Gwun̄ Ogwu Nwakpa Ge Ikpọk Iluk Ugwem

Me mgbọ una ibot ya, Jioba otutumu inyi Ilaija ibe: ‘Je fo Jerefat. Nwakpa ge okup me ama ya monyi owu inorie.’ Mgbọ Ilaija orebe otunchit ama ya, imumun̄ nwakpa ge okititiin̄ iye. Itutumu inyi ogwu enenwaan̄ ya ibe iche sọntiik mudim inyi ọmọ inwọ. Ike ogwu enenwaan̄ ya okije ibosi isa mudim ya inu, Ilaija ogwegwen ogwu enenwaan̄ ya mè itumu inyi ọmọ ibe: ‘Nye lek che sọn̄ okpọkọ fituru gbaalek nyi emi.’ Ire, ogwu enenwaan̄ ya ofọfọọk ibe: ‘Nkakaan̄ fituru geege mbanyi owu, ilọ me lek ubọk akpa ekọkọk ge okup me emen ogbokot, melek sọn̄ aran̄ okup me emen iko mbasa irọ sọntiik inorie eyi emi mè gwun̄ n̄a enerieen̄ meriebe.’ Ilaija otutumu inyi ọmọ ibe: ‘Jioba ichieek use ibe ke ire orọ sọn̄ okpukpuk unin̄i fituru ge isa ijet emi, akpa ekọkọk ikpota me emen ogbokot kwun̄, aran̄ ikponan me emen iko aran̄ mege ire usen ibot obokpọk irep igwook me ijọn̄.’

Ogwu enenwaan̄ ya ofofo uwu kan̄ mè isi irọ fituru inyi ogwu nriran Jioba. Ike Jioba ochieekbe me use, ogwu enenwaan̄ ya mè ogwu gwun̄ kpenan inorie ema eberie me okike mgbọ una ibot ya. Akpa ekọkọk mè aran̄ kiban̄ ikata.

Inu ge osasak obọbọkọ irek. Gwun̄ ogwu nwakpa ya onenifiak orukan̄ onyenye enenen mè ikwu. Ogwu enenwaan̄ ya obebeek Ilaija ibe itap ubọk inyi ọmọ. Ilaija obọbọkọ gwun̄ ya me ubọk ogwu uga mè isa ije inene isi uwu agan̄ inyọn̄ ere ikiluk, mè iben imaan̄ me inyọn̄ mkpilaak kan̄ mè ibeek uriaak ibe: ‘Jei, Jioba tele mè ugwem iyaka ikpọk inin̄ emen gwun̄ enerieen̄ yi.’ Ire oriọọn̄ mkpọ orọrọ inu yi Ilaija okido okup uyeke uyeke ni? Ire bak lek ibe ke ene geege ikawuwuuk lek ijomo me mkpa sabum mgbọ keyi. Ogwu nwakpa ya mè ogwu gwun̄ kpere ebi Ijeren si.

Gwun̄ enerieen̄ ya ikpọk iluk ugwem mè ibene ikifuk efuuk! Ilaija otutumu inyi ogwu nwakpa ya ibe: ‘Kpọ, gwun̄ kwun̄ me ogat ugwem!’ Ogwu enenwaan̄ ya obebele ejit enenen mè itumu inyi Ilaija ibe: ‘Mgbọ keyi ke nriọọn̄ ibe ke owu ire ogwu ikwaan̄ Awaji, ke ikọ Jioba okitumu inan̄a me otu kwun̄ ire atikọ.’