INU NKWEEN̄ 11

Uyok Uyok Ejit

Ebi Rom 12:11

ME MGBIDIM: Sa me uyok uyok ejit tumu inyi iriki ulọk mè itap ebi ikigban̄ owu efuuk me owot.

Chieek kè usem obotumu ya ire owu ejit. Eyi okibem lek inyinyi usem kwun̄, riọọn̄ ubọk keek oruru etip kwun̄ okaan̄be. Riọọn̄ ubọk kween̄ usem kwun̄ jaan̄ ifuna okotumu onan̄a me ejit kwun̄.
Kikeek ebi ibegban̄ owu. Kikeek ubọk inu obofuk miyaka ire ijeen̄ obosa isibi oruru inyi ebi ufi ife. Kikeek ubọk obosa inyi usem kwun̄ me oniin̄ eyi oborọ me ebi ikigban̄ owu utọn me lek eriọọn̄ ubọk enwọọn̄.
Tap ugwem me lek usem kwun̄ inyi ikawọ. Tumu me uyok uyok ejit. Sa ubọk irọ-inu kwun̄ mè ubọk okirọ akpalek kwun̄ sa jeen̄ nkeek kwun̄ sibi.

Mun̄ ibe ke okawuwọlọ nkeek ebi ikigban̄ owu sa me ikpọkpọk ikirọ mkpọ yaage kubọk ire ubọk irọ-inu kwun̄. Kè ubọk okisa akpalek igọọk usem kwun̄ itet mun̄. Jeen̄ uyok uyok ejit ogakge me mgbọ osikijeen̄ inu okukup ufiak mè ikitap ebi ikigban̄ owu efuuk me owot ibe esa erọ inu. Kamaan̄lek isa me uyok uyok ejit itumu otutuuk usem kwun̄ inyi ikata ebi ikigban̄ owu efuuk me owot.