Ikpa Akpalek Okikpọ Ntitiin̄ Ogebe

“Ire enyi ere ebi mekijeen̄ ebi ofifi ife inu.” (Iburu. 5:12) Kpọ-nu! Jioba—ogwu orọriọọn̄ Ijeen̄ inu ichit me otutuuk linyọn̄ yi—oyaka ibe me eji ekejeen̄ ebi ufi ife mkpọ ofolek kan̄! Ikwaan̄ geelek ore ijejeen̄ atikọ ofolek kè Jioba—me ototun̄ ukan̄, me emen ntitiin̄, miya ire me ikwaan̄ uko—ire irek omimin mè ire si ikwaan̄ omimin. Kpa-ubọk ke eji ebekọt irọ ni?

Ufọọk-otu ikup me emen usem ogwu ikwaan̄ Pọọlu ogebe ijet Timoti: “Sa mgbọ kwun̄ mè efuuk kwun̄ kifuk ikpa Mbuban nyi ebi ene, mè kitumu ikọ Awaji, mè kijeen̄ si ikọ Awaji.” Pọọlu obebe si: “Ire okirọ ifo isi, Awaji môsa me ikeya inyan̄a owu, mè inyan̄a si ebi geelek igbagban̄ ikọ kwun̄.” (1 Tim. 4:13, 16) Ire etip isasa inyan̄a ugwem ke okilook. Omọrọ igbebe ibe otap efuuk ifuna ubọk ifuk mkpọ mè ijeen̄ mkpọ kwun̄ inwọn. Broshọ yi eneen̄be motap ubọk inyi owu okọt orọ eyi. Kpọ-nu usini inu okup me emen ikpa yi.

Ere Baibul egebe me isi ikpa ge ge mokọt ire onineen̄ Baibul okakaan̄ mgbaan̄ me lek inu nkween̄ ya miya ire ubọk esabe inu nkween̄ ya isa irọ inu.

Jioba ore “Ogwu Ijejeen̄ Omimin Ichit.” (Asaya. 30:20) Eyi broshọ yi obotap ubọk irọ me okọt okofuk mè okojeen̄ inu ojaan̄, kawuuk ibe ke etip kiji inan̄a me ubọk Jioba, ke ọmọ si okitaba ebi ene. (Jọn 6:44) Eya orọ, kiriaak uriaak mgbọ geelek kibeek ekwukwu mbuban. Kisa Usem Awaji rọ inu me mgbọ geelek. Kisa nkeek ebi ene si lek Jioba, ikare lek kwun̄. Sa mè rọ inyi ebi ikigban̄ owu ekaan̄ ima odọdọk me lek kan̄.

Egwen owu ibe onojeen̄ etip okukup me ufiak ichit enyibe ebilene. Eji michieek ibe ke eyi oyakabe lek imaan̄ “me lek unye Awaji onyibe,” ke omokọt irọ itet.—1 Pita. 4:11.

Ebi ijejeen̄ ogbo kinyi,

Akpalek Okikpọ Ntitiin̄ Ebi Ata-Ikọ Jioba