Keke Orọ Awaji Onan̄abe Lek Ijo Inu mè Ofara?

1. Ike owa ke ijo inu osa ibene?

Ijo inu ibene me inyọn̄ ijọn̄ me mgbọ Setan okan̄be adasi ataak. Me ibebene, Setan ire ogwu osat ososo, ire, “ikakikeke inyi atikọ.” (Jọn 8:44) Ọmọ inikaan̄ ulọk me lek ntọbọ ebum okup inyi Awaji gaalek. Setan ikan̄ ataak inyi adasi enenwaan̄, Ìfu, mè ifiaan̄ Ìfu ibe isiki ibot inyi ọmọ kpan̄asi Awaji. Adam igọọk Ìfu ikpaka otu Awaji. Ntumu-mfieek Adam osa ofara mè mkpa inu.—Fuk Ibebene 3:1-6, 19.

Mgbọ Setan obe me Ìfu ikpaka otu Awaji, mgbọ ya ke ibene ikikeke ikeme unye nto-ikọ Awaji, miya ire irek kan̄ kubọk ogwu obebene ichit. Ogbogbo ebilene migọọk setan mè ijit Awaji kubọk Ogwu Mkpulu kiban̄. Omọrọ, Setan ikana “ogwu okikpulu linyọn̄ yi.”—Fuk Jọn 14:30; 1 Jọn 5:19.

2. Ire inu Awaji orombe ikaan̄ lọlọ me lek ni?

Otutuuk ikwaan̄ Awaji isoso ifuk. Ebilene mè ebi osat ikwaan̄ Awaji orombe mekọt isiki ibot inyi Awaji me oniin̄ ososo. (Ikan Oso Mgbọ Iba 32:4, 5) Awaji irom eji melek nkaan̄-lek isasa igobo irọrọ inu geelek mire ata sa ire ijo. Nkaan̄-lek yi ibook irek inyi eji isasa ijeen̄ ibe ke eji mima Awaji.—Fuk Jemis 1:13-15; 1 Jọn 5:3.

3. Keke orọ Awaji onan̄abe lek ofara ire cherekeyi?

Karake mkpaka ibot obọkọbe irek me uko Iden, ke Jioba onan̄a lek nkeke-nkeme unye nto-ikọ kan̄. Mije keke ni? Isasa ijeen̄ ibe ke kpunu mkpulu geege obonwọn inyi ebilene ire ikare mkpulu eyi kan̄. (Ogwu Etip 7:29; 8:9) Obop acha gweregwen iraka melek mfufuk bọn ebilene, usem ya ikpọk mbum. Mkpulu bọn ebilene ikakọt isan̄a akọn̄, mfiat ikan, ijo oyerebet, miya ire orukan̄.—Fuk Jerimaya 10:23; Ebi Rom 9:17.

Me ijeje ntikwo me lek mkpulu bọn ebilene, mkpulu eyi Awaji ikaan̄ oruru inyi ebi ibọbọkọ itap. (Asaya 48:17, 18) Sọnja mgbọ, Jioba mosa mkpulu eyi bọn ebilene inu me uyaka. Gaalek ebi igogobo ibe Awaji ikikpulu ema ebeluk me inyọn̄ ijọn̄.—Asaya 11:9; Fuk Danien 2:44.

Ikpọ fidio Why Does God Allow Suffering?

4. Ime Awaji ibook irek inyi eji erọ keke?

Setan ibe ke bọn ebilene ekitọbọ ebum inyi Jioba mije onwọn lek kiban̄ gaalek. Omoma ijejeen̄ ibe ke usem ya ire ataak ni? Omọkọt! Mkpulu Awaji ibook irek inyi eji ejeen̄ mire mkpulu Awaji ke eji ema sa ire eyi ebilene. Eji ekijeen̄ agan̄ eji egobobe sa me ike eji ekiluk.—Fuk Jobu 1:8-12; Urọk 27:11.

5. Ike owa ke eji ebekọt igobo Awaji kubọk Ogwu Mkpulu kiji ni?

Eji mekọt igobo Awaji kubọk ogwu mkpulu kiji sa me ikekikween̄ mè ikitọbọ ebum inyi ọmọ me otu oniin̄ otatat igọọk me lek Usem Awaji, orere Baibul. (Jọn 4:23) Eji mekọt ijit Setan kubọk ogwu mkpulu sa me isasan̄a lek me lek rumurumun̄ mkpulu mè akọn̄, kubọk Jisọs orọbe.—Fuk Jọn 17:14.

Mgbọ eji ejitbe eru barabat mè inu okisak ene unan melek Satan ikisa ebi unene kiji mè ebi ngwan kiji ikirọ me eji mkpọ ochak miya ire ikikeke ikeme eji. (Pita Eyi Adasi 4:3, 4) Eya orọ, ire eji ebegobo inyi lek kiji. Ire eji megobo ikekigbaan̄ ije me lek ebi imama Awaji ni? Ire eji mesiki ibot inyi ikan kan̄ ni? Ire eji irọ, eji ekijeen̄ ibe ke usem Setan otumube ibe ke kpunu ogwu obosiki ibot inyi Awaji me mgbọ oyọyọt, ire ataak.—Fuk Ebi Kọrint Eyi Adasi 6:9, 10; 15:33.

Ima Awaji okaan̄be me lek ebilene okibieen̄ inye ibe ke ijo inu mè ofara mota. Ebi ijejeen̄ ibe ke ema michieek me lek eyi menwọọn̄ ugwem ikakaan̄ge itata me inyọn̄ ijọn̄.—Fuk Jọn 3:16.