Inu Obọbọkọ Irek me Inyọn̄ Ogoon̄ Kamen

Owuwa ebi ubọọn̄ ikpukpulu akọp otoko me Ijeren mirọ ijo inu, ire, Eyabu ire ge me lek ebi ijo inu kiban̄ osakbe ichit. Eyabu ido ogwu enenwaan̄ mkpikpak okitọbọ ebum inyi Baali. Erieen̄ ogwu enenwaan̄ ya ire Jeseben. Eyabu mè Jeseben mirọ inyi owuwa ene etọbọ ebum enyi Baali mè ikpan̄ ebi nriran Jioba. Keke ke Jioba orọ? Iria ogwu nriran Ilaija ibe isi ilook Eyabu etip ge.

Ilaija itumu inyi ogwu ubọọn̄ Eyabu ibe ke ibot ikpoborep me Ijeren bak lek ijo inu ikebirọ. Me atikọ, ibot ikarep, inorie si ikatibi inyi ebi Ijeren me mkpọ oraraka acha ita. Jioba okpọkpọk iria Ilaija isi lek Eyabu. Eyabu otutumu inyi ọmọ ibe: ‘Ire owu okitap ufialek me Ijeren! Owu orọ ibe ibot ikarep.’ Ilaija ofọfọọk ọmọ ibe: ‘Ikare emi ntap ufialek me Ijeren. Ire owu otap ufialek me Ijeren mije okiriaak Baali. Eji enekpọ-nu ogwu orere ata Awaji. Tumu nyi otutuuk ebi Ijeren mè ebi nriran Baali ibe etitiin̄ me inyọn̄ ogoon̄ Kamen.’

Ebi ene etititiin̄ me inyọn̄ ogoon̄ ya. Ilaija otutumu ibe: ‘Ikayaka ikaan̄ ejit iba ofolek ogwu enyi eberiaak. Ire Jioba ore ata Awaji, iriaak ọmọ, ire, ire Baali ore ata Awaji, iriaak ọmọ. Inyi emi eriembuuk ge mè inyi si efit ebi nriran Baali ini mè akọp go eriembuuk ge. Eji mekpan̄ eriembuuk cha mè itoon̄ me inyọn̄ iye, ire, eji kpetap ukan̄ me lek. Emi magwen Jioba, ema megwen awaji kiban̄. Awaji geelek oraria ukan̄ itap me lek ngwugwa, ọmọ ore Awaji me atikọ.’ Otutuuk ene echechieek ibe erọ ikeya.

Ebi nriran Baali enenikpan̄ eriembuuk eyi kiban̄ mè itaan̄ ukpo ikigwen awaji kiban̄ ibene me ewelegwe mege ire ejit ikarek ikibe: ‘Jei Baali, na chieek ogwen kiji!’ Ire, kpenọ ida geege. Ilaija okekirọ Baali mkpọ ochak mè ikitumu ibe: ‘Ibene ida itaan̄ ukpo igwen ọmọ. Mokọt ire ibe ikilalaak, inye lek itimi ọmọ.’ Ebi nriran Baali migwen Baali mege ire ikakwun̄, ire, kpekaan̄ ufọọk-otu geege.

Ilaija onenito ngwugwa eyi kan̄ me inyọn̄ ntook mè igwook mun̄ me lek. Inenibeek uriaak itumu ibe: ‘Jei Jioba, nọ emi ida, mè fọọk emi otu, inyi ife chi eriọọn̄ ibe ke owu Jioba ore ata Awaji.’ Mgbọ yaage, Jioba oraria ukan̄ inan̄a me emen inyọn̄ igwook me lek ngwugwa ya. Ebi ene ebebene ikitumu ibe: ‘Jioba ore ata Awaji!’ Iliaja otutumu ibe: ‘Itet ebi nriran Baali cha, ikatele ene geege me lek kiban̄ inwọnọ!’ Me usen ya, ekpakpan̄ otutuuk ebi nriran Baali isan̄a.

Mgbọ emun̄be sọntiik oduku inyọn̄ osip ikup kubọk akajit ubọk ene okinan̄a isibi me agan̄ emen okwaan̄ ile, Iliaja otutumu inyi Eyabu ibe: ‘Gwat lek nin̄ uji akọn̄ kwun̄ mè libi fo mije unye efet okinu.’ Isinyọn̄ oduduku ichit, oduku inyọn̄ odudun̄ ere, unye efet ojijibi, me ota kan̄, unye otu ibot obebene ikirep. Eyabu oninin̄ uji akọn̄ kan̄ mè ikọp ugwat ugwat ikifo. Ire, Ilaija olilibi iraka uji akọn̄ Eyabu me oniin̄ sa me ntap-ubọk Jioba! Ire, ire ufialek Ilaija ita ni? Kè eji ekween̄ egbaalek-nu.