu enenen, ire lek Jioba osibibe ifieek ifafiat ama ile cha. Awaji iweek inyanyan̄a Lọt mè ebi ototun̄ ukan̄ kan̄, eya orọ, iraria ebi osat iba kan̄ ibe esi elook ema. Ebi osat cha etutumu inyi Lọt mè ebi ototun̄ ukan̄ kan̄ ibe: ‘Igwat lek inan̄a isibi! Jioba monifiat ama yi.’

Ire, Lọt ikanan̄a isibi mgbọ yaage. Ikpọkpọk ikikukubọ. Eya orọ, ebi osat cha etetet ubọk Lọt mè ogwu nwa mè nsabọn ebibaan̄ iba kiban̄, mè itaba ema isibi me ama ya mè itumu ibe: ‘Ilibi ekot ugwem kinyi mè ikakọọn̄ chieen̄ ikpọ udun̄. Ire enyi ikpọ udun̄, enyi mekwaan̄!’

Mgbọ ema elibibe ire ama ile ge ekigwen Sowari, Jioba orọrọ ibe ukan̄ ikirep kubọk ibot igwook me Sodọm mè Gomora. Ifiat ama ile iba cha isan̄a kpai. Mgbọ nwa kè Lọt okpakabe ibot inyi Jioba mè iyaka chieen̄ ikpọ udun̄, ikakana èdọ uchi mgbọ yaage. Ire, Lọt mè nsabọn ebibaan̄ iba kan̄ minyan̄a ugwem kiban̄ mije esikibe ibot inyi Jioba. Ema mira ifieek ejit ibe ke nwa Lọt ikpaka ibot inyi Jioba. Ire, ema mibele ejit ibe ke ema misiki ibot igọọk ntọ-ubọk Jioba.