Jioba Irọ Ibe Samsin Ikaan̄ Unye

Owuwa ebi Ijeren mikpọk iyaka ikitọbọ ibot inyi mkpọ ekọkọ, eya orọ, Jioba otetele ibe ebi Filisia ekekpulu ama kiban̄. Ire, ikaan̄ usini ebi Ijeren imama Jioba. Ge me lek kiban̄ ire Manowa. Ọmọ mè ogwu nwa kpekaan̄ gwun̄. Usen ge, Jioba oraria ogwu osat ge isi lek nwa kè Manowa. Ogwu osat ya otutumu inyi ọmọ ibe: ‘Owu mokaan̄ gwun̄ enerieen̄. Gwun̄ ya obosan̄a ebi Ijeren me ubọk ebi Filisia. Gwun̄ ya ibore gwun̄ obokup me inyan̄a-ibot eyi isusun̄ lek esese inyi Awaji mè iyaka ire Nazirite.’ Ire oriọọn̄ ebi ekigwen ikeya ni? Ema ire ebi usun̄ Jioba ikup okpọkpọ. Ema kpekisọp ijeek me ibot kiban̄.

Ike mgbọ ojebe, nwa Manowa omaman gwun̄ enerieen̄ mè igwen gwun̄ ya Samsin. Mgbọ gwun̄ ya ominbe, Jioba orọrọ ibe ikaan̄ unye. Samsin inye lek enenen ire lek ikọtbe isa ubọk ikike ikpan̄ egbe atat. Me mgbọ ge, Samsin gaalek ikpan̄ akọp ebirieen̄ ita me lek ebi Filisia. Ebi Filisia echacha Samsin enenen mè ikiweek ubọk ebekpan̄ ọmọ. Ema esisi otunchit ama Gaja me eririeen̄ ge mgbọ Samsin okilaak me ere ya mè ikup ikikpọ inyi mekpan̄be ọmọ me ewelegwe. Ire, me ejit eririeen̄, Samsin onanan̄a ikeke me ilaak mè ije isi lek otunchit ama ya, mè ijibi otunchit ya mè iben itoon̄ me inyọn̄ oguga isa ije inene inyọn̄ ogoon̄ okibene chieen̄ ikpọ Eburọn.

Ike mgbọ ojebe, ebi Filisia esisi lek Dilaila ogwu enenwaan̄ Samsin obodo mè itumu inyi ibe: ‘Eji menyi owu owuwa ikpoko alata okuket ire oweek iriọọn̄ inu orọrọ Samsin okaan̄be unye. Eji ekiweek itetet ọmọ itap me mkpọn.’ Bak lek Dilaila oweekbe ikakaan̄ ikpoko, ichechieek. Me adasi mgbọ, Samsin ikachieek itutumu inyi Dilaila inu orọrọ ọmọ okaan̄be unye. Ire, Dilaila isisaak Samsin ire lek Samsin otumube inu orọrọ ọmọ okaan̄be unye enenen. Samsin itumu inyi Dilaila ibe: ‘Kperarak isọp emi ijeek me ibot mije, emi nkup me inyan̄a-ibot eyi isusun̄ lek esese inyi Awaji. Ire esọp ijeek n̄a, mkpabayaka ikaan̄ unye.’ Samsin irọ inu olọlọ sa me itutumu ikọ ya inyi Dilaila, ire ikare ikeya ni?

Mgbọ yaage, Dilaila osisi itumu inyi ebi Filisia ibe: ‘Nriọọn̄ inu orọrọ Samsin okaan̄be unye!’ Dilaila orọrọ ibe Samsin ilaak me inyọn̄ ukot kan̄ mè ibe me ofifi ene isọp ijeek okup me ibot kan̄. Dilaila otataan̄ ukpo ibe: ‘Samsin, ebi Filisia minu-o!’ Samsin onanan̄a ikeke jip, ire, ikayaka ikaan̄ unye. Ebi Filisia etetet ọmọ mè irọkọ ọmọ chieen̄ isan̄a me ibot mè isa ọmọ isi itap me uwu mkpọn.

Usen ge, obop obop ebi Filisia etititiin̄ me uwu awaji kiban̄ ekigwen Dagọn, mè ikitaan̄ ukpo itumu ibe: ‘Awaji kiji iyaka Samsin itap eji me ubọk! Isan̄a Samsin isibi inu, inyi eji esa ọmọ echak imọm.’ Etetet Samsin isi ito me etete atà iba okup me eden̄ uwu ya, ema ekekisa ọmọ irọ mkpọ ochak. Samsin otataan̄ ukpo ibeek Jioba ibe: ‘Jei Jioba, soso kpọk nyi emi unye.’ Ike mgbọ keyi, ijeek okup me ibot Samsin iyaka ikpọk itibi. Isasa otutuuk unye kan̄ ibieen̄ atà uwu ya. Uwu ya ogbugbugbọ mè ikpan̄ otutuuk ebi itititiin̄ me uwu ya mè ikpan̄ Samsin si.